Diosan bendicionapwa katuqaskañäni
1. ¿Aka maran apaskani uka jachʼa tantachäwinxa kunsa katuqañäni?
1 Supayan apnaqata aka ñanqha pachanxa, Diosar yupaychañ tuqitxa jaqinakax wali aynachtʼataw jikxatasipxi, ukampisa Jehová Diosaw yupaychirinakaparux chʼamañchtʼkir aski yatichäwinak churaski (Isa. 58:11). Ukxa, sapa maraw kimsa uru jachʼa tantachäwin churistu. Niyakixay uka jachʼa tantachäwix jakʼankxchixa, ¿kunjamsa maynit maynikam chʼamañchtʼasiñasatak wakichtʼassna? (Pro. 21:5.)
2. ¿Kunanaksa niy waktʼayatäxañapa?
2 Janïratï kimsürpach jachʼa tantachäwinkañatak tiempo apstʼaskstaxa, kunjamsa juma pachpasa ukat irnaqäwimats tiempo apstʼasïta ukxa sum amuytʼasiñamawa. Janïr tantachäw qalltkipan puriñataki ukat kawkhansa quntʼasïta uk katuñatakixa, ¿qhawqha tiempo faltkipansa saräta uk amtxtati? Kuntï Jehová Diosax Bibliat apstʼat yatichäwinak wakichtʼarapkistu ukanak taqpachwa istʼañ muntanxa, janipuniw ina chʼusaru aptʼañ munktanti (Isa. 65:13, 14). Ukhamaxa, kawkharus qurpachasïta ukat autotti jan ukax kunatcha saräta, ¿ukx amtxtati?
3. Jachʼa tantachäwin wali wakiskir yatichäwinaka sum katuqañatakixa, ¿kuna iwxtʼanakas sapa maynirusa jan ukax familpacharusa yanaptʼistani?
3 Jachʼa tantachäwinkkasinxa, ¿yaqha tuqinakat jan lupʼiñatakix kun lurañas wakisispa? Wakisirjamächi ukhax urutwa sum samartʼañamatak ikintxañama, ukat tantachäwinxa arstʼiriruw uñtañama, arstʼirix Bibliat liytʼkani ukhax jupamp chikaw Bibliamat liytʼañamaraki ukat wakiskir yatichäwinaks qillqtʼasiñamawa. Ukat familpach mä chiqanak quntʼasipxaspa ukhax wali askipunïspawa, ukhamat awk taykax wawanakapar uñjapxañapataki (Pro. 29:15). Ukat utar purisaxa, kuna aski yatichäwinaksa yatiqawayapxta uk familiamamp parltʼañatak tiempo apstʼasipxarakismawa. Kuntï yatiqawayktan uka yatichäwinakax jachʼa tantachäwi tukuyat qhiparu jiwasar chʼamañchtʼaskakiñapatakixa, Familiana Diosar Yupaychañataki Arumanwa wali wakiskir yatichäwinak mä jukʼa amtsna.
4. ¿Kunsa mayninakan chʼamañchtʼat jikxatasipxañapatak lursna?
4 Kunjamsa mayninakar yanaptʼsna. Mayninakax Diosar yupaychañ tuqit chʼamachtʼatäpxañapwa munaraktanxa. ¿Kawkïr jilat kullakanakatï chuymankipstatäpki jan ukax uka jachʼa tantachäwir jan sarirjamäpki jupanakat amtasktati? Tamamantï utjchixa, ¿jupanakar yanaptʼasmati? (1 Juan 3:17, 18.) Uka jilat kullakanakan yanaptʼa katuqapxañapatakixa, irpir chuymaninakaw uñjapxañapa, yamas grupo uñjirinakaw uk sumpach uñjapxañapa.
5. ¿Kunjamsa invitación lakirasiskani? (Recuadro uñxatarakismawa.)
