Junio

Yatichirinakajja, Bibliat yateqerinakasat llakisipjjañasawa. Niyas jilat kullakanakasäjjaspa ukhamwa jupanakar uñjañasa. Diosar serviñ layku akapachankir amigonakap jaytañasa nayra jakäwip apanukuñasa yateqerinakatakejj chʼamakïspawa. Ukatwa suma yatichirinakajja, khitinakatï yateqerir yanaptʼapkaspa ukanakaru congregacionan uñtʼayapjje. Ukhamatwa yateqerejj Diosar jukʼamp serviskakiñatakisa jan waltʼäwinakar saykatañatakisa Diosan markapan yanaptʼa katoqaspa. Yateqerejj congregación taypinkjjaspasa Diosan familiap taypinkjjaspasa ukham amuyasiñapwa muntanjja. Jupatï jilat kullakanakar jakʼachasjjani ukhajja, Diosar munasiñ jan yanaptʼapki uka amigonakapar jaytañajj janiw chʼamäkaniti (Prov. 13:20). Akapachankir amigonakapatï jupat jan kuns yatiñ munjjapjjani ukhajja, Jehová Diosan markapan suma amigonakwa jikjjataspa ukwa amuyani (Mar. 10:29, 30; 1 Ped. 4:4). w20.10 pág. 17 párrs. 10, 11

Jehová Diosan amigopäñatakejja, Jesusan amigopäñasawa. ¿Kunatsa ukham sistanjja? Uk pä toqet yatjjatañäni. Maya, Jesusajj discipulonakapar akham sänwa: ‘Nayaruw munasipjjesta ukatwa alajjpachankir Awkejj jumanakar munasipjjtamjja’ sasa (Juan 16:27). Ukatsti akham sarakïnwa: “Naya taypikiw Awkin ukar puriñajj utji” sasa (Juan 14:6). Jesusan jan suma amigopäkasin Jehová Diosan amigopäñ munañajja, punknam jan pasas mä utar mantañ munañampi sasiwa. Jesusajja, uka toqet akham sarakïnwa: “Ovejanakajj mantapki uka punkojj nayätwa” sasa (Juan 10:7). Paya, Awkipajj kunjam chuymanisa uk wali qhanwa Jesusajj uñachtʼayäna. Ukatwa discipulonakapar akham säna: “Khititejj nayar uñjkitu ukajj Awkirojj uñjarakiwa” sasa (Juan 14:9). ¿Kunanak lurasas Diosar uñtʼaraksna? Jesusar uñtʼasaw Jehová Diosar uñtʼaraksna. Jesusat jukʼamp yateqasajja jukʼampiw jupar munasiñäni. Jesusar jukʼamp munasiñäni ukhajja, jukʼampirakiw Awkipar munasiñäni. w20.04 págs. 21, 22 párrs. 5, 6

Kawkïr jilat kullakanakatï usutäsin ikiñankapki, jan ukajj silla de ruedas ukankapki, sartañ jan puedipki, jan sum uñjapki ukanakajja, ¿jan usutäpki uka wayn tawaqonakamp chik tʼijupjjaspati? Jïsa tʼijupjjaspawa. Edadani jilat kullakanakasa, usutanakasa wiñay jakañar apki uka thakinwa tʼijusipki, ukampis janiw pachpa chʼamapamp tʼijupkiti, jan ukasti Jehová Diosan chʼamapampiw tʼijusipki. Jupanakajj telefonotwa tantachäwinak istʼapjje, jan ukajj JW Streaming programat apaqat videonakwa uñtapjje. Jupanakajj familiaranakaparu, doctoranakaru, enfermeranakaruw Diosan arunakap yatiyapjje, ukhamatwa Jesusajj ‘jaqenakar nayan discipulojar tukuyapjjam’ siskäna uk phoqasipki. Usutätas laykojja, janiw aynachtʼañasäkiti, janirakiw wiñay jakañar apki uka thakin janis tʼijuñ puedjjsna ukham amuyañasäkiti. Jehová Diosajj jupar confiyatasata, kunanaktï jupa layku lurawayktan ukanakat wal munasistu. Jan walinakan uñjasktan ukhaw Diosan yanaptʼap jukʼamp muntanjja, jupasti janipuniw jaytjkistaniti (Sal. 9:10). Antisas jukʼampiw jakʼachasistani. w20.04 pág. 29 párr. 16; pág. 30 párr. 17

¿Mä religionar saririmpejj kuna toqenakatsa parlsna? Kunanakarus jiwasjam creyiraki ukwa amuytʼañasa. Inas jupajj mä Diosaruk adorchi, Jesusaw jiwasar salvañatak jiwawayi, jan walinakajj niyaw tukusjjani sasin amuyarakchi. Kunanaksa jiwasjam creyiraki ukanakatwa Bibliampi chuymar purtʼkir parltʼañasa. Inas utanejj kunanaktï religionapan yatichapki ukanak jan taqpach creykchiti. Ukhamasti kawkïr religionarus sari uk yatisajja, kunsa jupajj creyi uk amuyañatakiw chʼamachasiñasa. Misionero mä jilatajja, akham siwa: “Yaqhepajj Trinidad yatichäwiruw creyta sapjjewa, ukampis Awkimpi, Yoqampi, espíritu santompejj janiw mä sapa Diosäkaspati sasaw sapjjaraki [...]. Mä jaqejj kunarus creyi uk yatisajj facilakwa uka toqet parltʼsna” sasa. Ukhamasti kunanakarus jaqenakajj cheqpachapun creyipjje uk yatiñatakiw chʼamachasiñasa. Ukhamatwa apóstol Pabljamajj ‘kunayman jaqenakar yanaptʼañatak taqe kunar tukuñäni’ (1 Cor. 9:19-22). w20.04 pág. 10 párrs. 9, 10

