Mayo

Aka qhepa maranakanjja, jan walinak utjipanwa waljanejj markapat yaqha markanakar escapapjje. ¿Kunjamsa jupanakar yanaptʼsna? Parlapki uka arut arunttʼañwa yateqsna. Kunanakattï yatiñ munapkaspa ukanakwa arupat yateqaraksna. Ukhamatwa Internetan jw.org cheqan utjki uka videonaka, Bibliat apstʼat qellqatanak pachpa arupat uñachtʼaysna. Jehová Diosajja, Cristianjam Jakañataki ukat Yatiyañataki tantachäwi toqew jukʼamp sum yatiyañasatak yanaptʼistu. Ukan kunanaktï yateqktan uka ewjjtʼanakaw Bibliat yateqañ munapki ukanakaru jan ajjsartʼas kuttʼañatakisa, Bibliat yatichañatakis yanaptʼistu. Ukhamajj awk taykanakajja, pachpa arunakapampi arstʼapjjañapatakiw wawanakapar yatichapjjañapa, ukhamatwa jupanakajj mä qhanjam qhantapjjani. Wawanakajj tantachäwin taqe chuyma arstʼapjje ukhajja, jichhak jutapki ukanakajj kuntï yateqapki ukajj cheqätapwa amuyapjje (1 Cor. 14:25). w18.06 págs. 22, 23 párrs. 7-9

Nayrajja, taqeniw Diosat wali jayankayätanjja (Efes. 2:12). Ukampis Diosaw munasiñapampi Juparu jawskatasistu (Os. 11:4; Juan 6:44). Cristorakiw wali sum katoqtʼistu, Diosan familiapankañasatakis punku jistʼararaki. Niyakejjay Jesusajj juchararäkstan ukhas sum katoqchistojja, jiwasajj ukhamarakiw jan khitirus yaqhachañasäkiti. Akapacha niya tukusiñampïskipanjja, tʼaqanoqtañasa, yaqhachasiñasa, uñisisiñas jukʼampiw jiljjattani (Gál. 5:19-21; 2 Tim. 3:13). Ukampis Diosan servirinakapajj ‘alajjpachat jutki uka yatiñwa’ thaqtanjja, ukaw jan khitir yaqhachañataki, taqenimp sum apasiñatak yanaptʼistu (Sant. 3:17, 18). Yaqha markankirinakampi amigösasa, costumbrenakap jan jiskʼachasasa, parlapki uka aru yateqasas wali kusisitätanwa. Ukham lurtan ukhajja, sumankañajj ‘mä jawirar uñtataw jiljjatti’ cheqapar sarnaqañasti, “jachʼa qotan mathapinakapar uñtataw” jilararaki (Is. 48:17, 18). w18.06 pág. 12 párrs. 18, 19

Romano soldadojj janiw jan wiskhunejj guerrar sarkaspänti. Uka wiskhupajj lipʼichit luratänwa, kimsa capanïnwa, kayupatakjam luratarakïnwa. Ukaw jan usuchjasiñatakisa wali jayanak sarañatakis yanaptʼäna. Kunjamtï romano soldadonakarojj wiskhu uchasiñajj guerrar sarañatak yanaptʼkänjja, ukhamarakiw “sumankañ yatiyäwinaka” yatiyañajj yanaptʼistu, ukaw ‘kayunakasar wiskhumpi uskuntatäksnas’ ukhamajja (Is. 52:7; Rom. 10:15). Ukampis awisajja, jan ajjsartʼas predikañajj chʼamakïspawa. 20 marani Jaime jilatajj akham siwa: “Yateqer masinakajaru predikañ ajjsarayätwa, phenqʼasirakiyätwa, kunatjjay phenqʼaschiyäta uk janiw amuykti. Ukampis jichhajja, jupanakar yatiyasajj wali kusisitätwa” sasa. ‘Diosan arunakap yatiyañataki sum wakichtʼasiñajj jan ajjsaras parlañatakiw yanaptʼitu’ sasaw walja wayn tawaqonakajj sapjje. w18.05 pág. 29 párrs. 9-11

Jesusajja, akham sasaw apostolonakapar säna: “Nayan sumankañajwa churapjjsma” sasa (Juan 14:27). ¿Kunjamsa Jesusan sumankañapajj achunak achoqaskakiñatak yanaptʼistu? Jan qarjtas yatiytan ukhajj Jehová Diosampiru Jesusampiruw kusisiytanjja, uk yatiñajj chuymasan sumankañ utjañapatakiw yanaptʼistu (Sal. 149:4; Rom. 5:3, 4; Col. 3:15). “Jumanakan kusisiñamajj phoqatäspa ukwa munta” sasin Jesusajj apostolonakapar säna uka qhepatjja, kunatsa maynit maynikam munasipjjañapäna ukwa qhanañcharakïna (Juan 15:11-13). Ukatjja akham sarakïnwa: “Amigonaka sasin[wa] jumanakar sapjjsma” sasa. Jesusan amigopäñajj mä suma regalowa. ¿Kunsa apostolonakajj Jesusan amigopäskakiñatakejj lurapjjañapäna? Jan qarjtasaw ‘achunak achoqasipkakiñapäna’ (Juan 15:14-16). Pä maranak nayrajja, Jesusajj akham sasaw apostolonakapar säna: “Sarkasasti akham sasaw yatiyapjjäta: ‘Alajjpachankir Reinojj jakʼankjjewa’” sasa (Mat. 10:7). Jiwayapkäna uka arumasti, jan qarjtas yatiyapjjañapatakiw chʼamañchtʼäna (Mat. 24:13; Mar. 3:14). w18.05 págs. 20, 21 párrs. 15, 16

