¿Mä suma manqtʼäwïkaspas ukham manqtʼañatakix wakichasxtati?
1. Mä suma manqtʼäwitakixa, ¿kunanak wakichtʼañas wakisi?
1 Wali suma manqtʼäwi wakichtʼañax chʼamakiwa akanak lurañaw wakisi: kunatï phaytʼañatak munaski uk alaña, wakichtʼaña, manqtʼapxañapatakix mesanak waktʼayaña ukat kawkhantï manqʼapkani uka lugarsa kʼachachtʼaña ukat yaqhanakampi. Ukampis invitadonakax wakichtʼasipxañaparakiwa, wali jayar sarañächi ukhaxa jukʼampïñapawa. Chiqasa wali irnaqtʼañaw wakisi, ukampis mä suma chʼamañchtʼkir manqʼa familiasampi ukat amigonakasampi manqtʼasiñaxa, ¿wali kusiskañäxaya? Chiqas akat mä jukʼaruxa Jehová Diosan Qhanañchirinakapax Uraqpachanwa jachʼa tamanakansa jiskʼa tamanakansa mä suma manqtʼäwïkaspas ukham manqtʼasiñatakix “Amuyasipxapunim” sat Kimsa Uru Jachʼa Tantachäwin tantachasipxani. Jichhürkamax uka tantachäwin wakichäwip waktʼayañatakisa ukat kunatï wakiski uk wakichtʼañatakisa wal irnaqtʼasiwayi. Ukampisa invitadonakjamax uka tantachäwir sarañatakisa askinak apsuñatakisa wakichtʼasiñasawa (Pro. 21:5).
2. Kimsürpacha jachʼa manqtʼäwïkaspas ukar sarañatakixa, ¿kun lurañasasa?
2 ¿Kuna amtampis sarañasa? ¿Uka suma manqtʼäwiru sarañatakix wakichasxtati? Kimsürpach sarañatakixa, wakischini ukhax patronamampi parltʼañamawa. ¿Sarañatakisa ukat qurpachayasiñatakisa wakichasisktati? Chiqasa, irpir chuymaninakaw chuymankipstatanakatsa usutanakatsa llakipxañapa, ukat kawkïr jilatas jan ukax kullakas yanaptʼatäñ munapxanixa jupanakatsa janiw armasipxañapäkiti (Jer. 23:4; Gál. 6:10).
3. Jan jawstʼatäsinxa janiw Walja Markanakat Jachʼa Tantachäwirux sarañasäkiti, ¿kunatsa?
3 Kunjamtï yatktanxa, yaqhip markanakanxa walja markanakat jachʼa tantachäwinakaw utjani. Mirä amp suma janiw ak armapxañamäkiti tantachasipxani uka lugaraxa qhawqhanitakisa, qhawqha cuartonakas qurpachasiñatakix utjaraki, ukarjamaw sucursalax qhawqhanis uka tantachäwin tantachtʼasipxani uk tantiytʼapxi, ukatwa kawkïr tamanakas ukat yaqha markat jutïr jilat kullakanakas jawstʼatäpki ukanakakix uka tantachäwir sarapxañapa. Jan jawstʼatäsin sarapxaspa ukhaxa, janipuniw akchʼas walïkaspati.
4. Sapüru tantachäwin wakichäwip qalltkani ukhaxa, ¿kuna amtayäwinakas yanaptʼistani?
4 Tantachäwirux alwat puriñatakiw wakichasiñama, ukhamat janïr tantachäwi qalltkipana qunuñanak jan ukax uttʼañanak jikxatañamataki. Janïr tantachäwi qalltkipanwa wakichäwipat mä jukʼa uñakiptʼasma, ukhamat kunatï yatichaskani uk taqi chuyma istʼañamataki (Esd. 7:10). Kunapachatï tantachäwi sarayirix musicaw qalltxani quntʼasxapxam sani ukhaxa sum istʼañamawa ukhamat qallta qʼuchu qʼuchuñatakisa ukat Diosar mayisiñatakisa.
5. ¿Kunjamatsa familiamax tantachäwit suma askinak apsuspa?