Wali tʼaqesiñ tiemponjja, Jehová Diosampi Jesusampiw servirinakapar salvapjjani sasaw Daniel profetasa apóstol Juanasa sapjjäna. Ukhamasti kunatï jutïrin paskani ukar janiw ajjsarañasäkiti. Danielajj khitinakan sutinakapatï “libron” qellqatäki ukanakaw salvatäpjjani siwa. Ukhamasti, ¿sutisajj “libron” qellqatäñapatakejj kunsa lurañasa? Jehová Diosan Corderoparu, mä arunjja Jesusar confiyataswa uñachtʼayañasa (Juan 1:29). Diosar vidas katuyasisajj bautisasiñasawa (1 Ped. 3:21). Ukatsti Diosan Reinopar yanaptʼañatakejj Jehová Diosar uñtʼapjjañapatakiw jaqenakar taqe chuyma yanaptʼañasa. Jichhaw Jehová Diosampiru markapampiru jukʼamp confiyañatakejj wal chʼamachasiñasa. Jichharakiw Diosan Reinopar yanaptʼañasa. Ukanak lurañäni ukhajja, Diosan Reinopajj norte toqenkir reyimpiru sur toqenkir reyimpir chhaqtaykani ukhajj salvatäñäniwa. w20.05 pág. 16 párrs. 18, 19

Adanampi Evampejja Diosan Jehová sutip yatipjjänwa. Jupanakajja, Diosajj taqe kun luratapsa, jupanakar vida churatapsa, mä suma paraíso churatapsa, mä perfecto esposo, mä perfecta esposa churatapsa yatipjjarakïnwa (Gén. 1:26-28; 2:18). Ukampis ¿kunanaktï Jehová Diosajj jupanakatak lurkäna ukanakat lupʼisipkakïnti? ¿Diosar jukʼamp munasiñatakisa, yuspärañatakisa chʼamachasisipkakïnti? Janiw ukham lurapkänti, Diosan enemigopajj jupanakar yantʼkäna ukhaw ukajj qhan uñjasïna. Supayajj mä asiru taypiw akham sasin Evar jisktʼäna: “¿Ukhamajj Diosajj sapjjtamti: ‘Janiw kawkïri qoqan achunakapsa manqʼapjjätati’ sasa?” (Gén. 2:16, 17; 3:1). Ukham jisktʼasajja, Supayajj jan amuykañakwa Diosar kʼarintäna. Diosajj janiw ukham siskänti, mä sapa alin frutapatakwa jan manqʼapjjañapäkänti (Gén. 2:9). Diosajj janis wajjtʼasirïkaspa ukhamwa amuyayäna. Inas Evajj ‘¿cheqapuniti Diosajj kunatï sumäki ukanakat jarkʼaspachïtu?’ sasin jisktʼaschïna. w20.06 págs. 3, 4 párrs. 8, 9

Diosan servirinakapat yaqhepajja, jilat kullakanakas chuym ustʼayapkaspa ukhamwa amuyasipjje. Apóstol Pablojja, ‘jumanak taypin kuna quejasiñas utjaniwa’ sasaw säna. Inas maynejj cheqaparjam jan uñjkchistuti. Ukampis ukanakampi apayasiñäni ukhajja, chuymwa ustʼayassna, Diosan markapatsa jitheqtjjaraksnawa. Sudamérica cheqan jakasiri Pablo sat mä jilatarojj ina chʼusatwa juchañchapjjäna. Janis juchanïkchïnjja, jilïr irpirinakajj cheqañchapjjänwa. ¿Kunsa Pablo jilatajj lurpachäna? Jupajj akham siwa: “Wali chuyma ustʼatäyätwa, ukatwa congregacionat jitheqtjjayäta” sasa. Nayrajj mä juchar purtʼasipkäna uka jilat kullakanakarojja concienciapajj juchañchaskakispawa, Diosamp munasitäñajj janis wakiskaspa ukhamwa amuyasipjjarakispa. Jupanakajj arrepentisjjapjjchisa, perdonatäjjapjjchisa, janis Diosan markapankañajj wakiskaspa ukhamwa amuyasipjjaspa. ¿Ukham amuyasir jilat kullakanakarojj kunjamsa uñjtanjja? w20.06 pág. 19 párrs. 6, 7

Kunanakas jiwasar jan waltʼayistaspa, kunjamsa ukanakat jarkʼaqassna uk janïräkipanwa amuytʼasiñasa (Heb. 5:14). Sañäni, kuna peliculanaksa jan ukajj kuna programanaksa televisionan uñtañäni ukjja sumwa ajlliñasa. Jilapartejj qʼañu jucha lurañanakaw ukan uñsti. Diosajj qʼañu jucha lurañanakjja uñisiwa, khitinakatï qʼañu juchan sarnaqapki ukanakajj jupanak pachpaw jan waltʼayasipjje, yaqhanakarus jan walinwa uñjasiyapjjaraki. Cristianonakajj janiw ukanak uñchʼukiñasäkiti, ukanakajj jukʼat jukʼatwa Jehová Diosat jitheqtayistaspa (Efes. 5:5, 6). Apostatanakan yatichäwinakapat amuyasiñasarakiwa, ukanakajj jan waliruw puriyistaspa. Apostatanakajj jilat kullakanakasata Jehová Diosan markapatwa pächasiyañ munapjjestu (1 Tim. 4:1, 7; 2 Tim. 2:16). Uka kʼari arunakajj jukʼat jukʼatwa Diosat apaqestaspa, ukhamajj janipun engañjayasipjjañäniti. Ukanakajj “jan wali amuyunïpki, kunatï cheqäki ukanaksa jan amuyapkaraki” uka jaqenakatwa juti, jupanakajj chʼajjwaña jiskhisiña ukakwa munapjje (1 Tim. 6:4, 5). Jupanakajj uka kʼarinakapar creysna, jilat kullakanakasats pächasjjsna ukwa munapjje. w20.09 pág. 29 párrs. 13, 15

