Septiembre

Lázaro chachajj jiwjjäna ukhajja, Jesusajj Martatsa Mariatsa wal sinttʼasïna. Jupanakar jachir uñjasajj “jachaqtʼasïnwa” (Juan 11:32-35). Jesusajj Lazaron jaktañap yatïnwa, ukhamajj janiw jupan jiwatapat jachkänti, jan ukasti, wali munat amiganakapajj kunja llakitäpjjänsa uk uñjasaw jachäna. Jiwasajj janiw Jesusjam perfectöktanti, ukampis kunjamsa jupajj jaqenakat sinttʼasïna ukat wal yateqsna. Ukham chuymanïtapatwa jupar wal munasiraktanjja. Jichhajj Diosan Reinopan Reyit uttʼayatäjjewa, niyaw tʼaqesiñanaksa chhaqtayjjarakini. Niyakejjay Jesusajj aka oraqen mä jaqjam jakchïnjja, janiw khiti jaqes jupjamajj Supayan apnaqäwipajj utjayawayki uka tʼaqesiñanak askichkaspati. Cheqas “pantjasitanakasat khuyaptʼayasiri” Reyinïñajj wali kusiskañawa (Heb. 2:17, 18; 4:15, 16). w19.03 pág. 17 párrs. 12, 13

Jaqenakan Diosar uñtʼapjjañapatakejj walsa chʼamachaskstanjja, Jehová Diosakiw jupar serviñan nayrar sartapjjañapatakejj jaqenakar yanaptʼaspa, uk janipuniw armañasäkiti (1 Cor. 3:6, 7). Diosaw jaqenakarojj Jupan ukar irpani. Sapa maynirakiw kunatï chuymapan utjki ukarjamajj Biblian yatichäwinakapar iyawsaniti janicha uk amtjjañapa (Mat. 13:4-8). Jesusajj wali suma yatichirïkchïnsa, jilaparte jaqenakajj janiw istʼapkänti. Ukhamajj yatiyktan ukanakat waljanejj jan istʼapkistani ukhajja, janiw aynachtʼañasäkiti. Diosan arunakap yatiykasajj jaqenakat sinttʼasiñäni ukhajja, walja bendicionanakwa katoqañäni. Sañäni, jukʼamp kusisitaw yatiyañäni, ‘wiñay jakañatak suma chuymanïpki ukanakarusa’, Reinon suma yatiyäwinakap istʼapjjañapatakiw yanaptʼarakiñäni (Hech. 13:48). Ukhamajj mayninakar ‘yanaptʼirjamäsajj taqenir yanaptʼapjjañäni’ (Gál. 6:10). Ukhamatwa alajjpachankiri Jehová Dios awkisar jachʼañchañajj kunja kusiskañasa uk yatiñäni (Mat. 5:16). w19.03 pág. 25 párrs. 18, 19

David reyejj akham sasaw qellqäna: “Tatitojj jachʼapuniwa, jachʼar aptatäñapajj wakisiwa” sasa (Sal. 145:3). Davidajj Jehová Diosar wal munasïna, ukatwa ‘tantachäwinakan jachʼar aptäna’ (1 Crón. 29:10-13; Sal. 40:5). Jichhürunakanjja, tantachäwinakan arstʼasaw Diosar jachʼañcharaktanjja. Tantachäwinakan kunayman comentarionak istʼañajj wali kusiskañawa. Mä wawajj taqe chuyma mä qhawqha arunakamp arstʼki ukhajja, wal kusistanjja. Mä jilatasa jan ukajj kullakas Bibliankir mä yatichäw sum amuytʼatapat arstʼki ukhasti, wali chʼamañchtʼataw jikjjatasiraktanjja. Wali ajjsariri, jan ukajj parlktan uka aru yateqer jilat kullakanakajj arstʼapki ukhajja, ukhamarakiw wal kusistanjja (1 Tes. 2:2). ¿Kunjamsa jupanakar yuspärsna? Inas tantachäw tukuyatar akham sissna: “Walik arstʼtajja, arunakamajj wal chʼamañchtʼitu” sasa. Maysa toqetjja, tantachäwinakan arstʼasaw jupanakar chʼamañchtʼaraksna (Rom. 1:11, 12). w19.01 pág. 8 párrs. 1, 2; pág. 9 párr. 6

Lepra usuni tunka chachanakajj uka usunïpjjatap laykojj wali llakitäpjjänwa. “Jachʼa Yatichiri Jesusajj taqe kasta usunakwa qollaski” sirwa istʼapjjarakïna. Ukatwa mä urojj Jesusar jutaskir uñjasajj akham sasin artʼapjjäna: “Jesús, Yatichiri, nanakat khuyaptʼayasipjjeta” sasa. Uk istʼasajja, Jesusajj tunkpachaniruw qolläna. Ukham qollatäjjasajj chuymapan wal yuspärapjjpachäna. Ukampis maynikiw Jesusar yuspärirejj kuttʼäna. Uka chachajj samaritano jaqënwa, jupajj arnaqtʼasisaw Diosar jachʼañchäna (Luc. 17:12-19). Jiwasanakajj uka samaritano chachjamarakiw jiwas layku kuns lurapki ukanakarojj yuspärañasa. Jehová Diosatwa yuspärasirïñ yateqassna. Jupajja, khitinakatï Jupatakjam sarnaqapki ukanakar bendisisaw yuspärasirïtap uñachtʼayi (2 Sam. 22:21; Sal. 13:6; Mat. 10:40, 41). Bibliajj akham sasaw ewjjtʼistu: “Diosan munat wawanakapjamajj jupat yateqasipjjam” sasa (Efes. 5:1). Ukhamajj Jehová Diosatwa yateqasiñ muntanjja, ukatwa yuspärasirïñasa. w19.02 pág. 14 párrs. 1, 2, 4

