Mayo

Jesusajj wawatpachwa awk taykapar istʼañ amtäna. Jupajj janipuniw José awkip contras ni María taykap contras saytʼkänti, janirakiw jupanakat sipans jukʼamp yatiñanïkaspas ukham amuyaskänti. Jesusajj jilïr wawjamajj kunayman lurañanakanïnwa, uk phoqañatakis wal chʼamachaspachäna. Familiapar yanaptʼañatakejja, kuntï José uywir awkipajj yatichkäna ukanak yateqañatakejj wal chʼamachasirakpachäna. Kunjamsa Jesusajj mä milagro toqe nasïna, angelanakajj jupjjat kamsapjjänsa, ukanak awk taykapajj awisapjjpachänwa (Luc. 2:8-19, 25-38). Ukampis Jesusajja, jupa pachpaw Qellqatanakat jukʼamp yatjjatirïpachäna. Jupajj Diosan Arupat suma yatjjatirïnwa, ¿kunatsa ukham sistanjja? Waynitükäna ukhajja, Jerusalén markankir yatichirinakajj “wali amuytʼasirïtapatsa jisktʼanakar qhanañchatapatsa wal musparapjjäna” (Luc. 2:46, 47). Jesusajj 12 maranëjjasajj Jehová Diosan wawapätapat janiw pächaskänti (Luc. 2:42, 43, 49). w20.10 págs. 29, 30 párrs. 13, 14

Jesusan jaktatapar creyiñajja, jiwatanakajj cheqapuniw jaktanipjjani sasin taqe chuym confiyañatakiw yanaptʼistu. Apóstol Pablojj jaktañ toqet parlañ qalltkäna ukhajja, akanakwa qhanañchäna: 1) ‘Cristojj juchanakas laykuw jiwäna’. 2) “Imantatäjjarakïnwa”. 3) “Jupajj Qellqatanakarjamaw kimsïr urun jaktayatäjjäna” sasa (1 Cor. 15:3, 4). Jesusan jiwatapasa, imantatäjjatapasa, jaktatapas ¿kunsa uñachtʼayistu? Isaías profetajja, Mesiasajj ‘aka oraqet jikʼinukutäniwa, qhoru jaqenak jakʼaruw imantapjjarakini’ sasaw säna. Ukatjja ‘walja jaqenakan juchanakapwa aparakini’ sasaw sarakïna. ¿Kunjamsa Jesusajj uk luräna? Jaqenak layku jiwasaw uk luräna (Is. 53:8, 9, 12; Mat. 20:28; Rom. 5:8). Jesusan jaktatapajja, juchampit jiwañampit salvatäjjañäniwa munat familiasasa amigonakasas jaktanipjjaniwa sasin confiyañatakiw yanaptʼistu. w20.12 págs. 2, 3 párrs. 4-6; pág. 5 párr. 11

Apóstol Pablojja, judionakan sinagogapanwa jilapartejj predicäna. Sañäni, Tesalónica markankir sinagoganwa judío jaqenakamp parläna, “kimsa sábado urunakaw jupanakarojj Qellqatanakat amuytʼayarakïna” (Hech. 17:1, 2). Niyakejjay Pablojj judiöchïnjja, jan ajjsarasaw sinagogan yatiypachäna (Hech. 26:4, 5). Pablojj judionakar uñtʼänwa, ukatwa jan ajjsaras yatiypachäna (Filip. 3:5). Apóstol Pablon enemigonakapajj Tesalónica markatsa, Berea markatsa alisnukupkäna ukhajja, Atenas markaruw sarjjäna. Ukanjja, “judionakampiru Diosar adorir jaqenakampiruw jupajj sinagogan amuytʼayäna” (Hech. 17:17). Ukampis qhatun yatiykäna ukhajja, yaqha kasta jaqenakampiw jikisïna. Filosofonakasa jan judío jaqenakas utjarakïnwa. Jupanakatakejja kuntï Pablojj yatiykäna ukajj ‘machaq yatichäwinakänwa’. Ukatwa Pablor akham sapjjäna: “Kunanaktï nanakajj jan istʼapjjerïkta ukanakwa jumajj parltajja” sasa (Hech. 17:18-20). w20.04 pág. 9 párrs. 5, 6

Pantjasisajja, janiw janis kunatak sirvksna ukham amuyasiñasäkiti. Niyakejjay taqenis pantjasirïstanjja, taqeniw Jehová Diosan jiwasat khuyaptʼayasiñap muntanjja. Ukatwa Diosajj juchanakas perdonañatakejja, Jesusar jiwas layku jiwañapatak khitanïna (Efes. 1:7; 1 Juan 4:10). Llakinakasat maynimp parlañ munktan ukhajja, jilat kullakanakampiw parltʼassna, jupanakaw jiwasar chʼamañchtʼapjjestaspa, chuymachtʼapjjarakistaspa (Prov. 12:25; 1 Tes. 5:14). Nigeria markankir Joy sat mä kullakajja, llakimpi jan aynachtʼañatakiw chʼamachasïna, jupajj akham siwa: “Janitï jilat kullakanakajj utjkaspa ukhajja, janiw aguantañ puedkiristti. Jupanakajj chʼamañchtʼapkitu ukanwa kunjamsa Jehová Diosajj oracionanakaj istʼitu uk amuyasta. Jupanakatwa mayninakar chuymachtʼañsa yateqawayta” sasa. Ukampis jilat kullakanakasajj kunapachas chuymachtʼatäñ muntan ukjja janiw amuyapkaspati. Ukhamajj jiwasaw experienciani mä jilatarusa jan ukajj mä kullakarusa kunjamäsktansa uk yatiyañasa, ukhamat yanaptʼayasiñataki. w20.12 págs. 23, 24 párrs. 7, 8