5 Familpacha mä lugaranak quntʼasiñaxa, awk taykanakaruw yanaptʼani, wawanakapax arstʼäwinak istʼasipkiti janicha uk uñjapxañapataki (Deu. 31:12). Arstʼirix Bibliat liytʼkani ukhaxa, jupamp chikaw Bibliasat liytʼañasaraki. Ukatxa wakiskirinak qillqtʼasiñas sum istʼañasatakiw yanaptʼarakistani, uka qillqtʼatanakaw arstʼäwinakan kuna wakiskirinakas utjäna uk amtañatakix yanapistani. Tantachäwinxa inamay parlañas sarnaqañas janiw wakiskaspati. Celularanïsta ukhaxa janiw ukampi tiempo apaqayasiñamäkiti ni mayninakarusa pantjayañamäkiti. Sapüru wakichäw tukuyaruxa, ¿kuna aski yatichäwinaksa yatiqawaytan ukanakat parltʼañax janit wakiskaspa?
6. Jachʼa tantachäwinakanxa, ¿kunas wali sumapunixa ukat kunjamatsa askinak apsuraksna?
6 Kimsa uru jachʼa tantachäwinxa mä wawakiw jilat kullakanakasampix tantachtʼastanxa, aka ñanqha pachanxa janiw ukham tantachtʼasiñax utjkiti (Sal. 133:1-3; Mar. 10:29, 30). Chiküru samartʼasax juma jakʼan quntʼatäpki uka jilat kullakanakamp parltʼañatakiw amtañama. Chiqasa, manqʼa alasiri mistuñat sipansa, tantachäwiruw manqʼa apasiñasa, ukhamatakwa yaqhanakamp parltʼañatakix tiempos utjarakispa. Maynit maynikama chʼamañchtʼasiñatakiw amtañama (Rom. 1:11, 12).
7. ¿Kunatsa isisiñ tuqit sum amuyasiñasax wakisi?
7 Isisiñ tuqita. Jehová Diosax nayra israelitanakarux fleconakan isinak uchasipxäta ukat fleconakxarux mä azul hilomp chʼukxatapxañamaw sasaw säna (Núm. 15:37-41). Uk uñjasaw jupanakax chiqpach yupaychäwitaki ajllit mä markäpxatap amtasipxäna. Jichhürunakanxa uka kikparakiwa, kunatï isisiñäki ukampi suma kʼachachtʼata isthaptʼastan ukhaxa, aka ñanqha pachampi jan chikachasitaswa uñachtʼaytanxa, ukat tantachäwi tukuyatat manqʼa aljañ utanakaru sartan ukhasa, uñjapkistu ukanakarus Jehová Diosar jachʼañchataswa uñachtʼaytanxa. Ukatwa, kunjamsa isisiñäni ukxa sum amuytʼasis ajlliñasa.
8. ¿Kawkjantix jachʼa tantachäwix utjki uka markan kunjamatsa yatiyaraksna?
8 Yatiyañasarakiwa. Sum wakichtʼasisa ukat chʼamachtʼasisaxa, kawkhantï tantachaskañäni uka markansa yatiyaraksnawa. Amuytʼañataki, mä jilatax tantachäwi tukuyatatxa warmipampiw manqʼa aljañ utaru saratayna. Uka utan irnaqirimpi parlañatakixa, tʼirkattʼatäkäna uka tarjeta uñachtʼayasax akham jisktʼäna: “¿Waljanirut akham tarjet tʼirkattʼatanakaru uñjta?” sasa. Irnaqirixa akham sarakïnwa: “Jïsa ukampis janiw kunatätapsa amuykti” sasa. Jilataxa mä jukʼa parltʼasax kimsüru jachʼa tantachäwiru sarañapatakiw jawstʼäna.
9. ¿Taqi uka manqʼanak Waktʼayiri, Jehová Diosarux kunjamatsa yuspärsna?
9 Jilatanakas taqpach arstʼäwinak asrtʼapkchixa ukat entrevistanakas demostracionanakas utjarakchixa, alaxpachankir Jehová Dios Awkisaw taqi ukanak waktʼayirixa, Jupakipuniw sapa mara mä suma manqʼtʼäwïkaspas ukham suma yatichäwinak manqtʼayistuxa (Isa. 65:13, 14). Jiwasatï taqi ukanakat yuspärañänixa, kimsürpachaw uka suma manqʼa manqtʼañatakix tantachasiñäni. Ukhamasti, ¿suma manqʼtʼäwïkaspas ukar sarañatakix wakichatäxtati?