Wayn tawaqonaka, Jehová Diosar serviñ nayrar uchañataki, Jupar jukʼamp serviñatakiw chʼamachasipjjañama. Inas masinakamajj kusistʼañaru sapakuti sarapjjchi, jan ukajj invitapjjarakstam. Ukampis amtanakam phoqañajj jumatak kunja wakiskirisa uk mayninakajj amuyapjjaniwa. Inas jupanakajj jan walinak lurayañ munapjjchïtam ukampis amtanakam phoqañatakiw chʼamachasiñama. Masinakamatï jan walinak lurayañ munapjjeristam ukhajja, ¿kunsa lurasma? Kunanakatï jan walinakar purtʼaykiristam ukanakat amuyasiñamawa (Prov. 22:3). Jan walinak lurasajj kuna jan walinakansa uñjasisma ukanakatsa amuytʼañamarakiwa. Sapamakejj janiw jan walinakar atipjkasmati uksa amtañamarakiwa. Humilde chuymanïyäta ukhajja, awk taykamana, jilat kullakanakan ewjjtʼanakap taqe chuymaw istʼäta (1 Ped. 5:5, 6). ¿Jumajj ewjjtʼanakar istʼañatak humilde chuymanïtati? w18.04 págs. 28, 29 párrs. 14-16

Jesusajj Asia Menor cheqankir yaqhep congregacionanakarojj suma luratanakapatwa chʼamañchtʼäna. Sañäni, Tiatira markankir jilat kullakanakarojj akham sasaw parlañ qalltäna: “Nayajj luratanakamsa, munasirïtamsa, Diosar confiyatamsa, jupar servitamsa, aguantatamsa yattwa. Kunanaktï jichhajj lurkta ukanakajja, qalltan lurkayäta ukanakat sipansa jukʼamp waljawa” sasa (Apoc. 2:19). Jesusajj janiw ‘luratanakamajj jukʼampiwa’ sasakejj siskänti, jan ukasti, kunatsa ukham lurapjjäna ukwa amtayarakïna. Uka congregacionankir yaqhep cristianonakar cheqañchkchïnsa, chʼamañchtʼkir arunakampiw jupanakar parlañ qalltäna, tukuyarakïna (Apoc. 2:27, 28). Niyakejjay Jesusajj taqpach congregacionanakan pʼeqtʼiripächejja, jupanakjjar wali autoridadaniwa, ukhamajj janiw luratanakasat yuspärañapapunejj wakiskiti, ukhamäkchisa yuspärapunistuwa. Jilïr irpirinakajj jupatwa yateqasipjjaspa. w19.02 pág. 16 párr. 10

Nayrïr patak maranakanjja, Jehová Diosajj jilïr irpirinak toqew taqe cristianonakar chʼamañchtʼäna, congregación irpapkäna ukanakarus chʼamañchtʼarakïnwa. Sañäni, jilïr irpirinakajj jupanak taypinkiri Pedrompiru Juanampiruw khitapjjäna. Jupanakajj Samaria markankir cristianonakatakiw espíritu santo katoqapjjañapatak Diosar mayipjjañapäna (Hech. 8:5, 14-17). Uka yanaptʼajj walpun Felipe chacharusa cristianöjjapjjäna ukanakarus chʼamañchtʼpachäna. Jichhürunakanjja, ukhamarakiw Oraqpachan Jilïr Irpirinakajj Betelan trabajirinakarusa, sapürunjam Diosatak irnaqapki uka jilat kullakanakarusa, oraqpachankir cheqpach cristianonakarus chʼamañchtʼistu. Ukham chʼamañchtʼatäsajja, nayrïr patak maranakan jakir cristianonakjamarakiw kusistanjja. Oraqpachan Jilïr Irpirinakajja, Diosan markapat jitheqtatanakar kuttʼanipjjañapatak chʼamañchtʼañatakejj Jehová Diosajj kuttʼaniñamwa muni sat folletwa 2015 maran apsupjjäna. w18.04 pág. 19 párrs. 18-20

Sum jakasiñatakejja, ‘maynejj munañaparjamaw taqe kunsa lurañapa’ sasaw waljanejj amuyapjje. Ukampis munañasarjam taqe kuns lurañajja, mä ari cuchilljamaw jan walir purtʼayistaspa. Jaqenakatï munañaparjamak taqe kuns lurapjjaspa ukhajja, ¿jakäwisajj kunjamakïspasa? Uka toqetjja, The World Book Encyclopedia diccionariojj akham siwa: “Mayachtʼat organizacionanakan sapa maynin utjki uka leyinak phoqañajj chʼamawa, ukhamäkchisa uka leyinakajj jaqenakar jarkʼaqañatakiwa, ukatjja jan munañaparjam sarnaqapjjañapatak luratarakiwa” sasa. Cheqas ukarjam phoqañajj chʼamawa. Jaqenakan lurat leyinakajj waljaw utji, uka leyinak jaqenakar amuytʼayañatakisa, phoqayañatakisa, walja abogadonaka juezanakaw munasiraki. ¿Kunjamatsa uka ewjjtʼap phoqsna? Nayraqatajja, kuntï Jesusajj yatichkäna ukar istʼañasawa. Ukjjarusti, discipulopäñasarakiwa. Ukhamatakwa cheqpachapun libre jakasiñäni. Jesusajj akham saskakïnwa: “Taqe khititejj jucha lurki ukajja, juchan esclavopawa. [...] Yoqatï jumanakar libre jakasiñ churapjjätam ukhajja, cheqpachapuniw libre jakasipjjäta” sasa (Juan 8:34, 36). w18.04 págs. 6, 7 párrs. 13, 14

