¿Jumax Macedoniar pasasmati?

1. ¿Kunatsa Pablompi compañeronakapampix Macedoniar sarapxäna?

¹ Khaya 49 maranwa Apóstol Pablox Antioquía de Siria chiqat misionerjam Éfeso markaru ukat Asia Menor uksa tuqin jikxataski uka markanakar visittʼañapäna. Ukampix pay kutiw ukhama saräna. Ukampis qullan ajay tuqiw mä visionan ‘Macedoniar pastʼañapatak’ mä invitación katuqäna. Pablompi ukat compañeronakapampixa wali kusisitaw uka invitación katuqasipxäna, ukat ukar sarapxatapatxa uka markankir nayrïr tamwa uttʼayapxäna (Hech. 16:9, 10; 17:1, 2, 4). Jichhürunakanxa, ukhamarakiw uraqpachan yaqhip chiqanakanxa Diosan arunakap yatiyasiñapatakix yanapax munasi (Mat. 9:37, 38). ¿Jumax yanaptʼarakismati?

2. ¿Kunatsa yaqhipax yaqha markar sarañ jan amtapkaspa?

² Inas jumax Pabljam chuymanirakïsta, ukampis inas yaqha markar sarañ jan amtkstati. Ukat Escuela de Galaad ukar inas jan sarirjamäksta, kunattix ukar sarañatakix inas maranak jan phuqkstati, soltera kullakästa jan ukax wawanak uywasksta. Janiw yaqha aru yatiqkiristi sasin inas amuysta jan ukax qullqi tuqit jan waltʼañan jikxatasitamat markamat kawkhantï jichhax jakasta uka markar sarxsta, ukatwa yaqha markar sarañax jumatakix chʼamäspa, inas ukanakat yaqha markar sarañ jan amtkstati. Ukampisa, Diosar mayisisa ukat sum lupʼikiptʼasinxa, inas jichhax kawkhantï jukʼamp yanap munaski uka markar sarañ amtxchisma.

3. Yaqha markar yanaptʼir sarañatakixa, ¿kunatsa misionerüñatak wakichatʼatäñapunix jan wakiski?

³ ¿Misionerüñatak wakichatʼatäñapunit wakisi? ¿Kuntï Pablosa ukat compañeronakapas lurapkäna ukax wali askirjam mistuñapatakix kunas yanaptʼäna? Jehová Diosaru ukat qullan ajayupar atinisiñaw jupanakar yanaptʼäna (2 Cor. 3:1-5). Ukhamasti, jumatï misionerüñatak wakichtʼäwi jan katuqirjamäksta ukhasa, yaqha markar yanaptʼir saräta ukhax wali askirjamaw irnaqtʼarakisma. Ukhamarusa ak amtapunim, Yatiyañataki Diosan Yatichäwipa ukat Yatiyañataki Tantachäwinwa suma wakichtʼatäñatakix yatichäwinak katuqasktaxa. Jumatï Galaad escuelaru jan ukax yaqha ukham escuelar sarañ amtaskstaxa, kunjamsa misioneronakax Diosan arunakap yatiyapxi uk yantʼir yaqha markar saräta ukhaxa, experiencianïñwa yanaptʼätam ukat uka escuelar sarkäta ukhax ukaw wal yanaptʼätamxa.

4. ¿Khitinakatï jilïrïpki uka jilat kullakanakax yaqha markar sarañ amtapxarakispati?

⁴ Jilïr jilat kullakanaka. Kawkir jilïr jilat kullakanakatï yatxatʼatapki ukat kʼumaräsipki jupanakaxa, kuna markantï yatiyirinakax munaski ukanxa wali aski yanapapunïpxaspawa. ¿Jumax jubilatätati? Yaqhipaxa, jubilacionapat mä qhawqha qullq irstʼasisaxa, jichhak nayrar sartasipki uka markar Diosan arunakapat yatiyasiñapatak yanaptʼir sarapxi jupanakax wali sum jakasipxi, uka markanxa qullayasiñasa ukat yaqha gastonakasa markapat sipansa jukʼamp minusakiwa.

5. Jubilasisin yaqha markar sarir jilatan experienciapat arstʼam.

⁵ Mä jilataxa kawkhantï inglés aruki parlapki uka markanwa jakasïna, jupaxa irpir chuymaniwa ukat precursorarakiwa, niyaki jubilasxasaxa Asia jachʼa markan kawkhantï turismox utjkäna ukharuw Inti jalsu aynach tuqir saräna, ukanxa inglés aru parlirinakat llätunka yatiyirinakakiw utjäna, jupanakaruw yanaptʼir saratayna, uka jilat kullakanakax 30.000 yaqha markanakat jutir jaqinakaruw yatiyapxañapäna. Ukat pä maratxa 50 tantachasirinakaw utjxäna. Uka jilatax akham siwa: “Uka chiqar saratajatxa wali aski bendicionanakpun katuqawayta. Taqi ukanakat parlañatakix tiempos pistʼitaspawa” sasa.

