Agosto

Jesusan suma amigonakapakiw jiwatapat kuna bendicionanakatï utjki ukanak katoqapjjani. Jesusajja ‘amigonakaj laykuw jakañaj churäjja’ sasaw säna (Juan 15:13). Jupajj janïr aka oraqer jutkäna uka nayra jakiri jaqenakasa, ukhamarakiw Jesusat yateqapjjañapäni, jupar munasipjjañaparakïni. Jupanakajj jaktanipjjaniwa, wiñay jakañ katoqañatakejj Jesusan amigopäñatakiw chʼamachasipjjañaparakïni (Juan 17:3; Hech. 24:15; Heb. 11:8-12, 24-26, 31). Reinon suma yatiyäwinakap predicasasa, yatichasasa Jesusaruw yanaptʼasktanjja, ukham lurañajj kusiskañawa. Jesusajj aka oraqenkkäna ukhajja cheqa yatichäwinakwa Diosat yatichäna. Alajjpachar kuttʼjjasajja, congregacionan pʼeqepjamajj jichhakamaw predicasiñapatakis yatichasiñapatakis pʼeqtʼaski. Jesusampiru Awkipampiru uñtʼapjjañapatak jaqenakar yanaptʼktan ukjja, Jesusajj uñjaskiwa wali valoranitwa uñjaraki. Cheqas Jehová Diosampina Jesusampin yanaptʼapampikiw jaqenakar prediksna, yaticharaksna (Juan 15:4). w20.04 pág. 22 párrs. 7, 8

Qalltanjja, Israel markat norte cheqankir markanak apnaqkäna uka reyiruw ‘norte toqenkir rey’ sasïna, sur cheqankir markanak apnaqkäna uka reyirusti ‘sur toqenkir rey’ sasirakïnwa (Dan. 10:14). 33 mara Pentecostés urukamajja, Israel markaw Diosan markapänjja. Ukampis uka qhepatjja, Jesusat jan jitheqtiri discipulonakapaw Diosan markapäjjäna. Ukhamasti Daniel capítulo 11 ukan qellqata profeciajj janiw israelitanakat parlkiti, jan ukasti Criston discipulonakapatwa parlaski (Hech. 2:1-4; Rom. 9:6-8; Gál. 6:15, 16). Ukhamarusa norte toqenkir reyejj janiw mä markakïkänti, tiempompejj yaqha markanakaw norte toqenkir reyïpjjäna, sur toqenkir reyimpejj ukhamarakiw pasäna. Ukhamäkchïnsa uka reyinakajj aka kimsa toqenakan igualakïpjjänwa: Maya, Diosan markapar uñisipjjapunïnwa. Paya, Diosan markapar tʼaqesiyasaw cheqpach Diosar uñisipjjatap uñachtʼayapjjäna. Kimsa, uka reyinakajj wali chʼamani markäñatakiw jupanakkam nuwasipjjäna. w20.05 págs. 2, 3 párrs. 3, 4

Amtap phoqañatakejj kunatï wakiski ukaruw Diosajj tukuspa. Jehová Diosajj Jupar servipjjañapatakisa amtap phoqapjjañapatakisa kunar tukuyañatï wakiski ukaruw pantjasir servirinakaparojj tukuyaspa (Is. 64:8). Ukhamanakatwa Diosajj munañap phoqayi. Diosajj kuntï amtki uk phoqasiñapatakejja, janiw kunas jarkʼkaspati (Is. 46:10, 11). Jehová Dios Awkisar jukʼamp munasiñatakisa respetañatakisa ¿kunanakas yanaptʼistani? 1) Luratanakapat lupʼiña, 2) kunanak lurañatakis yanaptʼawayistu ukanakat lupʼiña. Sañäni, taqe kun lurawayki ukanakat lupʼisajj wal muspartanjja (Sal. 8:3, 4). Ukatjja, munañap phoqañatakejj kunanak lurañtï yanaptʼawaykistu ukanakat lupʼisajj jukʼampiw Diosar respettanjja. Cheqas sutipajj wali musparkañawa. Kunjam Diosasa, kunanaksa luräna, kunanaksa lurarakini ukwa uñachtʼayarakistu (Sal. 89:7, 8). w20.06 págs. 9, 10 párrs. 6, 7

Jaqenakasa animalanakasa janiw jan samanampejj jakapkaspati. Jaqenakasa animalanakasa walja qʼoma samanwa maran samapjje. Ukampis samsupki ukajj dióxido de carbono satawa, ukajj janiw suma samanäjjeti. Ukhampachasa aka oraqen suma samanajj janipuniw tukuskiti, jan wali samanas janirakiw jilarkiti. ¿Kunatsa ukajj ukhamäpacha? Jehová Diosaw walja jiskʼa plantanaksa jachʼa arbolanaksa lurawayi, ukanakaw dióxido de carbono uk chʼamthapipjje, ukatjja suma samana, mä arunjja oxígeno utjayapjje. Samanan ukham qʼomachasitapajja, kuntï jichhürutak ajllita texton siski ukajj cheqätapwa uñachtʼayi. Aka oraqsa kunanakatï aka oraqen utjki ukanaksa wali valoranit uñjañatakejja, Jehová Diosan luratanakapatwa lupʼiñasa (Sal. 115:16). Ukanakat lupʼiñäni ukhajja, kuna sumanaktï Jehová Diosajj churkistu ukanakat sapüruw yuspärañäni. Ukatjja, kawki cheqantï jakasktan uka cheq qʼomacharakiñäniwa, ukanak lurasaw yuspäratas uñachtʼayañäni. w20.05 pág. 22 párrs. 5, 7