Casadonakajj munasiñampi respetompiw uñjasipjjañapa (Efes. 5:33). Bibliajj katoqañat sipansa churañatakiw chʼamañchi (Hech. 20:35). Munasiñampi respetompi uñjasiñatakejja, panipaw humildëpjjañapa. Cristiano matrimonionakajja, humildëpjjatap laykuw kusisit jakasipjje. Steven sat jilatajj akham siwa: “Esposamampejj purapat yanaptʼasipjjañamawa. Yamas problemanak utjipanjja jukʼampwa yanaptʼasipjjañama. ‘¿Kunas nayatak jukʼamp walïspa?’ sañat sipansa, ‘¿kunas nanakatak jukʼamp walïspa?’ sasaw jisktʼasiñasa” sasa. Stephanie sat esposapajj niya uka pachpwa saraki: “Janiw khitirus jiwas conträki ukamp jakañajj gustkistuti. Ukatwa jan waltʼayasiñajj utjki ukhajj kunjamatsa ukajj qalltawayi uk amuyañatak chʼamachasipjjta. Ukatsti orasipjjtwa, kawkïr qellqatanakansa uka toqet parli ukwa thaqtapjjta, ukjjarojj parltʼasipjjtwa. Nanakkam chʼajjwañat sipansa, panijaw uka problema askichañatak chʼamachasipjjta” sasa. Casadonakajj janiw jupas jukʼamp importantëkaspa ukham amuyasipjjañapäkiti, ukhamatwa jukʼamp kusisit jakasipjjani. w20.07 págs. 3, 4 párrs. 5, 6

Jehová Diosar sirvkasin janiw chʼamasaru, kuntï lurañ yatktan ukar confiyañasäkiti. Pablojj wali yatjjattʼatänwa, Gamaliel sat yatichirimpi yatichatarakïnwa. Uka tiemponjja Gamaliel yatichirejj judionakan pʼeqtʼirinakapat maynïrïnwa, wali respetatarakïnwa (Hech. 5:34; 22:3). Pablojj judionak taypin wali uñtʼatänwa (Hech. 26:4). Ukhamäkchïnsa Pablojj janiw jupa pachpar confiyaskänti. Kunanakatï akapachan wali importantet Pablor uñjaykäna ukanak jan arrepentisisaw jaytäna (Filip. 3:8). Jesusan discipulopäñatakejj kunayman jan walinakanwa uñjasïna. Pachpa markapankirinakajj wal uñisipjjäna (Hech. 23:12-14). Romano masinakapamp nuwjata, carcelar llawintataw uñjasirakïna (Hech. 16:19-24, 37). Ukatjja pantjasirïtapa, kunatï walïki uk lurañajj jupatak chʼamätapwa Pablojj amuyasïna, ukanakaw jupar llakisiyarakïna (Rom. 7:21-25). Ukampis enemigonakapamp jan waltʼayatäsasa, pantjasirïtap yatkasasa Jesusar arkaskakïnwa. Akham sarakïnwa: “Aynachtʼata [...] uñjasta ukhajja, nayajj wal kusista” sasa. ¿Kunatsa ukham säna? Aynachtʼatäkäna ukhaw Diosan yanaptʼap sum uñjäna (2 Cor. 4:7; 12:10). w20.07 págs. 15, 16 párrs. 7, 8

Jichhürunakan Diosan Reinopat yatiyañaw jakäwisan nayrankañapa. Jesusan aruparjamajja, aka oraqpachanwa predicasiñapäna, jiwatap qhepatsa jukʼampiw yatiyasiñapäna. Jesusajj jaktjjäna uka qhepatjja, mä milagro lurasaw yaqhep discipulonakaparojj walja chawll katuyäna. Ukhaw predicañajj yaqha lurañanakat sipansa wali wakiskirïtap qhanañchäna (Juan 21:15-17). Janïr alajjpachar sarkasajja, Jesusajj ‘qalltawaykta uka predicacionajj janiw Israel markanak yatiyaskaniti, jan ukasti aka oraqpachanwa yatiyasini’ sasaw säna (Hech. 1:6-8). Mä qhawqha maratjja, kunas ‘Tatitun urupan’ pasañapäna ukwa apóstol Juanajj mä visionan uñjäna. Ukanjja, ‘wiñay suma yatiyäwinakaw taqe markankirinakaru, tribunkirinakaru, kunayman parlani jaqenakaru, kunayman kasta jaqenakaru yatiyasïna’, uksti angelanakaw pʼeqtʼapjjäna (Apoc. 1:10; 14:6). Cheqas Diosajj tukuykam predicañaswa muni. w20.09 pág. 9 párr. 5