Maynin suma amigopäñ munstan ukhajja, kunsa pienstan, kunjamäsktansa, kunanaksa lurtan ukanakatwa parltʼasipjjañasa. Ukampis Jesusan suma amigopäñajj chʼamäkaspas ukhamäspawa. ¿Kunatsa? Maya, janiw Jesusar uñjktanti, ukatwa amigopäñajj chʼamäkaspas ukham amuysna. Apostolonakajj jakapkäna uka tiempon jakiri yaqhep cristianonakajj janirakiw Jesusar uñjapkänti. Ukhamäkchïnsa apóstol Pedrojj akham sänwa: “Cristorojj janis kunapachas uñjapkstajja, jupar munasipjjtawa. Janis jichhajj uñjapkstajja, juparuw confiyapjjtajja” sasa (1 Ped. 1:8). Ukhamasti Jesusan amigopäñatakejj janiw jupar uñjañapunejj wakiskiti. Paya, janiw Jesusampi parlksnati, ukatwa amigopäñajj chʼamäkaspas ukham amuyaraksna. Orasktan ukhajja Jehová Diosaruw orastanjja. Jesusan sutipjjarus oraskstanjja, janiw Jesusar orasktanti. Niyakejjay oracionajj Jehová Diosar adorañampi sasïchejja, Juparukiw orasiñasa, ukatwa Jesusajj jupar orasiñas jan munkiti (Mat. 4:10). Ukhamäkchisa Jesusan amigopäsnawa. w20.04 pág. 20 párrs. 1-3

Nayra Grecia markanjja, tʼijurinakajj jan walin uñjaskasas tʼijusipkakiñapänwa. Sañäni, jupanakajj qarjatasa usuchjatasa tʼijusipkakiñapänwa. Jupanakajj chʼamapar confiyasisa, ukat kunjamtï entrenadorapajj wakichkäna ukar confiyasisakiw tʼijupjjerïna. Cristianonakarojj ukhamarakiw tʼijuñasatak wakichapjjestu. Ukampis jiwasajj janiw chʼamasampik tʼijktanti, jan ukasti, Jehová Diosan jan tukusir chʼamapampiw tʼijtanjja. Diosar confiyañäni ukhajja, jupajj tʼijuñatakiw wakichistani, chʼamaniruw tukuyarakistani. Apóstol Pablojj kunayman jan walinakwa aguantäna. Juparojj jiskʼachapjjänwa, jan waltʼayañatakiw arknaqapjjäna, awisajj janis chʼamanëjjaspa ukhamwa amuyasïna, ukatsti chʼapir uñtataw mä jan walejj tʼaqesiyarakïna (2 Cor. 12:7). Uka jan walinakan uñjasisajj aynachtʼañat sipansa, ukanakajj Jehová Diosar jukʼamp confiyañatakiw yanaptʼitani sasaw säna (2 Cor. 12:9, 10). Ukatwa Jehová Diosajj Pablor yanaptʼapunïna. w20.04 pág. 29 párrs. 13, 14

Jan uñjaski uka regalonakat mayajj akawa: Jehová Diosampi alajjpachankiri organizacionapampi trabajiña (2 Cor. 6:1). Jupanakaw prediktan ukhajj wal yanaptʼapjjestu. Apóstol Pablojj jupampita yaqha jilat kullakanakampit parlkasajj akham sänwa: “Nanakajj Diosamp chika trabajirïpjjtwa” sasa (1 Cor. 3:9). Prediktan ukhajja, ukhamarakiw Jesusamp trabajtanjja. “Taqe markankir jaqenakar nayan discipulojar tukuyapjjam” sasin Jesusajj discipulonakapar siskäna uka qhepatjja, akham sarakïnwa: “Nayajj sapürupuniw jumanakampïskta” sasa (Mat. 28:19, 20). ¿Kunjamsa angelanakamp trabajiraktanjja? Kunapachatï jaqenakar ‘wiñay suma yatiyäwinak’ yatiytan ukhajja, angelanakaw irpistu, ukham yanaptʼapjjatapat wal yuspärtanjja (Apoc. 14:6). Alajjpachat jutir yanaptʼampejj ¿kunanakas lurasiski? Kunapachatï Reinon semillap satanttan ukhajja, yaqhep semillanakajj suma chuymanakar purisajj sumwa alsunipjje (Mat. 13:18, 23). ¿Khitis uka semillanak alsuyasin poqoyi? Kuntï jichhürutak ajllita textojj siski uka arunakampiw Jesusajj uka toqet qhanañchi. w20.05 pág. 30 párrs. 14, 15

Jichhürunakanjja, walja matrimonionakaw divorciasipjje. Maysa toqetjja, yaqhep familianakajj pachpa utans jakapkchejja janiw munasiñ uñachtʼayasipkiti. Familianak ewjjtʼiri mä chachajj akham siwa: “Taykasa awkisa wawanakapas mä utanaksa jakasipkchejja janiw jupanakpur parltʼasipkiti. Computadorampi tabletampi celularampi video juegonakampikiw tiempo aptʼasipjje, janis uñtʼasipkaspa ukhamaw jakasipjje” sasa. Akapachan janiw munasiñajj utjkiti, jiwasajj janiw jupanakjamäñ munktanti. Jan ukasti, familiasarusa jilat kullakanakarus taqe chuyma munasiñatakiw chʼamachasiñasa (Rom. 12:10). ¿‘Taqe chuyma munasiña’ sasajj kuna kasta munasiñatsa parlasktanjja? Kunjam munasiñatï sum apasir familian utjki uka kasta munasiñatwa parlasktanjja. Congregacionasankir jilat kullakanakar ukhamwa munasiñasa, jupanakaw Diosar serviñan familiasajja. Jiwasatï ukham taqe chuyma munasiñäni ukhajja, maynit maynikam yanaptʼasisaw Jehová Diosar mayachtʼat servipjjañäni (Miq. 2:12). w21.01 pág. 20 párrs. 1, 2

