Yateqañatakejj istʼañasawa
1. ¿Kunatsa kimsa uru jachʼa tantachäwinakan istʼañajj chʼamäspa?
1 Aka 2013 maratakejj kimsa uru jachʼa tantachäwinakajj niyaw qalltani. Ukatakejj mä suma wakichäw apstʼañatakejj wal chʼamachasiwayapjje ukhamat taqe jaqenakan ajay toqen chʼamañchtʼasipjjañapati. Ukhamajj ¿kimsürpach ukankañatakejj niyat wakichtʼasjjtänjja? Cheqas jachʼa tantachäwinakan kunayman lurañanakaw utjaspa, awisajj ukatwa jan sum istʼañjamäkaspati. Ukham tantachäwinakan wakichäwinakapajj taman utjki uka wakichäwinakat sipansa jukʼamp horanakanwa apasi, ukatwa sum istʼañatakejj chʼamachasiñasa. Maynejj yaqha cheqat purinisas jan ukajj kun lurasas qaritaw jikjjatasispa. Ukhamajj wali amuyumpi sum istʼañatakejj ¿kunas yanaptʼistani? (Deu. 31:12.)
2. Tantachäwitak suma wakichtʼatäñatakejj ¿kun lurañasas wakisispa?
2 Janïr tantachäw uru purinkipana. Internetar mantañataki www.jw.org/ay utjkistu uka cheqan kimsa uru jachʼa tantachäwin wakichäwip jikjjatsna, ukat uka wakichäwinwa arstʼäwinakajj kuna pʼeqeñchäwinakanïnisa, kuna wakiskir Bibliat apstʼat qellqatanakas maya jan ukajj paya sapa arstʼäwin liytʼasini taqe ukanak qhanañchani. Internetanïstan ukhajja, taqe ukanakat uñakiptʼsna ukhamatwa tantachäw istʼañatakejj chuymasajj wakichtʼatäni (Esd. 7:10). Inas Familian Diosar Yupaychañatak Aruman kuna toqenakatsa jachʼa tantachäwin parlasini taqe ukanak umuykiptʼapjjaraksna.
3. Wali amuyump istʼañatakejj ¿kunas yanaptʼistani?
3 Jachʼa tantachäwinkkasa. Janïr tantachäwi qalltkipan bañor sarañajj wakisirakispawa. Ukat jan khitin jawsaniñapatakis ukat mensajenak katoqas jan kuttʼayaskañatakis celularjja jiwtʼayañasawa. Celular naktayat jaytañ wakisini ukhajj amuktʼayañaw wakisispa, ukhamatwa mayni jawsankätam ukhajj janiw taqenin istʼkay wararkaniti. Ukat tableta electrónica satäkis ukanïsta ukhajja, wali amuyumpiw apnaqañama. Ukat tantachäwinkkasajja, janiw manqʼañasäkis ni umañasäkisa (Ecl. 3:1). Arstʼir jilatarojj sumwa istʼañasa ukat kawkïr jiskʼa tʼaqanaktï Bibliat liytʼaskani ukjja thaqtañasarakiwa. Ukat uks qellqaqtʼasirakismawa.
4. ¿Awk taykanakajj kunjamsa wawanakapan sum istʼapjjañapataki ukat yateqapjjañapatakejj yanaptʼapjjaspa?
4 Wawanakas istʼasin sum yateqapjjañapwa muntanjja. Proverbios 29:15 akham siwa: “Munañapampi sarnaqeri wawasti taykaparojj pʼenqachayiwa” sasa. Ukhamajj wawanakajj tantachäwin jan parlasipkañapatakisa, mensajenak jan qellqasipkañapatakisa ukat jan sarnaqasipkañapatakis awk taykapamp chikaw qontʼasipjjañapa. Ukhamatwa jupanakajj sum istʼapjjañapatakejj yanaptʼapjjaspa. Ukat jiskʼa wawanakajj janisay kuntï yatichaskani uk sum amuyapkchinejja, jan wararipjjañapataki ukat jan ikipjjañapatakiw yatichasirakispa.
5. ¿Kuntï jachʼa tantachäwin yateqaniwayktan uk wasitamp amthaptʼañajj kunatsa wakiskirejja ukat kunjamsa uk lursna?
5 Tantachäw tukuyataru. Sum samartʼañatakejj janiw sinti arum ikiñasäkiti. Ukat kuntï yateqaniwayktan uk jan armasiñasatakejj familiasampiw mä qhawqha minutonakan amthaptʼapjjañasaraki. Ukat manqʼa alasiñ utar amigonakasamp sarañäni ukhajja, jachʼa tantachäwin kawkïr arstʼäwis jiwasatakjamäkan uk qellqatanakas uñakiptʼasinwa amthaptʼapjjaraksna. Ukat kuntï jachʼa tantachäwin yateqaniwayktan ukajj kunansa yanaptʼistaspa uksa Familiana Diosar Yupaychañataki Arumanwa amuykiptʼapjjaraksna. Machaq qellqatanakat mistunkani ukanakatjja sapa semanan mä qhawqha minutonakan yatjjattʼañajj wakisirakispawa.
6. Jachʼa tantachäwir sarañajj ¿kunatsa wali wakiskiripunejja?
6 Mä jachʼa manqʼäwir sarsna ukat janirak kuns manqtʼasiniwayksna ni malltʼaniwaykaraksna ukhajj ukar saratasajj inamayakïspawa. Ukar uñtasitarakiw kimsa uru jachʼa tantachäwejja. Ukhamajj kimsürpach qalltat tukuykam ukankañatakiw chʼamachtʼasiñasa ukat wali amuyump istʼasin yateqatasarjam sarnaqañasatakis chʼamachasiñasarakiwa.