Abrahanan familiapajj jan walinakanwa uñjasïna. Sara munat esposapajj janiw wawanïñ puedkänti, ukaw jupanakar walja maranak llakisiyäna. Wawanïñ jan puedisajja, Sarajj Agar sirvientaparuw Abrahanan esposapäñapatak churäna. Ukhamatwa Abrahanampi Sarampejj Agar warmi taypi wawanïpjjaspäna. Ukampis Agarajj usurëjjäna ukhajja Sararojj uñisjjänwa. Ukham jan walin uñjasisajja, Sarajj Agar warmir jiskʼachasinwa escapayjjäna (Gén. 16:1-6). Tiempompejja, Sarajj usuriptjjänwa, ususkäna uka wawarojj Isaac sasaw Abrahanajj sutiyäna. Abrahanajj Ismaelampiru Isaacampirojj wal munasïna. Ukampis Ismaelajj Isaacarojj jiskʼachänwa, ukatwa Abrahanajj Ismaelampiru Agarampiru khitanukjjäna (Gén. 21:9-14). Qhepatjja Diosajj Isaacaru sacrificiot churañapatakiw Abrahanar mayïna (Gén. 22:1, 2; Heb. 11:17-19). Ismaelar khitanukkäna ukhasa, Isaacar sacrificiot loqtañapäkäna ukhasa, Abrahanajj ‘kuntï wawanakajat Jehová Diosajj arsuwayki uk phoqaniwa’ sasaw confiypachäna. w20.08 pág. 4 párrs. 9, 10

Jaktanipkani ukanakajja, jan wali lurañanakap apanukusina ukhamarak Diosan mandamientonakaparjam sarnaqasina kunja kusisitäpjjanisa uk amuytʼañäni. Jaktanisajj cambiañatak chʼamachasipkani ukanakajja, wiñayaw jakapjjani. Ukampis cambiañ jan munapkani ukanakajja, janiw wiñay jakañ katoqapkaniti (Is. 65:20; Juan 5:28, 29). Diosan Reinopanjja, taqpach servirinakapaw kuntï Proverbios 10:22 texton siski ukajj cheqätap uñjapjjañäni, ukan akham siwa: “Tatitun bendicionapawa qamiriptayi; janiw kuna llakisiñsa ukampi chikajj apayankiti” sasa. Jehová Diosan espíritu santopampi yanaptʼatäsajja, walja bendicionanakwa katoqañäni. Diosan servirinakapajj jukʼat jukʼatwa Cristjam chuymanëjjañäni, perfectöjjarakiñäni (Juan 13:15-17; Efes. 4:23). Urut urutjamaw usunakajj chhaqtjjani, suma jaqëjjarakiñäni. ¡Wali kusisitäñäniwa! (Job 33:25). w20.08 pág. 17 párrs. 11, 12

Solter jilat kullakanakasajj jan casarasiñatakejj walja razonanïpjjewa. Sañäni, yaqhepanakajj jupanak pachpaw solteröñ amtapjje. Yaqhepasti casarasiñ munapjjewa, ukampis janiw jupanakatakjam mä chacha jan ukajj mä warmi jikjjatapkiti. Yaqhepajj inas viudöpjjchi jan ukajj viudäpjjarakchi. Ukham solter jilat kullakanakarojj janiw ‘kunatsa jan casaraskta’ sasin sañasäkiti, janirakiw ‘pareja thaqañ yanaptʼäma’ sañasäkisa. Jan yanaptʼa maykistani ukhajj janiw ukanakat parljjayañasäkiti. Parljjaysna ukhajja, inas chuym ustʼaysna ukwa amuytʼasiñasa (1 Tim. 5:13). Jiwasanakatï solter jilat kullakanakarojj kunjam chuymanïpjjesa ukarjam wali valoranit uñjapjjañäni, janirak solteröpjjatapatsa jiskʼachapkañäni ukhajja, jupanakajj kusisitäpjjaniwa. Janiw walsa tʼaqesipkaspa ukham uñjañasäkiti. Jan ukasti, Diosar taqe chuyma servipjjatapat wali valoranitwa uñjapjjañasa. Ukham uñjañäni ukhajja, jupanakajj janiw akhamsa jupanakar sisksna ukham amuyasipkaniti: “Janiw nayajj jumar munksmati” sasa (1 Cor. 12:21). Antisas jupanakar respetatasa ukhamarak congregacionan wali valoranit uñjataswa amuyapjjani. w20.08 pág. 29 párrs. 10, 14

Uka qhepatsti, Jesusajj apóstol Pabloruw uñstarakïna (1 Cor. 15:8). Pablojj (Saulojj) Damasco markaruw saraskäna, ukapachaw Jesusan arup istʼäna, ukatsti mä visionanwa Jesusarojj alajjpachankaskir uñjarakïna (Hech. 9:3-5). Kuntï Pablojj uñjkäna ukajja, Jesusajj cheqapun jaktatapwa uñachtʼayistu (Hech. 26:12-15). Yaqhepajja, kuntï Pablojj Jesusan jaktatapat qhanañchkäna ukat janiw pächasipkaspänti, kunattejj Pablojja, nayrajj cristianonakaruw jan waltʼayañatak arknaqerïna. Ukampis Jesusan cheqapun jaktjjatap yatisajja, ukar creyipjjañapatakejj taqe chuymaw mayninakar yatiyäna. Jupajj Jesusan jiwatapata, jaktjjatapat kunatï cheqäki uk yatiyañ laykojj jawqʼjata, carcelan llawintata, qotans jan waltʼäwinakanwa uñjasïna (1 Cor. 15:9-11; 2 Cor. 11:23-27). Niyakejjay Pablojj Jesusan jaktatapar taqe chuyma creychïnjja, uk arjjatañ laykojj vidap aptʼasiñsa janiw ajjsarkänti. Cheqas Jesusan jaktatap qhanañchapki ukarojj taqe chuymaw creysna. Jiwatat jaktañajj cheqapuniw utjani sasajj jukʼampiw ukar creyiraksna. w20.12 pág. 3 párrs. 8-10