Jiwasat llakisipki ukanakampïñ wal muntanjja. Jupanakajja, kunanaksa amuytan, kunjamäsktansa uk amuyañatakiw chʼamachasipjje. Kuna yanaptʼsa muntan uk yatisajj jankʼakiw yanaptʼapjjarakistu. Awisajja, janïr yanaptʼap mayktan ukhaw yanaptʼapjjestu. Ukham sinttʼasirinakarojja, mä arunjja, ‘llakisirinakamp llakisirinakarojj’ wal munastanjja. Taqe cristianonakaw yaqhanakat sinttʼasiñ muntanjja. Ukampis awisajja, ukham jaqëñajj chʼamakïspawa, ¿kunatsa? Taqeniw pantjasirïtanjja, jiwasatak taqe kuns muniri chuymanirakïtanwa, ukatwa chʼamakïspa (Rom. 3:23). Yaqhepajja, yaqhanakat jan sinttʼasiri familianwa jilsuwayapjje, jan ukajj jan walinakan uñjasipjjatap laykuw sinttʼasirïñajj jupanakatak chʼamäspa. Maysa toqetjja, jaqe masipat sinttʼasiñat sipansa jupanak pachpa munasir jaqenak taypinwa jaktanjja (2 Tim. 3:1, 2). Ukampis Jehová Diosampita Jesucristo Yoqapampit yateqasiñaw jukʼamp sinttʼasirïñatak yanaptʼistani. w19.03 pág. 14 párrs. 1-3

Tunkïr mandamientorjamajja, yaqhankir wal munañajj janipuniw walïkänti (Deut. 5:21; Rom. 7:7). ¿Kunsa Diosajj uka mandamientomp yatichañ munäna? Servirinakapajj jan walinakatwa chuymap jarkʼaqapjjañapäna, mä arunjja, kunas chuymapan utjäna uka toqet wal amuyasipjjañapänwa. Jan walinak amuyañäni ukhajja, jan walinakwa lurarakiñäni, Diosajj uk sum yati. David reyit amtañäni, jupajj janiw jan wali jaqëkänti, ukampis mä kutejj casarat mä warmir wal munatapatwa juchar purtʼasïna (Sant. 1:14, 15). Uka warmimp adulterio jucha lurasajja, esposoparuw engañañ munäna, ukat guerran jiwayapjjañapatakiw mayirakïna (2 Sam. 11:2-4; 12:7-11). Jehová Diosajj uñnaqasak uñjañat sipansa, kunas chuymasan utji ukwa uñji (1 Sam. 16:7). Janiw kuna luratanaksa amuyunaksa Jupat imtʼksnati. Diosajj kunjamsa suma jaqëñatak chʼamachasisktan uk sum yati, ukarjamaw yanaptʼarakistu. Ukampis kuna jan wali amuyunakas chuymasan utji uk amuyasiñasa, ukat ukanak chuymasat apsuñaswa muni, ukaw juchar jan purtʼasiñatak yanaptʼistani (2 Crón. 16:9; Mat. 5:27-30). w19.02 pág. 21 párr. 9; pág. 22 párr. 11

Biblianjja, “Moisesajj cheqpachansa llampʼu chuymani jaqënwa akapachanjja” sasaw qhanañchi (Núm. 12:3). ¿Uka arunakajj jan chʼamani, pächasiri, ajjsariri jaqënwa sañti munpacha? Mä llampʼu chuymanejj ukhamawa sasaw waljanejj sapjjaspa. Ukampis Moisesajj janiw ukhamäkänti, jupajj chʼamani, jan pächasiri, jan ajjsariri ukham jaqënwa. Diosan yanaptʼapampejja, Egipto marka apnaqer reyimpejj jan ajjsartʼasaw parläna, mä kimsa millón jaqenakaruw wasaran pʼeqtʼäna, enemigonakapar atipjañatakiw israelitanakar yanaptʼarakïna. Jiwasajj janis Moisesjam jan walinakan uñjaskstanjja, sapüruw jan wali jaqenakarusa jan walinakarus saykattanjja, ukatwa llampʼu chuymanïñajj chʼamakïspa. Ukampis ¿kunatsa ukham chuymanïñatak chʼamachasiñasa? Jehová Diosajja, “llampʼu chuymaninakasti oraq katoqapjjani” sasaw sistu, ukatwa chʼamachasiñasa (Sal. 37:11). Akham jisktʼasiñäni: “¿Nayajj llampʼu chuyman jaqëtti? ¿Yaqhanakas ukham jaqewa sapjjaspati?” sasa. w19.02 pág. 8 párrs. 1, 2

Diosajja, jaqenakarojj concienciani lurawayistu. Adanampi Evampejj ukhamäpjjarakïnwa. Diosan leyipar jan istʼapkäna uka qhepatjja, concienciapajj juchañchänwa, ukatwa imantasipjjäna. Jan suma yatichat conciencianinakajja, lamar qotnam saraskir mä barcojj jan suma timonanïki ukamp sasispawa. Ukham jan suma timonani barcot sarasajj jan waliruw purtʼassna. Jachʼa thayasa oladanakas sartaspa ukhajja, jan suma timonanïtap laykojj maysaruw barcojj sarjjaspa. Ukampis barcon timonapatï suma cuidatächi ukhajja, kawknamtï sarañapäki uknam sarañatakiw barco apnaqerirojj yanaptʼaspa. Concienciasajj niya ukhamarakiwa, Bibliarjam sum yatichañäni ukhajja, kunatï walïki jan walïkaraki uk amuyañatakiw yanaptʼistani. Concienciasajj jan suma yatichatäki ukhajja, janiw kunatï jan walïki uk amuyañatak yanaptʼkistaspati (1 Tim. 4:1, 2). ‘Jan walïki ukajj walikïkaspas’ ukhamwa amuyayistaspa. w18.06 pág. 16 párrs. 1-3

