¿Religionarojj atinisiñjamati? Qollqe toqeta

Anaa warmejj wawanakapamp chikaw iglesiar sarapjjerïna, ukat “Bibliat sum amuyañ munta” sasaw mä kutejj tatakurar säna. Niyakejjay tatakurajj Bibliat jan yatichkchïntejja, Ana warmejj janiw iglesiapar sarjjänti. Ukat iglesia pʼeqtʼirinakaw akham sasin qellqapjjatayna: “Janitï iglesiar tantachasir jutirjamäkstajja, qollqem apayasinipkakita” sasa. Ukhaw qollqepak munapjjatap Ana warmejj amuyasïna.

Angelina warmejj wali Dios chuymanwa, jupajj akham siwa: “Iglesiajan kimsa kutiw qollqe churañatak plato muyuyapjjerïna, ukat kuns churapjjañajapunïnwa, qollqek mayisipkiri. ‘Janiw Diosan qollan ajayupanipkiti’ sasaw chuymajan sirïta” sasa.

Jichhajj kawkïr religionanaktï jan ukajj yupaychäwinaktï uñtʼkta ukanakat amuytʼam. ¿Jaqenakar kunjamatsa qollqe mayipjjapuniti? Ukat ukajj ¿Bibliarjamäskiti?

¿KUNSA BIBLIAJJ YATICHI?

Cristian tama uttʼayir Jesusajj akham sänwa: “Inakiw lurapjjäta, ukanak lurañataki [...] inaki katoqapjjatam layku” sasa (Mateo 10:8). Biblian yatichäwinakapajj taqenitakiwa, janiw aljasiñapäkiti.

¿Kunjamsa nayrïr cristianonakajj tamatak qollqe jikjjatapjjerïpachäna?

‘Sapa mayniw, kunjamtï chuymapan amtki ukhamarjam churapjjerïna; janiw pä chuyma ni maynin jariyatakis churapjjerïkänti, Diosasti kusisit chuymampi churirirojj munasiwa’ (2 Corintios 9:7). Ukat apóstol Pablojj akham sänwa: “Jilatanaka, ¿amtasipjjtati kunjämsa irnaqapjjäyäta, [...] tʼaqhesipjjäyäta jakañataki ukjja? Uruy aruma irnaqapjjäyäta jumanakatak jan kuna llakïskañataki kunapachatejj jumanakar Diosan arunakap churapkäyäsma ukkhajja” sasa (1 Tesalonicenses 2:9). Cheqas apóstol Pablojj Diosan arunakap yatiyañatakejj carpanakwa lurirïna, ukhamatwa qollqemp yanaptʼasirïna (Hechos 18:2, 3).

¿JEHOVÁ DIOSAN QHANAÑCHIRINAKAPAT KAMSASIRAKISPASA?

Jupanakan Tantachasiñ Utanakapajj janiw suma yänakampipuni luratäkiti. Ukhamajj ¿kunjamsa qollqemp yanaptʼasipjje? Janipuniw qollqe mayiñ amtampejj mä plato muyuyapkiti, ni sobrenaksa apayapkiti. Antisas aski yatichäwinak yuspärapki ukanakajj jan khitin uñjkataw qollqemp yanaptʼapjjaspa kawkïr cajanakatï Tantachasiñ Utanakapan utjki ukana.

Aka revista imprimiñasa ukat apayañasa qollqetakiwa. Ukampis janiw kunäkipansa aka revistanakat qollqejj mayiskaniti, kunattejj Biblian cheqa yatichäwinakap yatiyañ amtampiw lurasi.

Kunjamakis amuyasma ¿janit ukham lurapjjatapajj kuntï Jesusajj siskäna ukat nayrïr cristianonakajj lurapkäna ukhamäki?