Jehová Diosan Qhanañchirinakapan kimsa uru Jachʼa Tantachäwipa 2009
1. 1) Uka Jachʼa Tantachäwir kimsürpach sarasaxa, ¿kuna bendicionanaksa katuqañäni? 2) ¿Kunanakasa jichhatpach lurañäspa?
1 Walpun kimsa uru Jachʼa Tantachäwi suyasktanxa, ukat jilat kullakanakasampi, mä arunxa “khitinakatix [jiwasjam] ajay tuqin aynachtʼatäpxatap amuyasipxi” ukanakampix walpun parltʼasiñ muntanxa (Mat. 5:3). Jehová Diosan jachʼa urup jakʼankatap amuyasaxa, kimsürpach jan qhiparas sarañaw wakisi, ukhamatwa Jehová Diosar luqtäwisan jan jithiqtañasataki ukat iyawsäwisar chʼamañchañataki jilat kullakanakasampix maynit maynikam chʼamachtʼasipxañäni (Sof. 1:14). Chiqansa jiwasatakix wali askiw uka Jachʼa Tantachäwixa, ukatwa kimsürpach sarañ muntanxa, ukwa yatichirinakas patronanakas yatipxañapa. Jichhatpach sarañataki wakichasiñaxa wali askïspawa, ukhamatwa Jehová Diosan bendicionanakap katuqañäni, ukatsti Jupaw yanaptʼaskistani (Isa. 50:10).
2. Janitï walja markanakat Jachʼa Tantachäwir sarañataki invitación qatuqksnaxa, ¿kunatsa kimsa uru yaqha jachʼa tantachäwinakax ukar uñtasitäniw saraksna?
2 Walja Markanakat Jachʼa Tantachäwi. Walja markanakat Jachʼa Tantachäwix mä qhawqha jachʼa markanakanakwa apasi, ukarux khitinakatï ukar sarañataki qillqatäpki jupanakakiw sarapxañapa. Uka iwxanakarutï istʼañäni ukhaxa, uka Jachʼa Tantachäwinakan janiw jilaräpkaniti (1 Cor. 14:40; Heb. 13:17). Ukampisa, kimsa uru yaqha Jachʼa Tantachäwinakarux yaqha markan irnaqir betelitanaka, misioneronaka ukat yaqhanakampiw markanakapar sarapxarakini, ukhamaxa, yaqha chiqanakatsa jutapkaspa ukhamarakïniw uka Jachʼa Tantachäwinakaxa.
3. ¿Kunjamatsa tamasan jilat kullakanakasar munasiñas uñachtʼaysna?
3 Mayninakar irpapxañäni. Jachʼa Tantachäwir irpañatakixa, ¿tamaman maynir yanaptʼañax utjiti? Kunapachatï jilat kullakanakasar yanapktan ukhaxa, janiw jiwasatak askïki ukanakak ‘thaqktanti, jan ukasti mayninakataki askïki ukwa thaqtanxa’ (Fili. 2:4).
4. ¿Kimsa uru Jachʼa Tantachäwinakax kawkinsa ukat kuna urunakas apasini ukxa kawkinsa yatxatsna?
4 Kawkitsa yatxatsna. Kawkhansa Jachʼa Tantachäwinakax apasini ukat kuna urunakänisa uk yatxatañatakix janïr sucursalaru jawskasaxa, mirä amp suma Yatiyañataki (Abril-Junio 2009) uka qillqat uñxattʼma, jan ukax secretario jilatar jisktʼañaw wakisirakispa.
5. ¿Kunjamsa yaqhip jilat kullakanakarux yanaptʼsna?
5 Kunjamsa yanaptʼsna. Proverbios 3:27 qillqatanxa akham siwa: “Kunapachatï yanaptʼañax amparamankaskchi ukkhaxa, jan ‘Janiw’ siskamti khititix yanapa maykätam ukaruxa” sasa. ¿Uka Jachʼa Tantachäwinakanxa kunjamsa yaqhanakar yanaptʼsna? Inas tamanxa chuymankispata, jan ukax usut jilat kullakanakax utjchi, jupanakar irpañaw wakisispa ukat qurpachasiñ tuqit yanaptʼañas wakisirakispawa, janiw Diosar sapürjam luqtir jilat kullakanakatsa armasiñasäkarakiti, yaqhanakatsa ukhamaraki. Ukampisa familiaranakapaw ukham jilat kullakanakarux nayraqat yanaptʼapxañapa (1 Tim. 5:4). Ukat familiaranakax jan yanaptʼirjamäpkani ukhaxa cristian jilat kullakanakaw yanaptʼapxañapa (Gál. 6:10).
6. Kimsa uru Jachʼa Tantachäwi 2009 ukar sarañatak wakichaskasaxa, ¿kunanakamp amtañas wakisispa?
6 Diosar jachʼañchañataki sum sarnaqapxañäni. Kunapachatï qullan ajayun luräwiparjam taqi kunan sum parlañäni ukat sum sarnaqarakiñäni, ukat hotelan irnaqapki ukanakampi ukat kawki markantï jikxataskañäni uka chiqanakansa taqinimpi sum apasiñäni ukhaxa, Jehová Diosan markapat sum parlapxarakini ukat janirakiw mayninakarus pantjasiykañäniti (1 Cor. 10:31; 2 Cor. 6:3, 4). Ukhamax kimsa uru Jachʼa Tantachäwi 2009, ukar sarasax sapa mayniw Jehová Diosar jachʼañchañataki sum sarnaqañasa (1 Ped. 2:12).
[5 janan recuadropa]
Kuna horasänisa
Jueves (Walja Markanakat Jachʼa Tantachäwi utjkani ukatakiwa)
1.20 horasata 4.55 jaypʼu horaskama
Viernes, sábado
9.20 alwat 4.55 jaypʼukama
Domingo
9.20 alwat 4.00 jaypʼukama