[5, 6 jananakan recuadro]
Kimsa uru jachʼa tantachäwitak amtayäwinaka
◼ Kuna horas qalltani. Kimsürpachaw tantachäwix 9.20 alwa horasar qalltani. Ukat 8.00 alwa horasaruw punkux jistʼaratäxani. Kunapachatï musicax qalltxani ukhaxa, quntʼasxañasawa jan ukax uttʼasxañasawa ukhamat wakichäwix sum qalltañapataki. Viernes urumpi sábado urumpixa 4.55 jaypʼu horasaruw tukuyani, ukat domingo urusti 4.00 jaypʼu horasaruw tukuyarakini. Walja Markanakat Jachʼa Tantachäwïkani ukhaxa jueves urux 1.20 jaypʼu horasaruw qalltani ukat 4.55 jaypʼu horasarurakiw tukuyani.
◼ Auto saytʼayañanaka. Kawki chiqanakantix auto saytʼayañanakax jiwasankani ukhaxa janiw qullqix mayitäkaniti, ukatxa purinitarjamaw autonak saytʼayapxarakini. Niyakixay auto saytʼayañ chiqax jiskʼakïchixa, mä autotak waljan sarapxasma ukhaxa wali askipunïspawa.
◼ Qunuñanaka jan ukax uttʼañanaka. Jiwasamp chika jutirinakataki ukat jiwasamp chika pachpa utan jakasirinakatakikiw qunuñanak imsnaxa.
◼ Manqʼañ tuqita. Chikürux manqʼa alasir anqar mistuñat sipansa manqʼa apasiñax wali askiwa. Jachʼa phukhunaka ukat vidriot lurat manqʼa apnaqañanaksa janiw apañasäkiti.
◼ Qullqimpi yanaptʼañataki. Kunjamtï chuymasan amtawayktan ukhamarjamaw Uraqpachan yatiyasiski ukar qullqimp yanaptʼsna, ukhamatwa yuspäratas uñachtʼaysna, uksti Tantachasiñ Utanwa jan ukax jachʼa tantachäwinwa irantarakisma.
◼ Chijinakampi ukat akatjamat usuchjasiñanakampi. Yaqhipanakax mä jukʼa ustʼatas celularanakapat wal jawsanipxi sasaw qullirinakax sapxi. Ukhamaxa, jachʼa tantachäwintï maynix mä akatjamat usuntanixa, mä katuqtʼir jilataruw jawsañapa, jupaw Primeros Auxilios sat irnaqtʼir jilat kullakanakarux yatiyani, ukhamat kamachapxanisa uk sum amuykiptʼapxañapataki.
◼ Zapatonaka. Sapa maraw kay usuchjasipxi. Ukatwa ukürunakatak jan usuchjirjamäki uka zapato uchtʼasiñaw wakisi, ukhamat gradanakansa rejillanakansa ukat yaqha chiqanakansa jan tinkuñataki.
◼ Jan sum istʼapki ukanakataki. Pachpa jachʼa tantachäwinxa wakichäwix (FM) radiot istʼasini. Istʼañatakix mä jiskʼa radio ukat jinchur usktʼasis mä ischʼukiñampiw munasini.
◼ Grabación. Cablenak utjki ukanakar apkatasax janiw grabañasäkiti. Mayninakar jan jarktʼkani ukhakiw grabasispa.
◼ Wawa nuknaqañ cochenaka ukat apthapiñ sillanaka. Jachʼa tantachäwirux janiw wawa nuknaqañ cochenakasa apthapiñ jachʼa sillanakasa apasiñapäkiti. Jiskʼa wawanakar quntʼayañ sillanakxa apasisipkasmawa, ukampis uka sillanakax janiw mä qunuñat jiläñapäkiti.