Mä tawaqo kullakarojja, mä fiesta amtañatakiw profesorajj mayi. Kullakatakejj uka fiesta amtañajj janiw walïkiti, ukatwa “janiw uka fiesta amtkäti” sasin respetomp qhanañchi. Mä wayna jilatajj utat uta yatiykasajja, compañeropan utap leqtʼiriw sari. Uka compañeropajja, nayrajj Testigonakar wal jiskʼachirïna. Familiani mä jilatajj trabajopankaski ukhajja, jefepajj kʼarisiñapatakiw mayi. Ukampis jilatajja, “Diosan servirinakapajj honradöpjjañapawa, leyinakarus istʼapjjañapawa, ukwa Diosajj muni” sasaw jefeparojj trabajo aptʼasirjam qhanañchi (Rom. 13:1-4; Heb. 13:18). Kullakasa jilatanakasa, ¿kunjam chuymanïpjjatapsa uñachtʼayapjje? “Jan ajjsartʼirïpjjatapa, honradöpjjatapwa uñachtʼayapjje” sasin inas sissna. Ukajj cheqäkchisa, Diosar taqpach chuymampi servipjjatapwa uñachtʼayapjjaraki. Jupanakajj Diosan chuymap jan ustʼayañataki, leyinakapar istʼañatakiw chʼamachasipjje. Ukham lurapjjatap uñjasajja, Jehová Diosajj wal kusispacha. Jiwasajj ukhamarakiw alajjpachankir Awkisar kusisiyañ muntanjja. w19.02 pág. 2 párr. 1, 2

Moisesan Leyipajj yaqha markanakat jutirinakaru, wajchanakaru, viudanakaru, jan ukajj yaqha ukham jaqenakaruw jukʼamp yanaptʼäna. Taqe juezanakaw aka leyirjam lurapjjañapäna: “Jan lurapjjamti kunatejj jan cheqäki ukanakjja, yaqha markat jutir jaqenakampi ni wajchanakampisa, ni viuda warmin isipsa prendatjja katupjjamti” (Deut. 24:17). Jehová Diosajj jan walin uñjasipkäna uka jaqenakat wal llakisïna, jupanakar tʼaqesiyapkäna ukanakarus cuenta mayirakïna (Éx. 22:22-24). Jehová Diosajja, markap uñjañatak uttʼayatäpki ukanakajj sapa mayni jilat kullakanakat llakisipjjaspa ukwa muni. Qʼañu juchanak lurañas janipuniw Jupatakejj walïkiti. Taqe servirinakapajj jan walinakat jarkʼaqatäpjjaspa, cheqaparjam uñjatäpjjaspa ukwa munaraki, yamas jupanakpachpa jan jarkʼaqasirjamäpki ukanakaruw jukʼamp yanaptʼasiñapa (Lev. 18:6-30). Diosajj cheqaparjam jiwasar uñjatap amuytan ukhajja, jukʼampiw Jupar munastanjja. Diosar munastan, cheqapa leyinakapsa wali valoranit uñjtan ukhajja, munasiñampi, cheqaparjamaw jaqe masisar uñjaraktanjja. w19.02 págs. 24, 25 párrs. 22-26

Kunjamsa Supayan jan wali amuyunakapat chuymas jarkʼaqsna uk jichhajj uñjañäni. “Qʼañu juchasa, taqe ajjtaskañanak lurañasa, [...] janipun jumanak taypinjja arsutäpanti” sasaw Jehová Diosajj yatichistu (Efes. 5:3). Ukampis trabajonkiri jan ukajj colegionkir masinakasajj qʼañu lurañanakat parlañ qalltapjjaspa ukhajja, ¿kamachsnasa? Inas concienciasajj Biblian ewjjanakap amtaychistani (Rom. 2:15). ¿Concienciasar istʼañäniti? Inas kuntï parlapki uk istʼañsa, jan ukajj kuna fotonaktï uñachtʼayapki uk uñañsa munchiñäni, ukampis uk lurañat sipansa, jankʼakiw yaqha toqenakat parlañasa, jan ukajj sarjjañasawa. Jan ajjsarirïñasawa, ukaw masinakasajj jan walinak lurañataki, jan ukajj jan walinak amuyañatak chʼamañchapkistani ukhajj yanaptʼistani. Supayan amuyunakap contra saytʼasiñatakejj kunanaksa lurasktan uk sum Jehová Diosajj uñjaski, Juparakiw Supayar saykatañatakejj chʼamsa yatiñsa churistani (2 Crón. 16:9; Is. 40:29; Sant. 1:5). w19.01 págs. 17, 18 párrs. 12, 13