Jan mayachtʼata anatirinakani equipojj janiw atipkaspati. Ukampis anatirinakajj mä amtanikïpjjaspa ukhajj atipapjjaspawa. Amuyusasa, kuntï munktan ukasa, Jehová Diosar serviñan mayakïni ukhajja, chuymasajj mayachtʼat equipor uñtasitäniwa. Supayajj pächassna ukwa wal muni. Kun lurañastï Jehová Diosajj munki ukanak lurañ munkasas jiwasan jan wali munañanakas lurañ munaraksna ukwa Supayajj muni. Jehová Diosar serviñ munstan ukhajj taqe chuymaw Jupar serviñasa (Mat. 22:36-38). Supayajj chuymasan pächassna ukwa muni, janipun uk dejañäniti. David reyjamaw Diosar akham sasin mayisiñasa: ‘Phoqat chuyma churita, ukhamat sutimar ajjsarañajataki’ sasa. Uka mayisitarjam sarnaqañatakiw chʼamachasiñasaraki. Jiskʼäpasa, jachʼäpasa, kun lurañtï sapüru amtktan ukanakajja, Diosan santo sutipar taqe chuyma respetataswa uñachtʼayañapa. Jehová Diosan Testigopjamajj ukham lurañäni ukhajja, Diosaruw jachʼañchañäni (Prov. 27:11). Miqueas profetjamaw taqenis akham sarakiñäni: ‘Jehová Diosan sutiparjamaw wiñayatak sarnaqañäni’ sasa (Miq. 4:5, TNM). w20.06 pág. 13 párrs. 17, 18

Nortenkir reyimpi mayni gobiernonakampi Diosan markap contra sartapkani ukhajja, Taqe Chʼamani Diosajj wal colerasini, ukhamatwa Armagedón guerrajj qalltani (Apoc. 16:14, 16). Ukapachaw nortenkir reyin “jiwañapa horasajj purinirakini, janirakiw khitis jupar yanaptʼirejj utjkaniti” (Dan. 11:45). Ukhamarakiw Magog markankiri Gog sasin uñtʼata mayni markanakajj qʼala tukjatäpjjani. Daniel 12:1 textonkir profeciajja, kunjamsa norte toqenkir reyirusa mayni gobiernonakarusa qal tukjasini, kunjamsa jiwasajj salvatäñäni ukanakwa jukʼamp qhanañchi. ¿Uka textonkir arunakajj kamsañsa muni? Cristo Jesús Reyisan yaqha sutipajj Miguel satawa. Jupajj 1914 marat aksaruw Diosan markaparojj ‘arjjataski’, uka maraw Diosan Reinopajj alajjpachan uttʼayasïna. Akat mä jukʼaruw Jesusajj ‘uñstanini’, mä arunjja Armagedón guerranwa enemigonakapar tukjani. Kunjamtï Daniel profetajj siskänjja, uka guerranwa ‘llakisiña horasajj’ tukuyani (Apoc. 6:2; 7:14). w20.05 págs. 15, 16 párrs. 15-17

Joseajj esclavökäna ukhasa, carcelankkäna ukhasa sum jakasjjañatakejj janiw kuns lurirjamäkänti. ¿Kunas llakimp jan aynachtʼañatak yanaptʼpachäna? Jan lurirjamäkäna ukat llakisiñat sipansa, kuna lurañtï churapkäna uk sum phoqañatakiw chʼamachasïna. Taqe kunat sipansa Diosaruw nayrar uchäna, ukatwa kuntï jupajj lurkäna ukar Diosajj wal bendisïna (Gén. 39:21-23). Akapachanjja, awisajj ina chʼusatwa jaqenakajj jan walinak lurapjjestaspa, ukwa Josean sarnaqäwipajj amtayistu. Awisajj inas jilat kullakanakat maynejj jan walinak lurchistaspa. Ukampis Jehová Diosar jachʼa qarqasarjama mä imantasiñarjama uñjañäni ukhajja, janiw llakimpi aynachtʼkañäniti, Jehová Diosarus serviskakiñäniwa (Sal. 62:6, 7; 1 Ped. 5:10). Maysa toqetjja, Joseajj waynäskäna ukhaw Diosajj samkanak toqe amtanakap yatiyäna. Ukhamasti Diosajj wayn tawaqo servirinakaparojj confiyarakiwa ukwa ukajj uñachtʼayistu. Jichhürunakanjja, walja wayn tawaqonakaw José waynjam Diosar wal confiyapjje. Yaqhepasti Diosar serviñ laykuw ina chʼusat carcelan llawintat uñjasipjjaraki (Sal. 110:3). w20.12 pág. 16 párr. 3; pág. 17 párrs. 5, 7

Pedro ukat Juan apostolonakatakejja, Jesusan discipulopäpjjatap layku, Jesusan yatichäwinakap yatiyapjjatap layku uñisitäñajj kusiskañänwa (Hech. 4:18-21; 5:27-29, 41, 42). Nayrïr cristianonakatakejj janiw kunat phenqʼasiñas utjkänti. ¿Kunatsa? Uñisirinakapat sipansa uka humilde cristianonakaw jaqenakar jukʼamp yanaptʼapjjäna. Amuytʼañataki, uka cristianonakat yaqhepajja, Diosan amuytʼayatäsajj Bibliankir libronakwa qellqapjjäna, uka qellqatanakajj jichhakamaw walja millón jaqenakar yanaptʼaski, chuymachtʼaskaraki. Predicapkäna uka Reinojj alajjpachan apnaqjjewa, niyaw aka oraqe apnaqjjarakini (Mat. 24:14). Ukampis cristianonakar uñisiri nayra Roma markan gobiernopajj janiw utj-jjeti. Jesusan nayrïr discipulonakapajj alajjpachan reyinakäjjapjjewa, ukampis enemigonakapajj jiwatäjjapjjewa, jaktanipkani ukhasa cristianonakajj predicapkäna uka Reinomp apnaqatäpjjaniwa (Apoc. 5:10). w20.07 pág. 15 párr. 4