Supayajj kʼarinak parlasaw Jehová Diosan sutip qʼañuchi. Diosajj yatiñampi, pacienciampi, ukhamarak cheqapar taqe kun uñjasaw sutip qʼomachi. Taqe chʼamani Diosätapsa kunaymanitwa uñachtʼayaraki. Yamas luratanakapanwa wali munasirïtapajj qhan amuyasi (1 Juan 4:8). Jehová Diosajj sutip qʼomachaskakiwa. Jichhürunakanjja, Supayajj Diosan sutip qʼañuchaskakiwa. Jehová Diosajj janis chʼamanïkaspa, janis cheqapar uñjirïkaspa, janis yatiñanïkaspa, janis munasirïkaspa ukhamwa jaqenakar engañji. Sañäni, Diosajj janis utjkaspa ukhamwa jaqenakar amuyayañ muni. Diosar creyipki ukanakarojja, Diosan leyinakapajj janis walïkaspa, janis phoqañjamäkaspa ukhamwa amuyayaraki. Yamas jan sinttʼasiri Diosäkaspasa, jaqenakarojj infiernonsa nakhaykaspa ukhamwa yatichi. Uka kʼarinak creyiri jaqenakajja, janiw Diosampi apnaqatäñ munapkiti. Supayajj utjaskakini ukhajja, Diosat kʼarinak parlaskakiniwa, jiwasarus Diosat jitheqtayañwa munarakistani. ¿Supayajj Diosat jitheqtayistaniti? w20.06 pág. 5 párrs. 13-15

Walja congregacionanakanwa jilat kullakanakajj kunayman razonanakat yaqha aru parlañ yateqasipki. Inas jupanakajj uka aru jan sum parlañ puedipkchiti, ukampis parlatap uñchʼukiñat sipansa, qhawqsa Jehová Diosar munasi, jupar serviñatakis chʼamachasi uk amuyañatakiw chʼamachasiñasa. Ukhamatwa jupanakar taqe chuym respetañäni, valoranitsa uñjarakiñäni. Janiw arus jan parlañ yatipjjatap laykukejj jupanakar “janiw nayajj jumar munksmati” sañasäkiti (1 Cor. 12:21). Jehová Diosajj congregacionan kunayman lurañanakwa sapa maynir churistu, taqe ukanakat wal jupar yuspärtanjja. Chachanakasa, warminakasa, solteronakasa, casadonakasa, wayn tawaqonakasa, edadaninakasa, mä aru sum parlañ yatirinakasa, mä aru jan sum parlañ yatirinakasa, taqeniw Jehová Diosatakisa jilat kullakanakatakis valoranïtanjja (Rom. 12:4, 5; Col. 3:10). Ukhamajj congregacionan lurañanakas sumwa phoqañasa, jilat kullakanakarus respetompi munasiñampiw uñjañasaraki. w20.08 pág. 31 párrs. 20-22

Atenas markankirinakajj falso diosanakaruw adorapjjäna, qʼañu juchanakanwa sarnaqapjjäna, jaqenakan kʼari yatichäwinakaparuw creyipjjarakïna. Ukampis apóstol Pablojja, jupanakajj cambiapjjaniwa sasaw amuyäna, jiskʼachapkchïnsa Pablojj jupanakar predicaskakïnwa. Jupa pachpaw nayrajj “Dios contra jan wal parliri, markapar jan waltʼayañatak arknaqeri, jan respetasiri” ukhamäna, ukampis qhepat cristianöjjänwa (1 Tim. 1:13). Kunjamtï Jesusajj discipulojaruw Pablojj tukuspa sasin amuykänjja, ukhamarakiw Pablojj Atenas markankirinakajj cristianöpjjaspawa sasin amuyäna. Ukham amuyasajj janiw pantjaskänti (Hech. 9:13-15). Nayra patak maranakanjja, kunayman jaqenakaw Jesusan discipulopar tukupjjäna. Grecia cheqan Corinto markankirinakar Pablojj cartap qellqkäna ukhajja, jumanakat yaqhepajj jan wali jaqenaka, qʼañu juchanakan sarnaqerinaka ukhamäpjjayätawa, ukampis jichhajja “qʼomachatäjjapjjtawa” sasaw Pablojj säna (1 Cor. 6:9-11). ¿Uka jaqenakajj cambiapjjaniwa, Jesusan discipulopäpjjaniwa sasin jiwasajj amuyasänti? w20.04 pág. 12 párrs. 15, 16

‘Jehová Diosar serviñajj janiw kunans yanaptʼkistuti’ sasin amuyjjapjje uka jilat kullakanakarojja, jilïr irpirinakajj janiw jankʼak juchañchapjjañapäkiti. Antisas kunatsa ukham parlapjje, kunatsa ukham lurapjje uk amuyañatakiw chʼamachasipjjañapa. Ukjjaruw Bibliampi sum chʼamañchtʼapjjaspa. Amuytʼañäni, Elías profetajj Jezabel reinatwa escapäna (1 Rey. 19:1-3). Kuntï jupajj lurkäna ukajj inamayakïkaspasa ukhamwa Eliasajj amuyjjäna (1 Rey. 19:10). Jehová Diosajj Elías profetar juchañchañat sipansa, ‘janiw sapakïktati, nayan chʼamajar confiyam, jukʼamp lurañanakaw utjaskaraktamjja’ sasaw chʼamañchtʼäna. Eliasajj kunanakatï llakisiykäna ukanak Jehová Diosar cuenttʼäna ukhajja, munasiñampiw Diosajj istʼäna, ukatsti yaqha luräwinakwa churarakïna (1 Rey. 19:11-16, 18). ¿Kunsa ukajj yatichistu? Jiwasanakasa, yamas jilïr irpirinakasa, munasiñampiw Jehová Diosan ovejanakapar uñjañasa. Maynitï chuyma ustʼatächi jan ukajj Diosan perdonatäñapajj janis wakisjjaspa ukham amuyaschi ukhajja, jilïr irpirinakajj pacienciampiw kunjamas chuymapan jikjjatasi uk istʼapjjañapa. Ukatjja, qhawqsa Jehová Diosajj jupar munasi ukwa yatiyapjjañapa. w20.06 págs. 21, 22 párrs. 13, 14

