¿TAQE KUN JILJJATTATAPAT KUNS LURSNA?
Yatinoqtañasawa
Kunapachatï precionakajj jukʼat jukʼat jiljjatti ukat trabajosan sueldosar irjjatarakistu ukhajja, janiw precionakat sint llakisktanti. Ukampis mä akatjamat precionakajj wal jiljjattawayi, ukat trabajosan pachpak pagaskarakistu ukhaw wal llakissna, jukʼampis familiar manteniñajj waktʼistu ukhaw jukʼamp llakissna.
Taqe kunan jiljjattatap janiw askichksnati, ukampis ukanakar yatinoqtañajj yanaptʼistaspawa.
¿KUNATS IMPORTANTEJJA?
Taqe kunan jiljjattatap janiw askichañ puedksnati uk amuyañajja:
Jan sint llakisiñatakiw yanaptʼistani. Kunapachatï jan llakitäktan ukhajj jukʼamp qhanwa mä kuns amuytanjja, suma amtaruw puriraktanjja.
Wali amuyump kuns lurañatakiw yanaptʼistani. Sañäni, facturanak jan pagaña ukat qollq ina chʼusar gastañajj janiw walïkaspati.
Familiasampejj qollqe toqet jan chʼajjwañatakiw yanaptʼistani.
Taqe kun jiljjattatapat kuns lursna uk sum amuyañatakiw yanaptʼistani. Ukatakejj jukʼak gastaña, ukat kunanaktï cheqapun necesitktan ukanakak alañaw wakisispa.
¿KUNSA LURSNA?
Ukanakar yatinoqtañatakejj dispuestokïñasawa. Kunapachatï taqe kunas jiljjatti ukhajja, nayrajj qhawqhtï gastirïkayätan uk inas minustʼayañajj wakischispa. Yaqhep jaqenakajj jan necesitapki ukanak alasaw qollq tukjapjje. Ukham lurasaw jan walin uñjasipjje, tiempompejj jupanak pachpaw llakit jikjjatasipjje. Familianïstan ukhajja, kuntï necesitapki uk jan faltayañatakiw llakisirakpachätanjja. Ukampis familiasatakejj tiempwa apstʼasiñasa, munasiñampiw uñjañasa ukwa jupanakajj jukʼamp necesitapjje.
Jan necesitktan ukanak alasin qollq tukjañajja, jan walinakanwa uñjasiyistaspa.