“¿Taqpach tantachäwinakar sarañatakejj chʼamachasisktti?” sasaw jisktʼasiñasa. Uka tantachäwinakanwa Jehová Diosar serviskakiñatakejj chʼamañchastanjja, ukanwa jilat kullakanakasampi jikisisajj wal kusisiraktanjja (Mat. 11:28). Ukatsti, akhamwa jisktʼasiñasa: “¿Bibliat sum yatjjatañatakejj tiempo apsusisktti?” sasa. Familiamamp jakassta ukhajja, ¿sapa semanat Familiampi Bibliat Yatjjatasipkta? Jan ukajj sapak jakassta ukhajja, ¿kunjamtï familianakajj lurapki ukhamti Bibliat yatjjataskarakta? ¿Predicañatakisa jaqenakar yatichañatakis chʼamachasisktati? ¿Kunatsa ukanak jisktʼasiñasa? Jehová Diosajj amuyunakassa kunatï chuymasan utjki uksa uñakipiwa sasaw Bibliajj qhanañchi. Jiwasajj ukhamarakiw chuymasajj kunjamäskisa uk uñakiptʼasiñasa (1 Crón. 28:9). Ukatjja, inas kuntï lurañ amtkayätan, kuntï amuykayätan ukanak cambiañajj wakischini, ukhamäni ukhajja, Jehová Diosaruw yanaptʼa mayiñasa. Jichhaw kuna yantʼanakantï jutïrin uñjaskañäni ukatakejj wakichtʼasiñasa. w20.09 págs. 18, 19 párrs. 19, 20

Mä kutejja, Jesusajj pä uñachtʼäwimpiw kunsa maynejj discipulopäñ munchi ukhajj lurañapa uk qhanañchäna. Maya, mä uta lurañ muniri mä jaqetwa parläna, uka jaqejja ‘nayraqatajj qontʼasisin qhawqha qollqes munasini ukwa amuytʼañapa, ukhamat tukuyañatakejj alcanzaniti janicha uk yatiñataki’ sasaw säna. Paya, yaqha reyimp guerran nuwasir sarañ muniri mä reyitwa parlarakïna, uka reyejj guerrar janïr sarkasajj ‘nayraqatajj qontʼasisinwa yaqhanakamp aruskipañapa, ukhamat qhawqha soldadonakampis guerra atipaspa uk yatiñataki’ sasaw sarakïna (Luc. 14:27-32). Jesusan discipulopäñ munirinakajja, ukhamarakiw discipulöñatakejj kunsa lurañapa uk sum amuytʼasipjjañapa. Ukatakejja, sapa semana jiwasamp estudiañapatakiw chʼamañchtʼañasa. Maysa toqetjja, Bibliat yatichirinakajj sapa kuti Bibliat yatichañatakiw wakichtʼasipjjañasa. Kunjamsa yateqerejj facilak qhan amuyaspa, ukarjamas lurarakispa ukwa amuytʼañasaraki (Neh. 8:8; Prov. 15:28a). w20.10 pág. 7 párr. 5; pág. 8 párr. 7

Jesusan arunakapajj qhana amuykañawa. Ukatwa kuntï Jesusajj yatichkäna ukanak jaqenakarojj yatichañasa. Ukampis may amtañasa, Jesusajj janiw ‘taqe kuntï nayajj yatichapksma ukanak yatichapjjam’ sasajj siskänti. Jan ukasti ‘taqe kuntï nayajj yatichapksma ukanak phoqañ yatichapjjam’ sasaw säna. Uka arunakarjam lurañatakejja, janiw kuntï Bibliat yateqerejj lurañapäki ukak yatichañasäkiti, jan ukasti kunjamsa uk lurañapa ukwa yatichañasaraki. ¿Kunjamsa jaqenakarojj Jesusan arunakap phoqañ yatichsna? Mayniru Bibliat yatichkasajja, kunsa Diosajj jiwasanakar mayistu ukwa yatichtanjja. Ukampis janiw ukak yatichañasäkiti. Jan ukasti kunjamsa yateqatarjam jakäwipan sarnaqaspa ukwa yatichañasaraki (Juan 14:15; 1 Juan 2:3). Kunjamsa escuelansa, trabajonsa, yaqha ukhamanakansa Biblian yatichäwinakaparjam sarnaqaspa ukwa kuntï ukhamanakan uñjasisajj lurirïktan ukamp yatichañasa. Ukatjja, jupanakamp chika oraskasajj espíritu santon yanaptʼapwa jupanakatak mayiraksna (Juan 16:13). w20.11 págs. 2, 3 párrs. 3-5

Jesusan discipulonakapajj jan walinakanwa nayra tiempon uñjasipjjäna. Sañäni, Diosan Arupat jukʼa copianakakiw utjäna, janiw jichha tiemponjam Bibliat yatjjatañataki yanaptʼanakas utjkänti. Ukatjja, kunayman arutwa yatiyapjjañaparakïna. Ukhamäkchïnsa, kunatï jan lurañjamäkäna ukwa lurapjjäna, mä 30 maranakanakwa ‘oraqpachan yatiyapjjäna’ (Col. 1:6, 23). Jichha tiemponjja, ukhamarakiw Jehová Diosajj markapar yanaptʼaski. Ukjja, jilapartejj Biblia toqew katoqtanjja. Ukanwa kuntï Jesusajj aka oraqenkkasajj lurkäna, kun lurañtï qalltkäna ukanakajj qellqata (Mat. 28:19, 20). Jehová Diosajj jan yaqhachasir Diosawa. Jupajj akham sänwa: ‘Taqe markankirinakaru, tribunkirinakaru, kunayman parlani jaqenakaru, kunayman kasta jaqenakaruw predicasini’ sasa (Apoc. 14:6, 7). Diosajj Reinon suma yatiyäwinakap taqe jaqenakan istʼapjjañapwa muni. w20.10 pág. 21 párrs. 6-8