Amigonakasampi familiasampi kusisitäsna ukwa Diosajj muni (Sal. 133:1). Jesús pachpaw suma amigonakanïna (Juan 15:15). Suma amigonakanïñajj kunjamsa yanaptʼistu uka toqetwa Biblian parlaraki (Prov. 18:24). Sapaki sarnaqañat sipansa jilat kullakanakampi chikachasiñasatakiw Biblian chʼamañchtʼarakistu (Heb. 10:24, 25). Redes sociales ukanakajj walja amigonakanïñataki, jan sapak amuyasiñatakiw yanaptʼistu sasaw waljanejj sapjje. Ukampis wali amuyumpiw ukanak apnaqañasa. ‘Mayninakajj redes sociales ukanakar qellqapki, fotonak apkatapki ukanak wal uñirinakajja, saparstʼata llakita ukhamaw uñjasipjjaspa’ sasaw yatjjattʼatanakajj sapjje. ¿Kunatsa? Uka fotonak apkatirinakat jilapartejja, jupanakana amigonakapana suma fotonakapakwa apkatapjje, suma lugaranak sarapkäna uka fotonakwa apkatapjjaraki. Ukanak uñirinakajj janis ukham kusisitäpkaspa, llakitakis sarnaqapkaspa ukhamwa amuyasipjjaspa. w20.07 págs. 5, 6 párrs. 12, 13

La Atalaya 1 de octubre, 1988 revistajj akham sänwa: “Cristojj espíritu santo toqew congregacionankir jilïr irpirinakarojj Biblian mä ewjjtʼap arsupjjañapatak yanaptʼaspa, jan ukajj mä suma amtar puripjjañapatak yanaptʼaspa, ukwa jilïr irpirinakajj amuyapjje (Hech. 15:7-15). Espíritu santojja, congregacionan taqpach jilïr irpirinakaruw yanaptʼi, janiw mayniruk yanaptʼkiti” sasa. Mä jilïr irpirejj mayni jilïr irpirinakar respetompi uñjki ukhajja, janiw tantachasipki ukhajj jupak parlkiti, janirakiw jupakis taqe kunsa yatkaspa ukhamas tukkiti. Jan ukasti, kuntï amuyki ukjja humilde chuymampiw arstʼi, kuntï mayninakajj sapki uksa sum istʼaraki. Ukatjja, kuntï Bibliasa ukhamarak ‘suma phoqeri amuyasir esclavosa’ siski ukarjam istʼañatakiw chʼamachasiraki (Mat. 24:45-47). Jilïr irpirinakajj munasiñampi respetompi tantachäwinakap apapjje ukhajja, Diosaw espíritu santop jupanakar churi, uka espíritu santow suma amtanakar puripjjañapatak yanaptʼaraki (Sant. 3:17, 18). w20.08 pág. 27 párrs. 5, 6

Apóstol Pablon enemigonakapajj jupat sipans jukʼamp chʼamanïpjjänwa. Religión pʼeqtʼirinakasa, política pʼeqtʼirinakas walja kutiw nuwjayapjjäna, carcelarus llawintayapjjarakïna. Amigonakapasa sufriyapjjarakïnwa. Congregacionansa, yaqhepajj jupa contraw saytʼapjjäna (2 Cor. 12:11; Filip. 3:18). Ukampisa janipuniw enemigonakapajj aynachtʼaykänti. Arknaqatpachas jupajj predicaskakïnwa. Jilat kullakanakajj jan walsa jupar lurapkchïnjja, Pablojj janiw jupanakar jaytjkänti. Jehová Diosarus jiwañkamaw servïna, ukaw jukʼamp importantënjja (2 Tim. 4:8). Taqe ukanakjja, chʼamapar confiyañat sipans Jehová Diosar confiyatapatwa luräna. ¿Jaqenakajj jiskʼachapjjestuti, jan ukajj jan walcha lurapjjestu? Jaqenakajj jan wal lurapkistu ukhajj Jehová Diosampit Bibliampit yatichasaw jan walirojj atipjtanjja. ¿Kunjamsa uk lurtanjja? Jaqenakan jisktʼanakap Bibliampiw qhanañchtanjja, jan wal luratas munasiñampi respetompiw uñjtanjja, taqeniruw sum uñjtanjja, enemigonakasarus ukhamaraki (Mat. 5:44; 1 Ped. 3:15-17). w20.07 págs. 17, 18 párrs. 14, 15

¿Cheqapunit Jehová Diosajj humilde chuymanejja? Jïsa. Ukwa Davidajj jichhürutak ajllita texton siskäna ukajj amuytʼayistu. Uka arunak qellqkasajja, Samuel profetajj Israelan mä machaq reyip ajlliñatak Isaí (jan ukajj Jesé) chachan utapar sarkäna ukwa Davidajj amtaspachäna. Davidajj kimsaqallqo wawanakat sullkïrïnwa. Ukampis juparuw Saúl rey lanti reyïñapatak Diosajj ajllïna (1 Sam. 16:1, 10-13). Davidajja, kuntï mä salmistajj siskäna uka kikpwa amuyarakïna, salmistajj akham sänwa: ‘Jupajj alajjpacharu ukhamarak oraqer uñtaniñatakiw altʼasi, jupaw humilde jaqerojj laqʼa polvot wayti, ukhamat jilïrinakamp chika qontʼayañataki’ sasa (Sal. 113:6-8, TNM). Kunjamsa Jehová Diosajj pantjasir servirinakapar uñji ukaw humilde chuymanïtap uñachtʼayi. Janiw serviriparjamak uñjkistuti, jan ukasti amigoparjamaw uñjistu (Sal. 25:14, TNM). Jehová Diosaw juchanakas layku jiwañapatak Jesusar khitanïna, ukatwa Jupan amigopäsna. Ukham lurasajj wali khuyaptʼayasirïtapwa uñachtʼayistu. w20.08 pág. 8 párrs. 1-3