Awisajja, akapachankir jaqenakan amuyunakapajj jan amuyañjamäspawa, ukanakat amuyasiñasawa, jarkʼaqasiñasarakiwa. Sañäni, mä yatiyäwejja, mä partido politicon amuyuparuw arjjataspa. Yaqhep yatiyäwinakajja, maynit parlasaw kuntï akapachan jikjjatapki ukar chʼamañchistaspa. Yaqhep peliculanakansa, libronakansa, jiwas pachpata, familiasat llakisiñaw taqe kunat sipansa nayrankañapa sasaw yatichapjje. Ukampis uka amuyunakajj janiw Biblian yatichäwiparjamäkiti. Antisas Bibliajja, Jehová Diosaru taqe kunat sipansa munasisaw familiasan kusisita jakassna sasaw qhanañchi (Mat. 22:36-39). Ukhamajj ¿janipunit kusistʼañajj wakisjjaspa? Cheqas suma kusistʼañanakampi kusistʼañajj walikïskiwa. Ukampis akanak jisktʼasiñasawa: “¿Akapachan amuyunakapajj jan amuykayäkchi ukhas amuyastti? ¿Kuntï wawanakajajj uñchʼukipki liyipki ukanakat jan walïki uk jarkʼaqtti? ¿Naya pachpas ukanakat cuidasiraktti? ¿Kuntï Jehová Diosajj amuyki ukanak wawanakajar yatichtti, ukhamat akapachan amuyupampi jan apayasipjjañapataki?” sasa. w18.11 pág. 22 párrs. 18, 19

¿Kunjamsa Diosajj jiwasampïskatap uñachtʼayistu? Jupajj wali munasiñampiw uñjistu, jiwasatsa llakisipuniwa, ukatwa akham sistu: “Jumajj wali jila alanïtawa, nayasti wal munassma” sasa (Is. 43:4). Jehová Diosajj servirinakapar munasipuniniwa, janiw kunäkipansa jaytanukkaniti (Is. 54:10). “Janiw kuna jan walinakansa uñjasipkätati” sasajj janiw Jehová Diosajj siskistuti. Ukampis jawirar uñtasita, jan ukajj ninar uñtasita jan waltʼäwinakampi wiñayatak tʼaqesiñas janiw permitkaniti. Ukatwa ‘nayaw jumampïskä’ sasin sistu. Jiwayañ munapkistani ukhasa, Diosaw jan ajjsarañatak yanaptʼistani, ukhamat Jupat jan jitheqtañataki (Is. 41:13; 43:2). Jiwasatï ‘nayaw jumampïskä’ sasin Diosajj siskistu ukar confiyañäni ukhajja, jan ajjsarasaw jan waltʼäwinak aguantañäni. w19.01 págs. 3, 4 párrs. 4-6

Jumatï waynästa jan ukajj tawaqöstajja, inas yatichirinakamasa, kuna profesionsa ajllisma uka toqet amuytʼayirinakasa jan ukajj yaqhanakas akham sasin chʼamañchapjjeristam: ‘Walja qollqe ganañatakejj mä suma profesionanïñamawa’ sasa. Ukampis Jehová Diosajja, janiw ukham lurañam munkiti. Antisas colegion sum yateqañam muni, ukhamat colegiot mistjjasajj ukampi yanaptʼasisa jakañamataki (Col. 3:23). Ukampis kunsa jakäwimampi luräta uk janïr amtkasajja, yatichäwiparjam lurañamatakiw Diosajj chʼamañchtam. Ukanakaw kunsa aka qhepa urunakan lurañam muni uk amuyañatak yanaptʼätam (Mat. 24:14). Kunas jutïrin pasani taqe ukanakjja, Jehová Diosajj sum yati, akapachan niya tukjatäñapsa yatirakiwa (Is. 46:10; Mat. 24:3, 36). Yamas Jupajj sumwa uñtʼistu. Kunanakas kusisiyistaspa, kunanakas janiraki ukanaksa yatirakiwa. Ukatwa kuntï jaqenakajj ewjjtʼapktam ukanakat yaqhepajj waljamäkchisa, jan Bibliarjamäkchi ukajj janiw walïkiti. w18.12 pág. 19 párrs. 1, 2

“Llampʼu chuymaninakasti oraq katoqapjjani, jilarkir sumankañampiw kusisipjjarakini”, “aski jaqenakajj oraq katoqapjjani, wiñayatakiw ukan jakapjjarakini” sasaw Diosan amuytʼayatäsajj Davidajj qellqäna (Sal. 37:11, 29; 2 Sam. 23:2). ¿Kunjamsa uka arunakajj Diosan servirinakapar yanaptʼäna? Jutïrinjja, Edén jardinar uñtasit mä Paraisow utjani, ukansti wiñayatakiw aski, jan ukajj suma jaqenakajj aka oraqen jakasipjjani sasin confiyañatakiw yanaptʼäna. Tiempompisti, Diosaruw servipjjta sapkäna uka israelitanakat jila partejj Dios contraw saytʼjjapjjäna. Ukatwa Jehová Diosajj babilonionakampi katuntayasin qʼal tukjayäna, waljaniw Babiloniar apatäpjjarakïna (2 Crón. 36:15-21; Jer. 4:22-27). Ukampis profetanakajja, israelitanakajj 70 mara qhepat markapar kuttʼanjjapjjaniwa sasaw qellqapjjäna. Uka profecianakajj nayra tiempon phoqasïnwa, ukampis jiwasaw jukʼamppach phoqasir uñjañäni. w18.12 pág. 4 párrs. 9, 10