Diosan promesanakaparojj Abrahanajj wal confiyäna, Diosan Reinopan reyïñapäkäna uka Ajllitaru, mä arunjja, Mesiasar niyas uñjkaspa ukhamwa amuyäna. Ukatwa Jesusajj judionakar akham säna: “Jumanakan Abrahán awkimasti, nayan uruj uñjañ suykasajj wal kusisïna. Ukjja uñjänwa, kusisirakïnwa” sasa (Juan 8:56). Ukhamasti Abrahanajja wawanakapat yaqhepajj Jehová Diosan Reinopankapjjañap yatïnwa, Diosarojj uka promesap phoqañapkam suyañatakis listokirakïnwa. ¿Kunjamsa Abrahanajj Diosan uttʼayat markapa, mä arun Diosan Reinop suyatap uñachtʼayäna? Abrahanajj janiw akapachankir reinonakan markachiripar tukkänti, janiw mä cheqan utjanoqañsa, ni mä reyir yanaptʼañsa amtkänti. Janirakiw jupatak mä reino uttʼayañ amtkänti. Jan ukasti Jehová Diosar istʼasapuniw sarnaqäna, promesap phoqañapwa suyarakïna. Ukham lurasaw Diosar wal confiyatap uñachtʼayäna. w20.08 pág. 3 párrs. 4, 5

Jesusajj aka oraq apnaqkani ukhajja, janiw khitis “usutätwa” sisjjaniti sasaw Jehová Diosajj säna (Is. 33:24). Ukhamasti, Diosajj jiwatanakar jaktaykani ukhajja, jan usut cuerponwa jaktayani. Ukampis janiw ukjpachajj perfectöpkaniti. Perfectöjjapjjaspa ukhajja, familiaranakapajj inas jan uñtʼjjapjjchispati. Amuyatajja, Cristojj waranq maranak apnaqkani ukhaw jaqenakajj jukʼat jukʼat perfector tukusipkani. Waranq maranak tukuyjjani ukhajja, Jesusajj Awkiparuw Reino kuttʼayjjani. Uka Reinojja kuntï Diosajj munkäna ukanakwa lurani, jaqenakas uka Reinonwa perfectöpjjarakini (1 Cor. 15:24-28; Apoc. 20:1-3). Familiaranakasaru amigonakasaru jaktanir uñjasajj kunjamas jikjjatasiñäni uk amuytʼañäni. ¿Kusisiñat larusiñäniti jan ukajj jachañänicha? ¿Wali kusisitäsajj Jehová Diosarut cancionanakampi jachʼañchañäni? Janiw yatktanti, ukampis jiwatanakar jaktanir uñjasajja, jukʼampiw Jehová Diosampir Jesusampir munasiñäni. w20.08 págs. 16, 17 párrs. 9, 10

Jehová Diosar serviñatakejj solteröpjjaspa ukatakiw apóstol Pablojj cristianonakar chʼamañchäna (1 Cor. 7:8, 9). Pablojj janiw solteronakarojj jiskʼachkänti. Amuytʼañataki, Timoteo soltero waynarojj kunayman asignacionanakwa churäna (Filip. 2:19-22). Ukhamajj janiw mä jilatarojj casadötap laykusa jan ukajj solterötap laykusa suma wakichtʼatawa jan ukajj janiw wakichtʼatäkiti sasajj sisksnati (1 Cor. 7:32-35, 38). Jesusasa Pablosa janiw casarasiñamawa jan ukajj solteröñamawa sasajj yatichapkänti. Ukhamajj ¿casarasiñ toqetsa solteröñ toqetsa jiwasajj kamsaraksnasa? La Atalaya 1 de octubre, 2012 revistan akham siwa: “Casarasiñasa solteröñasa Diosan regalopawa. [...] Solteröñajj mä phenqʼäkaspasa tʼaqesiñäkaspasa ukham janiw Jehová Diosajj amuykiti” sasa. Ukhamajj solter jilat kullakanakarojj respetompiw uñjañasa. w20.08 pág. 28 párrs. 8, 9

Yaqhep markanakanjja, jaqenakajj Reinon suma yatiyäwip kusisitaw istʼapjje, ukajj chuymaparuw purtʼaraki. Ukampis yaqhep markanjja Diosatsa Bibliatsa jukʼanikiw istʼañ munapjje. Markasan ukhamäpansa janisa, predicañajj tukusjjani ukhakam predicaskakiñaswa Jehová Diosajj muni. Kunapachas predicañajj tukusjjani uk Diosajj amtjjewa, uka uru purinkani ukharakiw “akapachan tukusiñapajj jutani” (Mat. 24:14). Jesusajj jayäkipanwa kunanakas aka qhepa urunakan pasañapäna, jaqenakas kunjamäpjjañapänsa uk yatiyjjäna. Uka jan waltʼäwinakaw discipulonakarojj predicañ jaytayaspäna. Ukatwa Jesusajj “amuyasipjjapunim” sasin ewjjtʼäna (Mat. 24:42). Noé chachajj jakkäna uka urunakanjja, jaqenakajj janiw jupan arunakapar istʼapkänti, yaqhanakakwa lurasipkäna. Jichhürunakanjja ukarakiw pasistaspa (Mat. 24:37-39; 2 Ped. 2:5). Ukatwa predicacionajj jakäwisan nayrankañapatak chʼamachasiñasa. w20.09 pág. 8 párrs. 1, 2, 4