Jehová Diosajja, kunürusa aka jan wali pachar tukjani uk amtjjewa (Mat. 24:36). Ukampis uka tiempo puriniñap pacienciampiw suyaski. Jiwatanakar jaktayañ walsa munkchejja, janiw nayrtʼkaniti (Job 14:14, 15). Horasap puriniñapwa suyani (Juan 5:28). Jehová Diosar wali paciencianïtapat yuspärañatakejj walja razonanakaw utji. Sañäni, pacienciampi suyatapatwa walja jaqenakan arrepentisipjjañapatakejj tiempojj utji, jiwasas ukhamatwa Diosar uñtʼaraktanjja. Jehová Diosajja walja jaqenakan wiñay jakañ katoqapjjañapwa muni. ¿Kunjamsa Diosarojj paciencianïtapat yuspärsna? ‘Taqe khitinakatï wiñay jakañatak suma chuymanïpki’ ukanakar jikjjatañatak chʼamachasisa, ukhamarak Diosar munasipjjañapataki servipjjañapataki yanaptʼasa (Hech. 13:48). Ukhamatwa jupanakarojj kunjamtï Diosan pacienciapajj jiwasar yanaptʼkistu ukham yanaptʼarakini. w20.08 pág. 18 párr. 17

Kuntï Bibliat yateqerejj yateqki ukjja, janiw pʼeqerukejj katoqañapäkiti, jan ukasti chuymaparuw katoqañaparaki. Ukhamatwa kuntï yateqki ukarjam sarnaqañ amtani. Jesusan qhana yatichäwinakapjja, sumwa jaqenakajj pʼeqer katoqapjjerïna. Ukampis chuymapar katoqapjjatap laykuw Jesusar arkañ amtapjjäna (Luc. 24:15, 27, 32). Yateqerejj Diosan utjatapat janiw pächasiñapäkiti, juparojj Awkiparjama, Diosaparjama, Amigoparjamaw uñjañapa (Sal. 25:5). Yateqerir yatichkañäni ukhajja, Diosajj kunjam chuymanisa ukwa qhanstayañasa (Éx. 34:5, 6; 1 Ped. 5:6, 7). Kuna toqetsay yatichaskchiñänejja, Jehová Diosajj kunjam Diosasa uk qhanstayañasapuniwa. Diosajj kunja munasirisa, kunja suma chuymanisa, kunja khuyaptʼayasirisa uk wali valoranit uñjañapatakiw yanaptʼañasa. Jesusajja, ‘Jehová Diosamar munasiñamawa, ukaw taqet sipans nayrïri jachʼa mandamientojja’ sasaw säna (Mat. 22:37, 38). Yateqerin Jehová Diosar taqe chuyma munasiñapatakiw chʼamachasiñasa. w20.10 pág. 10 párr. 12

Jesusajj respetompipuniw warminakarojj uñjäna (Juan 4:27). Awkipan munañap lurapkäna uka warminakarojj jukʼamp respetompiw uñjäna, kullakapäpkaspasa, familiapäpkaspasa ukhamwa uñjäna (Mat. 12:50). Jesusajj Diosar serviri warminakampejj wali suma amigönwa. Sañäni, Mariampi Martampejj Jesusan amigapäpjjänwa, amuyatajj jupanakajj solteranakäpjjänwa (Luc. 10:38-42). Jesusajj arupampisa luratapampisa janiw jupanakar mayjtʼasiykänti. Ukatwa Jesusajj yatichkäna ukhajja, Mariajj jan ajjsartʼasis kayup jakʼar qontʼasïna. Martas jan ajjsarasaw ‘Mariajj janiw yanaptʼkituti’ sasin Jesusar qhan säna. Jesusasti ukham visitkasaw suma yatichäwinak jupanakar yatichäna. Mariatsa Martatsa Lazarotsa Jesusajj llakisïnwa, ukatwa yaqha horasanakan visittʼarakïna (Juan 12:1-3). Lazarojj wal usuntkäna ukhajja, Mariampi Martampejj jan ajjsarasaw Jesusar yanaptʼa mayipjjäna (Juan 11:3). w20.09 pág. 20 párr. 3; pág. 21 párr. 6

Jesusan discipulonakapajja, “Diosan Reinopajj mä akatjamatwa uñstani” sasaw amuyapjjäna, romanonakat qhespiyatäñwa suyapjjarakïna. Jiwasanakasti Diosan Reinopajj jankʼaki jan walinak tukj-jjaspa, aka oraqes cheqapar sarnaqer jaqenakampi phoqantatäjjaspa ukwa suyaraktanjja (2 Ped. 3:13). Kunapachas ukanakajj phoqasini uk Jehová Diosajj amtjjewa, ukhamajj paciencianïñaw wakisi. Jehová Diosajja, Noé chacharojj arca lurañapatakisa “kunatï cheqapäki uk” yatiyañapatakisa qhawqha tiempotï munaskäna ukha tiempow pacienciamp suytʼäna (2 Ped. 2:5; 1 Ped. 3:20). Sodoma, Gomorra markanakar Jehová Diosajj tukjañ amtkäna ukhajja, Abrahanajj walja kutiw Diosar jisktʼäna. Ukampis Diosajj pacienciampiw jupar istʼäna (Gén. 18:20-33). Jan istʼasir israelitanakarojj walja tiempow cambiapjjañapatakejj pacienciamp suytʼarakïna (Neh. 9:30, 31). Jichha tiemponjja, ukhamarakiw Jehová Diosajj paciencianïtap uñachtʼayaski, amigopäpjjañapatak ‘irpanki’ ukanakarojj arrepentisipjjañapatakiw tiempo churaski (Juan 6:44; 1 Tim. 2:3, 4; 2 Ped. 3:9). Jehová Diosajj kunja paciencianisa ukaw jiwasarojj pacienciampi predicañatakisa yatichañatakis yanaptʼistu. w20.09 pág. 10 párrs. 8, 9