Salomón reyejj munañani wali qamiri ukhamänwa, kuntï munkäna taqe ukanak jikjjatasajj kunjamsa jakasispa ukwa yatiñ munäna (Ecl. 2:1-10). Ukatwa utanak utachasïna, suma jardinanaka, parquenak lurayasïna, mä arunjja kuntï munkäna ukanakwa lurayasïna. ¿Uk lurasajj kusisitänti? Jupa pachpaw taqe ukanak jikjjatasajj inamayakïtapa amuyasïna, kunjamtï jichhürutak ajllita textojj siski ukhama. ¿Kunsa jupat yateqasisma? Yaqhepajja, jan walir purisakiw kunas wali kunas jan walïki uk yateqapjje. Ukampis Jehová Diosajj janiw ukham yateqañam munkiti, ukatwa Jupar istʼañam muni. Ukatakejj Juparuw confiyañama. Jupar confiyas taqe kuns luräta ukhajj janipuniw arrepentiskätati. ‘Diosajj janipuniw luratanakamatsa ni sutipar munasitamatsa armaskaniti’ (Heb. 6:10). Ukhamajj Jupar jukʼamp confiyañataki chʼamachasim. Ukhamatwa kuntï Diosajj sisktam ukajj juman askimatakïtap amuyäta (Sal. 32:8). w18.12 pág. 22 párrs. 14, 15

Dios chuyma jaqejj Diosaruw confiyi, Jupjam amuyañatakiw chʼamachasi. Diosan Aruparjamaw taqe kuns luri, Jupar istʼañwa amtaraki (1 Cor. 2:12, 13). Davidajj ukhamänwa. Mä kutejja, “jumaw nayan taqe kunajjätajja” sasaw Jehová Diosar säna. Uk sasinjja, Diosamp sum apaskäna uka toqetwa parlaskäna (Sal. 16:5). Ukham sum apasitapat walpun yuspäräna, ukatwa Diosar taqe chuyma confiyäna (Sal. 16:1). “Chuymajjajj walpun kusisi” sasaw qellqäna. Davidajj Diosamp sum apasisaw wali kusisitäna (Sal. 16:9, 11). Qollqe ganañaru jan ukajj kusistʼañanakaru chuyma uchapki ukanakajja, janiw David chachjam kusisitäpkaspati (1 Tim. 6:9, 10). Jumatï Diosar confiyäta servirakïta ukhajja, kusisitaw jakasïta, mä amtampiw jakasirakïta. Ukhamajj Diosar jukʼamp confiyañatakejja, Jupamp parlañatakiw tiempo apstʼasiñama. Ukatakejj Arupwa liyiñama, kunjam Diosasa uka toqetsa luratanakapatsa lupʼiñamarakiwa. Qhawqsa munastam uka toqetsa lupʼiñamarakiwa (Rom. 1:20). w18.12 pág. 25 párrs. 7, 8

Ukham sasinjja, janiw casarasiñ toqet aleq ukhamak apóstol Pablojj parlkänti, jan ukasti, casarasiñar respetompi uñjapjjañapatakiw cristianonakar ewjjtʼaskäna. Casaratanakajj ¿ukhamti uñjtanjja? Casarasiñar respetompi uñjasajj Jesusatwa yateqasisktanjja. Fariseonakajj divorciasiñat Jesusar jisktʼapjjäna ukhajja, jupajj kuntï Jehová Diosajj nayrïr chacha warmir siskäna ukwa säna, akham sänwa: “Ukatwa mä chachajj awkiparus taykaparus jaytjjani, panipasti mä jañchikëjjapjjaniwa” sasa. Ukatjja, “kuntï Diosajj mä yukur mayachki ukjja, jan khiti jaqes jaljtaypanti” sasaw sarakïna (Mar. 10:2-12; Gén. 2:24). Kunjamtï uñjktanjja, Diosaw casarasiñ utjayäna. Jesusajj uk sum yatïna, casarasiñajj wiñayatakiwa sasaw walja kuti säna. Jehová Diosajj janiw Adanampir Evampirojj divorciasipjjasmawa sasajj siskänti, jan ukasti, ‘panipajj’ wiñayatak jakasipjjañapwa munäna. w18.12 págs. 10, 11 párrs. 2-4

Jehová Diosar uñtʼañ qalltkayätan ukhajja, Diosan qallta yatichäwinakaparjam sarnaqañajj qhawqha wakiskirisa ukwa amuyayätanjja. Ukampis Diosar serviñan nayrar sartasajja, kunas Jupatak wali kunas jan walïkaraki, kunjamsa yaqha ukhamanakatsa amuyi ukanakwa yateqtanjja. Jehová Diosjam amuyañ yateqasin ukarjamaw sarnaqtanjja, jan ukajj ukarjamaw kuns amtaraktanjja. Jehová Diosjam amuyañ yateqasajj kusisitäkstansa, taqeniw pantjasirïtanjja, ukatwa awisajj Jupjam amuyañajj chʼamakïspa. Sañäni, Diosajj qʼañu juchanak lurañatsa, qollqe toqetsa, predicañatsa, wila manqʼañatsa jan ukajj uchayasiñatsa kamsisa uk amuyañajj chʼamakïspawa. Ukhamajj ¿kunas Jehová Diosjam amuyañ yateqaskakiñatakejj yanaptʼistaspa? Bibliatwa yatjjatañasa ukhamat kunsa Diosajj amuyi uk yatiñataki, yatjjatktan ukatsa lupʼiñasarakiwa, ukatsti Diosjam amuyjjañatakiw chʼamachasiñasaraki. w18.11 págs. 23, 24 párrs. 2-4

