Diosan munañapax phuqaspan
1. ¿Kawkïrïnisa mä uru jachʼa tantachäwin pʼiqiñchäwipaxa, ukat kunatsa uka tuqit yatxatañax wali wakiskirixa?
1 Jehová Diosax munañapatwa jiwasar lurawayistu (Apo. 4:11). Ukhamasti, suma jakasiñasatakixa, kunas Diosan munañapaxa ukwa yatxatañasa ukat ukarjamaw sarnaqañasaraki. Amuyatax uk lurañax janis chʼamäkaspa ukhamawa, ukampis chʼamakiwa. Kunattix “jañchi[sa]n munañanakaparjama” ukat “amtäwinakasarjama sarnaqa[ña]” jan ukax “kunatix Diosar jan uñtʼir jaqinakarux kusisiyki” ukanak jan lurañasatakiw wal chʼamachasiñasaxa (Efe. 2:3; 1 Ped. 4:3; 2 Ped. 2:10). Jehová Diosan jan yanaptʼapampixa, Supayaw ‘jupan munañap lurañasatak katuntistaspa’ (2 Tim. 2:26, MT). Mä uru jachʼa tantachäwix 2011 maran septiembre phaxsit 2012 agosto phaxsikam apasiskani uka tantachäwiw kuntï Jesusax Nänakan Awkija sat oracionan mayisiñ yatichkäna ukarjam sarnaqañasatak yanaptʼistani, pʼiqiñchäwipax akawa: “Diosan munañapax phuqaspan” (Mat. 6:9, 10).
2. Mä uru jachʼa tantachäwinxa, ¿kuna jisktʼanakarus qhanañchasiskani?
2 Kuna jisktʼanakarus qhanañchasiskani. Arstʼäwinak istʼkasaxa, kunjamsa aka jisktʼanakax qhanañchasiskani uk sumpunwa istʼäta: Diosan Arupat istʼasaxa, ¿kunamp lurañas wakisi? ¿Kunsa Diosax jiwasatakix muni uk kunjamatsa yatxataskaksna? ¿Kunatsa taqi jaqinakar yanaptʼañatak jankʼakïñasa? ¿Kunjamatsa kusisit jakassna? Wayn tawaqunaka, ¿kunjam chuymampis Jehová Diosar yupaychapxañama? ¿Kuna bendicionanaksa Diosan munañap phuqirinakax katuqapxi? ¿Kunatsa jilat kullakanakasar jankʼak chʼamañchtʼañasa ukat yanaptʼañasa?
3. Mä uru jachʼa tantachäwir sarasin wali askinak apsuñatakixa, ¿kunanaksa lurañasa?
3 Uka tantachäwir sarañatakisa ukat arstʼäwinak sum istʼañatakis chʼamachasipxapuniñäni. Uka tantachäwir invittʼat arstʼiri jilataxa, inas Betel utat khitanita mä jilatächini jan ukax tamanak tumptʼir jilatächini. Janïr tantachäwi qalltkipana jan ukax tantachäw tukuyatarusa, uka jilatampi ukat warmipampi parltʼapxañamatakiw chʼamañchtʼanipxsma. Ukat utar kuttʼasaxa, taqi kuntï tantachäwin istʼaniwayapkta uk jan armañatakixa, sapakisa jan ukax familpachasa wakiskir yatichäwinakwa amtapxasma ukat kunjamsa Diosan munañap jukʼamp sum lurapxasma uks amuytʼapxarakismawa (Sant. 1:25).
4. ¿Kunatsa Diosan munañaparjam sarnaqañasa ukat jakäwisan nayrar uchañasax wakisi?
4 Khitinakatï munañaparjamak sarñaqapxi ukat Jehová Diosan munañaparjam jan sarnaqañ munapki ukanakax niyaw tukjatäpxani (1 Juan 2:17). Ukatwa Jehová Diosarux mä uru jachʼa tantachäwi wakichanitapat wal yuspärtanxa. Chiqpachansa, uka tantachäwiw Diosan munañaparjam sarnaqañasataki ukat jakäwisan nayrar uchañasatak yanaptʼistani.