¿Biblian ewjjtʼanakapati jan ukajj akapachankir jaqenakan ewjjtʼanakapach yanaptʼistaspa? Jesusajj akham sänwa: “Maynin yatiñanïtapajj luratanakapanwa uñjasi” sasa (Mat. 11:19). Akapachajj tecnología toqet nayrarus sartkchejja, kunanakatï llakisiykistu ukanak tukjañ janiw puedkiti, sañäni, guerranaksa, yaqhachasiñanaksa, lunthatasiñanaksa janiw tukjañ puedkiti. Yamas qʼañu jucha lurañajj walikïkaspasa ukhamwa amuyayi. Ukampis uka jan wali lurañajja, jukʼampiw familianakar jan waltʼayi, usunakampiw apantasipjje, yaqha jan walinakanwa uñjasipjje. Maysa toqetjja, Jehová Diosjam amuyir cristianonakajj kusisitaw familjam jakasipjje, qʼañu juchanak jan lurasajj usunakatsa jarkʼaqasipjjewa, aka oraqpachankir jilat kullakanakampis sum apasipjje (Is. 2:4; Hech. 10:34, 35; 1 Cor. 6:9-11). Ukhamajj Jehová Diosan amuyupajj akapachankir jaqenakan amuyupat sipan wali jilankiwa. w18.11 pág. 20 párrs. 8-10

Familiaranakasampi sum apasiñatakis chʼamachaskstanjja, janipuniw jupanakampi sum apasiñ laykojj Jehová Diosan leyinakap pʼakintañasäkiti. Jehová Diosar jan munasipki ukanakampejj janiw amigöñasäkiti. Kunatï cheqäki ukarjam sarnaqerinakajj qollanäpjjañapawa jan ukajj santöpjjañapawa (Is. 35:8; 1 Ped. 1:14-16). Bibliat yateqasajja, kuntï nayrajj lurkayätan uk taqeniw jaytawaytanjja. Yaqhepajj yamas jukʼamp cambionakwa jakäwipan lurawayapjje. Ukhamajj ukanak jaytjjasajja, janipuniw akapachankir qʼañu luräwinakapar kuttʼañasäkiti. ¿Kunas ukatak yanaptʼistaspa? Santöñasatakejj kuntï Diosajj jiwas layku churawayki uka toqetwa lupʼiñasa, Jupajj wali munat yoqapan jakäwipwa jiwas layku churawayi (1 Ped. 1:18, 19). Jehová Dios nayraqatan suma jaqet uñjatäñatakejja, Jesucriston jiwas layku jiwatapajj qhawqha valoranisa uk janipuniw armañasäkiti. w18.11 pág. 11 párrs. 10, 11

Jehová Diosar sapürunjam servipki ukanakat waljanejja, ‘Diosan arunakap yatiyañ nayrar uchañaw jan walinakan uñjasipkta ukhajj jan sinti llakisiñatak yanaptʼapjjetu’ sasaw sapjje. Jupanakat yateqasisin qhawqtï lurirjamäktan uk luraskakiñäni, Diosarus confiyaskakiñäni ukhajj janiw aynachtʼkañäniti. Yamas jakäwisajj akatjamat mayjtʼaspa ukhajja, Jehová Diosampi jukʼamp sum apasiñatakiw ukajj yanaptʼistaspa ukwa tiempompejj amuysna. Jakäwisajj akatjamatwa mayjtʼaspa. Sañäni, inas Diosan markapan yaqha luräwi katoqsna, usuntsna, jan ukajj familiasar uñjañaw wakisispa. Ukhamanakan uñjastan ukhajja, Jehová Diosajj wal yanaptʼañ munistu, cheqas horasaparuw yanaptʼistani (Heb. 4:16; 1 Ped. 5:6, 7). Ukañkamajja, kuntï lurirjamäktan uk luraskakiñäni. Alajjpachankir Awkisarus oración toqe jukʼamp jakʼachasiskakiñäni, ‘Jupaw yanaptʼaskistani’ sasin taqe chuyma confiyasipkakiñäni. Ukaw jakäwisajj akatjamat mayjtʼani ukhajj jan sinti llakisiñatak yanaptʼistani. w18.10 pág. 30 párr. 17; pág. 31 párrs. 19, 22

Nayrajj kunjamsa Diosajj servirinakapat khuyaptʼayasïna ukajj Biblian qellqatawa. Amuytʼañataki, 1 Samuel 3:1-18 qellqatarjamajja, Samuelojj mä yatiyäw jachʼa jilïr sacerdoter yatiyañapäkäna ukhajja, Jehová Diosajj munasiñat yanaptʼänwa. Moisesan Leyiparjamajja, wawanakajj jilïr jaqenakar respetapjjañapänwa, yamas ‘marka apnaqapki uka jilïrinakarojj’ jukʼampiw respetapjjañapäna (Éx. 22:28; Lev. 19:32). Ukhamajj Elí chachar mä jan wali yatiyäwi yatiyañajj Samuelutak chʼamakïpachänwa. Cheqas “Samuelojj ajjsararakïnwa kuntejj Tatitojj unañchäwin siskatayna ukanak Elí sacerdoteru yatiyañjja” sasaw Bibliajj qhanañchi. Ukampis Jehová Diosaw Samuelurojj jawsaskäna, ukjja Elí chachajj qhanwa amuyäna. Ukatwa Samuelur akham säna: ‘Tatitojj kunsa parlawaytam uk jan imtʼas taqpach yatiyita’ sasa. Jupasti, “kuntejj Tatitojj yatiykatayna ukanakjja jan kunsa imtʼasaw yatiyäna”, kunattejj uka nayrakiw niya ukham yatiyäwinak katoqäna (1 Sam. 2:27-36). Uka sarnaqäwejja, Jehová Diosajj wali yatiñanïtapa khuyaptʼayasirïtapwa yatichistu. w18.09 pág. 23 párr. 2; pág. 24 párrs. 4, 5