Habacuc profetajj jan wali tiemponwa jakäna. Jaqenakajj wali qhoru jan sinttʼasiri ukhamäpjjänwa, ukatwa wal llakisïna. ‘¿Kunapachkamas jan walinakajj utjaskakpachäni? ¿Kunatsa Jehová Diosajj jan kuns lurkpacha?’ sasaw jisktʼaspachäna. Ina chʼusat tʼaqesiñanaka, jan waltʼañanakakiw utjäna, ukatakejj pachpa israelitanakaw juchanïpjjäna. Janis khiti arjjatiris utjkaspa ukhamwa amuyasïna. Ukham jan walinak taypin jakasaw Diosar yanaptʼa mayïna. Jehová Diosajj janis llakiskaspa, jan waltʼäwinak janis jankʼak askichkaspa ukham inas qalltan amuychïna. ¿Jiwasajj uka profetjam jikjjatasirïtanti? ¿Janit Habacuc profetajj Diosarusa arsutanakaparus confiyjjpachäna? Confiyaskakïnwa. Llakinakapa jaqenakar yatiyañat sipansa Jehová Diosaruw confiyäna, ukhamatwa pacienciamp suytʼatap amuytanjja. Jupajja kunatsa Diosajj jan kuns lurkäna, tʼaqesitapsa ukhamak uñchʼukïna ukanakatwa llakisïna. w18.11 pág. 14 párrs. 4, 5

Pedrompit Andresompit amuytʼañäni, jupanakajj chawlla katurïpjjänwa. Jesusajj ‘jaqenak katurïpjjañapatak’ invitkäna ukhajja, qänanakap (redenakap) jaytasaw Jesusamp sarjjapjjäna (Mat. 4:18-20). Ukhamajj ¿Bibliat taqe yateqerinakati trabajop jaytapjjañapa? Janiw uk sañ munkiti, cheqas familiapar yanaptʼañatakisa, kunatï munaski ukatakis trabajipjjañapawa (1 Tim. 5:8). Ukampis yänaka wal jikjjatañat sipansa kunatï jukʼamp wakiskirïki ukwa nayrar uchapjjañapa. Kuntï María sat mä tawaqojj lurkäna uk jichhajj uñjañäni. Golf sat anatañajj jupar wal gustäna, jukʼamp yatjjatañwa munarakïna ukhamat walja qollqe ganañataki. Ukampis Bibliat yatjjatañwa qalltäna. Kuntï yateqkäna ukajj chuymaparuw purtʼäna, ukarjamaw sarnaqjjarakïna. Diosar serviñatakejj walja qollqe jikjjatañ munañ apanukuñapänwa, uksa amuyarakïnwa (Mat. 6:24). Ukatwa golf sum anatañ yateqasiñ jaytjjañ amtäna. Jichhajja, precursoratwa serviski, “janiw kunas ukham kusisiñ churkistaspati” sasaw jupajj saraki. w18.11 pág. 5 párrs. 9, 10

Jesusajj 30 maranëjjäna ukhaw carpinterot trabajiñ jaytjjäna, ukatsti Diosan Reinopat yatiyañwa nayrar uchjjäna. Diosajj ukatakiw khitanitu sasaw sarakïna (Mat. 20:28; Luc. 3:23; 4:43). Jupatakejj taqe kunat sipansa Diosan arunakap yatiyañaw nayrankäna, taqenis jupjam lurapjjaspa ukwa munaraki (Mat. 9:35-38). Jiwasat jilapartejj janiw carpinteröktanti, ukampis taqeniw Diosan suma yatiyäwinakap yatichirïtanjja. Cheqas Bibliat yatichañajj wali wakiskiriwa, kunattejj Dios pachpaw ukan pʼeqtʼaski. Jiwasajj ‘Diosamp chika trabajirïpjjtanwa’ sasaw Bibliajj qhanañchi (1 Cor. 3:9; 2 Cor. 6:4). Diosan ‘taqpach arunakapajj cheqapawa’ uk sum yattanjja (Sal. 119:159, 160). Ukatwa yatiykasajj “Diosan arunakapsa cheqaparjam apnaqañataki” chʼamachastanjja (2 Tim. 2:15). Ukhamajja, Bibliat jukʼamp sum yatichañatakiw chʼamachasiñasa, Jehová Diosatsa, Jesusatsa, Reino toqetsa ukampiw yatichtanjja. w18.10 pág. 11 párrs. 1, 2

Mä chachajj Jesucristo pʼeqtʼiripat yateqasi ukhajja, ‘wali respetompi’ jupar uñjañapatakiw esposapar yanaptʼi (Efes. 5:22-25, 33). Ukhamatwa kullakajj esposopat khuyaptʼayasini. Awk taykanakajj purapat llakisipjje ukhajja, wawanakatakejj wali yateqaskayäpjjewa. Mayninakat kunjamsa llakisipjjaspa uksa wawanakapar yatichapjjañaparakiwa. Sañäni, Tantachasiñ Utan jan tʼijnaqapjjañapatakiw yatichapjjaspa, jan ukajj kusistʼañatak tantachasktan ukhajja, jupat jilïrïpki ukanakaw nayraqat manqʼa servisipjjañapa sasaw ewjjtʼapjjarakispa. Mä jiskʼa wawatï punku jistʼaristani, jan ukajj yaqha ukhamanakan yanaptʼistani ukhajja, ‘walik ukham lurtajja’ sasaw sañasa. Ukajj wal jupar yanaptʼani, ‘katoqañat sipansa churañanwa jukʼamp kusisiñajj utji’ siski uka arunaksa janiw armkaniti. w18.09 pág. 29 párrs. 5, 6