Supayajj ‘wali coleratawa’, ‘janiw nayarojj kamachkitanisa’ sasin janiw amuyañasäkiti, jupajj taqeniruw aynachtʼayañ munistani (Apoc. 12:12). Jutïrinjja, Jehová Diosan taqe servirinakapaw yantʼat uñjasiñäni. Niyaw ‘wali tʼaqesiñ tiempojj jutani’. “Akapachan qalltapat jichhakamajj janipuniw ukham tʼaqesiñajj utjkänti, janirakiw mayampis utjkaniti” sasaw Bibliajj sistu (Mat. 24:21). Inas uka tiempon familiaranakasajj jiwas contra saytʼapjjchini, Diosar serviñas jarkʼatäjjarakchini (Mat. 10:35, 36). Jiwasajj ¿Asá reyjamat Jehová Diosaw yanaptʼitani, jarkʼaqarakitani sasin confiyañäni? (2 Crón. 14:11). Jehová Diosajj kunatï jutïr urun paskani ukatak wakichtʼatäsna ukwa muni, ukatwa jupar jukʼamp confiyañasatak chʼamañchistu. Suma saytʼatäñasatakejja, ‘suma phoqeri amuyasir esclavo’ toqew ‘tiempoparu manqʼa churistu’, mä arunjja tiempoparu yatichistu (Mat. 24:45). Ukhamasti jiwasajj Jehová Diosar jukʼamp confiyañatakejj chʼamachasiñasarakiwa (Heb. 10:38, 39). w20.09 pág. 18 párrs. 16-18

Jehová Diosajja, amtaparjamäki ukhajj espíritu santopampiw kuntï munki ukanak autoridadanakar lurayaspa. Jaqenakajj jawiran utjki uka umjja kawkirutï irpañ munapki ukaruw qʼawsusajj irpapjjaspa. Jehová Diosajja, ukhamarakiw espíritu santopampejj autoridadanakan amuyunakap amtaparjam mayjtʼayaspa. Ukhamatwa autoridadanakajj kunatï Diosan markapar yanaptʼkaspa ukanak lurañ amtapjjaspa (Esdras 7:21, 25, 26 uñjjattʼarakïta). ¿Kunsa jiwasajj lursna? Kuntï autoridadanakajj amtapkani ukanakajj tantachäwinakarusa predicacionarusa jan waltʼayirjamäspa ukhajja, “marka apnaqerinakatakisa, ukhamarak taqe autoridadanakatakisa” oraraksnawa (1 Tim. 2:1, 2; Neh. 1:11). Kunjamtï nayra cristianonakajj lurapjjerïkänjja, ukhamarakiw carcelankir jilat kullakanak laykojj Diosar wal orapjjsna (Hech. 12:5; Heb. 13:3). w20.11 pág. 15 párrs. 13, 14

Bibliat yateqerisaru bautisasir uñjtan ukhajj walpun kusistanjja (1 Tes. 2:19, 20). Bibliat yateqerin nayrar sartatapasa bautisasitapasa qhawqsa jumasa congregacionasa jupar yanaptʼañataki chʼamachasiwayapjjta ukwa uñachtʼayi, ukatwa jichhak bautisatanakajja, yatichirinakapata ukhamarak congregacionat sum parlir ‘cartanakäpjje’ (2 Cor. 3:1-3). Sapa phajjsejj 10.000.000 ukha estudionakaw oraqpachan pusi maranak utjawayi, ukajj wali kusiskañawa. Uka pusi maranakanjja, niya 280.000 jaqenakaw Jehová Diosan Testigopjam sapa mara bautisasiwayapjje. Ukampis walja millón yateqerinakan bautisasipjjañapaw faltaski, ¿kunjamsa jupanakar yanaptʼsna? Jehová Diosajj pacienciampiw jaqenakarojj Jupan Testigopäpjjañapatak suytʼaski. Tiempojj niyaw tukusiski, ukatwa jupanakar yanaptʼañatak chʼamachasiñasa, ukhamat jankʼak bautisasipjjañapataki (1 Cor. 7:29a; 1 Ped. 4:7). w20.10 pág. 6 párrs. 1, 2

Saúl reyejj kun lurañaptï Jehová Diosajj maykäna ukarojj janiw istʼkänti. Samuel profetajj jan wal luratap qhanañchkäna ukhajja, janis pantjaskaspa ukhamwa tuküna. Luratapajj janis kunäkaspa, mayninakas juchanïpkaspa ukhamwa säna, ukampiw luratanakap imtʼañ munäna (1 Sam. 15:13-24). Uka nayrajja ukham chuymanïtapwa uñachtʼayarakïna (1 Sam. 13:10-14). Saúl reyejj jachʼa jachʼa tukuñampiw apayasjjäna. Janiw amuyunakap cheqañchaskänti, ukatwa Jehová Diosajj jupatak colerasïna, reyïñatsa apaqarakïna. Jiwasajj janiw Saúl reyit yateqasiñ munktanti, ukatwa akham jisktʼasiñasa: “¿Biblian ewjjtʼanakap liyisajj janiw ukajj nayatakïkiti sasat sistjja? ¿Luratajajj janiw sinti jan walïkiti sasat amuytjja? ¿Jan wal luratajat mayninakarut juchañchtjja?” sasa. Uka jisktʼanakat mayarus jïsa sisstanjja, amuyunakassa luratanakassa cambiañasawa. Jan uk lurksna ukhajja jachʼa jachʼaw tukjjsna, Diosas janiw amigoparjam uñj-jjestaspati. w20.11 pág. 20 párrs. 4, 5

