Julio

Diosajj oracionas istʼañapatakejja, Jesusan amigopäñasawa. Ukampis janiw mä oración tukuyasajj “Jesusan sutipjjaruw mayissma” sasin aleqak sañasäkiti. Jan ukasti, Diosajj kunjamsa Jesús taypejj oracionanakas istʼistu ukwa amuyañasa. Jesusajj apostolonakapar akham sänwa: “Kunanaktï sutij-jjar mayipkäta ukanakwa nayajj lurarakëjja” sasa (Juan 14:13). Jehová Diosaw oracionas istʼasajj kuntï mayktan uk churistu, ukampis kuntï jupajj amtki uk lurañatakejj Jesús Yoqaparuw chʼam churi. Ukhamajj janïr oracionasar jayskasajja, Jesusan ewjjtʼapar istʼasktanti janicha ukwa nayraqat uñji. Jesusajj akham sänwa: “Jumanakatejj jaqenakan juchanakap perdonapjjäta ukhajja, alajjpachankir Awkimajj perdonapjjarakïtamwa; jumanakatejj jaqenakan juchanakap jan perdonapkäta ukhajja, janirakiw alajjpachankir Awkimajj juchanakam perdonapkätamti” sasa (Mat. 6:14, 15). Diosasa Jesusasa suma chuymampiw uñjapjjestu, mayninakar uka kikpa uñjañajj wali wakiskiriwa. w20.04 pág. 22 párr. 6

Apóstol Pablojj kuna toqetsa jaqenakajj yatiñ munapjje ukwa amuytʼirïna, ukatsti ukarjamaw yatiyirïna. Listra markan walja jaqenakar yatiykäna ukanakat yaqhepajja, janiw Qellqatanakat kunsa yatipkänti, yaqhepasti mä jukʼakwa yatipjjarakïna. Ukatwa Pablojj kunanaktï jaqenakajj uñtʼapkäna ukanakat parltʼirïna. Sañäni, suma cosecha tiemponakata, kusisit jakasiñata. Jupajj fácil amuykañ arunakampi uñachtʼäwinakampiw yatiyirïna. Yatiyktan uka cheqanakankir jaqenakajj kuna toqenakatsa yatiñ munapjje uk amuytʼañatakiw chʼamachasiñasa, ukatsti ukarjamaw yatiyañasa. Mä jaqeru jan ukajj mä utaru jakʼachaskasajja, ¿utanejj kunanakatsa yatiñ munaspa uk kunjamsa amuysna? Kunanakas uta jakʼan utji, jan ukajj uka jaqejj kunjamäskisa ukanakwa amuytʼañasa. Inas jardinapan trabajaskchi, mä libro liyiskchi, autop arreglaskchi, jan ukajj yaqha ukhamanak luraskchi. Wakischi ukhajja, kuntï luraski ukanakat parltʼasaw predicañ qalltsna (Juan 4:7). Kunjam isthaptʼatasa ukajja, kawki markatasa, kun luririsa, pelot anatir kawkïr equipos gusti ukanakwa amuytʼayistaspa. w20.04 pág. 11 párrs. 11, 12

Yaqhep jilat kullakanakajja, llaki usunïsajj kun lurañsa ukat mayninakampi parlañsa wal ajjsarayasipjje. Jupanakatakejja walja jaqenak taypinkañajj chʼamäspawa, ukhampachasa tantachäwinakarusa, jachʼa tantachäwinakarusa sarasipkakiwa. Jan uñtʼatanakampi parlañ walsa ajjsarapkchejja, predikir sarasipkakiwa. Jiwasatejj ukham ajjsarirïstanjja, jan llakisiñäniti, waljaniw ukhaman uñjasipjjaraki. ¿Kunsa amtañasapuni? Qhawqsa chʼamachastan uk yatisajja, Jehová Diosajj wal kusisi. Jupaw bendisistu, chʼamapsa churarakistu, ukatwa ajjsarirïkasas jan aynachtʼktanti (Filip. 4:6, 7). Usutäkasasa, llaki usunïkasasa Jehová Diosar serviñatak chʼamachasiskakiñäni ukhajja, Jupajj wal kusisini, janiw ukat pächasiñasäkiti. Cristianonakajj tʼijusktan ukanjja waljaniw usutäpjje, ukhampachas jan qarjtasaw tʼijusipkaki (2 Cor. 4:16). Jehová Diosan yanaptʼapampejja, taqeniw wiñay jakañar apki uka thakin tukuykam tʼijuñäni. w20.04 pág. 31 párrs. 20, 21

Diosajj kunjamsa aka oraqe lurtʼawayi uk amuyañäni ukhajja, wali yatiñanïtap qhanwa amuyañäni (Heb. 3:4). Cheqas janiw aka oraqekejj intir muytkiti, jan ukasti yaqha planetanakas intirojj muytapjjarakiwa. Ukampis aka oraqekiw jaqenakan jakasipjjañapatak suma lurtʼatajja. Aka oraqejj mä chʼusa lugaran jistʼantata mä utar uñtasitäkaspas ukham sañäni. Ukampis jaqen lurata uka utampi Diosan lurata aka oraqempejj mayj mayjawa. Sañäni, uka jistʼantat utan jakirinakatï samansa manqʼsa umsa jupanakpachpa utjayapjjañapäspa, janiraki basuranaksa anqaru jaqtapjjañapäkaspa ukhajja, ¿qhawqha tiempos uka uta manqhan jakapjjaspa? Janiw jaya tiempo jakapkaspati. Ukampisa aka oraqen walja millón jaqenakaw jakapjje. Oraq pachpaw samansa manqʼsa umsa utjayarapistu, ukampiw jakasiraktanjja. Janirakiw ukanakajj tukuskiti. Yamas basuranakajj janiw oraqet anqaru jaqtaskiti. Ukhampachasa aka oraqen jakañajj utjaskakiwa, suma oraqëskakiwa. ¿Kunatsa? Aka oraqejja, kunatï jan sirvjje ukanaka jan ukajj basuranak serviriruw tukuyi, Jehová Diosaw ukham lurtʼawayi. w20.05 pág. 20 párrs. 3, 4