Reyit uttʼayat Criston pʼeqtʼatapajj jichhürunakan wal yanaptʼistu, jutïrinsa yanaptʼaskakistaniwa. Ukhamajja, kuna cambionakatï aka qhepa urunakan utjawayki ukanakar istʼañajj kunjamsa yanaptʼistu ukat kusisiñasawa. Tantachäwinakatakisa yatiyañatakis kuna cambionakatï utjawayki ukanakajj kunjamsa yanaptʼawayistu ukanakat janit familjam yatjjatksna. Ukham lurañajj wal chʼamañchtʼistani. Diosan markapajj kuna ewjjtʼanaktï churkistu ukajj kunjamsa yanaptʼistu uk sum amuyañäni ukhajja, uka ewjjtʼanakar istʼañajj janiw chʼamäkaniti. Sañäni, Bibliat apstʼat qellqatanakajj jukʼakiw imprimisjje, ukhamatwa qollqejj jan añcha gastasjjeti. Jichhak uñstki uka aparatonak utj-jjepansti, Diosan arunakapajj jukʼamp jaqenakaruw yatiyasi. Ukhamajja, Bibliat apstʼat qellqatanaka, videonaka Internetat tabletasaru, jan ukajj celularasaru apaqañajj ¿janit walïkaspa? Ukham lurasajj Jesusjam amuyataswa uñachtʼayañäni, jupajja kunatï Diosan markapan utjki uk sum apnaqasiñapwa muni. Criston ewjjtʼapar taqe chuyma istʼañajja, mayachtʼatäñataki, Jehová Diosar jukʼamp confiyañatakiw jilat kullakanakar yanaptʼi. w18.10 págs. 25, 26 párrs. 17-19

Jiwasatï Jehová Diosat yateqasis mayninakar munasiñampi uñjañänejja, Diosajj jiwas toqes llakit jilat kullakanakan mayisitapar istʼkaspa ukhamäniwa (2 Cor. 1:3-6). Jilat kullakanakajj janipunis pantjasirïpkaspa ukham janiw amuyañasäkiti, kunattejj awisajj pantjasipjjaniwa (Ecl. 7:21, 22). Jehová Diosajj pantjasirïtas laykojj pacienciampiw uñjistu, Jupat yateqasisajj ukhamarakiw mayninakar uñjañasa (Efes. 4:2, 32). Janiw janis chʼamachasipkaspa ukham amuyayañasäkiti, ni luratanakapsa mayni jilat kullakanakan luratanakapamp igualayañasäkiti, ukham lursna ukhajj jukʼampiw aynachtʼapjjaspa. Antisas ‘walik ukham lurtajja’ sasaw chʼamañchtʼañasa. Ukaw jupanakar chʼamañchtʼani, Diosar kusisit servipjjañapatakis yanaptʼarakini (Gál. 6:4). w18.09 pág. 16 párrs. 16, 17

Jesusatakejja, Diosan munañap lurañajj manqʼäkaspas ukhamänwa. Kunapachatï mä suma manqʼa manqtʼastan ukhajja, wali kusisitätanwa. Diosan munañaparjam sarnaqtan ukhajj ukhamarakiw kusisitätanjja, Diosarus jukʼampiw jakʼachastanjja. Kuntï Jehová Diosajj yatichkistu ukhamarjam sarnaqasajja, jukʼamp yatiñan jaqëtanwa (Sant. 3:13). Jukʼamp kusisitarakïtanwa. Bibliajj akham siwa: “Yatiñ kankañajj jikjjatiripatakejj jakañawa; ¡kusisiñaniwa uka yatiña katjjäsipki ukanakajja!” sasa (Prov. 3:13-18). Mä kutejja, Jesusajj akham sasaw discipulonakapar säna: “Jumanakatejj ukanak yatipjjsta, ukarjamarak lurapjjsta ukhajja, kusisipjjam” sasa (Juan 13:17). Kusisit jakaskakiñatakejja, Jesusajj yatichkäna ukarjamaw discipulonakajj sarnaqasipkakiñapäna. Cheqas ukhamwa lurapjjäna. Jesusat yateqasisapuniw sarnaqapjjäna, yatichäwinakaparjamaw jakapjjarakïna. w18.09 pág. 4 párrs. 4, 5

Adanampi Evampejj Edén jardinan panipakïpkchïnsa, kunanaktï Jehová Diosajj jupanakar siskäna ukajj mayninakat llakisiñatakiw yanaptʼañapäna. Diosajj jupanakar bendisïnwa, ukat akham sarakïnwa: “Wali mirantapjjam, aka oraqerusti phoqhantapjjarakim, apnaqapjjarakim” sasa (Gén. 1:28). Kunjamtï Jehová Diosajj taqe luratanakapat wal llakiskejja, ukhamarakiw Adanampi Evampejj janïr nasipkäna uka wawanakapat llakisipjjañapäna. Taqeni kusisit jakasipjjañapatakejja, aka oraqpachwa mä paraisor tukuyapjjañapäna. Ukham lurañatakejj familpachaw yanaptʼapjjañapäna. Adanasa, Evasa, jan juchani nasipkaspäna uka wawanakapasa aka oraq mä paraisor tukuyapjjaspäna ukhajja, Jehová Diosan amtap phoqasiñapatakiw yanaptʼapjjaspäna, samarañaparus mantapjjarakispänwa (Heb. 4:11). Ukham lurasajj wali kusisitaw jakasipjjaspäna. Jehová Diosajj churirïpjjatapatsa mayninakat llakisipjjatapatsa bendisispänwa. w18.08 pág. 18 párr. 2; págs. 19, 20 párrs. 8, 9