Jichhürunakanjja, waljaniw kʼarisiñ yatipjje. Wali uñtʼat mä revistajja, “kunatsa kʼaristan” sat mä yatichäwipan akham sänwa: “Kʼarisiñajj janis kuna juchäkaspa ukhamwa jaqenakajj amuyjjapjje” sasa. Jaqenakajj jarkʼaqasiñataki, jan wali luratanakap imtʼañataki, pantjasitanakap imtʼañataki, jan ukajj trabajon suma lugarankañataki, jilpach qollqe ganañatakiw kʼarisipjje. Ukatjja uka qellqatajj akham sarakïnwa: “Jaqenakajj jan uñtʼatanakarusa, trabajir masinakaparusa, amigonakaparusa, familiaranakaparus facilakiw kunayman kʼarisipjje” sasa. Ukham kʼarisipjjatapat ¿kuna jan walinakas utji? Maynit maynikam janiw confiyasjjapjjeti, ni sumsa apasjjapjjeti. Davidajj akham sasaw Jehová Diosar mayisïna: “Jumasti, Dios Tata, cheqa chuymaruw muntajja” sasa (Sal. 51:6, Aymar Biblia). David reyitakejja, kunas chuymasan utji ukaw jukʼamp wakiskirïna. Cheqa cristianonakajja, taqe horasanwa ‘maynit maynikamajj cheqa arunak parltanjja’ (Zac. 8:16). w18.10 pág. 7 párr. 4; pág. 8 párrs. 9, 10; pág. 10 párr. 19

Israelitanakajj 1513 antes de Cristo maran Egiptot mistjjapjjäna ukhajja, kimsa millonats jiläpjjpachänwa. Jupanak taypinjja, wawanaka, chuymankipstatanaka, usutanakaw utjpachäna, usurnukstatanakas utjarakpachänwa. Ukham walja jaqenakar pʼeqtʼañatakejj maynejj paciencianïñapänwa, munasirïñaparakïnwa. Jehová Diosajj ukham chuymanïtapwa Moisés toqejj uñachtʼayäna. Ukaw israelitanakarojj Egipto markat mistjjapjjäna ukhajj jan ajjsarapjjañapatak yanaptʼäna (Sal. 78:52). ¿Kunsa Jehová Diosajj jan ajjsarapjjañapatakejj luräna? Israelitanakarojj “mä jachʼa ejercitor uñtat[wa]” Egipto markat irpsüna (Éx. 6:26). Uka markat ukham mistuñajja, jan ajjsarayasiñatakiw jupanakar yanaptʼäna, kunattejj Jehová Diosaw taqe kunsa uñjaskäna. Maysa toqetjja, jupanakarojj “mä qenayaw urojj irpäna, nina qhanaw arumajj irparakïna”, ukhamatwa Jehová Diosajj jupanakamp chikäskatap uñachtʼayäna (Sal. 78:14). Ukham lurasajja, Diosajj akham siskaspas ukhamänwa: “Jan ajjsarapjjamti. Nayaw irpasipkäma, jan walinakatsa jarkʼaqasipkarakïma” sasa. w18.09 pág. 26 párrs. 11, 12

Bibliajj qellqaskäna uka tiemponjja, Diosan servirinakapat yaqhepajj llakimp aynachtʼasajj jiwjjañwa munapjjäna. Amuytʼañataki, wali llakitäsajja, Job chachajj akham sänwa: “Janiw jukʼampi jakañ munkjjtti” sasa (Job 7:16). Jonás chachajj kuntï munkäna ukarjam jan phoqasitapat qʼala aynachtʼatäsajj akham sänwa: “Tatay, maytʼassma jakañajj apaqjjañamataki. Jiwjjañaw sumajja jakañat sipansa” sasa (Jon. 4:3). Elías profetasti mä tiempojj wali llakitäsajja, Diosar akham sasaw mayisïna: “¡Ukkhakëjjpan Tata! ¡Nayarojj jakañajj apaqjjeta!” sasa (1 Rey. 19:4). Ukampis Jehová Diosajj wali valoranitwa uka servirinakapar uñjäna, jakasipkakiñapwa munarakïna. Juchañchañat sipansa munasiñampiw chʼamañchtʼäna, jakañ munasipkakiñapatakisa jan jitheqtas Jupar servisipkakiñapatakis yanaptʼarakïnwa. w18.09 pág. 13 párr. 4