Davidajj Jehová Diosan arunakaparuw munasïna (Sal. 1:1-3). Jehová Diosajj humilde chuymaninakar salvirïtapa, jachʼa jachʼa tukurinakarus jiskʼachirïtapwa Davidajj yatïna. Ukatwa Diosan arunakapampi yanaptʼayasisajj amuyunakap cambiañatak chʼamachasïna. Jupajj akham sasaw qellqäna: “[Jehová Diosaruw] nayar irpatapat jachʼañchä, arumanakamppachaw chuymajj manqhan cheqachitu” sasa (Sal. 16:7). Jiwasatï humilde chuymanïstan ukhajja, janïr jan walinak lurkasinwa Diosan Arupampi yanaptʼayasis jan wali amuyunakas cambiañäni. Bibliajj akham siwa: “Kupi toqeru, jan ukajj chʼeqa toqerus saranukütajja, qhepäjjamatsti mä aru istʼäta, sarakïtamwa: ‘Aka cheqaw thakejja, sarasipkakim’ sasa” (Is. 30:21). Jehová Diosar istʼasajj walja askinakwa katoqañäni (Is. 48:17). Sañäni, janiw yaqha jaqen mä phenqʼa cheqañchat uñjaskañäniti. Niyakejjay Jehová Diosajj munat wawaparjam uñjchistojja, jukʼampiw Jupar jakʼachasiñäni (Heb. 12:7). w20.11 pág. 20 párrs. 6, 7

Ukaw Corintonkir yaqhep cristianonakarojj amuyunakap mayjtʼaypachäna (1 Cor. 15:12). Jupanakat yaqhepajj jiwatat jaktañajj janis cheqäkaspa ukham inas amuyapjjchïna. Sañäni, juchararätap laykojj jiwatäpkaspas ukhamwa amuyapjjäna, ukampis cristianöjjapjje ukhajj juchanakapat perdonatäjjasin jiwatats jaktanjjapjjaspa ukhamwa amuyapjjarakïna. Ukham amuyasajja, Diosar confiyapjjatapajj inamayakïnwa. Diosatï Jesusar jan jaktaykchïnjja, janirakiw juchanakapat kutsuyatäpkänti ni perdonatäpkänsa. Jesusajj janiw jaktayatäkänti sapki ukanakajja, janiw jaktayatäñ suyapkaspati (1 Cor. 15:13-19; Heb. 9:12, 14). Apóstol Pablojj jupa pachpaw ‘Cristojj jiwatanak taypit jaktayatäjjatap’ uñjäna. Jesusan jaktatapajja, jupat nayra jaktayatäpkäna ukanakampejj janiw igualäkänti, jupanakajja wasitampiw qhepat jiwjjapjjäna. Pablojja, “khitinakatï jiwañan iktʼjjapjje ukanakat [Jesusajj] nayrïr achuwa” sasaw säna, ¿kunatsa? Jupaw espíritu cuerponi nayraqat jaktayatäna, alajjpacharus nayraqat sararakïna (1 Cor. 15:20; Hech. 26:23; 1 Ped. 3:18, 22). w20.12 pág. 5 párrs. 11, 12

Nayrïr cristianonak tiemponjja, Jerusalenankir apostolonakampi jilïr irpirinakampejj Diosan markapan sumankaña utjañapatakisa, taqe kun suma organiztʼat lurañatakis mayachtʼataw trabajipjjerïna (Hech. 2:42). Sañäni, circuncisión toqet 49 maran mä jan waltʼäwejj utjkäna ukhajja, apostolonakampi jilïr irpirinakampejj espíritu santon yanaptʼapampiw uk askichapjjäna. Congregacionatï tʼaqjjtatäskakïspäna ukhajja, janiw sum predicjjapjjaspänti. Apostolonakampi jilïr irpirinakampejj judiöpkchïnsa, janiw costumbrenakampisa ni kuntï yaqhanakajj yatichapkäna ukampis apayasipkänti. Jan ukasti, Diosan Arupanwa yanaptʼa thaqapjjäna, espíritu santompiw yanaptʼayasipjjarakïna (Hech. 15:1, 2, 5-20, 28). Jehová Diosasti kuna amtarutï puripkäna ukarojj bendisïnwa. Ukatwa congregación taypin sumankañasa, mayachtʼat jakasiñas utjaskakïna. Diosan arunakapsa predicasipkakïnwa (Hech. 15:30, 31; 16:5). Jichha tiemponjja, Jehová Diosan markapajj sumankaña utjañapataki, taqe kunas organiztʼat lurasiñapatakiw chʼamachasiraki. w20.10 págs. 22, 23 párrs. 11, 12

Inas edadanëjjatasata, usutätas layku jan ukajj yaqha razonanakat munktan uka asignación jan churapkistaspati. Jiwasatï ukhaman uñjasstanjja, David reyitwa yateqassna. Davidajj Diosan templop lurañwa wal munäna, ukampis janiw jumajj lurkätati sapkäna ukhajja, Diosajj khitirutï templo lurañataki ajllkäna ukarojj taqe chuymaw yanaptʼäna. Davidajj templo lurañatakejj walja qollqe, qori churäna. Jupajj jiwasatak wali yateqaskayawa (2 Sam. 7:12, 13; 1 Crón. 29:3-5). Franciankir Hugues sat jilatajja, wali usutätap laykuw jan jilïr irpirëjjänti, janirakiw utan kuns lurañ puedjjänti. Jupajj akham siwa: “Qalltan wal llakisiyäta, janis kunatak sirvjjerista ukham amuyasiyäta. Tiempompejja, inamayaw kunanaktï lurañ jan puedjjta ukanakat llakisiskirista sasaw amuyjjayäta, ukatwa Diosar serviñatakejj kunanaktï lurañ puediskayäta ukanak lurañatak chʼamachasiyäta, ukhamatwa kusisitäjjayäta. Kunjamtï Gedeonampi 300 soldadonakapampejj qaritäkasas guerran nuwasisipkakïnjja, ukhamarakiw nayajj chʼamachasiskakëjja” sasa (Juec. 8:4). w20.12 pág. 25 párrs. 14, 15

