Jehová Diosan Qhanañchirinakapan jichha mara Jachʼa Tantachäwipa
1. 1) Hebreo cristianonakar Pablon iwxtʼäwipaxa, ¿kunatsa jiwasanakatakix wali askixa? (Hebreos 10:24, 25 liytʼäta) 2) Pablon iwxaparjam lurañatakixa, ¿kuna tantachäwis jakʼankxi?
1 “Tatitun jutäwipa jakʼankxatapa” yatisinxa qhawqha wakiskirisa tantachäwinakar sarañaxa ukhamaraki chʼamachtʼasiñasa ukanakwa apóstol Pabloxa hebreo cristianonakarux amtayäna (Heb. 10:24, 25). Pablon parlataparjamax uka urux niyaw purinini, ukxa jichhürunakan sum amuyxtanxa, ukatwa jilat kullakanakasampi kunjamat tantachasiñsa wal muntanxa, ukhamaraki aka “qhipa urunakan” sum sarnaqañatakisa Diosan yatichäwinakapwa wal munaraktanxa, kunattix akapachax jukʼampi jan waliruw saraski (2 Tim. 3:1). Jichha 2008 marax apaskani uka jachʼa tantachäwinwa ukhamarjamax lursna.
2. 1) ¿Kunatsa kimsürpach jachʼa tantachäwinkañax wali wakiskirixa? 2) ¿Kunjamsa uka tantachäwitak wakichasiñ qalltasma?
2 Kimsürpach sarapxañäni. Jumax kimsürpach uka jachʼa tantachäwir sarasma ukax wali askipunïspawa. “Janirakiw tantachäwinakasar janix sarañasäkiti” siski uka arunakaxa, taqpach yatichäwi istʼaña sañ muni, janiw mä yatichäwsa aptʼañasäkiti, kunattix uka yatichäwinakxa wal muntanxa (Heb. 10:25). Jichjat uka tantachäwitak wakichasxapxañäni. Ukhamaraki jichjatwa patronarus yatiyxañama ukhamatwa wakisin ukhaxa irnaqäwipsa sum wakiyasxani. Wawanakamax yatiqañ utar sarasipkchi ukat uka Jachʼa Tantachäwix uka semanar waktʼchi ukhaxa, yatichirinakaparux yatiyapxañamawa ukat Diosar yupaychiriw sarani sasaw sapxañamaraki. Chiqpachansa, jumatix Diosan Apnaqäwip nayrar uchañ layku chʼamachasïta ukhaxa, Jehová Diosax bendicïtamwa (Mat. 6:33).
3. ¿Kunjamanakatsa mayninakar yanaptʼaraksna?
3 Uka tantachäwir sarapxañapataki mayninakar yanaptʼañäni. “Thaqañasaw maynit maynikama kunjäman yanaptʼasiñasataki” sasaw Pablox jilat kullakanakapar iwxtʼäna (Heb. 10:24). Librot Yatiqañataki tantachasktan ukanxa, ¿jachʼa tantachäwir sarañatakix yanaptʼa munirinakax utjiti? Bibliat yatiqirinakarux uka tantachäwir sarapxañapatakixa, ¿janit yanaptʼsna, mä uruki sarapxañapatakisa? Jehová Diosar jan uñtʼapki uka familiaranakasar uka tantachäwit parlasaxa, jupanakarus sarapxañapatakix chʼamachtʼaraksnawa. Inas jupanakax sarapxarakchispa, ukax wali kusiskañäspawa.
4. Jachʼa Tantachäwinakaxa, ¿kawkinsa ukat kunapachanakas apasini ukxa kunjamatsa yatsna?
4 Kawkinsa apasini uk kunjamatsa yatsna. Sapa marawa, sucursalar telefonot jawsanipxi kunapachasa ukat kawkinsa jachʼa tantachäwinakax apasini sasina. Chiqpachansa jilat kullakanakaw jawsanipxi, ukampis taqi jilat kullakanakaruw jachʼa tantachäwinakatxa yatiyasxi, ukhamasti, janïr jawsankasaxa, wakisispawa marzo 1, 2008 Yatiyañataki sat revista uñxattʼaña.
5. 1) Jachʼa tantachäwinakasar sarktan ukhaxa, ¿kunjamanakatsa Jehová Diosar jachʼañchtanxa? 2) Jilat kullakanakasan sum sarnaqapxatap uñjasaxa, ¿kamsapxataynas qurpachasiñ ut uñjirinakaxa?
5 Aski luräwinaka. Jehová Diosan mayitanakaparjam yupaychañataki tantachasisaxa, jiwas kikpawa wali askinak apstanxa. Chiqpachansa, ukham tantachasisaxa Sutipwa jachʼañcharaktanxa (Isa. 48:17). Jachʼa Tantachäwinakanxa “aski luräwinaka[sa]x” walja jaqinak taypinwa “uñjasi” ukat yaqhipanakax walpun muspharapxi ukatwa kunjamsa jikxatasipxi ukxa arstʼapxaraki (1 Tim. 5:25). Walja maranakaw mä markanxa ukham tantachäwinakax apasxi, ukat uka markankir qurpachasiñ ut uñjir mä gerentexa akhamwa satayna: “Jehová Diosan Qhanañchirinakapatsa jachʼa tantachäwinakapatsa walja jaqinakaw aka markanxa parlapxi. Kunjamsa Centro Cívico lugarxa qʼumachsupxi uksa uñjapxtwa, auto sayayañanaksa ukhamarakiw qʼumachapxi. Nänakatakix wali askipuniw veranon jumanakar katuqtʼañaxa. Walja maranak ukham sarnaqassna” sasin satayna. Ukat qurpachasiñ yaqha ut uñjir gerentexa, niya ukham arstʼarakitayna, kunattixa, kunapachatix cantantenakaru ukat musiconakaru qurpachasax jan waltʼäwinakanwa uñjasitayna, ukampis qurpachasir jilat kullakanakasatxa ‘yanaptʼasirïpxiwa ukat paciencia chuymanïpxiwaʼ sasaw sarakïna. Ukatxa: “¡Taqi qurpachasirinakax Jehová Diosan Qhanañchirinakapjam sarnaqapxaspa ukax wali askipunïspawa!” sasa. Chiqpachansa, jilat kullakanakasan suma sarnaqapxatapatxa, janiw ukham parlatanakakix istʼaskiti, jan ukasti Jehová Dios Awkisan chuymapwa kusisiyixa.
6. Kunatsa jachʼa tantachäwin apaskani uka wakichäwir sum istʼañax wakisi uka tuqitxa, ¿kamsistusa Mateo 4:4 qillqataxa?
6 “Taqi kuntix Diosax siski” uka arunak istʼañäni ukhawa jakaskañäni sasaw Jesusax säna (Mat. 4:4). Sapa mara apaski uka jachʼa tantachäwinakanwa Jehová Diosax amuyasiri chiqapa uywatampi wakichayasin “manqʼanak” jan ukax yatichäwinakap churistu (Mat. 24:45). Uka yatichäwinak wakichañatakisa ukhamaraki jiwasanakar puriyañatakisa wali chʼamaw tukusi, janiw faciläkiti. Ukhamasti, tantachäwir sarasa ukat taqi yatichäwinak sum istʼasa Jehová Diosar yuspärapxañäni, jupax munasiñapatwa sum uñjistu sum yatichistu.
[4 janan recuadropa]
Kuna horasänisa
Viernesampi sabadompi
9.20 alwa horasat 4.55 jaypʼu horaskama
Domingo
9.20 alwa horasat 4.00 jaypʼu horaskama