Jehová Diosampi trabajirinakajj katoqtʼasirinakäpjjewa. Griego Arut Qellqatanakanjja, ‘katoqtʼasiri’ siski uka arojj “yaqha jaqenakar munasiñat yanaptʼa[ña]” sañwa muni (Heb. 13:2, nota). Biblian qellqatäki uka sarnaqäwinakatwa katoqtʼasirïñ yateqassna (Gén. 18:1-5). Ukhamajj ‘jiwasjam creyentëpjjpasa’ janisa, mayninakar yanaptʼañ thaqañasapuniwa (Gál. 6:10). Congregacionar chʼamañchtʼañataki visittʼapkistu ukanakarojj sum katoqtʼañasawa, ukhamatwa Diosampejj trabajiraksna (3 Juan 5, 8). Ukham katoqtʼasajj ‘purapatwa chʼamañchtʼasipjjañäni’ (Rom. 1:11, 12). Bibliajja, taqe jilatanakaruw jilïr irpirïpjjañapataki, congregacionan yanapiripäpjjañapataki chʼamañchtʼi, ukhamat Jehová Diosampi trabajipjjañapataki (1 Tim. 3:1, 8, 9; 1 Ped. 5:2, 3). Ukatak chʼamachasipki ukanakajja, jilat kullakanakar Diosar serviñansa kunanjjay wakischi ukansa yanaptʼañwa munapjje (Hech. 6:1-4). Uka trabajonakan yanaptʼirinakajja, mayninakar yanaptʼañajj wali kusiskañawa sapjjewa. w18.08 págs. 24, 25 párrs. 6, 7, 10

Timoteojj jupat jilïrinakarus pʼeqtʼkchïnjja, respetompi, munasiñampiw jupanakar uñjañapäna. Chuymankipstat mä jilatatï, jan ukajj mä kullakatï yatkasin juchachasispa, jan ukajj kunatï Diosatak jan walïki ukanak lurapjjañapatak yaqhanakar chʼamañchaspa ukhajja, Jehová Diosajj janiw aleq uñkatasak juzgkaniti, ni juch luratapatsa ukham aleqak uñjkaniti. Bibliajj akham siwa: ‘Juchachasir jaqetï patak maranïchi ukasa, maldicitäniwa’ sasa (Is. 65:20, NM). Ezequiel profetajj mä visión uñjkäna ukansa niya ukham yatichäwiw utjaraki (Ezeq. 9:5-7). Ukhamasti, ‘chuymani Jilïri jaqeru’ mä arunjja, Jehová Diosaru respetañatakiw jukʼamp chʼamachasiñasa (Dan. 7:9, 10, 13, 14). Ukham lurañäni ukhajja, janiw chuymankipstatanakarusa ni wayn tawaqonakarus cheqañchañ ajjsarkañäniti (Gál. 6:1). w18.08 pág. 11 párrs. 13, 14

Taqe cristianonakaw mä yatiyäwejj cheqati janicha uk sum yatjjatañ yateqañasa, ukhamat kunatï cheqäki uk yatiñasataki (Prov. 3:21-23; 8:4, 5). Jiwasatï jan uk yateqksna ukhajja, Supayasa jupan apnaqat akapachas facilakiw amuyus mayjtʼayapjjestaspa (Efes. 5:6; Col. 2:8). Cheqas mä yatiyäwit sum yatjjatsna ukhakiw cheqati janicha uk yatsna. Jichhürunakanjja, kunayman yatiyäwinakaw Internetansa, televisionansa ukat yaqha ukham cheqanakansa utji. Correo electrónico ukanak toqe, mensajenaka jan ukajj amigonak toqes ukhamarakiw walja yatiyäwinak katoqtanjja. Niyakejjay yatiyäwinakajj waljächejja, kuntï liyktan, istʼkaraktan ukanakat amuyasiñasawa. w18.08 pág. 3 párrs. 1, 3

Yoqap nasiñapataki horasajj purinjjäna ukhajja, Jehová Diosajj María sutini humilde virgen tawaqoruw Yoqapar ususiñapatak ajllïna. Mariajj Nazaretanwa jakasïna, uka markajj jan yäqañjam markänwa, Jerusalenatsa ukankir templotsa jayankarakïnwa (Luc. 1:26-33). Mariajj sumwa Diosampejj apasïna, Elisabet familiarapampi parlasaw uk uñachtʼayäna (Luc. 1:46-55). Cheqas Mariajja Jehová Diosar jan jitheqtas servirïnwa, ukatwa Diosajj kuntï jan suykäna ukampi bendisïna. Jesusajj nasïna uka qhepatjja, janiw Jehová Diosajj Jerusalén, Belén uka markankir wali uñtʼata jilïrinakarojj nasïwipat yatiykänti. Jan ukasti angelanakap toqejj ovej awatir humilde chachanakaruw yatiyäna, jupanakajj Belén marka pampanwa ovejanakap awatipjjerïna (Luc. 2:8-14). Awatirinakasti jichhak nasit Jesusar visitiriw sarapjjäna (Luc. 2:15-17). Mariampi Joseampejj kunjamsa uka awatirinakajj Jesusar jachʼañchapjjäna uk uñjasajj kusisipjjpachänwa. w18.07 págs. 9, 10 párrs. 11, 12

¿Kunatsa Diosajj Salomonatak colerasïna? Bibliajj akham siwa: “Diosar munañ chuymapajj jan utj-jjatapata, kunjämatejj Diosajj pay kuti uñstasina, siskäna jan yaqha diosanakar yupaychañapataki. Ukampis jupajj janiw istʼkänti kuntejj Tatitojj siskäna ukjja” sasa. Ukhamïpanjja, Jehová Diosajj janiw Salomón reyir sum uñj-jjänti ni yanaptʼjjarakïnsa. Israel markajj payaruw jaljtäna, ukhamasti Salomonat jutir reyinakajj janiw markpachar apnaqjjapjjänti, walja maranakaw kunayman jan walinakan uñjasipjjarakïna (1 Rey. 11:9-13). Kunatï Salomonar paskäna ukajj jiwasar pasarakistaspawa. Jiwasatï Diosan leyinakap jan amuyapki, jan ukajj uka leyinakar jan respetapki ukanakampi amigösna ukhajja, Diosat jitheqtjjaraksnawa. Jupanakat yaqhepajj Jehová Diosar jan taqe chuyma serviri Testigonakäspawa, jan ukajj Diosar jan servir familiaranaka, utas jakʼan jakirinaka, yateqer masinaka, trabajir masinaka ukanakäpjjaspawa. Amigonakasatï Diosan leyinakapar jan respetapkchejja, tiempompejj Diosamp sum apasitas aptʼasiyistaspawa. w18.07 pág. 19 párrs. 9, 10