Supayajja Diosajj kʼarinaksa jupanakar siskaspa ukhamwa Evar säna. Ukhamatwa Supayajj kʼarisitap laykojj Diablor tukjjäna. Evajja Supayar creyisajj engañjataw uñjasïna (1 Tim. 2:14). Jehová Diosar confiyañat sipansa, Evajj Supayaruw jukʼamp confiyäna. Ukatwa Diosar jan istʼjjänti, jan manqʼañapäkäna uka frutsa manqʼantäna. Ukatjja Adanaruw churarakïna (Gén. 3:6). Evajj Supayar kamsañapänsa uk amuytʼañäni. Akham sañapänwa: “Janiw jumarojj uñtʼksmati, Jehová Dios Awkijarukiw uñtʼta, Juparojj munastwa, confiyaraktwa. Jupaw nayarus esposojarus taqe kun churapjjetu. ¿Kamisarak Diosat jan walinak parljjätasti? ¡Saram akat Supaya!” sasa. Ukham saspäna ukhajja, Diosar taqe chuyma munasitapa confiyatapwa uñachtʼayaspäna, Jehová Diosas walpun kusisispäna (Prov. 27:11). Ukampis janiw Evasa ni Adanasa Awkipar taqe chuyma munasipkänti. Ukatwa Diosan sutipat jan saytʼasipkänti. w20.06 pág. 4 párrs. 10, 11

Kullakanakarojja, Diosar servisajj kunanaksa lurasipki ukanakat yuspärañasawa. Jupanakajj Tantachasiñ Utanak lurañana, askichañanwa yanaptʼapjje. Yaqhepajja, yaqha aru parliri gruponakanwa yanaptʼapjje, Betelan voluntariotwa servipjjaraki, jan waltʼäwinakansa yanaptʼapjjarakiwa. Yaqhepasti, traductorata, precursorata, misioneratwa servipjjaraki. Yaqhep kullakanakajja, esposonakaparuw Diosan markapansa congregacionansa lurañanakap phoqapjjañapatak yanaptʼapjje. Janitï esposanakapajj yanaptʼapkaspa ukhajja, janiw lurañanakap sum phoqapkaspati, uka jilatanakajj ‘mä bendicionar uñtatäpjjewa’ (Efes. 4:8). Suma jilïr irpirinakajja, kullakanakan ‘mä jachʼa ejercitöpjjatap’ amuyapjjewa. Kullakanakajj trabajiñatakejj jankʼakïpjjewa, yaqhepanakajj Jehová Diosan arunakapsa sumwa yatiyapjje. Diosar jan jitheqtas servisipki, ukhamarak experiencianïpki uka kullakanakajja, tawaq kullakanakarojj problemanïpki ukhajj wal yanaptʼapjjaspa, uk jilïr irpirinakajj sum yatipjje (Tito 2:3-5). Ukhamajja, kullakanakarojj wali valoranitwa uñjapjjañasa, munasiñampiw uñjañasaraki. w20.09 pág. 23 párrs. 13, 14

Jupar taqe chuym sirvkasin markapat jitheqtjjapjje uka jilat kullakanakat Jehová Diosajj janiw armaskiti, janirakiw taqe chuym servipkäna uksa armaskiti (Heb. 6:10). Isaías profetajja, kunjamsa Jehová Diosajj markapar cuidi uk mä uñachtʼäwimpiw akham sasin qhanañchäna: “Kunjämatejj mä awatirejj ovejanakap antʼata jutejja, ukhamarakiw jupajj juti, amparapar ovejanak ichtʼata” sasa (Is. 40:11). Congregacionat maynejj jitheqtjje ukhajja, ¿kunjamsa Jachʼa Awatiri Jehová Diosajj jikjjatasi? Ukjja Jesusaw discipulonakapamp parlasajj uñachtʼayäna, jupajj akham sänwa: “¿Jumanakajj kamsapjjasmasa? Mä jaqetï patak ovejanïspa, ukat mä ovejapajj chhaqaspa ukhajja, ¿janit llätunk tunka llätunkani ovejanak mä qollu patar jaytawayasajj chhaqat ovejapar thaqer sarkaspa? Nayajj cheqpachapuniw sapjjsma, uka chhaqat ovejap jikjjatasajj walpun kusisi, jan chhaqapki uka llätunk tunka llätunkani ovejanakat sipansa” sasa (Mat. 18:12, 13). w20.06 págs. 19, 20 párrs. 8, 9

Jehová Diosar serviñajj wali kusiskañawa (Sal. 27:4; 84:10). Mä jilatajj Diosan markapan jukʼamp lurañanak katoqañ munki ukajj walikïskiwa. Ukampis mä luräwi katoqasajj janiw jachʼa jachʼa tukuñapäkiti (Luc. 17:7-10). Antisas humilde chuymampi mayninakar yanaptʼañwa munañapa (2 Cor. 12:15). Biblianjja wali importantëpkaspas ukham amuyasirinakan sarnaqäwipaw qellqata. Sañäni, Diótrefes chachajj janiw humildëkänti, congregacionan jupaw ‘nayrankañ munirïna’ (3 Juan 9). Uzías chachajja kuntï jan lurañapäkäna uk lurasaw jachʼa jachʼa tukurïtap uñachtʼayäna (2 Crón. 26:16-21). Absalón chachasti reyïñ munasaw munasirïkaspas ukham tuküna (2 Sam. 15:2-6). ¿Kunsa uka sarnaqäwinakajj uñachtʼayistu? Diosarojj janiw jachʼañchayasiñ munirinakajj gustkiti (Prov. 25:27, TNM). Jachʼa jachʼa tukurinakasa, mayninakampi jachʼañchayasiñ munirinakasa, jan walinakanwa uñjasipjje (Prov. 16:18). w20.07 pág. 4 párrs. 7, 8