Kʼarintapjjestaspa ukhajj ¿kunsa jiwasajj lursna? Jesusas Bautisir Juanas kʼarintataw uñjasipjjäna (Mat. 11:18, 19). ¿Kunsa Jesusajj luräna? Ukajj kʼariwa sasin arjjatasiñatak janiw tiempo aptʼaskänti. Antisas kuntï yatichkäna, lurkäna ukajj cheqati janicha uk jupanak pachpa amuyapjjañapatakiw jaqenakar chʼamañchäna. Kunjamtï jupajj siskänjja, “maynin yatiñanïtapajj luratanakapanwa uñjasi”. ¿Kunsa ukat yateqsna? Awisajja, jaqenakajj jiwasat jan walinakwa parlapjjaspa, inas jiskʼachapjjchistaspa. Ukhamïpanjja inas cheqaparjam uñjatäñatak chʼamachassna, ukhamat jiwasat sapki ukajj jan cheqätap amuyapjjañapataki. Ukampis ¿kunsa luraraksna? Jiwasat kʼarinak parlapjjaspa ukhajja, sum sarnaqasaw jan cheqätap uñachtʼaysna. Kunjamtï Jesusan sarnaqäwipat yateqktanjja, cristianjam sum sarnaqañataki chʼamachasiñäni ukhajja, jiwasat kuna jan walinaktï parlapki ukajj jan cheqätap taqeniw amuyapjjani. w18.08 pág. 6 párrs. 11-13

Caín chachasa, Salomonasa, israelitanakasa, arrepentisipjjaspänwa, jan wali sarnaqäwipsa jaytapjjaspänwa, ukampis janiw ukham lurapkänti (Hech. 3:19). Cheqas jan walinak lurtan ukhajja, Jehová Diosajj janiw jankʼak jaytanukkistuti, yanaptʼañ munaskakistuwa. Amtañäni, Aarón chacharojj pantjasitapat perdonänwa. Jichhürunakanjja, Diosajj Biblian qellqatäki uka sarnaqäwinak toqe, Bibliat apstʼat qellqatanak toqe, jan ukajj jilat kullakanak toqew ewjjtʼistaspa. Uka ewjjtʼanakar istʼañäni ukhajja, Jehová Diosajj jiwasat khuyaptʼayasistaniwa. Jehová Diosajj mä amtampiw khuyapayasiñap uñachtʼayistu (2 Cor. 6:1). Jupajja, ‘jan wali sarnaqañanak apanukuñasataki, akapachan utjki uka jan wali munañanak apanukuñasatakiw’ khuyaptʼayistu (Tito 2:11-14). “Akapachankir jaqenak taypin” jakkasajja, qhawqsa Diosar munastan ukajj yantʼat uñjasikipuniniwa. Ukhamasti, Jehová Dios toqet taqe chuyma saytʼasiñatakejj listokïñasawa. w18.07 pág. 21 párrs. 20, 21

Akapachampi sum uñjatäñat sipansa ¿kunas Jehová Diosampi sum uñjatäñ munaskakiñatak yanaptʼistaspa? Akanakwa amtañasa. Maya, Jehová Diosajj jupat jan jitheqtiri servirinakapat janipuniw armaskiti (Heb. 6:10; 11:6). Diosajj sapa mayni servirinakaparuw wal munasi, jupanakar ukham jan uñjañajj janipuniw Jupatak walïkaspati. Ukhamarus Jehová Diosajja, ‘aski jaqenakan sarnaqäwip yatiwa’, yantʼan uñjasipki ukanakar salvañsa yatirakiwa (Sal. 1:6; 2 Ped. 2:9). Paya, Jehová Diosajj kuntï jan suyktan ukanakampiw bendisistaspa. Jupajj janiw mayninakampi jachʼañchatäñ laykuki sumanak lurapki ukanakarojj bendiskiti. ¿Kunatsa? ‘Jupanakajja, kunatejj waktʼki ukanak katoqjjapjjewa’ sasaw Jesusajj säna (Mat. 6:1-5). Ukatjja jan jachʼañchayasiñ thaqasa mayninakat khuyapayasipki ukanakarojj Diosaw ‘jamasat uñjaski’ sasaw sarakïna. Diosajj suma luratanakap uñjasaw maynir bendisi. w18.07 pág. 9 párrs. 8, 10