Supayajj televisionana ukhamarak peliculanakan uñstki uka historianakampi, jan ukajj sarnaqäwinakampiw chuymas qʼañuchañ munarakistu. Uka sarnaqäwinakajja, jan amuykañakiw amuyunakassa luratanakassa mayjtʼayaspa. Jesús pachpaw uñachtʼäwinakampi jaqenakan chuymapar purtʼirïna. Ukatwa khuyaptʼayasir samaritano jaqet parlir uñachtʼäwita, ukhamarak utjirinakap tukuntir waynat parlir uñachtʼäwit parläna (Mat. 13:34; Luc. 10:29-37; 15:11-32). Supayan amuyunakapampi qʼañuchat jaqenakajja, ukhamarakiw kunayman historianakampi chuymas qʼañuchañ munapjjestu. Cheqas televisionan yaqhep programanakapasa peliculanakasa, janiw jan walïkiti, ukanakajj kusistʼayistuwa, yaticharakistuwa. Ukhamajj suma amuytʼasirïpjjañäni. Janïr kun uñtkasajj akham jisktʼasiñasawa: “¿Aka peliculasa jan ukajj programas jan wali amuyunakampi apayasiñajatakit yatichañ munitu?” sasa (Gál. 5:19-21; Efes. 2:1-3). Ukhamächi ukhajja, jankʼakiw uk uñtañat jitheqtañasa, kunjamtï contagioso usuni mä jaqet jitheqtksna ukhama. w19.01 págs. 15, 16 párrs. 6, 7

Cascojja, soldadorojj pʼeqepwa jarkʼaqerïna, ‘Diosan salvacionapat lupʼiñajj’ ukhamarakiw jan wali amuyunakat jarkʼaqestu (1 Tes. 5:8; Prov. 3:21). ¿Kunjamsa Supayajj cascos jan uchasiñasatak chʼamañchistaspa? Jesusarojj kunjamsa pantjasiyañ munäna uk amuytʼañäni. Jutïrin Reyit uttʼayatäñap suyaskatap Supayajj yatpachänwa. Ukampis apnaqañ qalltañatakejja, Jehová Diosajj amtkäna ukapachkamaw Jesusajj suyañapäna. Janïr uk purinkipanjja, tʼaqesiñapänwa, jiwayataw uñjasiñaparakïna. Ukatwa Supayajj kuntï Jesusajj suytʼaskän uk ukaratpacha churañ munäna, akham sänwa: ‘Jumatejj mä kutikis adoritäta ukhajja, taqe aka markanakjjar munañanïñwa churäma’ sasa (Luc. 4:5-7). Jiwasarojj ukhamarakiw kuntï Jehová Diosajj churañ munkistu uk Supayajj jichpach churañ munistu. Ukampis suytʼañasawa, inas ukañkamajj jan waltʼäwinakan uñjaschiñäni. Ukatwa Supayajj kusisita jakasiñatakejj kunayman churañ munistu. Diosar serviñat sipansa walja yänaka jan ukajj cosasanak jichha tiempona jikjjatañasatakiw chʼamañcharakistu. Janiw Diosan Reinop nayrar uchañas munkiti (Mat. 6:31-33). w18.05 págs. 30, 31 párrs. 15-17

Wayn tawaqo, Diosajj kusisitäñamwa muni. Diosaru jukʼamp serviñ amtasa, taqe kunansa Jupan ewjjtʼaparjam sarnaqasaw kusisitäsma. Ukanaktï wayn tawaqökasin jankʼaki amtäta ukhajja, jankʼakirakiw Jehová Diosan yanaptʼapsa, bendicionapsa katoqäta, kunjamsa jan walinakat jarkʼaqtam uksa amuyarakïtawa. Diosajj walja ewjjanakwa Biblia toqejj churistu, ukanakat amuytʼañamawa. Bibliajj “waynäkasina jumar irnoqer [jan ukajj lurir] Diosamat amtasim” siski uka arunakarus istʼañamarakiwa (Ecl. 12:1). Jehová Diosar jukʼamp serviñ amtawayapki uka wayn tawaqonakarojj ‘walik ukham lurtajja’ sasaw chʼamañchtʼañasa. Jupanakajj Diosar jukʼamp serviñatakiw jan walinakan uñjaskasas chʼamachasipjje, predikañaw jupanakatakejj nayranki, akapachampi jan apayasiñatakisa wal chʼamachasipjjaraki. Wayn tawaqonaka, ukham chʼamachasipjjatamajj janiw inamayäkaniti, jilat kullakanakajj wal munasipjjtam yanaptʼañsa munapjjaraktamwa. Jumanakatï ‘taqe luräwinakam Jehová Diosan amparapar jaytapjjäta ukhajja, amtäwinakamajj phoqasiniwa’, kusisitaw jakasipjjarakïta. w18.04 pág. 29 párrs. 17, 19