Yaqhep familianakajj jan waltʼäwinakat qhespiñataki jan ukajj trabajo thaqañatakiw yaqha markanakar sarjjapjje. Inas uka markan kuna artï parlapki uka escuelar wawanakapajj sarapjjchi. Awk taykanakas inas trabajonïñatakejj uka markan arup yateqapjjarakchi. Ukampis kuna artï jupanakajj parlapki uka arun mä congregacionasa jan ukajj mä grupos utjaspa ukhajja, ¿kawkïr aru parlir congregacionarus sarapjjañapäspa? ¿Arup parlapki uka congregacionaru jan ukajj kuna artï uka markan parlapki uka congregacionaruch sarapjjañapäspa? Familia pʼeqtʼiriw kawkïr congregacionarus sarapjjani uk amtañapa, uk amtañajj sapa familiatäjjewa. Kawkïr congregacionar sarañas familiapar jukʼamp yanaptʼaspa ukarjamaw uk amtañapa. Kuntï familia pʼeqtʼirejj amtki ukjja respetañasawa. Congregacionasar jutañ amtapjjani ukhajj sumwa katoqtʼañasaraki (Rom. 15:7). w20.08 pág. 30 párrs. 17, 18

Jehová Diosan chʼamapamp yanaptʼatäñatakejja, janiw jan usutäñasa, suma yatjjattʼatäñasa, suma markatäñasa, wali qollqenïñas wakiskaspa ukham amuyañasäkiti. Diosajj janiw ukanakarjam valoranit uñjkistuti. Cheqas Diosan markapanjja, “jaqen amuyuparjam wali yatiñan jaqet uñjatäpki ukanakatjja janiw waljanejj utjkiti, janirakiw chʼamani jaqenakatsa ni reyin familiapat jutir jaqenakatsa waljanejj utjkiti” (1 Cor. 1:26). Ukhamasti kuntï qalltan parlaniwayktan ukanak jan utjkchistu ukhajja, janis Diosar serviñ puedksna ukham janiw amuyañasäkiti. Antisas kunjamsa Diosajj chʼamap churistu ukwa amuyañasa. Sañäni, kunarutï creyktan ukanakat jiskʼachapjjestu ukhajj aynachtʼsnawa, ukampis jan ajjsaras creencianakasat saytʼasiñatakejj Jehová Diosaruw chʼam mayisiñasa (Efes. 6:19, 20). Jan qollkay usunïstan ukhajja, jan qarjtas serviskakiñatakejj Jehová Diosaruw chʼam mayisiñasa. Diosajj kunjamsa chʼamapamp yanaptʼistu uk uñjasajj jukʼampiw Jupar confiyañäni, jukʼamp chʼamaniruw tukurakiñäni. w20.07 pág. 16 párr. 9

Diosan Reinop nayrar uchañ munstan ukhajja, Abrahanatwa yateqasiñasa. Diosar kusisiyañatakejj kunanak jaytañay wakischini ukanak jaytañatakejj listokïñasarakiwa (Mar. 10:28-30; Heb. 11:8-10). Diosar serviñan jan walinakajj utjakipuniniwa. Jehová Diosar phoqatpacha serviri jilat kullakanakas jan walinakan uñjasipjjarakiniwa, ukwa Abrahán chachan sarnaqäwipat yateqtanjja (Sant. 1:2; 1 Ped. 5:9). Nayrat sipansa jichhürunakan jukʼamp razonanakaw kuntï jutïrin katoqkañäni ukat lupʼiñatak utji. Kunatï oraqpachan pasaski ukanakajj qhep qhepa urunakan jakaskataswa uñachtʼayi. Kuna bendicionanaktï Diosan Reinopan katoqkañäni ukanakat mayajja, munat familiaranakasajj jaktanipkani ukawa. Jutïrinjja, Diosaru wal confiyatapata, pacienciampi suytʼatapatwa Abrahanar Diosajj jaktayani, familiaparus jaktayarakini. ¿Jupanakar katoqañatakejj ukankätati? Jumatï Abrahanat yateqasisa Diosan Reinop jakäwiman nayrar uchäta, ukhamarak jan walinakan uñjaskasas Diosar confiyaskakïta, pacienciampis Jehová Diosar suytʼaskakïta ukhajja, ukankätawa (Miq. 7:7). w20.08 págs. 5, 6 párrs. 13, 14; pág. 7 párr. 17

Enemigonakasajj jiwayapkistanisa Jehová Diosajj jaktayistaniwa sasaw confiytanjja. Kunanaksay lurasipkpan janipuniw kunas Jehová Diosat jitheqtaykistaniti (Rom. 8:35-39). Jiwatanakar jaktayäwa sasinjja, Jehová Diosajj wali yatiñanïtapwa uñachtʼayistu. Ukatwa Supayan arkirinakapajj jiwayañampi amenazapkistu ukhajj jan ajjsarktanti. Jehová Diosat janipun jitheqtañatakis wal chʼamañcharakistu. Enemigonakasajj jiwayapjjämawa sistaspa ukhajja, ¿Diosaw jaktayaskitani sasat confiyañäni? Uk yatiñatakejj akham sasaw jisktʼasiñasa: “¿Kunanak lurañtï nayajj sapür amtkta ukanakajj Jehová Diosar confiyatajti uñachtʼayi?” sasa (Luc. 16:10). Ukatjja “¿Diosan Reinop nayraqat thaqä ukhajja, Diosaw kunatï jakañatak wakiski uk churitani sasin confiyatajti luratanakajajj uñachtʼayi?” sasaw jisktʼasiñasaraki (Mat. 6:31-33). Uka jisktʼanakar jïsa sisstan ukhajja, uka confianzaw jan walinakan aguantañatak yanaptʼistani (Prov. 3:5, 6). w20.08 págs. 17, 18 párrs. 15, 16