6. Kawkhantï Diosan Arupat yatiyasiñapatak yanaptʼax munaski uka markar sarir soltera kullakan experienciapat arstʼam.

⁶ Soltera kullakanaka. Diosan arunakapat yatiyasiñapatak yanap munaski uka markanakanxa Jehová Diosaw kullakanak tuqi yatiyaski (Sal. 68:11, NM). Mä tawaqu kullakaxa Diosan arupat jukʼampi yatiyañatakiw yaqha markar sarañ amtatayna, ukampis awk taykapaw jupan askipat llakisipxäna. Ukatwa kawkir markatï política tuqitsa ukat qullqi tuqit suma uttʼatäki uka markar sarañ amtatayna ukat sucursalaruw qillqatayna, jupanakatwa jukʼamp yanaptʼa katuqatayna. Suxta mara uka markan yanaptʼatapatxa, walja bendicionanakwa katuqatayna. Jupax akham siwa: “Markajanxa janiw Bibliat waljanir yatichkiriskayätti. Ukampis kawkhantï walja yanapax munaski ukar sarxasaxa, waljaniruw yatichta ukat kunjamsa jukʼamp sum yatichirista uks yatiqawayaraktwa” sasa.

7. Yaqha markar sarir mä familian experienciapat arstʼam.

⁷ Familianaka. ¿Wawanakanïstxaya janiw yaqha markar sarkiristi sasinti amuyta? Pä wawani mä familiaxa yaqha markar sarañwa amtapxatayna, wawanakapatxa maynix kimsaqallquni maraniwa ukat maynïristi tunkani. Taykapax akham siwa: “Wawanakajax akan jilsupxatapat walpun kusisipxta, akankapxatajatwa wawanakajax precursor especialanakarusa ukat misioneronakarus sum uñtʼawayapxi. Kawkhantï yanap munaski ukar yanaptʼañatak sarasaxa wali kusisitapuniw jikxatasipxta” sasa.

8. ¿Yaqha aru parlañ jan yatiqkasax Diosan arupat yatiyasiñapatak yanaptʼir yaqha markar sarsnati? Uk qhanañchtʼam.

⁸ Yaqha aru yatiqaña. ¿Janiw yaqha aru yatiqkiristi sasinti yaqha markar jan sarañ munkta? Kawkhanakantï Diosan arunakapat yatiyasiñapatak yanapax munaski uka markan inas kuna aruttï jumax parlkta uka aru parlasirakchi. Inglés aru parlir mä matrimonioxa kawkhantï español aru parlapki uka markaruw sarañ amtapxatayna, ukat uka markanx inglés aru parlirinakax waljaw utjäna. Ukat inglés aru parlir tamanakatxa kawkïr tamanakansa jukʼamp yanaptʼa munasi sasaw sucursalar jisktʼapxatayna. Ukatxa sucursalaw mä lista jupanakar apayatayna. Jupanakaxa mä tama ajllipxatäna ukat uka tamarux pay kutiw visittʼapxatayna. Utapar kuttʼxasaxa, sapa phaxsix janiw walja qullq gastxapxänti ukat mä maraw qullq tantasipxäna. Ukat uka markar sarxañatak wakichtʼatäxapxäna ukhaxa, uka markankir jilat kullakanakaw kawkhantï jakasipxañapäna uka uta jikxatañ yanaptʼapxäna.

9, 10. Khitinakatï markap jaytawayapki jupanakaxa, ¿kun lurañsa amtapxaspa, ukat kunatsa?

⁹ Markapat sarxirinaka. ¿Bibliat janïr yatiqkasati markamat sarxta? Inas markamanxa Diosan arunakapat yatiyasiñapatak yanapirinakax munaschi. ¿Yatiyasiñapatak yanaptʼañatakix markamar kuttʼañ amttati? Yaqha markat jutirinakatak sipansa inas jumatakix trabajo jikxatañasa ukat kawkhansa jakasïta uka uta jikxatañas jan chʼamäkchispati. Ukat kuna arsa markaman parlaski uks yatirakpachätawa. Ukhamarusa, inas uka markankirinakax yaqha markat jutirinakar istʼañat sipansa jumar istʼapxiristam.