Diosajj jiwatanakar jaktaykani ukhajj pachpa amuyuni, ukhamarak janïr jiwkasajj kunjam jaqënsa uka pachpwa jaktayani. Ukham lurañatakejj qhawqsa jaqenakar uñtʼpacha uk amuytʼañäni. Niyakejjay Jehová Diosajj wal munaschistojja, kunsa pienstan, kunjamäsktansa, kunsa parltan, kunsa lurtan ukanak sumwa yati. Ukatwa jaktayañajj wakiskani ukhajj kunjam jaqënsa uka pachpa jaktayani. David reyejja Jehová Diosajj qhawqsa sapa maynir uñtʼistu uk sum yatïna (Sal. 139:1-4). Diosajj sapa maynir sum uñtʼatap yatisajj ¿kunjamas jiwasajj jikjjatastanjja? Jehová Diosajj kunanaktï lurktan ukanak taqpachwa yati. ¿Kunatsa Diosajj pantjasitanakaj uñjarakpachaw sasin jan llakisiñasäki? Amtañäni, Diosajj sapa mayniruw wal munasistu, jupatakejj taqeniw wali valoranïtanjja. Kunanakas jakäwisan pasawayistu ukanak Diosajj sum yati. ¿Ukanak yatiñajj waljjay chuymachtʼistojja? Janipuniw sapakïksnas ukham amuyasiñasäkiti, Jehová Diosajj taqe horasanwa jiwasampïski, yanaptʼañsa wal munarakistu (2 Crón. 16:9). w20.08 pág. 17 párrs. 13, 14

Jehová Diosarojja, markapar yatichañajj wal gusti. Munat wawanakapajj Jupar uñtʼapjjaspa, munasipjjaspa, wiñay jakasipjjarakispa ukwa muni. Ukatwa Jehová Diosajj yatichistu (Juan 17:3). Nayrïr cristianonakarojj congregación toqew yatichäna (Col. 1:9, 10). Jilapartejja, Diosajj espíritu santop toqew yatichäna, uka espiritutjja Jesusajj akham sänwa: ‘Diosasti yaqha yanapir churapjjätam’ sasa (Juan 14:16). Uka espirituw discipulonakarojj Diosan Arup amuyañatakejj yanaptʼäna, kuntï Jesusajj siskäna, lurkäna uk amtapjjañapatakis yanaptʼarakïna. Qhepatsti taqe ukanakajj Mateo, Marcos, Lucas, Juan libronakan qellqatäjjarakïnwa. Ukanakat yatjjatañaw nayrïr cristianonakarojj Diosar jukʼamp confiyapjjañapatak yanaptʼäna. Ukarakiw Diosaru, Yoqaparu, jilat kullakanakar munasipjjañapatak yanaptʼäna. Diosan arsutaparjamajja, ‘qhepa urunakan’ taqe markanakaw Diosan qolluparu makatapjjañapäna, ukhamat Jupampi yatichatäñataki (Is. 2:2, 3). Jichha tiemponwa uka profeciajj phoqasiski. w20.10 pág. 24 párrs. 14, 15

¿Kunatsa mä suma amigon ewjjtʼapar maynejj jan istʼañ munkaspa? Jachʼa jachʼa tukurïtapatwa jan istʼañ munkaspati. Jachʼa jachʼa tukurinakajja, “kuntï jupanakajj istʼañ munapki” ukanakakwa sayasiñ munapjje. “Kunatï cheqäki” ukanak janiw istʼañ munapkiti (2 Tim. 4:3, 4). Jupanakas mayninakat sipan wali importantëpkaspa, janis ewjjtʼatäpjjañapajj wakiskaspa ukhamwa amuyasipjje. Apóstol Pablojj akham sänwa: “Maynitejj jan kunäkasina kunäkaspas ukham amuyaschejja, jupa pachpaw engañjasiski” sasa (Gál. 6:3). Salomón reyejj uka toqet akham sänwa: “Askiwa mä pobre waynajja yatiñanïchi ukkhajja, pisi amuytʼani awki reyit sipansa, jupasti jichhajj janiw kuna ewjja arsa katoqkaspati uka layku” sasa (Ecl. 4:13). Apóstol Pablojj jaqenak nayraqatan Pedror ewjjtʼkäna ukhajja, kunsa Pedrojj luräna ukat amuytʼañäni (Gál. 2:11-14). Apóstol Pedrojja, jaqenak nayraqatan cheqañchatäsajj chuym ustʼayasispänwa. Ukampis Pedrojj yatiñanïtapwa uñachtʼayäna, ukatwa Pablon ewjjtʼaparojj taqe chuyma istʼäna, janiw coleraskänti ni chuyma ustʼatas sarnaqkänti. Jan ukasti jupat parlkasajj ‘munat jilata’ sasaw säna (2 Ped. 3:15). w20.11 pág. 21 párrs. 9, 11, 12