5 Pasïr maranakjamarakiw uka jachʼa tantachäw qalltañapatak kimsa seman faltkipan invitacionanak jaqinakar churaskañäni. Sapa tamaw qhawqtï lakirapxañapäki uk taqpacha lakirañatak amtapxañapa ukat kawkhanakansa tamax yatiyi uka chiqankirinakarus taqinir invitʼapxañapatakiw amtapxañaparaki. Ukat kunürkamatï lakirasiñapäki uka uru qhipat familiamax invitacionanïsipkakchi ukhaxa, kawkhantï jachʼa tantachäwix apaskani ukaruw apasipxañama, ukhamatwa tantachäwir sarkasin jaqinakar invittʼapxasma. Kunjamsa uk lursna ukxa, viernes uruw qhanañchasini. Janitï qʼal lakirañjam amuyapxäta ukhaxa, kawkhantï jachʼa tantachäwix apaskani ukar mantasinwa katuqtʼir jilatar churasma. Ukampis mä invitación jiltʼayasiñ janipun armasimti, kunattix domingo uruw qhip qhipa arstʼäwin uka invitacionat qhanañchtʼasini.
6. ¿Kunjamsa respetomp sarnaqirïtas uñachtʼaysna?
6 Respetomp sarnaqatasaw yaqhanakar yanaptʼaspa. Jichhürunakanxa, “jupan jaqïñaki muniri” jaqinakax waltʼatapuniwa, jupanakaxa janiw yaqhanakatxa sinttʼasipkiti, ukampis respetompi sarnaqir jilat kullakanak taypin jikxatasiñax wali kusiskañapuniwa (2 Tim. 3:2, MT). ¿Kunjamatsa respetomp sarnaqatas uñachtʼaysna? Kawkhantï tantachasiñäni uka chiqax 8.00 alwa horasar jistʼarasini ukhax jan jankʼaki mantasa, ukat khitinakatï jiwasamp jakapxi jan ukax sarapxi ukat jiwasamp Bibliat yatiqasipki ukanakatakik asiento katusa. Tantachäwi sarayirix musicaw qalltxani quntʼasxapxam sani uk istʼasa ukat celularanakasa jan ukax yaqha ukhamanakasa janiw yaqhanakan istʼkayañapäkiti. Jiwasatï respetasirïstanxa, janiw jan wakiskani ukhax parlkañäniti janirakiw celularatsa mensajenak qillqas apaykañäniti, ukat tantachäw apaskipan janiw manqʼkañäniti ni inamayas sarnaqkañäniti.
7. ¿Kunjamsa mayni jilat kullakanakampi parltʼasisax maynit maynikam chʼamañchtʼasna?
7 Maynit maynikamaw chʼamañchtʼasna. Kimsa uru jachʼa tantachäwinxa mä wawakiw jilat kullakanakasampix tantachtʼastanxa (Sal. 133:1-3). ¿Yaqha tamankir jilata kullakanakar uñtʼañamax janit wakiskaspa? (2 Cor. 6:13, NM.) Sapa urus mä jilataru jan ukax mä kullakaru, jan ukax mä familiaru uñtʼañatakiw amtasma. Manqtʼasiñataki chika urux samartʼtan ukhaw yaqha jilat kullakanakar uñtʼsna. Ukhamaxa, anqar manqʼa alir sarañat sipansa utatpach manqʼa apasiñäni, ukhamatwa mayni jilat kullakanakamp parltʼasiñäni. Ukhamtï lurañänixa, suma amigonakwa jikxatañäni, ukax wali jachʼa bendicionawa.
8. Kunatsa jachʼa tantachäwin yanaptʼañax wakisispa ukat kunansa yanaptʼsna uka qhanañchtʼam.
8 Diosar yupaychañataki jilata kullakanakasamp irnaqtʼañaxa wali kusiskañapuniwa. Amuytʼañataki, kuna lurañanakatï uka tantachäw apasiñapatakix utjki ukan yanaptʼañatakiw sarasma, jan ukax kawkïr chiqatï tamamar qʼumachañ waktʼki ukans yanaptʼarakismawa (Isa. 6:8). Janitï kun lurañatakis asignatäkäta ukhaxa, Departamento de Servicio Voluntario siski ukaruw sarasma. Kunapachatï waljani yanaptʼtan ukhaxa, kusisitaw jankʼak kun lurañsa tuktʼaytanxa.
9. ¿Kunatsa sum sarnaqañasa ukat isisitasas sumäñaparaki?