Mateo, Marcos, Lucas uka kimspach Evangelionakajj qhawqtï munasiñ toqet parlki ukat sipanjja, Juan sat Evangelionwa munasiñ toqet jukʼamp parli. Cristianonakajj munasiñatwa kuns lurapjjañapa, ukwa uka librojj yatichistu (1 Juan 4:10, 11). Apóstol Juan pachpasa, tiempompejj munasirïñ yateqarakïnwa. Jupajj waynäskäna ukhajja, awisajj janiw munasiñ uñachtʼayirïkänti. Mä kutejja, Jesusampi discipulonakapampejj Jerusalenar viajkasaw Samaria cheq pasapjjäna. Samariankir mä jiskʼa markanjja, janiw jupanakar katoqapkänti. Uk uñjasajja, ‘¿janit alajjpachat nina saraqaniñapatak mayipkirista, ukhamat uka jaqenakar qʼal jiwarayañapataki?’ sasaw Jesusar jisktʼäna (Luc. 9:52-56). Yaqha kutinjja, jupampi Santiago jilapampejj Jesusajj apnaqjjani ukhajj jupamp chika qontʼasiñwa munapjjäna, ukatwa mamaparojj Jesusar uk mayiñapatak iyawsayapjjäna. Uk yatisajj mayni apostolonakajj wal colerapjjäna (Mat. 20:20, 21, 24). Juanajj ukhamsa pantjaskchïnjja, Jesusajj jupar munasïnwa (Juan 21:7). w21.01 págs. 8, 9 párrs. 3, 4

Jehová Diosajja, kunatï mayninakar yanaptʼkaspa ukarjamaw kuns amti. Sañäni, janiw Jupan askip thaqasaki jakañ vida utjaykänti, jan ukasti jakasin kusisitäñasatakiw vida churistu. Jehová Diosajj jiwasanak layku jiwañapatakiw Yoqapar khitanïna, uk janiw khitis obligkänti, antisas jiwasar yanaptʼañatakiw ukham luräna. Jesusasti, mayninakar yanaptʼañ munasaw kuns amtarakïna. Sañäni, wali qaritäkasas samarañat sipansa, walja jaqenakaruw yatichäna (Mar. 6:31-34). Familiap sum pʼeqtʼiri mä chachajja, kunas familiapar yanaptʼaspa uka amtanakar puriñajj chʼamätap yatiwa. Ukatwa suma amtanakar puriñatak wal chʼamachasi, janiw askip thaqasakisa, ni chuymapamp apayasisakis kuns amtkiti. Jan ukasti suma amtanakar puriñatakejj Jehová Diosampiw yanaptʼayasi (Prov. 2:6, 7). Ukhamatwa jupat llakisiñat sipansa kunatï familiapar yanaptʼkaspa ukat llakisitap uñachtʼayi (Filip. 2:4). Familia pʼeqtʼiritï Jehová Diosampita Jesusampit yateqasiñatak chʼamachasini ukhajja, familiaparojj sumwa pʼeqtʼani. w21.02 pág. 7 párrs. 19-21

Asá reyejj waynäskäna ukhajja, humilde chuymanïnwa, jan ajjsaririrakïnwa. Sañäni, Abías sat awkipan jiwatapat jupajj reyëjjäna ukhajja, uka markankir idolonak qʼal tukjañwa qalltäna. Ukatjja, ‘Judá markajj Jehová Diosaru makatjjañapataki nayra awkinakapan Diosaparu, ukhamarak leyinakapsa mandamiento arunakapsa phoqañapatakiw mayïna’ (2 Crón. 14:1-7). Zérah sat etíope jaqejj mä millón soldadonakampi Judá marka contra jutäna ukhajja, Asá reyejj amuytʼasirïtap laykojj Jehová Diosaruw yanaptʼa mayïna. Akham sasaw ruwtʼasïna: ‘Jehová Dios Tata, jumatakejj pachpakiwa chʼamanirusa, jan chʼamanirusa yanaptʼañajja. Ukampisa ¡yanaptʼapjjetaya, nanakan Tatit Diosajja, nanakasti jumaruwa confiyasipjjsma’ sasa. Asá reyin uka suma arunakapajja, jupajj Jehová Diosaw nayarusa markajarus salvapjjetani sasin taqe chuyma confiyatapwa uñachtʼayistu. Asá reyejj alajjpachankir Awkiparuw confiyasïna, Jehová Diosasti etiopenakarojj atipjänwa (2 Crón. 14:8-12). Cheqas mä millón soldadonak jupa contra jutir uñjasajja, Asá reyejj wal sustjaspachäna. Ukampis Jehová Diosaruw confiyäna, ukatwa uka ejercitorojj atipjäna. w21.03 pág. 5 párrs. 12, 13