Wayn tawaqo, khitirus servïta ukwa jumajj amtañama. Khitis Jehová Diosajja, kunas munañapajja, kunjamsa jumajj munañap phoqasma ukanakjja juma pachpaw yatjjatañama (Rom. 12:2). Ukhamatakwa Jehová Diosar serviñ amtäta, uka amtar puriñaw vidaman wali importantejja (Jos. 24:15). Jumatï Biblia sapür liyïta, sapa kut yatjjatarakïta ukhajja, jukʼampiw Jehová Diosar munasïta, jukʼampirakiw jupar confiyäta. Jehová Diosan munañapwa nayrar uchañama. Akapachankir jaqenakajja, ‘kunanaktï sum lurañ yatkta ukanak juman askimatak luräta ukhajj kusisitaw jakasïta’ sasaw sapjje. Ukampis khitinakatï walja qollqenïñataki chʼamachasipki ukanakajj ‘kunayman llakinakampiw apjjatasipjje’ (1 Tim. 6:9, 10). Jumatï Jehová Diosar istʼäta, munañap nayrar uchäta ukhajja, kusisitaw jakasïta, ‘taqe luräwinakamas sumaruw sarani’ (Jos. 1:8). w20.10 págs. 30, 31 párrs. 17, 18

Nayrïr cristianonak tiemponjja, Jesusajj kuntï yatichkäna ukajj kuntï jutïrin katoqapkani ukar confiyapjjañapatakiw jaqenakar yanaptʼäna. Jesusajj kuna lurañtï qalltawaykäna ukanak lurasipkakiñapatakiw discipulonakapar mayïna, uksti ‘aka oraqpachanwa’ yatiyapjjañapäna (Hech. 1:8). Jupanakajj janiw chʼamapampikejj uk lurapkaspänti, jan ukasti Jesusajj apayanipjjämaw siskäna uka espíritu santon yanaptʼapampikiw phoqapjjaspäna (Juan 14:26; Zac. 4:6). Jesusan discipulonakapajja, 33 maran Pentecostés urunwa espíritu santo katoqapjjäna. Ukan yanaptʼapampejj jankʼakiw predicañ qalltapjjäna, mä jukʼa tiemponakwa walja jaqenakajj uka suma yatiyäwinak taqe chuyma katoqasipjjäna (Hech. 2:41; 4:4). Arknaqata uñjasipkäna ukhasa, Jesusan discipulonakapajj janiw ajjsarayasipkänti. Antisas akham sasaw orasipjjäna: “Esclavonakamarus yanaptʼam, ukhamat arunakamat jan ajjsaras parlasipkakiñapataki” sasa. Ukatsti, taqeniw espíritu santomp phoqtʼatäpjjäna, “jan ajjsarasarakiw Diosan arunakapat parlapjjäna” (Hech. 4:18-20, 29, 31). w20.10 pág. 21 párrs. 4, 5

¿Kunatsa Jehová Diosajj cheqapuniw Jesusar jaktayäna sasin sissna? Jesusajj jiwatat jaktjjäna uka qhepatjja, waljaniw jupar uñjapjjäna (1 Cor. 15:5-7). Ukanakat parlkasajja apóstol Pablojj Pedrotwa nayraqat ayti. Mä qhawqha discipulonakasa Jesusajj jaktjjasin Pedroruw uñstatayna sasaw qhanañchapjjarakïna (Luc. 24:33, 34). Ukatsti 12 apostolonakaparuw Jesusajj uñstäna. Qhepatsti, “phesqa patakatsa jukʼampi jilatanakaruw uñstäna”, inas Galilean tantachatäsipkchïna, ukajj Mateo 28:16-20 textonwa qhanañchasi. Jesusajj ‘Santiagoruw uñstarakïna’. Jupajj jilapänwa, ukhakamajja janiw Jesusan Mesiasätap creykänti (Juan 7:5). Ukampisa jaktatap yatisajja, janiw pächasjjänti. Pablojj 55 mara jakʼanakan uka carta qellqkäna ukhajja, Jesusar jaktat uñjapkäna ukanakatjja waljaniw jakasipkäna. Ukhamajj maynitï Jesusan jaktatapat pächasispänjja, jupanakaruw jisktʼasispäna. w20.12 pág. 3 párrs. 5, 7, 8

Usutäktan jan ukajj jaya tiempo wali usutäjjtan ukhajja, facilakwa jan walinak pienssna. Ukham uñjasisajj Diosaruw yanaptʼa mayiñasa. Diosajj janis milagro toqe jichha tiempon qollkchistojja, chuymachtʼistuwa, jan walinak aguantañatakis chʼamwa churarakistu (Sal. 94:19). Sañäni, utan kuna lurañanakampejja, Diosajj jilat kullakanakampiw yanaptʼayistaspa. Jupanakaruw jiwasamp orasipjjañapatakejj chʼamañchaspa. Jan ukajj Bibliankir suma arunakwa amtayarakistaspa, mä arunjja, kunjamsa machaq mundon perfecto cuerponi, jan usuntasa jakasjjañäni ukwa amtayistaspa (Rom. 15:4). Usutäktan ukhajja, nayrjam predicañ jan puedjjasajj wal llakissna. Laurel sat kullakajja, 37 maranakaw samsuñ yanaptʼir mä maquinan (pulmón de acero) jakäna. Jupajj canceranïnwa, walja kutirakiw operayasïna, jañchipatsa usutarakïnwa. Ukham jan walinakansa uñjaskchïnjja, predicaskakïnwa. Enfermeranakaru, utapan atiendipkäna uka doctoranakar predicatapatjja, 17 jaqenakaruw Bibliat yatjjatapjjañapatak yanaptʼäna. w20.12 pág. 24 párr. 9; pág. 25 párr. 12