Cristianonakajj Biblia sum apnaqañwa yatiñasa. Tantachäwinakanwa kunjamsa Biblia sum apnaqsna uk yateqtanjja. Ukampis cheqa yatichäwinakapajj kunjamsa yanaptʼaspa uk jaqenakar amuytʼayañ munstan ukhajja, Bibliatwa sapak yatjjatañasa, ukatakejja mä programanïñasawa. Jehová Diosar jukʼamp confiyañatakejj Diosan Arupampiw yanaptʼayasiñasa. Ukampis janiw aleqakejj liyiñasäkiti, jan ukasti lupʼiñasarakiwa, Bibliat apstʼat qellqatanakatsa jukʼampwa yatjjatañasa, ukaw Biblian yatichäwinakap sum amuyañatakisa jaqenakar sum qhanañchañatakis yanaptʼistani (1 Tim. 4:13-15). Ukhamatwa jaqenakar Bibliampi yatichañatakejj wakichtʼatäñäni. Cheqas janiw aleqakejj Biblia liytʼarapiñasäkiti, jan ukasti kamsañsa muni jan ukajj kunjamsa jakäwipan yanaptʼaspa uk amuyañapatakiw yanaptʼañasa. Ukhamasti, Bibliat sapa kuti yatjjatañäni ukhajja, suma yatichirïñäniwa (2 Tim. 3:16, 17). w20.09 pág. 28 párr. 12

Diosajj kunjamsa yanaptʼaskistu uka toqetwa lupʼiñasa, ukaw jakäwisan predicación nayrar uchañatak yanaptʼistani. Sañäni, Diosajj kunayman qellqatanaka, grabacionanaka, videonakwa churistu, JW Broadcasting^® programsa churarakistuwa. Internetan utjkistu uka jw.org cheqat amuytʼañäni, ukanjja waranqats jila arunakanwa kunayman qellqatanakajj utji (Mat. 24:45-47). Predicación nayrar uchañatakejja, Jesusat yateqasiñaw yanaptʼarakistani. Jesusajj kunatï cheqäki uk predicañatakejj janiw kunampis jarkʼayaskänti (Juan 18:37). Janirakiw “aka oraqenkir taqe markanaka, ukhamaraki kunja qamirïpkitejj taqe ukanakwa” churäma sasin Supayajj siskäna ukhas engañjayaskänti, ni jaqenakajj reyit uttʼayañ munapkäna ukarus istʼkänti (Mat. 4:8, 9; Juan 6:15). Jesusajj janiw qamiriptañ munañampejj apayaskänti, janirakiw uñisirinakaparus ajjsarkänti (Luc. 9:58; Juan 8:59). Ukhamajj yantʼat uñjaskañäni ukhajja, kuntï apóstol Pablojj jichhürutak ajllita texton siskäna uka arunakwa amtañasa, ukaw predicación nayrar uchaskakiñatak yanaptʼistani. w20.09 págs. 9, 10 párrs. 6, 7

Congregacionan wali trabajtʼir kullakanak utjatapat wal kusistanjja. Jupanakajj tantachäwinakanwa arstʼapjje, predicacionarus sarapjjewa, jilat kullakanakatsa llakisipjjarakiwa. Yaqhepasti, Tantachasiñ Utanak askichañwa yanaptʼapjjaraki. Ukhamäkchisa jupanakajj kunayman jan waltʼäwinakanwa uñjasipjje. Yaqhepajja, edadani awk taykaparuw cuidapjje. Yaqhepasti, familianakapan jan waltʼayataw uñjasipjje. Wawanakapar sapak uywapki uka kullakanakasti wal trabajipjjaraki. ¿Kunatsa kullakanakar yanaptʼañasa? Warminakajj respetomp uñjatäpjjañapawa, ukampis akapachanjja janiw ukham uñjapkapuniti, ukatwa jupanakar yanaptʼañasa. Biblia pachpaw warminakar yanaptʼañatak ewjjtʼistu. Amuytʼañataki, apóstol Pablojj ‘Febe kullakar munasiñamp katoqapjjam, kunanakantï yanaptʼatäñ munki ukarjam yanaptʼapjjarakim’ sasaw Romankir congregacionarojj säna (Rom. 16:1, 2). Pablon markapankirinakajja, warminakarojj wal jiskʼachapjjäna. Ukampis jupajj cristianöjjäna ukhajja, Jesusat yateqasisaw warminakarojj munasiñampi ukat respetomp uñj-jjäna. w20.09 pág. 20 párrs. 1, 2

Diosan arunakap predicañ munapjjañapatakejja akhamwa Bibliat yateqerinakarojj jisktʼsna: “¿Kunjamsa Reinon suma yatiyäwinakap istʼañajj sum jakasiñatak yanaptʼawaytam? ¿Uka suma yatiyäwinakajj yaqhanakar yanaptʼarakispati? ¿Kunsa jupanakar yanaptʼañatakejj lurasma?” sasa (Prov. 3:27; Mat. 9:37, 38). Amtapjjañäni, Jesusajj akham sänwa: “Taqe kuntï nayajj jumanakar yatichapksma ukanak phoqañ yatichapjjarakim” sasa. Yatichkäna ukanakatjja, pä jachʼa mandamientwa yaticharakïna: Jehová Diosar munasiña, ukhamarak jaqe masisar munasiña (Mat. 22:37-39). Uka munasiñaw jaqenakaru Diosan arunakap predicañatak chʼamañchistu. Ukampisa yaqhep yateqerinakatakejj predicañajj ajjsarañjamäspawa. Ukatwa jupanakarojj “Jehová Diosan yanaptʼapampejj jukʼat jukʼatwa jaqenakar jan ajjsarjjätati” sasin chʼamañchtʼañasa (Sal. 18:1-3; Prov. 29:25). w20.11 pág. 3 párrs. 6-8

