Wali respetompi Cristor arkapxañäni
1. Wakisipuniwa respetompi taqi kun lurañaxa, ¿kunjamsa aka marataki jachʼa tantachäwin pʼiqiñchapax ukax askïtap uñachtʼayi?
1 Biblianxa taqi kunxar Munañan Jehová Diosaxa, kʼajkir qhapaqkankañampi isthapitaw siwa (Sal. 104:1). Jesusax Awkiparusa ukat kamachinakaparusa parlatapampi luratapampixa, jachʼañchapunïnwa (Juan 17:4). Taqi jiwasanakaxa Jesusjamarakiw aka jutïr “¡Cristor arkapxañäni!” sat Jachʼa Tantachäwisanxa Jehová Diosaru jachʼañchasipkañäni.
2. ¿Kunjamsa Jehová Diosar jachʼañchi kimsürpach ukankañataki wakiyasitasaxa?
2 Respetompi yupaychañäni. Kuntï Jehová Diosax jupat jukʼamp yatiqañasataki wakichki uka tantachäwinkañataki wakichtʼastan ukhaxa Diosaruw jachʼañchtanxa. ¿Sapüru tantachäwinkañatakix patronamampi parlxtati, ukat viernes urumpitakit parlarakta? ¿Alwat qunuñanak thaqhañatakisa, qʼuchuñatakisa ukat qalltañataki Diosat mayisïwinkañatakisa waktʼayasisktati? ¿Kuns jilat kullakanakampi chika urun manqtʼasïta uk jichjatti amtaskta? Kunapachatï tantachäwi sarayir jilatax janïr music qalltkipana quntʼasxapxam qunuñanakamaru sistani ukhaxa, parlaskasaxa ukaratpachaw amukixañasa, ukat wakichäwi qalltañap suytʼañatakix quntʼasxañasawa.
3. Ukham tantachäwin taqi chuym istʼasaxa, ¿kunjamsa wali respetompi Diosar yupaychatas uñachtʼaytanxa?
3 Ukataki waktʼayat arstʼäwinak taqi chuym istʼasaxa alaxpachankir Awkisaruw jachʼañcharaktanxa. Mä yatiyäwinak qillqir chachaxa, ukham jachʼa tantachäwi uñjasaxa akham sasaw qillqatayna, khiti uñjirisa muspharapunispawa “ukankirinakaxa amukiw respetompi parlki ukarux istʼapxäna ukat walpunwa Diosa tuqit yatxatañ munapxatapxa amuyasïna” sasa. Ukatxa “muspharkañapunïnwa, walja wawanakaw ukankapxäna [...] ukat wali sumapuniw uñjasïna, jupanakax amukiw quntʼasipxäna, Bibliatsa jupanakax thaqhapxarakïnwa” sasa. Tantachäwinkkasaxa janiw mayninakamp parlaskañasäkiti, janirakiw celularat qillqatanak apayaskañäkiti, ukatxa janirakiw manqʼaskañax walïkaspati ni sarnaqaskañasa. Wayn tawaqunakaxa awkinakapampiw quntʼasipxañapa ukhamata uka wakichäwit sum yatiqapxañapataki (Deu. 31:12; Pro. 29:15). Ukham lurasawa yaqhanakaru respetatasa uñachtʼayañäni ukat Diosat jukʼamp yatiqañataki ukham wakiskiri manqʼa luqtaski ukanakat yuspäratasa uñachtʼayarakiñäni.
4. Jachʼa tantachäwir sarasaxa, ¿kunatsa cristianjam isthapisiñasapunixa?
4 Cristianjam isthapisipxañäni. Pasir maran “Taqi chiqan cristianjam sarnaqapxañäni” sat pʼiqiñchani arstʼäwinxa, kunjamsa chiqa cristianonakjam isthapisna askichtʼasna uka tuqinakatwa amtthapiyistäna, ukatwa waljaninakax yuspärapxi. Aka maraxa uka kikparakiw wasitampi uka tuqit iwxtʼasiskarakini. Kunjam isthapitäktantï ukaxa Jehová Diosar munasitasa Qhanañchiripjam sarnaqatasa uñachtʼayi. “Diosar katuyata” jaqinakjamaw isthapisiñasa (1 Tim. 2:9, 10).
5. Jachʼa tantachäwi utjkani uka markankkasaxa, ¿kunjamsa Diosar luqtirjam isthapitas uñachtʼaytanxa?
5 ¿Tantachäwinkkañäni ukhakit cristianjam isthapisiñäni? Kawkjantï tantachaskañäni ukawjanakanxa waljaninakaw tarjeta de solapampi tʼirkatata uñjapxistani. Ukatwa yaqha jaqinakatxa mayjäñasapuni. Ukat inakïkañäni ukhasa, tantachäw tukuyatat manqʼir sarkañäni ukhaxa, Jehová Diosar yupaychiri jutataswa isthapitasampix uñachtʼayañasa, ukatwa mayja pantalonanakampi, jiskʼa pantalonanakampsa jan ukax mayja camisetanakampsa jan isisiñasäkiti. Ukhamatwa jaqinakaru suma yatichäwi churañäni. Kunapachatï Diosar luqtirjam isthapistan ukhaxa, Jehová Diosaruw kusisiyasktanxa.
