Wali importantëki ukanak repastʼam

¿Kuntï yatjjatawaykta uk amthapiñajj jumatak chʼamakiti? Taqeniruw ukajj awisajj pasistu. ¿Kunas amthapiñatak yanaptʼistaspa? Wali importantëki ukanak repastʼañaw yanaptʼistaspa.

Yatjjatkasajj kunanaktï yateqaskta uk amuytʼañatak suytʼam. Uk lurapjjañapatakiw apóstol Pablojj cartapat yatjjatasipkäna uka jilat kullakanakar chʼamañchtʼäna, jupajj akham sänwa: “Taqe ukanakat parlasajj aka toqetwa parlasktanjja” sasa (Heb. 8:1). Ukham sasaw kuna toqetsa parlaskäna uk amuyapjjañapatakisa, kunjamsa arunakapajj mayat may sum jaqthaptäna uk amuyapjjañapatakis yanaptʼäna.

Sapa kuti yatjjatkäta ukhajja, inas tukuyarojj mä 10 minutonak tiemp apstʼaschisma, ukhamat kunatï uka yatichäwit wali importantëki uk amuykiptʼañataki. Janitï amthapiñ puedksta ukhajja, subtitulonaka jan ukajj sapa parrafon nayrïr arunakap wasitat liytʼasma. Mä kun yateqasajja, pachpa arunakamamp qhanañchtʼañatakiw chʼamachasisma. Kunatï wali importantëki ukanak repasañajja, janiw amthapiñatakikejj yanaptʼkätamti, jan ukasti kunjamsa ukajj jakäwiman yanaptʼiristam ukwa amuyarakïta.