¹⁰ Mä jaqixa, Albania markan jan waltʼäwi utjipanwa Italia markar sarxatayna. Ukanxa mä suma trabajo jikxatäna ukat sumarak pagapxäna, ukhamatwa familiapar qullq apayäna. Tiempompixa Biblian chiqa yatichäwinakapwa yatiqäna. Uka qhipatxa, mä gruporuw albanés aru yatichäna, jupanakaxa Italia markankir precursor especialanakapxänwa ukat Albania markaruw sarapxañapäna. Uka jilatax akham sasaw säna: “Jupanakax kawkïr markattï mistuniwaykta uka markaruw sarasipkäna, ukat janis albanés aru yatipkchïnxa, wal sarañ munapxäna. Niyakixay nayax albanés aru parlañ yatstxa ukat uka markankirirakistxa, ¿kunatsa Italia markan qhiparaskayätxa?” sasa. Ukatwa uka jilatax markapar kuttʼañ amtäna, ukhamat Diosan arunakap yatiyasiñapatak yanaptʼañataki. Ukat akham saskakiwa: “Italia markan trabajo ukat qhawqha qullqtï gankayäta ukanak jaytaniwaytwa, janipuniw ukham luratajat amtaskti. Albania markanwa wali suma trabajo jikxatta, kunattix taqi kuntï maynin utjki ukanakampi Jehová Diosar yupaychañaw taqi kunat sipansa wali wakiskirixa ukat ukarakiw kusisiyistu” sasa.

11, 12. ¿Khitinakatï yaqha markar sarañ amtapki jupanakax kunsa lurapxañapa?

¹¹ Kunjams lurasiñapa. Janïr Macedonia markar sarkasaxa, Pablosa ukat jupamp chik sarapkäna jupanakasa Inti jalant tuqiruw sarasipkäna. Ukampisa, qullan ajayuw uksa tuqir jan sarapxañapatak jarktʼäna, ukatwa alay tuqir sarapxäna (Hech. 16:6). Kunapachatï Bitinia marka jakʼankapkäna ukhaxa, Jesusaw jupanakar jarktʼäna (Hech. 16:7). Jichhürunakanxa, Jehová Diosaw Yuqap tuqi suma yatiyäwinak yatiyasiñapatak uñjaski (Mat. 28:20). Ukhamasti, jumatï yaqha markar sarañ amtaskstaxa, Jehová Diosaruw yanap mayisiñama (Luc. 14:28-30; Sant. 1:5; “¿Kawkïr markarutï sarañ amtktxa uka markanx yanapax munasiti janicha uk kunjamsa yatiristxa?” siski uka recuadro uñxattʼäta).

¹² Kuntï lurañ amtaskta ukax walikïskiti janicha ukxa, tamamankir irpir chuymani jilatanakaru jan ukax yatxattʼat jilat kullakanakaruw jisktʼasma (Pro. 11:14; 15:22). Yaqha markan Diosan arunakapat yatiyasiñapatak yanaptʼir sarañxata parlki uka qillqatanakwa liytʼañama, ukat kawkïr markarutï sarañ amtaskta uka markat sumwa yatxatañamaraki. ¿Uka markar visittʼasmati ukat mä qhawqha phaxsinak ukan qhiparasmati? Uka markarutï sarañ amtsktaxa, uka markankir sucursalaruw yanapa mayiñatak qillqañama. Uka markankir sucursalan direccionapxa aka maran mistki uka Anuario libronwa jikxatasma. Cartam sucursalar chiqak apayañat sipansa, tamamankir irpir chuymani jilatanakaruw churañama, jupanakaw mä qhawqha arunakamp janïr apaykasax qillqtʼawayapxarapïtam (Organizados para hacer la voluntad de Jehová sat librot 111 ukat 112 jananak uñxattʼäta).

13. ¿Kunjamatsa sucursalax yanaptʼiristam, ukat kunsa juma pachpax lurañama?

¹³ Ukat mä suma amtar puriñamatakixa, uka markankir sucursalaw taqi kuntï yatiñamäki uk yatiyapxätam. Ukampisa, visa apsuñamatakisa jan ukax markan jakañataki permiso apsuñamatakisa kuna documentonakas wakisi uk janiw churapkätamti, ni uka markar mantañamatakis mä invitacionäkaspas ukham mä carta qillqarapipkätamti. Janirakiw kawkhantï jakkäta uka uts jikxatarapipkätamti. Jumaw taqi ukanakxa, janïr uka markar sarkasin lurañama. Ukat kunanakas visa apsuñatakisa jan ukax trabajañatak permiso apsuñatakis munasi uk yatiñatakixa, jumaw embajadanakampi jan ukax consuladonakamp parlañama. Khitinakatï yaqha markar sarañ amtasipkchixa, kuna papelanakatï leyinakarjamax lurasiñapäki ukxa sapa mayniw uñjañapa ukat kunanakatï jakañatak munaski uksa sapa mayniw uñjañaparaki (Gál. 6:5).

14. Kawkïr markatï Diosan arunakap yatiyañataki jarkʼatäki uka markar sarañ munsta jan ukax ukar yanaptʼañatak sarañ munsta ukhaxa, ¿kun lurañamasa?