Biblianjja, wali suma amigonakatwa parli, jupanakat maynejj Davidampi Jonatanampiwa. “Jonatanajj Davidampejj wali suma amigonakapuniw tukupjjäna, ukatsti Jonatanajj jupa kipkarjamaw munasïna” sasaw Bibliajj qhanañchi (1 Sam. 18:1). Saúl reyejj apnaqkäna uka qhepatjja, Davidaw reyïñapäna, juparojj Jehová Diosaw ajllïna. Uk yatisajja, Saúl reyejj wal Davidat envidiasïna, colerasirakïnwa, ukatwa jiwayañ munäna. Ukampis Saulon Jonatán yoqapajja, janiw awkipjam lurañ munkänti. Antisas Davidampejj amigöñataki maynit maynikam yanaptʼasiñatakiw juramentompi arsupjjäna (1 Sam. 20:42). Jonatanampi Davidampi amigöpjjañapajj chʼamakïspänwa ukatwa jupanakan suma amigöpjjatapajj wali musparkañajja. Sañäni, Jonatanajj Davidat sipansa 30 maranak jilïrïnwa, ukatwa ‘Davidajj waynäskiwa janiw experiencianïkiti, janiw jupamp amigöpkiristi’ sasin Jonatanajj amuyaspäna. Ukampis janiw ukham amuykänti, antisas wali respetompiw Davidar uñjäna. w21.01 págs. 21, 22 párrs. 6, 7

Jesusajja, cheqpachapuniw kusisitäpjjäta sasaw discipulonakapar säna, ukampis jan waltʼäwinakanwa uñjasipjjäta sasaw jupajj sarakïna (Mat. 10:22, 23; Luc. 6:20-23). Jesusan discipulopäsajj wali kusisitätanwa. Ukhamäkchisa familiasamp jarkʼataw uñjassna, gobiernonakan arknaqataw uñjassna, escuelankiri jan ukajj trabajonkir compañeronakasaw jan walinak lurayañ munapjjestaspa, taqe ukanakaw llakisiyistaspa. Cheqas janiw khitirus arknaqatäñajj kusisiykistuti, ukampis Diosan Arupajj kusisitäpjjam sistuwa. Sañäni, discípulo Santiagojja, jan waltʼäwinakan uñjasisajj janiw aynachtʼapjjañamäkiti, antisas kusisitäpjjañamawa sasaw qellqäna (Sant. 1:2, 12). Jesusjam jan waltʼayañatak arknaqata uñjasipjjäta ukhas kusisipjjam sasaw säna (Mat. 5:11). Jehová Diosajja, kunjamsa uka cristianonakajj jan waltʼäwinakan uñjaskasas kusisitakïsipkaspa uka toqet ewjjtʼanak qellqañapatakiw Santiagor amuytʼayäna. w21.02 pág. 26 párrs. 1, 2; pág. 27 párr. 5

Timoteojj jakkäna uka tiemponjja, yaqhep cristianonakajj Jehová Diosamp trabajiñ jan valoranitwa uñjapjjäna. Ukanakat yaqhepanakajja, Demas, Figelo, Hermógenes, Himeneo, Alejandro, Fileto uka chachanakäpjjänwa (1 Tim. 1:19, 20; 2 Tim. 1:15; 2:16-18; 4:10). Amuyatajja, uka cristianonakajj qalltan taqe chuymaw Diosar servipjjpachäna, ukampis qhepat kunatï wali valoranïkäna uk apanukupjjänwa. Diosajj churkistu ukanak apanukuñasatakejja, ¿kunanakampis Supayajj jiwasar engañjañ munarakistu? Ukanakat mä qhawqha uñjañäni. Kunatï televisionansa, peliculanakansa, Internetansa, yaqha qellqatanakansa uñstki ukanakampiw engañjañ munistu. Ukanak toqew amtanakassa amuyunakassa mayjtʼayañ muni, jan wal sarnaqañasatakiw chʼamañcharakistu, ukhamatwa Supayajj jukʼat jukʼat cheqa yatichäwinak apanukuyañ munistu. Ukat kuntï jaqenakajj sapki ukanak ajjsarasa, arknaqatäñ ajjsarasa predicación jaytjjsna ukwa munaraki. Ukatjja, apostatanakan yatichäwinakap istʼasa cheqa yatichäwinak jaytjjsna ukwa munaraki. Janitï amuyasksna ukhajja, jukʼat jukʼatwa cheqa yatichäwinak apanukjjsna (1 Tim. 6:21). w20.09 pág. 27 párrs. 6-8

¿Mä amigosasa jan ukajj familiasas jan wal lurirïstuti? Ukhamächi ukhajja, David reyin Absalón yoqapat yatjjatañaw yanaptʼistaspa (2 Sam. 15:5-14, 31; 18:6-14). Janïr uka sarnaqäwit Biblian liytʼkasajja, kunjamas jan wal luratajj jikjjatastan ukwa Jehová Diosar qhan yatiyañasa (Sal. 6:6-8). Ukatjja kunjamas Davidajj jikjjataspachäna uk niyas uñjksna ukhamwa amuytʼañasa. Jupajj Absalonar wal munasïna, Ahitofel chacharus confiyarakïnwa. Ukhamäkchïnsa, panpachaniw jupa contra saytʼapjjäna, chuymap wal ustʼayapjjäna, jiwayañ kunwa munapjjarakïna. Davidajja, mayni amigonakajajj Absalonampiw mayachasjjarakpacha sasaw jupanakar jan confiyjjaspänti. Jupa pachpatak llakisisajj sapakiw yaqha markar escapañ munjjaspäna. Jan ukajja, llakitäsajj qʼal aynachtʼaspäna. Ukampis janiw uk lurkänti. Antisas Jehová Diosaruw oracionan yanaptʼa mayisïna, amigonakaparuw yanaptʼa mayirakïna. Mä amtar purisajja, ratukiw ukarjam luräna. Jehová Diosarusa, amigonakaparus confiyaskakïnwa. w21.03 pág. 15 párrs. 7, 8; pág. 17 párrs. 10, 11