“Tantachthapim taqpach markaru”
1. Jachʼa tantachäwinakampi ukat Sinaí qollun israelitanakajj tantachasipkäna ukampejj ¿kunansa niya pachpakïpjje?
1 Egipto markat israelitanakajj mistuwayjjapjjän uka qhepatjja, Jehová Diosajj Moisesar akham sänwa: “[Sinaí qollun] tantachthapim taqpach markaru arunakajj istʼapjjañapataki, ukhamaraki ajjsarapjjañapataki [...], ukatsti wawanakapar kipka yatichapjjañapataki” sasa (Deu. 4:10-13). Uka tantachäwejj israelitanakatakejj jan armkayäpachänwa. Jehová Diosar jukʼamp confiyapjjañapatakiw yanaptʼpachäna. Mä qawqha phajjsitjja, Diosan markapajj ukhamarakiw kimsa uru jachʼa tantachäwina ukat walja markanakat jachʼa tantachäwi utjki ukansa Jehová Diosampi yatichayasiñataki tantachasipjjani. Uka tantachäwit askinak apsuñatakejj ¿kunanak lurañas wakisi?
2. Kimsa uru jachʼa tantachäwitaki sum wakichtʼatäñatakejj ¿kun lurañasasa?
2 Wakichtʼasiñasawa. Sinaí qollun tantachasiñatakejj wakichtʼatäjjapjjañamawa sasaw Jehová Diosajj israelitanakar säna (Éxo. 19:10, 11). Kimsa uru jachʼa tantachäwitakejj ukhamarakiw taqenis sum wakichtʼasiñasa, janiw arstʼäwinïpki ukanakakejj wakichtʼasipjjañapäkiti. Amuytʼañäni, kimsa uru jachʼa tantachäwinkañatakejj waljaniw trabajopat permiso mayisipjjañapa. Jumajj inas Nehemías chachjam jikjjatasiraksta. Jupajj Artajerjes reyin coperopänwa, ukat Jerusalén markan perqanakap wasitat saytʼayañatakiw permiso mayisiñ munäna, ukampis ‘reyejj janjakiw munkaniti’ sasaw ajjsarayasïna. Ukhamïpansti, Jehová Diosaruw yanaptʼa mayïna, ukat kamsasas parlani uk sum amuykiptʼasisajja, jan ajjsartʼasaw permiso mayïna. Mayitaparojj reyejj istʼänwa, ukat Jerusalén perqanakap wasitampi saytʼayañapatakis yanaptʼarakïnwa (Neh. 2:1-9). Trabajomat permiso mayisjjsta ukhajja, kawkhansa qorpachasïta, kunjamsa viajäta ukanaksa janiw armasiñamäkarakiti. Irpir chuymaninakaw yanaptʼa munirinakarojj taqe chuyma yanaptʼasipkani. Tantachäwinakar jan qheptʼat puriñatakejj sum wakichtʼasiñasa, ukat “wali amuyu[mpi]” sum istʼañatakis chuymas wakichtʼañasarakiwa (Heb. 2:1).
3. Kimsa uru jachʼa tantachäwit askinak apsuñatakejj ¿kun lurañasas wakisi?
3 Sum istʼañataki ukat yateqañatakejja, chuymas sum wakichtʼañasa (Esd. 7:10). Jachʼa tantachäwitak waktʼayatäki uka wakichäwejj jayäkipanwa Internetan jw.org/ay cheqan uchatäjjani. Arstʼäwinakan pʼeqeñchäwipasa ukat Bibliat liytʼaskani uka wakiskir jiskʼa tʼaqanakas mayas jan ukajj payas uka wakichäwin qhanañchasirakiniwa. Ukhamajja, Familiana Diosar Yupaychañataki Arumanwa uka toqet jayäkipan yatjjatañajj wakisispa. Yaqhepajj uka wakichäwjja, jachʼa tantachäwin qellqaqtʼasiñatakiw imprimtʼasipjje.
4. Kimsa uru jachʼa tantachäwejj ¿kunjamsa awk taykanakarojj wawanakapar yatichapjjañapatakejj yanaptʼaspa?
4 Wawanakamar yatichapjjañamawa. Jehová Diosajja, Jupan arunakap israelitanakajj wawanakapar yatichapjjañapatakiw Sinaí qollun tantachtʼarakïna (Deu. 4:10). Kimsa uru jachʼa tantachäwejj ukhamarakiw wawanakar yatichañatakejj wali askiraki. Awk taykanakajj wawanakapampiw qontʼasipjjañapa, ukat sum istʼapjjañapatakis yanaptʼapjjañaparakiwa. Sapa tantachäw tukuyatarojja, kunsa uka urojj yateqaniwayapjje ukanakatwa parltʼasipjjaspa jan ukajj familjam Diosar yupaychkasaw amthaptʼapjjarakispa.
5. Kimsa uru jachʼa tantachäwir sarasajj ¿kuna askinaksa jikjjatañäni?
5 Sinaí qollun tantachasipkän ukajja, Jehová Diosan markapankañajj kunja wakiskirisa uk amuyapjjañapatakiw israelitanakar yanaptʼäna (Deu. 4:7, 8). Uka amtampirakiw kimsa uru jachʼa tantachäwejj wakichtʼasiwayi. Supayan apnaqata aka ñanqha pachajja, mä wasarar uñtatawa. Ukhamajja jilat kullakanakasamp kimsa uru tantachtʼasiñajj kusiskañäniwa, kunattejj ajay toqet jukʼampiw chʼamañchasiñäni (Isa. 35:7-9). Niyakejjay Jehová Diosan jachʼa urupajj wali jakʼankjjchejja, jachʼa tantachäwirojj sarañasapuniwa, ukhamatwa jilat kullakanakasampejj maynit maynikam chʼamañchtʼasiñäni (Heb. 10:24, 25).