Uka visión uñjasajja, kamsañsa munpacha sasaw apóstol Pedrojj jisktʼasïna. Ukhamaruw Cornelion khitat jaqenakajj purinipjjäna. Espíritu santon irpatäsajja, Pedrojj uka jaqenakamp chikaw saräna. Judionakajj janipuniw jan judío jaqenakan utanakapar mantapjjerïkänti. Ukhamajj Pedrotï uñkatasak uka jaqenakar juzgaspäna ukhajja, janipuniw Cornelion utapar sarkaspänti. Ukampis ¿kunatsa saräna? Kuntï visionan uñjkäna ukaw jan nayrjam amuyjjañatak yanaptʼäna, espíritu santos ukhamarakiw yanaptʼäna. Cornelion arunakap istʼasajja, Pedrojj akham sasaw Jehová Diosan amuytʼayatäsajj säna: “Jichhajj cheqpachapuniw nayajj amuyta, Diosajj janiw khitirus yaqhachkiti. Jan ukasti khitinakatï taqe markanakan jupar ajjsartʼapki, kunatï cheqapäki ukarjam lurapki ukanakajja, jupan katoqatäpjjewa” sasa (Hech. 10:34, 35). Ukajj apóstol Pedrotak machaq yatichäwïnwa. w18.08 pág. 9 párrs. 3, 4

Cheqas taqeniw kuntï Diosajj uñiski ukanak jan lurañatak chʼamachastanjja. Ukampis Bibliajj uka toqet jan sum qhanañchki ukhajja, ¿kun lurañassa Jehová Diosajj muni uk kunjamatsa yatsna? Concienciasatï Bibliarjam suma yatichatächi ukhajja, suma amtanakaruw puriñäni. Jehová Diosajj wal munasistu ukatwa Biblian yatichäwinakap churistu, ukaw concienciasar yanaptʼi. Jupajj akham sistuwa: “Nayätwa [Jehová] Tatitu Diosamajja, nayasti kunatejj jumatakejj askïki ukwa yatichsma, kawki thakinjamtejj sarañamäki ukanjam irparaksma” sasa (Is. 48:17, 18). Biblian yatichäwinakapat lupʼtan, chuymasarus katoqastan ukhajja, concienciasaruw sumäñapatak yanaptʼtanjja. Ukhamatwa concienciasajj suma amtanakar puriñatak yanaptʼistu. Biblian yatichäwinakapajj suma amtanakar puriñatakiw yanaptʼistu. Uka yatichäwinak sum amuyañajja, kunjamsa Diosajj amuyi, kunatsa leyinak qellqayäna ukanak amuyañatakiw yanaptʼistu. w18.06 pág. 17 párr. 5; pág. 18 párrs. 8-10

‘Herodesan arkirinakapajj’ aka amtampiw Jesusar pantjasiyañ munapjjäna: ‘Jesusatï janiw pagapjjañamäkiti sanejja, romanonak contra saytʼirit uñtʼatäspawa, pagapjjañamawa sani ukhasti, arkirinakapajj jaytanukupjjaniwa’ sasa. Jesusajj sum amuytʼasisaw impuesto pagañ toqet uka jaqenakar qhanañchäna. Impuesto cobririnakan qollqe chuymäpjjatap Jesusajj yatïnwa, ukampis Diosan Reinopaw taqe jan waltʼäwinak askichani sasaw confiyäna, ukatwa jan engañjayaskänti. Ukajj wali yateqaskayawa. Politiconakajj jaqenakar yanaptʼañatakis chʼamachasipkchejja, janipuniw politicar mitisiñasäkiti. Jan walinak lurapjjatap uñjasin jupanak contra parlañat sipansa, Diosan Reinopwa nayrar uchañasa, kunatï Dios nayraqatan cheqapäki ukanakwa thaqañasaraki (Mat. 6:33). Jehová Diosan Testigonakapat waljaniw nayrajj politiconakjam amuyunipjjäna, ukampis jichhajj janiw ukhamäjjapjjeti. w18.06 pág. 6 párrs. 9-11

Supayajj warminakamp ikintasipjjañapatakiw angelanakarojj engañjäna. Ukampis janiw ukampikejj angelanakar engañkpachänti, jan ukasti jaqenakjjar munañanïpjjañapatakiw chʼamañcharakpachäna. Jupan amtapajj ‘warmin wawap’ puriniñap jarkʼañäpachänwa (Gén. 3:15). Ukhamäkchïnsa, Jehová Diosajj Uma Juicio apanisaw Supayampina Dios contra saytʼir angelanakampin jan wali amtanakap chhaqtayäna. Ukhamajj qʼañu juchanak lurañatsa munañasak thaqañatsa walpun amuyasiñasa. Uka angelanakajj walja maranakaw Diosarojj nayraqatapan servipjjäna. Ukhamäkchïnsa, jupanakat waljanejj janiw jan wali amuyunak apanukupkänti, jan ukasti jukʼampiw uka toqet lupʼipjjpachäna. Jiwasampejj ukhamarakiw pasaspa, inas Diosarojj walja maranak serviskstan, ukampis jan walinak lurañ munañajj chuymasan jiltarakispawa (1 Cor. 10:12). Ukatwa chuymasajj kunjamäskisa uk sapa kuti amuytʼañajj wali wakiskiri. Qʼañu juchanak lurañ munañasa jan ukajj jachʼa jachʼa tukuñ munañanakas utjani ukhajja, jankʼakiw aparpayañasa (Gál. 5:26; Col. 3:5). w18.05 pág. 25 párrs. 11, 12