¹⁴ Diosan arunakap yatiyañataki jarkʼat markanaka. Yaqhip markanakanxa, jilat kullakanakasax wali amuyumpiw Diosan arunakap yatiyasipki (Mat. 10:16). Uka markar visittʼir sarapki jan ukax jakir sarxapxi uka jilat kullakanakax awisax jan munkasaw Diosan arunakap yatiyasitap qhan amuyayapxaspa, ukat inas uka markankir jilat kullakanakasarus jan walin uñjayapxchispa. Kawki markantï Diosan arunakapat yatiyasiñapatak jarkʼatäki uka markarutï jumax sarañ amtasksta ukhaxa, sucursalaruw irpir chuymaninak tuqi mä carta apayañama.

15. Yaqha markar jan sarirjamäksta ukhaxa, ¿kunjamsa Diosatak jukʼamp irnaqtʼasma?

¹⁵ ¿Yaqha markar jan sarirjamäkäta ukhasti? Jumatï yaqha markar jan sarirjamäkstaxa, janiw llakisiñamäkiti. Inas jumatakix Diosatak yaqha lurañanakax utjaskchi (1 Cor. 16:8, 9). Markamanxa, kawkïr tamanakas yanap muni ukxa inas tamanak tumptʼiri jilatax yatchi. Inas yaqha aru parlapki uka tamaru jan ukax grupor yanaptʼir sarchisma. Tamamansa jukʼamp yanaptʼarakismawa. Ak amtañamapuniwa, kawkinsa, Jehová Diosar taqi chuyma yupaychañaw taqi kunat sipansa wali wakiskirixa (Col. 3:23).

16. ¿Diosan arunakapat yatiyasiñapatak yanaptʼir yaqha markaruw sarañ munta sasin maynix sistaspa ukhax kun lurañasäspasa?

¹⁶ ¿Yaqha markar Diosan arunakapat yatiyasiñapatak yanaptʼir sarañ munir jilataru jan ukax kullakar uñtʼtati? Ukhamächi ukhaxa, chʼamañchtʼañamawa ukat yanaptʼañamarakiwa. Kunapachatï Antioquía de Siria markat Pablox mistuwaykäna ukhaxa, uka markax Roma jachʼa markankir kimsïr jachʼa markapänwa (Roma ukat Alejandría markanakas ukham jachʼa markäpxarakïnwa). Ukham jachʼa markätapatxa waljaw yatiyañax utjäna, ukatwa Pablon yanaptʼapax taman wakisïna, ukat jupatï sarxaspänxa yanaptʼax faltaspänwa. Ukhamäkchïnsa, Pablorux qhiparayañwa uka jilat kullakanakax munapxäna sasin janiw Bibliax siskiti. Janiw jupanakaki yanap katuqañ munapkänti, jan ukasti Diosan arunakap uraqpachan yatiyasiñap sum amuyapxäna (Mat. 13:38).

17. ¿Kunatsa ‘Macedoniar pasañataki’ amtañasäspa?

¹⁷ Pablompi compañeronakapampixa, Macedonia markar pasapxatapatx walja bendicionanakwa katuqapxäna. Filipos markanxa Lidiaruw uñtʼapxäna, juparuw Jehová Diosax “chuymap chʼallxtayäna, kuntix Pablox siskäna ukar jaysañapataki” (Hech. 16:14). Kunapachatï Lidiampi ukat familiapampi bautisasipxäna ukhaxa, Pablosa ukat mayni misioneronakas wali kusisitaw jikxatasipxpachäna. Walja markanakanwa Lidia warmjama Diosan Arupat yatiqañ munir jaqinakax utjaski. Jumatï ‘Macedoniar pasañamatak’ invitacionar jaysäta ukhaxa, ukham jaqinakaruw jikxatäta ukat jupanakarus yanaptʼarakismawa, ukax wali kusiskañapunïniw jumatakixa.

[5 janan recuadropa]

“¿Kawkïr markarutï sarañ amtktxa uka markanx yanapax munasiti janicha uk kunjamsa yatiristxa?”

• Jichhak mistki uka Anuario libronwa sapa yatiyirix qhawqha jaqinakarus yatiyañapa uk uñxattʼañama.

• Kawkïr markarutï sarañ amtaskta uka markat jukʼamp yatxatañataki ukat kuna experiencianakas uka markat utjki uk yatxatañatakixa, Índice sat qillqatatwa thaqtasma.

• Kawkïr jilat kullakanakatï uka markar visittʼapkatayna jan ukax uka markan jakapkatayna jupanakampiw parltʼasma.

• Kuna artï parlkta uka arut Diosan arunakapat yatiyañ munsta ukhaxa, kuna markanakansa uka aru parlapxi ukxa, Internetata jan ukax yaqha tuqinakatwa yatxatasma.