6. Ukham cristianjam respeto uñachtʼayatasatxa, ¿kuna askinakas utjaspa?
6 Kuna askinakas utji. Jachʼa tantachäwisan cristianjam sarnaqañäni ukaxa yaqhanakaruxa Bibliat parltʼarakiñaniwa ukat khitinakatï uñchʼukipkistu ukanakarusa isthapisitasampiw yaticharakiñäni. Jachʼa tantachäw tukuyataruxa mä policiax akham sänwa: “Janipuniw ukham suma jaqinak uñjirïkti, kunjamtï Diosax munki ukhamwa jumanakax sarnaqapxtaxa” sasa. Ukham sarnaqañax taqinir munataswa respetasitaswa uñachtʼayi ukat Jehová Diosarux jachʼañcharakiwa (1 Ped. 2:12). Jehová Diosar axsaratasa ukat yatichäwinakap yuspärataswa ukax uñachtʼayi (Heb. 12:28). “¡Cristor arkapxañäni!” sat Jachʼa Tantachäwi wal suytʼkasaxa respeto uñachtʼayaskakiñäni.
[3 janan recuadropa]
Kimsa pʼunchayniyuq jatun tantakuypaq yuyariykuna
◼ Kuna horas qalltani. Kimsürpachaw wakichäwix 9.20 alwa horasar qalltani, ukampis 8.00 alwa horasarux jistʼaratäxaniwa. Kunapachatï musicax qalltani ukhaxa, quntʼasxañasawa ukhamat wakichäwix sum qalltañapataki. Viernes urumpi sábado urumpixa 5.05 jaypʼu horasaruw wakichäwix tukuyani, ukat domingo urusti 4.10 jaypʼu horasaruw tukuyarakini.
◼ Qunuñanaka jan ukax uttʼañanaka. Jiwasampi chika jutirinakataki ukat jiwasampi chika pachpa utan jakasirinakatakikiw qunuñanak imsnaxa.
◼ Manqʼa. Chikürux manqʼa alañataki anqar mistuñat sipansa manqʼxa apasiniñamawa, janiw sinti walja apasinïtati. Jachʼa phukhunaka, vidrio botellanaka, machjayir umañanakax janiw mantayaskaniti.
◼ Qullqimpi yanaptʼañataki. Aka jachʼa tantachäwi wakichañatakixa qullqix waljaw irtasiwayi, ukhamaxa kunjamtï chuymasan amtawayktan ukhamarjamaw Apnaqäwin luräwinakapar qullqimp yanaptʼañataki yuspäratas uñachtʼaysna, ukxa Tantachasiñ Utanwa jan ukax jachʼa tantachäwinwa irantsnaxa.
◼ Chijinakampi ukat akatjamat usuchjasiñanakampi. Yaqhipanakax mä jukʼa ustʼatas celularanakapat wal jawsanipxi sasaw qullirinakax quejasipxi. Ukhamaxa, jachʼa tantachäwintï maynix mä akatjamat usuntanixa, mä katuqtʼir jilataruw jawsañapa, jupaw Qullir jilat kullakanakar yatiyani.
◼ Jan sum istʼapki ukanakataki. Pachpa jachʼa tantachäwinsa uka jakʼanakansa wakichäwix radiot istʼasirakiniwa (FM). Istʼañatakix mä jiskʼa radio ukat jinchur usktʼasis mä ischʼukiñampiw munasi.
◼ Grabadoranaka. Kawkhantï jachʼa tantachäwix apaski uka chiqanxa janiw grabadoranak lusar conectañasäkiti, ukat yaqhanakarutï jan waltʼaykchi ukaxa janirakiw apnaqañax walïkaspati.
◼ Sírvase visitar sat formularionaka. Jachʼa tantachäwir sarkasax yaqhanakamp Diosa tuqit parlapuntanwa, ukanakatxa yaqhipanakax jukʼampiw yatiqañ munapxi, jupanakan direccionanakap qillqtʼasiñatakixa Sírvase visitar (S-43) sat formulariow utji. Yatiyirinakax jachʼa tantachäwir sarkasax maya jan ukax pä formularionak apasipxapuniñapawa. Jachʼa tantachäwinxa Departamento de Publicaciones sat lugaranwa mayipxarakispa. Yatiyirixa pachpa lugararuw uka formulario jaytaspa jan ukax tamapankir secretario jilataruw churarakispa (Nuestro Ministerio del Reino de febrero de 2005, página 6, ukwa uñxatäta).
◼ Manqʼa aljañ utanaka. Walja lugaranakanwa manqʼa aljañ utanakan irnaqirinakaruxa wali sum luratapat ukan manqʼirinakax qullqi waxtʼapxi, sapa patakatxa mä tunka phisqani jan ukax mä pä tunkwa waxtʼapxi.
Amtayäwi: Yatiyañataki tantachäwin wakichäwixa Diosan Apnaqäwipat Yatiyañataki qillqatan sapa semanatakiw mistsuskani, ukampisa “¡Cristor arkapxañäni!” sat Jachʼa Tantachäwi jakʼachasinkipanxa tamanakax uka wakichäwxa mayxtʼayapxaspawa. Jachʼa tantachäwitaki mä seman faltkipanwa Yatiyañataki Tantachäwinxa mä tunka phisqani minutonakwa jachʼa tantachäwitaki wakiskir amtäwinakat parltʼasiñapa. Ukatxa, jachʼa tantachäwit mä phaxsi jan ukax pä phaxsi pasxipanxa, Yatiyañataki Tantachäwinxa mä tunka phisqani jan ukax mä pä tunka minutonaka (tamankirinakataki iwxtʼanaka sat wakichäwinwa ukax lurasispa) jachʼa tantachäwin wakiskir yatichäwinakapwa amtasiñapa. Janiw taqpach arstʼäwinakat parlasiñapäkiti, jan ukasti kunsa yatiyir sarañ tuqit yatichistu ukanakakwa jukʼamp qhanstayaña. Irpir chuymaninakat superintendente de servicio jilataw uk arstʼañapa. Istʼirinakax kunjamsa yatiqatarjam lurasipki ukat kunjamsa uk lurañ amtapxi uka tuqinakatxa arstʼapxarakispawa.