Pä uru jachʼa tantachäwitak machaq wakichäwi
Jehová Diosaxa jachʼañchatäñapapuniwa. Ukhamaxa, ¿kunjamsa jachʼañchsna? Yaqhip jilat kullakanakax Diosar jachʼañchasaxa, ¿kuna jan waltʼäwinakansa uñjasipxi? ¿Jichhürunakan Diosar jachʼañchirinakaxa kuna bendicionanaksa katuqapxi? Taqi aka jisktʼanakaruxa jutïr 2008 maran pä uru jachʼa tantachäwinwa qhanañchasiskani. Pʼiqiñchapax akham satawa: “Taqi kunsa Diosar jachʼañchañatakiki lurapxam” (1 Cor. 10:31). Diosa tuqit kuna suma yatichäwinakas utjani ukanak uñjañäni.
Yatiqañataki Diosan Yatichäwipa sat wakichäwix utjaniwa, superintendente de distrito irpir jilataw uk sarayani, ukat juparakiw akham sat arstʼäwinak arstʼaskani: “¿Kunatsa Diosar jachʼañchañasa?”, “Diosan mayitanakap sum phuqañäni”, taqinitak arstʼäwix akham satäniwa: “¿Khitinakas jichhürunakan Diosar jachʼañchapxi?” ukat tukuy arstʼäwixa, “Uraqpachan mayachtʼata Diosaru jachʼañchapxañäni” sat pʼiqiñchaniwa. Ukat tamanakar tumptʼir jilataxa kimsa arstʼäwinak arstʼaskani: “Diosar jachʼañchatasatxa kusisiñäni”, “Kunanakas tamanakan wakisi” ukat “‘Chiqäki ukan thurtʼatakisipkakiñäni’”, uka qhipa arstʼäwixa 2 Pedro 1:12 qillqatat apstʼatäniwa. Ukampisa, “Kunatsa precursorjam irnaqtʼañax Diosar jachʼañchi” ukanakatwa yatiqañäni. Ukatxa pä mayachtʼat aski arstʼäwinakaw utjarakini. Nayrïrin pʼiqiñchapaxa akham satawa “Taqi jakäwisan Diosarupuni jachʼañchapxañäni”, ukaxa 1 Corintios 10:31 qillqat arunakax kamsañs muni ukwa sum amuytʼayistani. Payïri mayachtʼat arstʼäwin pʼiqiñchapaxa akham satawa: “Jehová Diosar jachʼañchañatakixa yupaychapxañäni”, ukaxa kunayman tuqinakan yupaychañatwa parltʼaskani. Domingonxa La Atalaya wakichtʼäwi arsüwit ukat uka urutak waktʼayat textot wali sumanak yatiqañäni. Bautismos machaq arkirinakatakix utjarakiniwa.
Jila part jaqinakaw Diosar uñtʼañxa jan munapkiti. Waljaniw kunayman luräwinakaparuki chuym uchapxi janiw Jehová Diosar jachʼañchañat lupʼipkiti (Juan 5:44). Ukat jiwasax kunjamsa ‘taqi kunsa Diosar jachʼañchañatakik lursna’ uk lupʼiñatakiw tiemp apstʼastanxa. Ukhamaxa uka tantachäwinkañatakisa sum istʼañatakisa wakichasipxañäni.