Bibliat yatichañatak wakichaskasajja, Bibliat yateqerejj kunan yanaptʼatäñsa muni uka toqetwa Jehová Diosar mayisiñasa. Biblian yatichäwinakapampi yateqerin chuymaparu purtʼañatakis ukhamarakiw mayisiñasa. Yateqerin bautisasiñapatakiw yanaptʼañ muntanjja, uk janiw armañasäkiti. Bibliat yateqerejja, Jehová Diosamp parltʼasiñaparakiwa. ¿Kunjamsa uk luraspa? Diosaruw oracionan mayisiñapa, ukatjja Biblia sapüru liyisaw istʼañaparaki (Jos. 1:8; Sal. 1:1-3). Sapüruw Jehová Diosampi oración toqe parltʼasiñapa. Sapa kuti yateqerimpi yatjjatkañäni ukhajja, janïr qalltkasasa tukuyatarusa taqe chuymaw Diosar orasiñasa, yateqerin sutipsa oracionan aytañasarakiwa. Ukhamatwa Diosar taqe chuyma mayisiñsa, Jehová Diosar Jesusan sutipjjar jakʼachasiñsa yateqani (Mat. 6:9; Juan 15:16). Jupatï sapüru Biblia liyisa Diosar istʼani, oración mayisisa Jupamp parltʼasirakini ukhajja, jukʼampiw Jehová Diosar jakʼachasini (Sant. 4:8). w20.10 pág. 8 párr. 8; pág. 9 párrs. 10, 11

Diosan markapajj mayachtʼatäñapataki taqe kunas organiztʼat lurasiñapatakiw chʼamachasi (Hech. 16.4, 5). Sañäni, Yatiyañataki Revistat Yatjjatañataki sat tantachäwir yaqha congregacionar sarsna, jan ukajj yaqha markan uka tantachäwir sarsna ukhajja, kunjamsa revistat yatjjatasini, kuna yatichäwitsa yatjjatasini uk yatjjsnawa. Congregacionasanksnasa ukhamwa amuyassna. Cheqas espíritu santon yanaptʼapampikiw Diosan markapajj ukham mayachtʼatäspa (Sof. 3:9). ¿Kunsa jiwasajj luraraksna? Akhamwa jisktʼasiñasa: “¿Congregacionan sumankañ utjañapatakisa mayachtʼatäñapatakis yanaptʼasktti? ¿Congregación pʼeqtʼirinakarojj taqe chuymat istʼasktjja? ¿Mayninakajj nayar confiyapjjaspati? ¿Privilegionakanïst ukhajj confiykayätti? ¿Horasaparut lurañanak phoqtjja, mayninakar yanaptʼañatakis jankʼakïtti?” sasa (Sant. 3:17). Ukanakan inas jukʼamp sum lurañatak chʼamachasiñasajj wakischi, ukhamächi ukhajja Jehová Diosaruw espíritu santop mayisiñasa. Jiwasatï suma jaqëñataki espíritu santompi yanaptʼayasiñäni, taqe luratasansa espíritu santompi irpayasiñäni ukhajja, jilat kullakanakajj wal munasipjjestani, wali valoranitwa uñjapjjarakistani. w20.10 pág. 23 párrs. 12, 13

Diosan Arupajj jiwasatakejj mä espejor uñtasitäspawa (Sant. 1:23-25). Jiwasanakat jilapartejja, sapa alwaw utat mistuñatakejj espejot uñkatastanjja. Ukhamatwa janïr yaqhanakan uñjkata askichtʼastanjja. Biblia sapüru liyisajj ukhamarakiw kunjamanakatsa chuymassa, amuyussa mayjtʼaysna uk amuyassna. Diosan Arupat sapür yatjjatañataki sat folletot sapa alwa, utat janïr mistkasa liytʼañajja, waljaniruw yanaptʼi. Kuntï liytʼapki ukarjamaw amuyunakap cheqañchasipjje. Uka urojj ukarjam sarnaqañatakiw chʼamachasipjjaraki. Ukhamajja, sapüruw Biblia liyiñasa kuntï liyktan ukanakatsa lupʼiñasaraki. Ukaw jakañar apir thakin saraskakiñatakejj wal yanaptʼistani. Diosan Arupajja, rayos X apsuñ maquinampi sasiwa, kunatï chuymasan utjki ukwa uñjayistu. Ukhamajja, Diosan Arupampi jan ukajj Diosan markap irpapki uka jilatanakampi yanaptʼayasiñatakejj humilde chuymanïñasawa. w20.11 pág. 18 párr. 3; pág. 20 párr. 8