9 Suma sarnaqatas uñjasaw mayninakax Diosat yatiqañ munapxaspa. Kimsürpachaw uka jachʼa tantachäwir saririnakajamax sarnaqañasa, janiw tantachäwinkktan ukhakixa. Ukhamasti, kawkïr markantï uka jachʼa tantachäwix apaskani ukanxa, yaqha jaqinakat mayjätasax qhanaw amuyasiñapa (1 Ped. 2:12). Tantachäwinkkañänisa, qurpachasiñ utankkañänisa jan ukax manqʼa alasiñ utankkañäni ukhasa suma isisitasampiw Jehová Diosar jachʼañchañasa (1 Tim. 2:9, 10). Tantachäwi tukuyatattï tarjeta jan apsuskañänixa, Jehová Diosan Qhanañchirinakapätasxa qhanwa jaqinakax amuyapxani, ukhamat inas jupanakar jachʼa tantachäwisat parlsna ukat Bibliatsa yatiyaraksna.
10. Qurpachasiñ utana jan ukax manqʼa aljañ utan irnaqtʼirinakax jachʼa tantachäwis wali askirjam uñjapxañapatakixa, ¿kunsa lurañasa?
10 ¿Kunsa qurpachasiñ utan irnaqirinakasa jan ukax manqʼa aljañ utan irnaqirinakax jiwasat amuyapxani? Qurpachasiñ utanxa, janiw inamayak utanak mayiñasäkiti, kunattix jilat kullakanakasax janiw qurpachasiñ ut jikxatapkaspati, ukat kuntï qurpachasiñ utax ganañapäkäna uksa aptʼasirakispawa. Uka qurpachasiñ utar mantkañäni jan ukax mistxañäni ukhatï walja jaqinakax utjchini ukhaxa, pacienciampiw suytʼañasa (Col. 4:6). Ukat khitinakatï manqʼa aljañ utan manqʼa asxaraykistani ukat qurpachasiñ utan qʼipinakas apañ yanaptʼistani jan ukax qurpachastan uka ut pichsupki ukanakarus qullq waxtʼañax wakisispawa.
11. ¿Kunanakas suma sarnaqirïtas uñachtʼayi?
11 Kunürunakatï jachʼa tantachäwix apaski uka urunakan suma sarnaqatasampixa, ¿kunsa uñachtʼaytanxa? Mä periodicorjamaxa, kawkhantï jachʼa tantachäwix apaskäna uka uta uñjirixa akham sasaw satayna: “Wali respetasir jaqinakäpxiwa, sapa mara jupanakar katuqtʼañaxa wali kusiskañapuniwa” sasa. Pasïr maraxa, kawkhantï jilat kullakanakasax qurpachasipkäna uka utanwa maynix qullqi bolsap chhaqayasitayna, ukampis jupax janiw Jehová Diosan Qhanañchiripäkänti, ukat kunapachatï uka uta uñjirix qullqi bolsap phuqatpach kuttʼayxäna ukhaxa, akham sasaw jupar säna: “Wali askipunïnwa Jehová Diosan Qhanañchirinakapax aka jakʼan tantachasipxatapaxa ukat aka utan qurpachasipxatapasa. Janitï ukhamäspänxa, janiw uka qullqi bolsam jikxatkasmänti” sasa.
12. Niyakixay jachʼa tantachäwix jakʼachasisinkchixa, ¿kun lurañsa amtañasäspa, ukat kunatsa?
12 Jichha maran apaskani uka kimsa uru jachʼa tantachäwinakax niy jakʼankxiwa. Uka tantachäwin wakichäwip waktʼayañatakisa ukat kunatï wakiski uk wakichtʼañatakisa walja horanakaw irnaqtʼasiwayi. Ukhamasti, kimsürpach uka jachʼa tantachäwir sarañatak chʼamachasipxañäni, ukhamatwa kuntï Jehová Diosasa ukat markapasa waktʼayarapkistu uka aski yatichäwinak katuqañäni. Ukat maynit maynikam chʼamañchtʼasiñasatakixa, wali respetompi ukat kusisit chuymamp sarnaqañatak amtañasawa. Ukham lurañäni ukhaxa, kunjamtï pasïr mara jachʼa tantachäwir sarasin maynix jikxataskäna ukhamarakiw jikxatasiñäni, jupax akham sänwa: “¡Janipuniw ukham sumankañan uñjasirïkti!” sasa.