¿Kunas Bibliat yateqerinakarojj nayrar sartapjjañapatak jukʼamp yanaptʼani? Tantachäwinakar sarañaw yanaptʼani. ¿Kunatsa? Kunatï tantachäwinakan yatichaski ukajja, Bibliat jukʼamp yatipjjañapataki, Diosar jukʼamp confiyapjjañapataki ukhamarak jukʼamp munasipjjañapatakiw yanaptʼani (Hech. 15:30-32). Ukatjja, mä jilata jan ukajj kullakaw kunjamsa Diosar jukʼamp munasiñajj mandamientonakap phoqañatak yanaptʼawayi ukwa yateqerirojj cuenttʼaspa (2 Cor. 7:1; Filip. 4:13). Bibliat yateqerinakajj Diosar taqe chuyma serviri walja jilat kullakanakar uñtʼapjje ukhajja, jupanakatwa kuntï Cristojj Diosar munasiñatsa, jaqe masisar munasiñatsa siskäna uk phoqañ yateqapjje (Juan 13:35; 1 Tim. 4:12). Ukatjja, jupanakjam jan walinakar saykatiri jilat kullakanakatwa yateqasipjjaraki. Criston discipulopäñatakejj kunanakansa cambiapjjaspa ukwa jupanakat yateqasipjje (Deut. 30:11). Congregacionan taqeniw Bibliat yateqerirojj nayrar sartañapatak kunaymanit yanaptʼsna (Mat. 5:16). w20.11 pág. 5 párrs. 10-12

Inas Pablojj Éfeso markankir mä estadion jaqenakajj salvaje animalanakampi nuwasipjjerïkäna ukat parlaskchïna (2 Cor. 1:8; 4:10; 11:23). Jan ukajj inas uñisiri judionakat parlaskchïna, yaqhepajj “salvaje animalanakampi” sasipjjänwa (Hech. 19:26-34; 1 Cor. 16:9). Kunatjjay parlaskchïna, ukampis Pablojj kusisit chuymampiw jan waltʼäwinakar saykatirïna (1 Cor. 15:30, 31; 2 Cor. 4:16-18). Jiwasajj ukham jan wali tiemponwa jakaraktanjja. Yaqhep jilat kullakanakajja, jiwayataw uñjasiwayapjje. Yaqhepasti guerra utjipan ajjsarayasiñjamäki uka cheqanakanwa jakasipjje. Yaqhepajja, kawkjantï Diosar serviñajj wali jarkʼatäki ukawjanwa jakäwip aptʼasirjama Diosar servisipki. Ukhamanakansa uñjasipkchejja, Jehová Diosar jan jitheqtas servisipkakiwa, jiwasatakejj wali yateqaskayäpjjewa. Jiwayatas uñjasipjjchinejja, jutïrin jukʼamp sum jakasiñwa Jehová Diosajj jupanakar churani, uk yatisaw jan ajjsarayasipkiti. w20.12 pág. 9 párrs. 3, 4

¿Jan istʼañ munapki uka territorion predicasasa jan ukajj jaqenakajj jan utjki uka cheqan predicasasa awisajj llakisirïtati? Ukhaman uñjasisajj ¿kunas kusisitäskakiñataki jan ukajj jukʼamp kusisitäñatak yanaptʼistaspa? ¿Predicacionarojj kunjam uñjañasas wakisi? Diosan sutipata Reinopat yatiyañatakiw chʼamachasiñasa. Jesusajj ‘jukʼanikiw jakañar apiri thak jikjjatapjjani’ sasaw säna (Mat. 7:13, 14). Predicasajja, Jehová Diosampi, Jesusampi, angelanakampiw trabajisktanjja (Mat. 28:19, 20; Apoc. 14:6, 7). Jehová Diosajj jupar serviñ munapki ukanakaruw markapar irpani (Juan 6:44). Ukhamajja, inas jichhajj mä jaqejj jan istʼañ munkchistaspati, ukampis qhepatjja istʼjjestaspawa. Débora sat mä kullakajj akham siwa: “Supayajj llakimpiw aynachtʼayistaspa, ukajj mä armapawa” sasa. Ukampis Jehová Diosajj Supayat sipansa armanakapat sipansa jukʼamp chʼamaniwa. w20.12 págs. 26, 27 párrs. 18, 19, 21

Diosar jan jitheqtas serviri walja jilat kullakanakajja, kunanakatï jupatakisa familiapatakis munaski uk jikjjatañatakejj sapüruw trabajipjje. Ukhamäkchisa, qhawqtï lurirjamäpki ukampiw Diosan markapar yanaptʼapjje. Sañäni, yaqhepajj jan waltʼäwinak utjki ukanakanwa yanaptʼapjje, yaqhepasti Tantachasiñ Utanaka ukat yaqha ukhamanakajj luraski ukanwa yanaptʼapjjaraki. Ukampis taqeniw obra mundial ukar donacionanakapampi yanaptʼapjjarakispa. Ukanak lurasaw Diosar munasipjjatapa, jaqe masipar munasipjjatap uñachtʼayapjje. Ukat jiwasanakajja qaritäkasas tantachäwinakar sapa semana sarasaw jilat kullakanakar munasitas uñachtʼaytanjja. Arstʼañ ajjsarayaskasas arstʼapuntanwa, problemanïkasas tantachäwi janïr qalltkipana jan ukajj tukuyjjepan mayninakar chʼamañchtʼapuntanwa (Heb. 10:24, 25). Taqe ukanak jilat kullakanakan lurapjjatapat wal yuspärtanjja. w21.01 pág. 10 párr. 11