Nayrïr cristianonakajja, walja kutis arknaqat uñjasipkchïnjja, sumankañ tiempojj jupanakatak utjarakïnwa. Uka tiempon ¿kunsa lurapjjäna? Diosat jan jitheqtiri uka cristianonakajj suma yatiyäwinak taqe chuyma predicañatakiw chʼamachasipjjäna. Hechos libronjja, cristianonakajj ‘Jehová Diosar ajjsarasaw sarnaqapjjäna’ sasaw qhanañchi. Jupanakajj Diosan suma yatiyäwinakap predicasipkakïnwa, ukatwa ‘jiljjattasipkakïna’. Sumankañ tiempon taqe chuyma predicasipkakitapatwa Jehová Diosajj bendisïna (Hech. 9:26-31). Jesusan nayrïr discipulonakapajja, taqe horasanwa Diosan suma yatiyäwinakap predicapjjäna. Sañäni, Éfeso markanjja, walja jaqenakaw istʼañ munapjjäna, ukatwa apóstol Pablojj uka markar quedasiñ amtäna, ukhamat uka jaqenakar predicasin Jesusan arkiripar tukuyañataki (1 Cor. 16:8, 9). Nayrïr cristianonakajj ‘Jehová Diosan arunakap jukʼamp yatiyañatakiw’ chʼamachasipjjäna (Hech. 15:30-35). Ukatwa congregacionanakajj wal yapjjattäna, kunjamtï jichhürutak ajllita textojj siski ukhama. w20.09 págs. 15, 16 párrs. 6-8

Adanajj juchachasisaw jiwañar purtʼasiwayi, wawanakaparus jiwañar aptʼawayaraki. Ukatwa kunayman jan walinakan tʼaqestanjja. Ukampis Jehová Diosajj Jesusaru jiwatat jaktayatap laykojja, jutïrin suma bendicionanakwa katoqañäni. Apóstol Pablojj akham sänwa: “Jiwatat jaktañajj mä jaqe taypirakiw utji [mä arunjja Jesús taypikiw utji]. Kunjamtï taqenis Adán kawsajj jiwarasipkejja, ukhamarakiw taqenis Cristo taypi jaktayatäpjjani” sasa (1 Cor. 15:22). ‘Taqenis Adán kawsaw jiwarasipki’ sasajja, ¿kamsañsa Pablojj munäna? Taqe jaqenakatwa parlaskäna, cheqas Adanan juchachasitap kawsaw taqenis juchanïtanjja jiwaraktansa (Rom. 5:12). Adanajj janiw ‘jaktayatäpkani’ ukanak taypinkkiti. Cristojj janiw jupa layku jiwawaykiti, Adanajj perfectönwa, yatkasinwa Diosar jan istʼkänti. Ukhamajja, “Jaqen Yoqapajj” juzgañatak jutkani ukhajj khitinakarutï ‘cabranakarjam’ uñjkani, mä arunjja Adanajj ‘wiñayatak jiwayata uñjasipkani’ ukanak taypinkarakiniwa (Mat. 25:31-33, 46; Heb. 5:9). w20.12 pág. 5 párrs. 13, 14

Jiwasajj munktan uka asignación jan churapkchistu ukhajja, angelanakatwa yateqasiñasa. Acab jan wali reyejj apnaqaskäna ukhajja, Jehová Diosajj angelanakaruw kunjamsa uka reyirojj engañjasispa sasin jisktʼäna. Walja angelanakaw kunsa lurasispa uk sapjjäna. Ukampis Diosajj kuntï mä angelajj siskäna ukarukiw arsutamajj walïniw sasin säna (1 Rey. 22:19-22). ¿Mayni angelanakajj llakisipjjpachänti, “kunatsa inamay parlayitu, tiempsa aptʼasiyitu” sapjjpachänti? Janiw ukham sapkpachänti. Angelanakajj wali humildëpjjewa, Diosar jachʼañchañwa munapjjaraki (Juec. 13:16-18; Apoc. 19:10). Diosan sutipa apañasa Reinopat yatiyañasa mä suma privilegiowa uk amtapuniñäni. Diosajj janiw kuna asignaciontï churapkistu ukarjamajj valoranit uñjkistuti. Jiwasatï humildëñänejja, Jehová Diosasa jilat kullakanakasa wal munasipjjestani. Ukhamasti humildëskakiñataki Diosar mayisipjjañäni. Biblian Diosan humilde servirinakapat qellqatäki ukat lupʼipjjarakiñäni. Jilat kullakanakarus qhawqtï puedktan ukarjam taqe chuyma yanaptʼaskakiñäni (1 Ped. 5:5). w20.12 pág. 26 párrs. 16, 17

Salvasiñ cascojja, Jehová Diosajj mä suytʼäwi churkistu ukawa. Uka suytʼäwejja, Diosaw jiwañat salvitani, sasin confiyañawa, voluntadap lurapkani ukanakaw premio katoqapjjani sasin confiyañarakiwa (1 Tes. 5:8; 1 Tim. 4:10; Tito 1:1, 2). ‘Diosaw salvitani’ sasin suytʼañajj jan wali amuyunakatwa jarkʼaqestu, Diosan promesanakapat lupʼiñatakiw yanaptʼistu, jan waltʼäwinakan uñjaskasas jan sinti llakisiñatakiw yanaptʼarakistu. Jehová Diosjam amuyañatak chʼamachasisaw uka casco uchastanjja. Sañäni, ‘tukusir qollqer confiyañat sipansa Diosaruw confiytanjja’ (Sal. 26:2; 104:34; 1 Tim. 6:17). Espíritu santojj churkistu uka espadajja, Diosan Arupawa, mä arunjja, Bibliawa. Uka espadajj kʼarinak qhanstayañatakisa, kʼari yatichäwinakat jaqenakar qhespiyañatakisa, jan wali vicionak apanukuyañatakis wali chʼamaniwa (2 Cor. 10:4, 5; 2 Tim. 3:16, 17; Heb. 4:12). Uka espadjja, Bibliat sapak yatjjatasa, Diosan markapajj yatichkistu uka yanaptʼa katoqasaw sum apnaqañ yateqtanjja (2 Tim. 2:15). w21.03 pág. 27 párr. 4; pág. 29 párrs. 10, 11