Apóstol Pablojj yanaptʼwa munäna. Niya 56 maranjja, walja jaqenakaw Pablorojj Jerusalenankir templo anqäjjar qatatsupjjäna, niyaw jiwayapjjarakïna. Qhepürusti, Sanedrín nayraqatar irpapjjäna ukhajja, niyapuniw enemigonakapajj jupar jiwayapjjäna (Hech. 21:30-32; 22:30; 23:6-10). Ukapachajj inas Pablojj akham jisktʼaschïna: ‘¿Kunapachkamas akham tʼaqesiskäjja?’ sasa. ¿Kuna yanaptʼsa Pablojj katoqäna? Pablor katuntapkäna uka arumajja, Jesusaw mä visionan jupa lador saytʼasisajj akham säna: “¡Jan ajjsaramti! Kunjamtï Jerusalén markan nayat phoqatpach yatiyktajja, ukhamarakiw Roma markan yatiyañama” sasa (Hech. 23:11). Ukajj walpun Pablor chʼamañchpachäna. Uka arunakampejja, Jerusalenan yatiyatapatwa Jesusajj Pablor felicitaskäna. Ukatjja, Roma markarojj jan kuna kamachtʼataw purïta sasaw saskarakïna, ukanwa jukʼamp yatiyañapäna. Uka arunak istʼasajja, Pablojj janiw ajjsarjjänti, kunjamtï mä wawajj tatapan amparapan jan ajjsarki ukhamaw jikjjataspachäna. w20.11 pág. 12 párrs. 1, 3; pág. 13 párr. 4

Diosan Reinop suytʼañajj “kunjamtï mä anclajj barcor katjjäskejja, ukhamarakiw jakäwisar katjjasi” mä arunjja, jan walinakan uñjasktan ukhajj jan sint llakisiñatakiw yanaptʼistu. Kunanakatï jichhajj llakisiykistu ukanakajj jutïrin janiw amtatäjjaniti sasaw Jehová Diosajj sistu, ukanakatwa lupʼiñasa (Is. 65:17). Niyas paraisonkjjsna ukhamwa amuytʼañasa, ukanjja suman jakasiñaw utjani, jan walinakas janiw utj-jjaniti (Miq. 4:4). Ukanakat jan armasiñatakejja, yaqhanakaruw uka suytʼäwisat parlañasaraki. Ukhamajj predicañataki, jaqenakar Jesusan discipulopar tukuyañatak chʼamachasipjjapuniñäni. Ukhamtï lurañänejja, ‘kuntï suyasipktan ukjja tukuykam jan pächasisaw suyasipkakiñäni’ (Heb. 6:11). Akapachan tukusiñapar jukʼamp jakʼachaskasajja, jukʼamp jan waltʼäwinakanwa uñjasiñäni, ukanakajj jukʼampiw llakisiyistaspa. Chʼamasar confiyañat sipansa Jehová Diosar confiyañaw uka jan waltʼäwinakan uñjaskasajj pacienciampi suytʼañataki, jan sint llakisiñatak yanaptʼistani. Jehová Diosan aka promesapar confiyatas luratanakasampi taqenis uñachtʼayapjjañäni, Jupajj akham sistuwa: ‘Jumanakatejj paciencianïpjjäta, confiyapjjarakïta ukhajja, chʼamanïpjjätawa’ sasa (Is. 30:15, TNM). w21.01 pág. 7 párrs. 17, 18

Santiago 5:11 texton Jehová Diosajj wali munasir chuymaniwa sasin siski ukamp chikajj wali khuyaptʼayasiriwa sarakiwa. Ukham Diosätapaw jupar jakʼachasiñatak yanaptʼistu (Éx. 34:6). Mä toqetjja, juchanakas perdonasaw khuyaptʼayasirïtap uñachtʼayistu (Sal. 51:1). Biblian khuyaptʼayasiña sasinjja, janiw maynir perdonaña sañak munkiti. Jan ukasti, maynejj maynir tʼaqesir uñji ukhajja, jupat sinttʼasisajj yanaptʼañatakiw chʼamachasi ukwa sañ munaraki. Mä taykajj wawapar wal munasi, Jehová Diosajj ukat sipans jukʼampwa yanaptʼañ munistu sasaw Bibliajj qhanañchi (Is. 49:15). Tʼaqesktan ukhajja, khuyaptʼayasiñapatwa jiwasar yanaptʼistu (Sal. 37:39; 1 Cor. 10:13). Jiwasajj Jehová Diosat yateqasisaw jilat kullakanakasar perdonañasa, janirakiw jupanakatak chuyma ustʼata sarnaqañasäkiti (Efes. 4:32). Maysa toqetjja, jan waltʼäwinakan uñjasipkipan jupanakar yanaptʼasaw khuyaptʼayasirïtas uñachtʼayaraksna, ukham lurasajja, Jehová Diosat yateqasitaswa uñachtʼaytanjja, jupjam taqe chuyma munasirejj janiw utjkiti (Efes. 5:1). w21.01 pág. 21 párr. 5