Jachʼa jachʼa tukur jaqenakatakejja, mayninakaru felicittʼañajj wali chʼamawa, antisas jupanakaw jachʼañchayasiñ munapjje. Ukatjja, jaqe masipampis wal uñchʼukisipjje, kunansa jupanakakiw nayrankañ munapjje. Mayninakaru yatichañat sipansa, privilegionak churañat sipansa jupanakakis uk sum lurañ yatipkaspa ukhamwa amuyasipjje, mä arunjja munañaparjam lurasiñapwa munapjje. Ukhamarusa jupanakatakikiw taqe kuns munapjje, envidiasiri ukhamäpjjewa. Ukhamajja, chuymasantï uka amuyunakajj utjchi ukhajja, ‘amuyunakas machaqar tukuyañatakiw’ Jehová Diosar yanaptʼa mayisiñasa, ukhamat jan jachʼa jachʼa tukur jaqëñasataki (Rom. 12:2). Jehová Diosan humilde chuymanïtapat wal yuspärtanjja (Sal. 18:35). Kunjamtï Jupajj servirinakapar uñjki ukanwa humilde chuymanïtap amuytanjja. Jiwasajj Jupat yateqasiñwa muntanjja, humilde chuymampi Diosar servipkäna ukanakat yateqasiñwa munaraktanjja. Jehová Diosarukiw jachʼañchañasa, jupakiw uk katoqañatak derechoni (Apoc. 4:11). w20.08 pág. 13 párrs. 19, 20

Matrimoniojj Diosan mä perfecto regalopawa, ukampis jaqenakajj pantjasirinakäpjjtanwa (1 Juan 1:8). Ukatwa khitinakatejj casarasipkani ukanakatakejja, “tʼaqesiñaw jañchipan utjani” sasin Bibliajj qhanañchi. Cristiano chachanakajja, familiapajj Diosamp sum apasiñapataki, kusisita jakasiñapataki, kunatï jakañatak munaski uk jan faltañapatakiw llakisipjjañapa, ukwa Diosajj muni (1 Tim. 5:8). Ukampis casada kullakanakajj walja lurañanakanïpkchisa, Biblia sapüru liyiñatakisa, kuntï liyipki ukat lupʼiñatakisa, Jehová Diosaru taqe chuyma mayisiñatakis tiempo apsusipjjañapawa. Taqe ukanak lurañajj jupanakatak chʼamakïspawa, ukampis tiempo apsusipjjañapawa. ¿Kunatsa? Jehová Diosajj sapa mayni servirinakapajj Jupar sum uñtʼañapa, Jupamp sum apasisipkakiñapwa muni (Hech. 17:27). Mä kullakajja, pantjasiri esposopar respetañatakisa istʼañatakis wal chʼamachasiñapäspawa. Ukampis esposopar istʼañajj Bibliarjamätap amuyani, ukarojj walikiw sarakini ukhajja, esposopar istʼañajj janiw chʼamäkaniti. w21.02 pág. 8 párr. 3; pág. 9 párrs. 6, 7

Mä espadat amuytʼañäni, espada lurañatakejja, nayraqatajj ninampiw juntʼutatayapjje. Ukat thayarayjjapjje ukhajja, espadajj jukʼamp duröjjewa, yantʼanakajj uka ninamp sasiwa. Yantʼanakan uñjasktan ukhajj ukhamarakiw Diosar jukʼamp confiytanjja. Ukatwa Santiagojj akham säna: “Jumanakatejj aguantasipkakïtajja, jukʼamp suma wakichtʼat jaqëpjjätawa, ukhamatwa jumanakajj phoqatäpjjäta, taqe kunansa sanöpjjäta” sasa (Sant. 1:4). Ukhamajja, yantʼanakajj Diosar jukʼamp confiyañatakiw yanaptʼistu, ukatwa jan waltʼäwinakan uñjasisas kusisit aguantsna. Kuna problemanakas jan kusisit jakasiyjjestaspa ukanakwa Santiagojj cartapan mä qhawqha qhanañchäna. Sañäni: mä probleman uñjasisajj jan kuns lurirjama ukhamaw amuyassna. Ukhaman uñjasisajja, kunatï Diosar kusisiykaspa, jilat kullakanakarus yanaptʼkaspa, Diosar taqpach chuymamp serviñatakis yanaptʼkistaspa uka amtanakaruw puriñ muntanjja (Jer. 10:23). Kunsa lurañäni, enemigonakasar kamsañänisa ukatakejj yatiñanïñwa muntanjja. Jan kuns lurirjamäjjsna ukhajja, aynachtʼjjsnawa, llakitakëjjarasnawa. w21.02 pág. 28 párrs. 7-9

Diosatwa ukham chuymanïñ yateqassna. Jupajj wal munasistu, ukhamajj jiwasatï jupat jan jitheqtkañäni ukhajja, janiw kunas munasiñapat apaqkistaniti (Rom. 8:38, 39). ‘Chuymatpacha’ sasin traduciski uka arojja, griego arun maynir munasiñatak wal chʼamachasiña sañwa muni, awisajja yaqhep jilat kullakanakar munasiñatakejj ukham chʼamachasiñaw wakisini. Ukhamajj maynimpi sum apasiñajj chʼamäni ukhajja, Bibliajj ‘maynit maynikam munasiñamp aguantasipjjam, espíritu santojj mayachtʼat jakasiñ churkistu ukarjam sarnaqañatak wal chʼamachasisa, sumankañan jakapjjam’ siski uka ewjjtʼaruw istʼañasa (Efes. 4:1-3). Janiw jilat kullakanakasan pantjasitanakap uñchʼukiñasäkiti, jan ukasti kunjamtï Diosajj jupanakar uñjki ukham uñjañatakiw chʼamachasiñasa (1 Sam. 16:7; Sal. 130:3). Awisajja jilat kullakanakasar taqe chuyma munasiñajj chʼamakiwa, yamas pantjasitanakap uñchʼuktan ukhajj jukʼamp chʼamawa. Ukaw nayra cristianonakampejj pasarakïna. Ukatwa apóstol Pablojj Evodia ukhamarak Síntique kullakanakarojja, ‘Tatitumpi mayakïpjjatap laykojj mä pachpa amuyunikïpjjañapatak chʼamañchtʼäna’ (Filip. 4:2, 3). w21.01 págs. 22, 23 párrs. 10, 11

