Wali suma manqʼtʼäwïkaspas ukham suma tantachäwi
1. Luqtirinakapax kuntï munapki ukanakxa, ¿kunjamsa Jehová Diosax churi?
1 Jehová Diosax wali munasiñampiwa luqtirinakapax kuntï munapki uk churi. Ukatwa wali suma manqʼtʼatäksnas ukham jikxatastanxa, ukampis akapachankir jaqinakax Diosan yatichäwinakap jan katuqasaxa, manqʼatsa jiwarasipkaspa ukhaman uñjasipxi (Isa. 65:13). ¿Kunjamsa Jehová Diosax manqʼaykistaspas ukham yatichistu? Sapa maraw Jachʼa Tantachäwinak wakichi. ¿“Qullan ajayumpi irpayasipxañäni” sat Jachʼa Tantachäwiru jan faltasiñatakix wakichasisktati? ¡Wali suma manqʼtʼäwikaspas ukham suma yatichäwiw suyaskistu!
2. Jachʼa Tantachäwiru sarañatakixa, ¿kunanak tuqitsa jichhjat amtxañasa?
2 Janiräkipan wakiyasiñäni. “Suma amuytʼampi kuna amtäwinaka wakichatasa sumakiwa phuqhasi.” (Pro. 21:5.) Ukatpï, kimsürpach sarañataki irnaqäwimat permiso mayisiñax wakischi ukhaxa, jankʼakiw patronamampix parlañama. Ukhamaraki kawkirus qurpachasïta, ¿ukax wakiyatäxiti? Chikürunakax pachp Jachʼa Tantachäwin jilat kullakanakasamp manqtʼasiñatakiw amtañasäspa. Ukatxa, sapür alwat puriñatakirakiw jichhjat amtañasäspa, ukhamatwa kawkjarus quntʼasiñäni jan ukax uttʼasiñäni uk jikxatañäni, ukhamatwa Jachʼa Tantachäwxa qʼuchtʼasa Diosat maytʼasisa sum qalltañataki.
3. ¿Kunjam isinis Jachʼa Tantachäwir sarañäni?
3 Ukatxa, kunatix isisiñäki ukakwa sum isisipxañasa uksa amuyasipxañasarakiwa (1 Tim. 2:9, 10). Kawki markanakantix Jachʼa Tantachäwinakax apaskani ukanakan jiwasat yatipxañapax wali askïniwa. Uka markanakantï suma isthaptʼata ukat tarjetas suma tʼirkattʼata sarnaqañäni ukhaxa, janiw yaqha jaqinakjam sarnaqkañäniti, ukhamatwa kunjam jaqinakätansa ukxa uñjapxani.
4. Familpachasa jan ukax sapakisa, ¿kunjamatsa yatichäwinak suma yatiqsna?
4 Sum istʼapxañäni. Tantachäwin suma manqʼjam churaskani uka yatichäwitxa janiw khitis mä jukʼsa chhaqasiñ munktanti (Pro. 22:17, 18). Ukhamasti, tantachäwin Bibliat liytʼaskani ukhax Bibliasat liytʼarakiñäni ukat qillqaqtʼasirakiñäni ukhawa yatichäwinakxa sum istʼañäni, ukat janiw kunampis inamay tiemp apaqayaskañäniti. Ukhamatwa, arumarux qillqtʼasitasarjamax mayninakampix parltʼsna. Aka qhipa maranakanxa, yaqhip waynitunakasa tawaqitanakasa Jachʼa Tantachäwinakanxa mayawjarukiw quntʼasipxi, ukatxa yatichasiski ukhaw parlasipki jan ukax yaqhipanakax celularatwa qillqatanak apayasisipki. Ukhamasti, wawanakanïstan ukhaxa, wali askïspawa familpacha mayawjaru quntʼasiñaxa, janiw askïkaspati wawanakaru masinakapamp chika quntʼasir khitañaxa.
5. ¿Kunjamatsa Jachʼa Tantachäwin jukʼampi kusisitäsna?