[4 janan qhanañchäwipa]
Pasïr maranakjamarakiw uka jachʼa tantachäw qalltañapatak kimsa seman faltkipan invitacionanak jaqinakar churaskañäni
[6 janan qhanañchäwipa]
Tantachäwinkkañänisa, qurpachasiñ utankkañänisa jan ukax manqʼa alasiñ utankkañäni ukhasa suma isisitasampiw Jehová Diosar jachʼañchañasa
[7 janan qhanañchäwipa]
Maynit maynikam chʼamañchtʼasiñasatakixa, wali respetompi ukat kusisit chuymamp sarnaqañatak amtañasawa
[4-7 jananakan recuadropa]
Kimsa uru jachʼa tantachäwitak amtayäwinaka, 2011
◼ Kuna horas qalltani. Kimsürpachaw tantachäwix 9.20 alwa horasar qalltani. Ukat 8.00 alwa horasaruw punkux jistʼaratäxani. Kunapachatï musicax qalltxani ukhaxa, quntʼasxañasawa jan ukax uttʼasxañasawa ukhamat wakichäwix sum qalltañapataki. Viernes urumpi sábado urumpixa 4.55 jaypʼu horasaruw tukuyani, ukat domingo urusti 3.40 jaypʼu horasaruw tukuyarakini.
◼ Auto saytʼayañanaka. Kawki chiqanakantix auto saytʼayañanakax jiwasankani ukhaxa, janiw qullqix mayitäkaniti ukatxa purinitarjamaw autonak saytʼayapxarakini. Niyakixay auto saytʼayañ chiqax jiskʼakïchixa, mä autotak waljan sarapxasma ukhaxa wali askipunïspawa.
◼ Qunuñanaka jan ukax uttʼañanaka. Jiwasamp chika jutirinakataki ukat jiwasamp chika pachpa utan jakasirinakataki jan ukax Bibliat jiwasamp yatiqapki ukanakatakikiw qunuñanak imañasa (1 Cor. 13:5).
◼ Manqʼañ tuqita. Chikürux manqʼa alasir anqar mistuñat sipansa manqʼa apasiñax wali askiwa. Ukampisa, manqʼxa janiw jachʼa qʼipi apañasäkiti janirakiw manqʼa apañatakix vidriot luratax utjki ukarus apañasäkiti.
◼ Qullqimpi yanaptʼañataki. Kunjamtï chuymasan amtawayktan ukhamarjamaw Uraqpachan yatiyasiski ukar qullqimp yanaptʼsna, ukhamatwa yuspäratas uñachtʼaysna, uksti Tantachasiñ Utanwa jan ukax jachʼa tantachäwinwa irantarakisma.
◼ Chijinakampi ukat akatjamat usuchjasiñanakampi. Jachʼa tantachäwintï maynix mä akatjamat usuchjasispa jan ukax jan waltʼxaspa ukat doctorar apañ wakischispa ukhaxa, mä katuqtʼir jilataruw yatiyañama, jupaw Primeros Auxilios ukan irnaqtʼir jilat kullakanakarux yatiyani, ukhamatwa jupanakax hospitalar jawsañax wakisiti janicha uk sum amuykiptʼapxani.
◼ Medicamentonaka. Jumatï medicamentonak umsta ukhaxa, mirä amp suma qhawqtï wakisirjamäni ukjwa apasiñama, kunattix jachʼa tantachäwinxa janiw uka medicamentonak jikxatkätati.
◼ Zapatonaka. Sapa maraw kay usuchjasipxi jan ukax qʼiwsusipxi. Ukatwa ukürunakatakix jan usuchjirjamäki uka zapato uchtʼasiñax wakisi, ukhamat gradanakansa rejillanakansa ukat yaqha chiqanakansa sum sarnaqañataki.
◼ Jan sum istʼapki ukanakataki. Pachpa jachʼa tantachäwinxa, wakichäwix FM radiot istʼasini. Istʼañatakix mä jiskʼa radio ukat jiñchur usktʼasis mä ischʼukiñampiw munasini.
◼ Wawa nuknaqañ cochenaka ukat apthapiñ sillanaka. Jachʼa tantachäwirux janiw wawa nuknaqañ cochenakasa apthapiñ jachʼa sillanakasa apasiñapäkiti. Jiskʼa wawanakar quntʼayañ sillanakxa apasisipkasmawa, ukampis uka sillanakax janiw mä qunuñat jiläñapäkiti.