◼ Sírvase visitar sat formularionaka. Jachʼa tantachäwinkasin Diosat yatxatañ munirinakampi parltʼäta ukhaxa, jupanakax kawkjans jakapxi uk qillqtʼañatakixa Sírvase visitar (S-43) sat formularioruw qillqtʼasiñama. Jachʼa tantachäwinxa Departamento de Publicaciones sat uñjiri jilatanakaruw uka formulario jaytasma jan ukax tamankir secretario jilataruw tamar kutʼxasax churarakisma (Nuestro Ministerio del Reino de febrero de 2005, 6 jana uñxatäta).
◼ Manqʼa aljañ utanaka. Uka utanakar sarasin jilat kullakanakasax respetomp sarnaqapxi ukhaxa Jehová Diosaruw jachʼañchapxi.
◼ Hotelanaka. Akxankki uka iwxanakaxa janiw taqpach markanakatakïkiti. 1) Janiw inamayak utanak mayïtati, janirakiw yaqhanakarus uka utar qurpachañatak jawstʼätati. 2) Janitï uka utan qurpachasiñ munxätaxa jankʼakiw qurpachasiñ uta uñjirirux yatiyañama. 3) Qʼipinaka apañataki utjki ukxa janiw inamay apasiñamäkiti ukat jan apnaqxätaxa jankʼakiw kuttʼayxañama ukhamat yaqhanakax qʼipinakap apasipxañapataki. 4) Uka utan janiw phayañamäkiti sapxätamxa, janiw phayañamäkiti. 5) Qurpachaskäta uka utan irnaqirirux sapüruw qullqi waxtʼasma. 6) Juntʼümas chhullunkhayas inakiw qurpachasirinakarux churasi, ukhamax janiw jilpach apsusiñamäkiti. 7) Qurpachasiñ utan irnaqirinakarux munasiñampi ukat respetumpiw uñjañasa. Jupanakax waljaniruw yanaptʼasipki, ukhamax jiwasan amuytʼasirïtasatsa suytʼirïtasatsa ukat jupanakar yanaptʼirïtasatsa wal yuspärapxi. 8) Kunanaktï jan apnaqawaykta ukanakat qullqi apsuñ munapxätamxa janiw churañamäkiti jan ukasti jankʼakiw Departamento de Alojamiento ukarux yatiyañama. 9) Qurpachaskta uka utantï jan waltʼäwinakax utjanixa, jachʼa tantachäwinkasax Departamento de Alojamiento satäkis ukar yatiyañxa janiw armasïtati.
◼ Katuqtʼirinaka. Kawkïr jilatanakatï experiencianïpki, yämas irpir chuymaninakaru ukhamarak yanapirinakaparux katuqtʼirinakjam irnaqtʼapxañapatakiw chʼamañchtʼasi, jilat kullakanakar sum yanaptʼapxañapataki ukhamat mä wawakjam tantachasiñax utjarakini. Ukham irnaqtʼañax Jehová Diosar wal kusisiyi.
◼ Horasar puriña. Kawkhantï jachʼa tantachäwix apaskäni ukarux horasapar puriñatak chʼamachtʼasiñäni ukhaxa wali chʼamañchtʼataw jikxatasiñäni. Kunattix jilat kullakanakasampiw parltʼañäni, música usktʼaskani uksa istʼañäni, qallta qʼuchsa qʼuchuñäni, qallta oracionsa ukat wali suma katuqtʼatäpxtaw siskani uka arunaksa istʼarakiñäniwa. Horasapar tantachäwir puriñäni ukhaxa, jilat kullakanakasax wakichäwi sum istʼapxani ukat taqi kun sum lurirïtapat Jehová Diosar respetatassa yuspäratassa uñachtʼayarakiñäni (1 Cor. 14:40).
[5 janan recuadropa]
Jehová Diosar kunjams jachʼañchsna:
■ Diosan Qhanañchirinakapjamax sum isthapisiñasawa.
■ Jan akapachankirinakajam isthapisipxañäniti.
■ Kunatï isisiñäki ukham isthapisiñäni ukhaxa, sum amuytʼasirïtaswa uñachtʼayi.
[6 janan recuadropa]
Istʼasax lupʼiñasawa:
■ ¿Jehová Diosamp wali sum apasiñatakix kunjamsa yanaptʼitu?
■ ¿Mayninakamp sum apasiñatakix kunjams yanaptʼitu?
■ ¿Jakäwijana ukat yatiyir sarañatakis kunjams yanaptʼitaspa?