Waynitu jilata, congregacionankir jilat kullakanakajja, jupanakamp chika Jehová Diosar ‘mayachtʼata servitamjja’ wali valoranitwa uñjapjje (Sof. 3:9). Kuna luräwinaktï katoqkta uk kusisita, taqe chuyma phoqatam uñjasas wal kusisipjjaraki. Respetonakapsa ganastawa, confiyapjjaraktamwa. Maysa toqetjja, Jehová Diosajj wal munastam, confiyaraktamwa, uk janipun armamti. Qhepa urunakanjja, walja waynanakaw chuymapat amtasa servipjjani sasaw Diosajj arsuwayäna (Sal. 110:1-3, TNM). Jumajj Diosar wal munastajja, jukʼamp sum serviñwa munaraktajja, uk Jupajj yatiwa. Ukhamajj pacienciampi mayninakar uñjam, juma pachpatakis paciencianirakïma. Pantjasïta ukhajja, maynitï ewjjtʼätam jan ukajj cheqañchätam ukhajj taqe chuyma katoqtʼasim. Jehová Diosaw jupanak toqejj yanaptʼasktam, uk janipun armamti (Heb. 12:6). Kuna luräwtï katoqkta uk sum phoqam. Jukʼampisa, Jehová Diosar kusisiyañatak chʼamachasim (Prov. 27:11). w21.03 pág. 7 párrs. 17, 18

Kunayman jan walinakaw llakisiyistaspa. Awisajj pantjasirïtasata, mä kun lurañatak jan chʼamanëjjatasata, usutätasatwa wal llakissna. Awisasti kuna asignaciontï katoqañ munktan uk jan katoqasa, jan ukajj predicktan uka cheqanakan jan istʼañ munapjjatapaw llakisiyistaspa. Awisajja, jiwas pachpatsa pantjasitanakasatsa facilakwa llakissna. Ukatwa Jehová Diosajj janiw machaq mundon katoqkitaspati sasin amuyjjsna. Ukham amuyañajj jan waliruw apistaspa. Bibliarjamajj taqeniw pantjasirïtanjja, Jesusakiw jan pantjasirïkänti (Rom. 3:23). Diosajj janiw pantjasitanakas uñchʼukkiti, janirakiw perfectöñassa maykistuti. Jan ukasti munasir Awkjamajj yanaptʼañwa munistu, wali pacienciampiw uñjarakistu. Jan walinak jan lurañatak chʼamachasitassa uñjasinkiwa, janiw kuntï jan lurirjamäktan uksa maykistuti, antisas jiwasar yanaptʼañatakejj listokiwa (Rom. 7:18, 19). w20.12 pág. 22 párrs. 1-3

Taqeniw mä viajenksnas ukhamätanjja. Machaq mundon wali munasiri Jehová Diosampi apnaqatäñatakiw viajisktanjja. Sapürurakiw wiñay jakañar apiri thakin saraskakiñatak chʼamachasisktanjja. Kunjamtï Jesusajj siskänjja, jakañar apir thakejj wali kʼullkʼuwa, awisajj ukan sarañajj chʼamakiwa (Mat. 7:13, 14). Niyakejjay pantjasir jaqëstanjja, uka thakit saranukuñajj facilakiwa (Gál. 6:1). Ukhamajja jiwasatï jakañar apir kʼullkʼu thakit jan saranukuñ munkstan ukhajja, chuymassa amuyunakassa luratanakassa jankʼakiw cheqañchañasa. Apóstol Pablojj “cheqañchasisipkakim” sasaw ewjjtʼistu. Ukampis amuyunakasa chuymasa uñakipañajj janiw faciläkiti. ¿Kunatsa? Chuymasajj engañjasiriwa, ukatwa kawkirus apistaspa uk jan yatksnati (Jer. 17:9). Facilakwa ‘kʼari amuyunakampejj’ engañjayassna (Sant. 1:22). Ukatwa Diosan Arupampi yanaptʼayasis chuymas uñakipañasa. Diosan Arupajja, “kunatï amuyunsa chuymansa utjki ukanaksa” qhanstayiwa (Heb. 4:12, 13). w20.11 pág. 18 párrs. 1-3

Humilde chuymanïsajj kusisitaw jakassna. ¿Kunatsa ukham sistanjja? Humilde chuymani jaqenakajja, janiw taqe kuns lurañ yatipkaspa ukham tukupkiti, jan ukasti maynejj yanaptʼañ munki ukhajj kusisitaw yanaptʼayasipjje. Jesusajj lepra usuni 10 jaqenakar qollkäna uk amtañäni. Qollatanakat maynikiw Jesusar yuspärañatak kuttʼanïna. Uka humilde jaqejja, jupa pachpa qollasiñ jan pueditap yatïnwa, ukatwa Jesusar wali kusisit yuspäräna, Diosarus jachʼañcharakïna (Luc. 17:11-19). Humilde chuymani jaqenakajja, taqenimpiw sum apasipjje, suma amigonakanïpjjarakiwa. ¿Kunatsa? Ukham jaqenakajja, jaqe masipan suma luratanakapwa uñjapjje, taqe chuymaw jupanakar confiyapjjaraki. Mayninakajj Jehová Diosar servisa privilegionak katoqapki ukhas wal kusisipjje, taqe chuymaw jupanakar felicittʼapjjaraki. w20.08 pág. 12 párrs. 17, 18