¿Religionarojj atinisiñjamati? Chʼajjwäwinak toqeta

Alberto chachajj niya tunka maranakaw ejercitonkäna, jupajj akham siwa: “Tatakurajj akham sasaw bendicipjjetäna: ‘Diosaw jumanakampiski’ sasa. Ukampis akham sasiyätwa: ‘Nayajj jaqe jiwayirejjay saraskstjja, ukhamarus Bibliajj “janiw jaqe jiwayätati” sarakisä’” sasa.

Ray chachajj Payïri Jachʼa Chʼajjwäwin ejército de la marina siskis ukankänwa. Mä kutejj akham sasaw tatakurar jisktʼatayna: “Jumajj mayninakar atipapjjañajataki ukat soldadonakatak Diosat mayiñatakiw jachʼa boterojj makatanta. Ukampis ¿mayninakajj janit ukham lurapkaraki?” sasa. Ukat tatakurajj Tatitun luräwinakapajj janiw sum amuyañjamäkiti sasakiw situ.

Tatakuran ukham satapajj ¿walikiw sasmati?

¿KUNSA BIBLIAJJ YATICHI?

Wakiskir mandamientonakat maynïrejj akawa: “Jaqe masimaruw munäta, jumar munasktas ukhama” sasaw Jesusajj säna (Marcos 12:31). Ukhamajj ¿maynejj kawkïr markatächiniy ukarjamaw munasipjjäta sasat Jesusajj sispachäna? Janiwa. Antisas arkirinakaparojj akham sänwa: “Jumanakatejj maynit maynikama munasipjjätajja, taqeniw amuyapjjani nayan discipulonakajjäpjjatama” sasa (Juan 13:34, 35). Jïsa, ukajj ukhamañapänwa. Ukat jaqe masipar jiwayaskañat sipansa jakäwinakapsa aptʼasirjamapjjañapänwa.

Ukat ukhampunwa lurapjjäna. The Encyclopedia of Religion notes: sat qellqatajj akham qhanañchi: ‘Tertuliano ukat Orígenes chachanakajj Iglesian nayrïr awkinakapjamajj akham sapjjänwa: “Nayrïr cristianonakajj janiw jaqe jiwayañ munapkänti, ukatwa Roma markan utjkän uka ejercitonkañ jan munapkänti”’ sasa.

¿JEHOVÁ DIOSAN QHANAÑCHIRINAKAPAT KAMSASIRAKISPASA?

Jupanakajj niya taqe markanakankapjjewa. Ukat mä markatï yaqha markampi chʼajjwapjjaspa ukhajja, purapat munasiñ uñachtʼayasiñatak wal chʼamachasipjje.

Amuytʼañataki 1994 maranjja, Ruanda markan hutus ukat tutsis jupanakaw chʼajjwapjjäna, ukhaman uñjasisajj Jehová Diosan Qhanañchirinakapajj purapatwa yanaptʼasipjjäna. Jïsa, jakäwip aptʼasirjamas hutus jupanakajja tutsis jupanakarurakiw yanaptʼapjjäna. Ukat kunaratutï Interahamwe ukankir jaqenakajj Jehová Diosan Qhanañchirinakapat pä hutunakar tutsinakar yanaptʼapjjatapat katuntapkän ukhajja, akham sapjjänwa: “Tutsinakar yanaptʼapjjatam laykuw akham uñjasipjjtajja” sasa. Ukatsti jiwayapjjänwa (Juan 15:13).

Ukhamajj ¿janit ukham lurapjjatapajj kuntï Jesusajj cheqpach munasiñat siskän ukhamäki?