Kunapachatï judionakat waljanejj Diosan arunakap jan istʼañ munapkäna ukhajja, Pablojj aynachtʼataw uñjasïna. Jupajj akham sasaw Roma markankir cristianonakar qellqäna: “Cheqpachansa israelitanakan salvasipjjañap wal nayajj chuymajan munta, ukatakiw Diosarus wal ruwtʼasirakta. Nayajj ak jupanakat qhanañchirista, jupanakajj walsa Diosar serviñatakejj chʼamachasisipkchejja, Diosat jan sum yatisaw uk lurapjje” sasa (Rom. 10:1, 2). Pablojja, israelitanakan salvasipjjañap “wal nayajj chuymajan munta” sasaw säna. Cheqas jupajj judionakan salvasipjjañapwa munäna (Rom. 11:13, 14). Judionakat taqeni Diosan arunakap istʼapjjañapatakiw Diosar mayïna. Jupajj akham sänwa: ‘Jupanakajj Diosar serviñatakejj wal chʼamachasipjje’ sasa. Jaqenakajj kunjamsa Diosar servipjjaspa uk uñjañatakiw Pablojj chʼamachasïna. Judionakajj Diosar taqe chuyma serviñ munirinakäpjjänwa, uk Pablojj sum yatïna. Criston discipulopäjjasajj nayjamarakiw chʼamachasipjjani sasaw amuyäna. w18.05 pág. 13 párr. 4; págs. 15, 16 párrs. 13, 14

Cheqas kuna yanaptʼsa jilat kullakanakajj munapjje uk taqeniw amuyañasa. Apóstol Pablojj akham sänwa: “Jan chʼamani amparanaksa jan chʼamani qonqorinaksa chʼamanir tukuyapjjam, kayunakamatakisa cheqa thakinak lurasisipkakim, ukhamat cojo kayojj jan qhaqsusiñapataki, antisas waliptañapataki” sasa (Heb. 12:12, 13). Wayn tawaqonakas jilat kullakanakarojj chʼamañchtʼapjjaspawa. Pablojj akhamwa ewjjtʼäna: “Cristomp mayakïpjjatam laykutejj jumanak taypin maynit maynikam chʼamachtʼasiñasa, munasiñat chuymachtʼasiñasa, maynit maynikam llakisiñasa, munasiñasa, sinttʼasiñas utjchi ukhajja, ukarjam sarnaqasipkakim, mä amuyunikïpjjam, mä pachpa munasiñanikïpjjam, mayachtʼat sarnaqapjjam, mä pachpa amtanikïpjjam, ukhamatwa nayar wal kusisiyapjjetäta. Jan kunsa jumanakajj jiskhisiñ laykusa ni wali wal tukuñ laykus lurapjjamti, jan ukasti mayninakarojj humilde chuymamp uñjapjjam, jumanakat sipansa jilïrïpkaspas ukhama. Jan jumanak pachpatak llakisipjjamti, jan ukasti mayninakatsa llakisipjjarakim” sasa (Filip. 2:1-4). w18.04 pág. 22 párr. 10; pág. 23 párr. 12

Jehová Diosajja, jupar serviñasatakiw Jesús taypejj juchampit jiwañampit salvistu. Diosat libre jakasiñ katoqasajja, Jupar serviñatakiw chʼamachasiñasa. Ukhamatwa akapachampisa ni munañasampisa apayaskañäniti (Gál. 5:16). Noé chachampita familiapampit amtañäni. Jupanakajj qʼañu juchanaka, jan walinak lurir jaqenak taypinsa jakasipkchïnjja, janiw jupanakjam sarnaqapkänti. ¿Kunas jupanakarojj yanaptʼäna? Kuntï Jehová Diosajj lurapjjañap maykäna ukwa taqe chuyma lurapjjäna. Noé chachasa familiapasa arca lurañatakiw chʼamachasipjjäna, jupanakatakisa uywanakatakisa manqʼwa imapjjäna, ukatjja jaqenakaruw Uma Juiciot yatiyapjjäna. Biblianjja “Noesti kunjämtejj Diosajj siskatayna ukhamwa taqe kunsa luräna” sasaw qhanañchi (Gén. 6:22). Ukham lurapjjatapatwa Noé chachasa familiapasa salvasipjjäna (Heb. 11:7). w18.04 pág. 10 párr. 8; pág. 11 párrs. 11, 12

Supayasa demonionakapas janiw gobiernonakaruk apnaqapkiti, jan ukasti falso religionanakarus apnaqapjjarakiwa, qollqe ganañ amtampi negocio lurañanakarus jupaw chʼamañcharaki, ukhamatwa aka oraqpachankir jaqenakar engañjapjje (Apoc. 12:9). Supayajja, falso religionanak toqejj kʼarinakwa Jehová Diosat yatichi, Diosan sutipat armasipjjañapatakis jaqenakarojj wal chʼamañcharaki (Jer. 23:26, 27). Ukhamatwa Diosaruw adorasipkta sasin amuyir suma chuyman jaqenakajj engañjatäpjje, demonionakarus jan amuyasis adorapjjaraki (1 Cor. 10:20; 2 Cor. 11:13-15). Walja qollqe ganañ amtampi negocio lurañanak toqesti, walja qollqenïsakisa walja cosasanakanïsakis kusisit jakasiñajj utjkaspa ukham amuyayasaw jaqenakar engañji (Prov. 18:11). Ukar creyirinakajja, Diosar serviñat sipansa ‘qollqe’ jikjjatañatakiw jakäwinakapan wal chʼamachasipjje (Mat. 6:24). Diosar inas jupanakajj mä jukʼa creyisipkchi, ukampis qollqe munañaw chuymanakap chʼamaktʼayi (Mat. 13:22; 1 Juan 2:15, 16). w18.05 pág. 23 párrs. 6, 7