Negocionakan jan ajjsaras Diosan arunakap yatiyapjjañäni
1. Negocionakan yatiyañ ajjsarayastan ukhajja, ¿kunatsa jan llakisiñasäki?
1 ¿Negocionakan Diosan arunakap yatiyañ ajjsarayastati? Ukhamächi ukhajja, jan llakisimti. Jumjamajj waljaniw ajjsarayasipjjaraki. Pablojj suma yatiyirïkchïnsa, jan ajjsartʼas yatiyañatakejj chʼamachasiñapänwa (1 Tes. 2:2). Kunsa negocionakan yatiyañ toqet jisktʼastan uk kimsa toqet uñjañäni, ukat kunjamsa yatiysna uk mä qhawqha uñjarakiñäni.
2. ¿Kunatsa negocionakan aljapki ukanakamp parlañ jan ajjsarañasäki?
2 ¿Aljirinakajj tiemps apaqkirist ukhamt amuyasipjjaspa? Walja negocionakanjja, alasirinak jutki ukhajja, aljirinakajj luräwinakap jaytasin jankʼakiw katoqapjje. Ukhamasti, jupanakamp parlir sarkäta ukhajja, alasiriw jutpacha sasajj sum katoqätamjja. Ukat suma isthaptʼat saräta ukat munasiñamp arunttʼarakïta ukhajja, respetompiw katoqtʼäpjjatamjja.
3. ¿Alasirinakar jan mayjtʼayañatakejj kuns lursna?
3 ¿Walja alasirinak taypin yatiyaskakiristi? Alasirinakajj jan sint utjki jan ukajj negocionakap jistʼarasipki ukhaw parlañajj wakisispa. Ukat kunaratutï dueñosa jan ukajj aljirinakapas sapakiski ukhaw parlañajj wakisirakispa.
4. ¿Kamsasas negocionakan yatiyasma?
4 ¿Kamsiristsa? Mä negociontï walja aljirinakapajj utjchi ukhajja, dueñömpi jan ukajj uka negocio apnaqki ukamp parltʼañaw wakisispa. Inas akham sischisma: “Akham negocion aljasipki ukanakar utapan jikhatañajj chʼamawa, ukatwa trabajonakamar visittʼir jutapjjta. Amuyatajj janiw tiempomajj utjpachati mä jukʼak parltʼawayama” sasa. Ukat revistanak jaytañäni ukhajja inas qollq mayiñajj jan wakiskchispati ukhamat jan yaqha aljirimp panjasiñapataki. Ukat jisktʼapjjestani ukhajja, kunjamsa qollqemp yanaptʼasi ukanak yatiyaraksnawa. Ukatjja kuna kasta negocionjay yatiyaskstan ukarjamaw jiktʼsna, dueñorusa jan ukajj negocio apnaqki ukanakarusa ¿aljirinakamamp mä rato parltʼiristi? sasa. Kunjamtï mayninakamp parlktanjja uka pachpwa parltʼaraksna. Aljirinakapatï jan tiemponïkchi ukhajja, mä tratado jaytaraksna. Jan khitimp parlañas utjjchi ukhajja, kawkjarus qellqatanak jayttʼawayirista sasaw jisktʼarakisma.
5. ¿Kunatsa negocionakan jan ajjsartʼas yatiyañajj wakisi?
5 Jesusas ukat Pablos jan ajjsartʼasaw kawkhantï jaqenakajj trabajapki ukhanakan yatiyapjjerïna ukat jumas ukham lurarakismawa (Mat. 4:18-21; 9:9; Hech. 17:17). Jehová Diosar yanaptʼap mayisipunim ukhamat jan ajjsartʼas yatiyañamataki (Hech. 4:29). Negocionakan yatiyañajj wali askipuniwa, uka cheqan jaqenakajj utjapuniwa. ¿Ukham lurarakismati?