◼ Sírvase visitar sat formulario. Jachʼa tantachäwinkkasin Diosat yatxatañ munirinakampi parltʼäta ukhaxa, jupanakax kawkjans jakapxi uk qillqtʼañatakixa Sírvase visitar (S-43) sat formularioruw qillqtʼasiñama. Jachʼa tantachäwinxa Departamento de Publicaciones uñjiri jilatanakaruw uka formulario jaytasma jan ukax tamankir secretario jilataruw tamamar kutʼxasax churarakisma (Diosan Apnaqäwipat Yatiyañataki noviembre 2009, 4 jana uñxatäta).
◼ Manqʼa aljañ utanaka. Uka utanakar sarasin jilat kullakanakasax respetomp sarnaqapxi ukhaxa, Jehová Diosaruw jachʼañchapxi. Ukan irnaqtʼirinakarutï qullqi waxtʼapxapunchi ukhaxa, jumax waxtʼarakismawa.
◼ Qurpachasiñ utanaka. Aka amtäwinakaxa, janiw taqi chiqanakatakïkiti:
1) Janiw inamayak utanak mayïtati, janirakiw yaqhanakarus uka utar qurpachañatak jawstʼätati.
2) Uka qurpachasiñ utanxa, kawkhantï phayasiñapäki uka chiqanakwa phayasma.
3) Qurpachaskäta uka utan irnaqirinakarux sapüruw qullqi waxtʼasma.
4) Juntʼümas chhullunkhayas inakiw qurpachasirinakarux churapxi, ukhamax janiw jilpach apsusiñamäkiti.
5) Qurpachasiñ utan irnaqirinakarux munasiñampi ukat respetompiw uñjañasa. Jupanakax waljaniruw yanaptʼasipki, ukhamax jiwasan amuytʼasirïtasatsa suytʼirïtasatsa ukat jupanakar yanaptʼirïtasatsa wal yuspärapxi.
◼ Yanaptʼañataki. Jachʼa tantachäwinakar sarañax wali kusiskañapuniwa, ukampis kunanakantï ukan yanaptʼañax wakisini ukar yanaptʼäta ukhaxa, jukʼamp kusisitaw jikxatasïta (Hech. 20:35). Taqi khitinakatï yanaptʼañ munapxani ukanakaxa, Departamento de Servicio Voluntario ukaruw sarapxañapa. Ukat khitinakatï janïr 16 maranïpki ukanakas yanaptʼapxarakispawa, ukampis awk taykapan uñjatäpxañapawa.
◼ Katuqtʼirinaka. Kawkïr jilatanakatï experiencianïpkta, yamas irpir chuymaninakaru ukhamaraki yanapirinakaparuw katuqtʼirinakjam irnaqtʼapxañamatak chʼamañchtʼanipxsma, jilat kullakanakar sum yanaptʼapxañapataki ukhamat mä wawakjam tantachasiñax utjarakini. Ukham irnaqtʼañax Jehová Diosar wal kusisiyi.
◼ Horasar puriña. Kawkhantï jachʼa tantachäwix apaskäni ukarux horasapar puriñatak chʼamachtʼasiñäni ukhaxa, wali chʼamañchtʼataw jikxatasiñäni. Kunattix jilat kullakanakasampiw parltʼañäni, música usktʼaskani uksa istʼañäni, qallta qʼuchsa qʼuchuñäni, qallta oracionsa ukat wali suma katuqtʼatäpxtaw siskani uka arunaksa istʼarakiñäniwa. Horasapar tantachäwir puriñäni ukhaxa, jilat kullakanakasax wakichäwi sum istʼapxani ukat taqi kun sum lurirïtapat Jehová Diosar respetatassa yuspäratassa uñachtʼayarakiñäniwa (1 Cor. 14:40).
[5 janan recuadropa]
¿Kunjamsa invitación lakiraskañäni?
Kawkhanaktï tamax yatiyki uka chiqanakan taqinir invittʼañatakixa, mä qhawqha arunakamp parltʼañakiw wakisispa. Inas akham sissna: “Kamisaki. Uraqpachanwa aka invitacionax churasiski. Jumatak jayttʼawayañ munaraktwa. Kunatakisa ukat kawkhansa apasiskani ukx akanwa qhanañchasiski” sasa. Uka invitacionan qalltan siski uka arunakax chuymar purtʼkiriwa, ukhamax uñxattʼañapatakjamaw churäta. Taqi chuymaw irnaqtʼañama. Sabadomp domingompix invitacions jaytchïtaxa, wakisirjamäni ukhax revistanak churarakismawa.