5 Jilat kullakanasamp parltʼasipxañäni. Munat amigonakamp suma manqʼa manqʼtʼasiñax wali askipuniwa (Pro. 15:17). Jachʼa Tantachäwin jilat kullakanakasamp parltʼasiñax ukham wali kusiskañarakikiwa. Ukatpï, wali askixa tantachasirinakampi uñtʼasiñasa parltʼasiñasa (Sal. 133:1). Ukampisa, kunapachatï tantachäwi sarayirix “musicaw qalltxani, quntʼasxapxam” sani ukhaxa, janiw parlaskakiñasäkiti jan ukasti quntʼasiriw sarxañasa, ukhamat wakichäwin qalltap suyañataki.
6. Tantachäwix apaski uka markanakanxa kunjamsa yatiysna uka tuqit mä experiencia arstʼma.
6 Yatiyañatakix wakichatäñasawa. Jachʼa Tantachäwinakan jaqi masisar yatiyañax wali askiwa. Sañäni, yaqhipanakax tantachäwi tukuyxipanxa “restaurante” sat manq’ aljapki uka utanakaruw sarapxi, ukat awisax uka utan irnaqirinakawa “kunatsa uka tarjeta tʼirkatatäpxta” sasin jisktʼapxi. Ukhamatwa uka irnaqirinakampix parltʼapxi, chiqa yatichäwinakatsa qhanañchtʼapxaraki. Ukat yaqhipanakax ukham yatiyatäsaxa tantachäwirus sarapxarakiwa.
7. Jakʼankxi uka Jachʼa Tantachäwisaruxa, ¿kunatsa sarapxañasaxa?
7 Waranq waranqa horanakaw uka tantachäw wakiyapxi; kunjamsa uttʼayasini ukat kuna irnaqäwinakas lurasini ukat kunjamsa arstʼapxani taqi ukanakwa ukham wakiyapxi. Wali munasiñampi uka suma tantachäwitak irnaqtʼapki ukaxa, Jehová Diosan markapar wali munasitapwa uñachtʼayistu. Ukhamasti, ¡taqini sarapxañäni ukat wali sum chʼamañchtʼasiniwayapxañäni! Ukham lurañäni ukhaxa, janiw akapach jaqinakjamax jikxatasipkañäniti, jan ukasti ‘kusisiñatsa qʼuchupxañäniwa, chuymanakasan kusisiñax utjatap layku’ (Isa. 65:14).
[4 janan recuadropa]
Jachʼa Tantachäwitak amtayäwinaka
◼ Kuna horas qalltani. Kimsürpachaw wakichäwix 9.20 alwa horasar qalltani, ukampis 8.00 alwa horasarux punkux jistʼaratäxaniwa. Kunapachatï musicax qalltxani ukhaxa, quntʼasxañasawa ukhamat wakichäwix sum qalltañapataki. Viernes urumpi sábado urumpixa 4.55 jaypʼu horasaruw wakichäwix tukuyani, ukat domingo urusti 4.00 jaypʼu horasaruw tukuyarakini.
◼ Auto sayayañanaka. Kawki chiqanakantix auto sayayañanakax jiwasankani ukhaxa, janiw auto sayayatatxa cobraskaniti ukatxa, purinitarjamaw katuqasirakini. “Tarjeta de solapa” sat tarjetaninakakiw ukarux autop jaytasipxaspa.
◼ Qunuñanaka jan ukax uttʼañanaka. Jiwasamp chika jutirinakataki ukat jiwasamp chika pachpa utan jakasirinakatakikiw qunuñanak imsnaxa.
◼ Manqʼañ tuqita. Chikürux manqʼa alasir anqar mistuñat sipansa manqʼxa apasiñasawa. Jachʼa phukhunaka, vidrio botellanaka, machjayir umañanakax janiw apasiñapäkiti.
