BIBLIA TOQET JISKTʼANAKA
¿Taqe religionanakat Diosar jachʼañchapjje?
Religionan sutipjjaruw awisajj kunayman jan walinak lurapjje, uk inas yatiyäwinak istʼasin amuyirïsta. Cheqas janiw taqe religionanakajj Diosat jutkiti (Mateo 7:15). Niya taqe jaqenakaw uk jan amuyapkiti. (1 Juan 5:19 liytʼäta.)
Ukampis suma chuyman jaqenakan kunatï cheqäki ukat cheqapäki uk lurañ munapjjatap Diosajj yatiwa (Juan 4:23). Kunatï cheqäki uk Biblian thaqapjjañapatakiw jupanakar invittʼi. (1 Timoteo 2:3-5 liytʼäta.)
¿Kunjamatsa cheqpach religionarojj uñtʼasma?
Kunatï cheqäki uk yatichasa, ukat maynit maynikam munasipjjañapatak yatichasaw Jehová Diosajj kunayman religionankapkäna ukanakar mayachthapiski (Miqueas 4:2, 3). Cheqpach religionankapki ukanakarojja, kunjamsa jupanakkamajj uñjasipjje ukhamatwa uñtʼasma. (Juan 13:35 liytʼäta.)
Jehová Diosajj cheqpach religión toqew taqe kasta jaqenakar mayachthapiski. (Salmo 133:1)
Jehová Diosan cheqpach servirinakapajja, kuntï Bibliajj siski ukaruw creyipjje ukat ukarjamaw sarnaqapjjaraki (2 Timoteo 3:16). Diosan sutipsa respetapjjewa (Salmo 83:18, NM). Taqe jan waltʼäwinakjja, Diosan Reinopakiw tukjani sasaw jaqenakar yatiyapjjaraki (Daniel 2:44). Jupanakajj Jesusjamaw jaqenakarojj yanaptʼapjje, ukhamatwa qhanjam qhantapjje (Mateo 5:16). Diosan Reinopajj kuna askinaksa jikjjatani ukwa vecinonakapar yatiyapjje, ukhamatwa taqenis jupanakar uñtʼapjje. (Mateo 24:14 ukat Hechos 5:42; 20:20 liytʼäta.)