Familia pʼeqtʼirejj jakañatak wakiski ukwa familiapar churañapa. Ukampis janiw ukaruk chuym uchañapäkiti. Sañäni, janiw trabajoruki tiempo aptʼasiñapäkiti, ukham luraspa ukhajja, familiaparojj janiw Jehová Diosamp sum apasiñapatakisa kusisitäñapatakis yanaptʼjjaspati, janirakiw wawanakapar yatichjjaspati ni cheqañchjjaspasa. Diosajj yanaptʼañwa munistu ukatwa cheqañchistu (Heb. 12:7-9). Jesusajja Awkipjamarakiw khitinakarutï pʼeqtʼkäna ukanakarojj munasiñampi yatichäna, cheqañcharakïna (Juan 15:14, 15). Jesusajj qhana arunakampiw cheqañchistu, ukampis munasiñampiw uñjarakistu (Mat. 20:24-28). Pantjasiri jaqëtas layku jan walinak lurirïtassa yatirakiwa (Mat. 26:41). Jehová Diosampita Jesusampit yateqasiri familia pʼeqtʼirejja, esposapana wawanakapan pantjasirïtap yatiwa, ukatjja pantjasipjje ukhajj janiw jupanakatak wal colerkiti (Col. 3:19). Jan ukasti jupas pantjasirïtap yatisajj Gálatas 6:1 texton ewjjtʼaparjamaw “llampʼu chuymampi” cheqañchi. Jesusjamarakiw arunakampik sañat sipansa, sarnaqatapamp familiapar yatichi. w21.02 págs. 6, 7 párrs. 16-18

Jehová Diosajj Yoqapan vidapampiw congregacionankir jilat kullakanakan vidapsa, taqe khitinakatï Jesusar confiyapkani uka jaqenakan vidapsa alawayi (Mar. 10:45; Hech. 20:28; 1 Cor. 15:21, 22). Ukatwa Jehová Diosajj congregación pʼeqtʼañapatakejj Jesusar uttʼayawayi. Ukhamajja, Jesusajj kunsa jaqenakasa, familianakasa, congregacionankir jilat kullakanakas lurapjjañapa uk sañatakisa phoqayañatakis derechoniwa (Gál. 6:2). Ukampis janiw kunsa lurañasa, kunsa jan lurañasäki ukak siskistuti, jan ukasti sapa mayniruw munasiñampi uñjistu, cuidarakistu (Efes. 5:29). Kullakanakajja, Jesusajj khiti jilatanakarutï congregación cuidañapatak uttʼayki ukanakar istʼasaw Jesusar respetapjjatap uñachtʼayapjje. Jehová Diosajja, jilatanakaruw pʼeqtʼirinakjam uttʼayi, jupanakajj kullakanakaru munasiñampi respetompi uñjasaw uk sum amuyapjjatap uñachtʼayapjjaraki. Congregacionan taqenitï Jehová Diosajj kunatsa pʼeqtʼirinak uttʼayi uk amuyapjjañäni, ukar respetapjjarakiñäni ukhajja, congregacionan sumankañaw utjani. Jukʼampisa munasir Jehová Dios Awkisaruw jachʼañchañäni. w21.02 pág. 19 párrs. 14-17

Davidajj Saulat escapasin filisteo oraqen jakkäna ukapachajja, Davidampi jaqenakapampejj familianakap jaytasaw mä guerrar sarapjjäna. Ukañkamasti, enemigonakapaw utanakapar sarasajj taqe familianakap preso apasjjapjjäna. Uk uñjasajja, Davidajj nuwasiñatak wali experiencianïtap yatisajj familianakap aparasinjjañwa amtaspäna. Ukampis uk lurañat sipansa, Jehová Diosan yanaptʼapwa thaqäna. Diosar akham jisktʼäna: “¿Uka lunthata jaqenakarojj arktañajjati?” sasa. Diosasti “arktaskakim, jikjjatätawa” sasaw sarakïna (1 Sam. 30:7-10). ¿Kunsa ukat yateqasma? Amtanakar janïr purkasajja, nayraqatajj yaqhanakaruw uka toqet jisktʼasiñama. Awk taykamampi jan ukajj jilïr irpirinakampiw parltʼañama. Jupanakaw suma ewjjtʼanak churapjjeristam. Jehová Diosajj jilïr irpirinakaruw jumar yanaptʼañapatakejj uttʼayi. Jupanakarojj confiyarakiwa, jumasti jupanakar confiyarakismawa. Jehová Diosajja, jupanakarojj congregacionaruw mä ‘regaljam’ churi (Efes. 4:8). Jumatï jupanakat yateqasïta, ewjjtʼanakaparus istʼarakïta ukhajja, suma amtanakaruw purïta. w21.03 págs. 4, 5 párrs. 10, 11

Maynejj Bibliat yateqki ukarjam jan lurki ukhajja, chʼalla patjjar utachasiri jaqempi sasiwa. Jupajj inamayakiw wal trabaji sasaw Jesusajj säna. ¿Kunatsa? Umajj wal sartanini, thayas wali chʼamamp thaytʼanirakini ukhajja, utajj allthaptjjaniwa (Mat. 7:24-27). Jiwasatï kuntï yateqktan ukarjam jan lurkañäni ukhajja, ukhamarakiw chʼamachasitasajj inamayakïni. Problemanakan uñjaskañäni, arknaqata uñjaskañäni ukhajja, Diosarojj jukʼakwa confiyjjañäni. Ukampis, jiwasatï Bibliat yatjjatasin ukarjam lurañäni ukhajja, suma amtanakaruw puriñäni, sumakiw jikjjatasiñäni, Jehová Diosarus jukʼampiw confiyarakiñäni (Is. 48:17, 18). Jan waltʼäwinakan uñjasisajj jan jitheqtas serviskakiñatakejja, Jehová Diosaruw oracionan yanaptʼa mayisiñasa, Arupatsa jan jaytasaw yatjjatañasa. Jehová Diosar jachʼañchañaw jukʼamp importantejja, janiw ukat armasiñasäkiti. Jupajj janipuniw jaytanukkistaniti, janirakiw ni kunas jiwasar munasiñapatak jarkʼkaniti, ukanakat jan pächasiñäniti (Heb. 13:5, 6). w21.03 pág. 15 párr. 6; pág. 18 párr. 20