◼ Qullqimpi yanaptʼañataki. Kunjamtï chuymasan amtawayktan ukhamarjamaw Apnaqäwin luräwinakapar qullqimp yanaptʼsna, ukhamatwa yuspäratas uñachtʼaysna, uksti Tantachasiñ Utanwa jan ukax Jachʼa Tantachäwinwa irantsnaxa.
◼ Chijinakampi ukat akatjamat usuchjasiñanakampi. Yaqhipanakax mä jukʼa ustʼatas celularanakapat wal jawsanipxi sasaw qullirinakax quejasipxi. Ukhamaxa, jachʼa tantachäwintï maynix mä akatjamat usuntanixa, mä katuqtʼir jilataruw jawsañapa, jupaw Primeros Auxilios sat irnaqtʼir jilat kullakanakarux yatiyani, ukhamat kamachapxanisa uk sum amuykiptʼapxañapataki.
◼ Jan sum istʼapki ukanakataki. Pachpa Jachʼa Tantachäwinxa wakichäwix (FM) radiot istʼasini. Istʼañatakix mä jiskʼa radio ukat jinchur usktʼasis mä ischʼukiñampiw munasini.
◼ Wawa nuknaqañ cochenaka ukat armthapiñ sillanaka. Jachʼa Tantachäwirux janiw wawa nuknaqañ cochenakasa, armthapiñ jachʼa sillanakasa apasiñapäkiti. Jiskʼa wawanakar quntʼayañ sillanakxa apasisipkasmawa, ukampis uka sillanakax janiw mä qunuñat jiläñapäkiti.
◼ Sírvase visitar sat formularionaka. Jachʼa Tantachäwïnkasina Diosat yatxatañ munirinakampi parltʼäta ukhaxa, jupanakan direccionanakapxa Sírvase visitar (S-43) sat formularioruw qillqtʼasiñama. Yatiyirinakax Jachʼa Tantachäwir sarkasax maya jan ukax pä formularionak apasipxañapapuniwa. Jachʼa Tantachäwinxa Departamento de Publicaciones sat uñjiri jilatanakaruw uka formulario jaytasispa jan ukax tamankir secretario jilataruw churasirakispa (Nuestro Ministerio del Reino de febrero de 2005, 6 jan uñxatäta).
◼ Manqʼa aljañ utanaka. Uka utanakar sarasin jilat kullakanakasax sum sarnaqapxi ukhaxa Jehová Diosaruw jachʼañchasi. Walja lugaranakanxa manqʼa aljañ utanakan irnaqirinakarux mä jukʼa (15 jan ukax 20%) qullqwa lurataparjamax waxtʼapxi.
◼ Taman tantachäwinakapa. Jachʼa Tantachäwinxa, janiw Librot Yatiqañataki wakichäwitsa, Yatiyañataki Diosan Yatichäwipatsa, ukhamaraki Yatiyañataki Tantachäwitsa arstʼaskaniti. Ukhamasti, Librot Yatiqañatak taman tantachäwinakapaxa kunjamatix apasirïki ukhamarjamaw uka semanax apasiskañapa. Uka tantachäwix apasiñapapuniwa, janiw kunjamatsa jaytanukutäñapäkiti. Kawki utanakantix apasirïkäna ukhamarjamaw apasiskañapa ukaw wali askixa. Janiw askïkiti Tantachasiñ Utan taqi gruponakax uka semanan tantachasipxañapaxa, kunattix jilat kullakanakasaruw jan waltʼaykaspati, ukhamaraki janiw kunjamatï taman uttʼayatäki ukhamarjamax luratäkaspati.
◼ Katuqirinaka. Wali yatxattʼat jilatanakawa, chiqpachansa, irpir chuymaninaka ukhamaraki yanapirinakapawa katuqtʼirinakjam irnaqtʼañatakix Departamento de Acomodadores uka chiqar jakʼachtʼasipxañapa, ukatxa yaqha jilatanakarus kunjamas luraña uksa yanaptʼapxarakispawa, ukhamat jilat kullakanakas layku irnaqtʼañataki. Jehová Diosatakix ukax wali askipuniwa.