Jesusat predicatap layku carcelan jistʼantatas uñjaskchïnjja, mayninakat llakisitapwa apóstol Juanajj uñachtʼayäna. Ukatwa kuna visionanaktï Jehová Diosat katoqkäna ukanak qellqasajj congregacionanakar apayäna, ukhamat “kunatï mä jukʼa tiempot paskani” ukanak yatipjjañapataki (Apoc. 1:1). Patmos islat antutatäjjäna uka qhepatwa Jesusan jakäwipata, predicatapat qellqäna. Jilat kullakanakar chʼamañchtʼañatakejj kimsa cartanakwa qellqarakïna. Apóstol Juanat yateqasisajja, ukhamarakiw jiwasajj kuntï vidasamp lurkañäni ukampi jaqenakar munasitas uñachtʼaysna. Supayan apnaqat akapachajja, qollqe jikjjatañataki jan ukajj wali uñtʼatäñataki chʼamassa tiempossa aptʼassna ukwa muni. Ukampis aka oraqpachanjja, walja jilat kullakanakaw predicañataki tiempo apsusipjje, jaqenakar Jehová Diosar jakʼachasipjjañapatakis yanaptʼapjjarakiwa. w21.01 pág. 10 párrs. 9, 10

Jonatanajj Davidat envidiasispänwa, Saulon yoqapjamajj nayaw reyïñatak derechonïtjja sasaw amuyarakispäna (1 Sam. 20:31, TNM). Ukampis, janiw ukham lurkänti, antisas humilde chuymanïnwa, Jehová Diosarus jan jitheqtasaw servirakïna, ukatwa Diosajj Davidar trono churañ amtkäna ukar taqe chuyma apoyäna. Davidarus taqe chuymaw yanaptʼarakïna, uk uñjasajj Saúl reyejj wal coleräna (1 Sam. 20:32-34). Jonatanajj Davidar taqe chuymaw munasïna, ukaw enemigoparjam jan uñjañatak yanaptʼäna. Jonatanajj wali suma flechtʼirïnwa, guerranakans jan ajjsarasaw nuwasirïna. Jupampi Saúl awkipampejj ‘jachʼa pakanakat sipansa wali jalirïpjjewa, leonanakat sipansa jukʼampi chʼamanïpjjewa’ sasaw jaqenakajj sapjjerïna (2 Sam. 1:22, 23). Ukhamajja, guerranakan atipjirïtapat jachʼa jachʼaw Jonatanajj tukuspäna, ukampis janiw kuns Davidar atipañ amtampejj lurirïkänti, janirakiw Davidajj guerranakan atipirïkäna ukanakatsa envidiasirïkänti, antisas Davidan jan ajjsarirïtapata Jehová Diosar confiyirïtapat wal kusisïna. Sañäni, Davidajj Goliatar jiwaykäna uka qhepatwa Jonatanajj Davidar munasiñ qalltäna. w21.01 pág. 21 párr. 6; pág. 22 párrs. 8, 9

Taqe cristianonakaw Jesusamp pʼeqtʼatätanjja, jupajj jan pantjasir pʼeqtʼiriwa. Ukampis mä cristiana warmejj casarasjje ukhajja, pantjasir chachaw jupan pʼeqtʼiripäjje, ukatwa awisajj jupar istʼañajj chʼamakïspa. Ukhamajj mä kullakatï casarasiñ amtaskchi ukhajj akhamwa jisktʼasiñapa: “Uka jilatajj familian suma pʼeqtʼirïniti janicha ukjja, ¿kunjamatsa yattjja? ¿Jupatakejj Jehová Diosar serviñat nayranki? Jan ukhamäkchi ukhajja, ¿casarasjjapjjä ukhajj suma pʼeqtʼirëjjaniwa sasin kunatsa amuytjja?” sasa. Yaqha toqetjja, kullakajj akham sasaw jisktʼasiñaparaki: “¿Kunjamsa nayajj matrimoniojan yanaptʼirista? ¿Nayajj pacienciani wajjtʼasiri ukhamätti? ¿Kunjamsa Jehová Diosamp apastjja?” sasa (Ecl. 4:9, 12). Mä warmitï janïr casaraskasin suma amtanakar purini ukhajja, casarasjjani ukhajj kusisitaw jakasini. Cheqas walja millón kullakanakaw esposonakapar istʼapjjatapat wali yateqaskayäpjje. Diosar jan jitheqtas servipjjatapat felicittanwa. w21.02 pág. 8 párrs. 1, 2

Aka qhepa maranakanjja, Diosar jukʼamp serviñatakejj walja jilat kullakanakaw yaqha aru yateqañ amtawayapjje. Ukatjja, kawkjantï jukʼamp yatiyirinakajj munaski uka congregacionar sarañwa amtawayapjjaraki. Ukham yaqha congregacionar sarjjañajj sapa maynitäjjewa. Walja maranakatsa yaqha aru sum parlañ yateqapkchinejja, congregacionarojj wal yanaptʼasipki. Experienciapasa Diosan arunakaparjam sarnaqapjjatapasa jilat kullakanakar wal chʼamañchi. Ukham lurapjjatapajj jiwasatakejj wali valoraniwa. Ukhamajj mä jilatatï yateqaski uka aru janïr sum parlañ yatkchi ukhajja, ‘janiw jupajj jilïr irpirïkaspati jan ukajj janiw congregacionan yanapiripäkaspati’ sasin jilïr irpirinakan amuyapjjañapajj janiw walïkaspati. Mä jilïr irpirirusa jan ukajj congregacionan mä yanapiriparusa janiw mä aru parlañ yatiti janicha ukarjamajj uttʼayasiñapäkiti, jan ukasti Biblian utjki uka mayitanakarjamaw uttʼayasiñapa (1 Tim. 3:1-10, 12, 13; Tito 1:5-9). w20.08 pág. 30 párrs. 15, 16

Walja jaqenakajja, maynejj jan usutäspa, walja qollqenïspa, kusisit familianïspa ukhakiw kusisit jakasispa sasaw amuyapjje. Ukampis Santiagojj parlkäna uka kusisiñajja, espíritu santon achupat maynïriwa. Ukatwa kunayman jan waltʼäwinakan uñjaskasas kusisitakïsksna (Gál. 5:22). Cristianonakarojja, Jehová Diosamp sumat uñjatäña, Jesusat yateqasis sarnaqañaw cheqpach kusisiñ churistu (Luc. 6:22, 23; Col. 1:10, 11). Kunjamtï mä farolajj jallutsa thayatsa ninar jarkʼaqkejja, ukhamarakiw kusisiñajj chuyma manqhasan suma jarkʼaqatäski. Usutäktan ukhasa, qollqejj jan utjkistu ukhas kusisitakïsktanwa. Familiasasa yaqhanakas jarkʼistu jan ukajj jiskʼachapkistu ukhas kusisitakïsktanwa. Jaqenakajj jan kusisitäñasatak jan waltʼayañ munkistu ukhajja, jukʼamp kusisitätanwa. Diosar servitas layku jan waltʼäwinakan uñjasitasajj Jesusan cheqpach discipulonakapätaswa uñachtʼayi (Mat. 10:22; 24:9; Juan 15:20). Ukatwa Santiagojj kuntï jichhürutak ajllita textojj siski uka arunak qellqäna. w21.02 pág. 28 párr. 6

Pacienciampi suytʼañasa Jehová Diosar confiyañas kunja wakiskirisa uk Biblia liykasin jikjjatañäni ukhajja, uka textonak pʼeqesar yatsuñatakiw chʼamachasiñasa. Ukatakejj inas jachʼat liytʼaña, jan ukajj qellqtʼasiña wakischispa, ukhamat repastʼañataki. Jehová Diosajja, Josué chacharojj Leyi libro liyiñapataki, kuntï liyki ukat uruy aruma lupʼiñapatakiw mayïna, ukhamat ukarjam sum phoqañapataki. Ukham lurañaw Josué chacharojj jan ajjsarañataki, Diosan markapar irpañatak yanaptʼäna (Jos. 1:8, 9). Jiwasajj ukhamarakiw Diosan Arupan chʼamañchtʼkir arunak jikjjatsna, ukaw jan walinakan uñjaskañäni ukhajj pacienciamp suytʼañataki, jan ajjsarañataki jan sint llakisiñatak yanaptʼistani (Sal. 27:1-3; Prov. 3:25, 26). Tantachäwinakanjja, plataformat yatichasinki ukasa, comentarionakasa jilata kullakanakamp parltʼasiñas wal yanaptʼistu (Heb. 10:24, 25). Congregacionankir mä munat amigosaru llakinakas yatiyañas wal chʼamañchtʼarakistaspa. w21.01 pág. 6 párrs. 15, 16

Bautisaskta ukhajja, Jehová Diosar taqe chuyma confiyatamwa uñachtʼaytajja. Jehová Diosasti familiap taypiruw wali munasiñampi katoqtamjja. ¡Ukajj mä suma bendicionawa! Jichhasti Jehová Diosar confiyaskakitamwa uñachtʼayañama. Cheqas wali wakiskir amtanakar puriñatakejja, Diosar yanaptʼa mayiñajj janiw chʼamäkiti. Ukampis janiw ukatakik yanaptʼa mayiñamäkiti, jan ukasti kusistʼañ ajlliñatakisa, trabajotakisa jan ukajj yaqha ukhamanakatakis yanaptʼap mayiñamapuniwa. Mä arunjja, taqe kunatakiw yanaptʼap mayisiñama. Juman yatiñamaruk confiyañat sipansa, Biblian kawkïr wiñay yatichäwipas yanaptʼiristam ukwa thaqañama, ukarjamaw lurañamaraki (Prov. 3:5, 6). Ukham lurasajja, Jehová Diosaruw kusisiyäta, jilat kullakanakan respetopsa ganasirakïtawa. Cheqas jumajj nanakjam pantjasir jaqerakïtawa, ukhamajja awisajj pantjasïtawa. Ukampis ukajj janiw Jehová Diosar serviñat jumar jarkʼañapäkiti. w21.03 pág. 6 párrs. 14, 15

¿Jehová Diosar serviñti familiasajj jarkʼistu? Jan ukajj ¿kawkjantï jakasktan ukan predicañajj mä jukʼa jan ukajj qʼala jarkʼatati? Ukhamächi ukhajja, 2 Timoteo 1:12-16 ukat 4:6-11, 17-22 textonak liyiñaw chʼamañchtʼistaspa. Apóstol Pablojj carcelankkasaw uka textonak qellqäna. Ukampis janïr uka textonak liytʼkasajja, kunanakas llakisiyistu, kunjamas jikjjatastan ukanak Jehová Diosar qhan yatiyañäni. Ukatjja, kunanakas jiwasar yanaptʼistaspa uka ewjjtʼanak Pablon sarnaqäwipan jikjjatañatakejj Jehová Diosar yanaptʼa mayisiñäni. Pablojj cristianötapat arknaqataw uñjasiñapäna, Diosajj uk yatiyjjänwa (Hech. 21:11-13). ¿Kunjamsa Diosajj Pablor yanaptʼäna? Mayisitanakapar contestänwa. chʼamañchtʼarakïnwa. Jehová Diosajja, ‘premio katoqañatak wal chʼamachasitamat katoqätawa’ sasaw Pablor yatiyäna, jupat jan jitheqtir amigonakapampiw Pablor yanaptʼayarakïna. w21.03 pág. 18 párrs. 14, 15, 19