¿Qhipa janankki uka jisktʼanakamp yatiyirïtati?

Kunapachatï jaqinakax mä qillqat katuqapxi ukhaxa, jankʼakiw nayrïr jana uñxatasax kunas qhipax janan utji uk uñxatapxi. ¿Jumax uk amuyirïtati? Yatiyañataki (yatiyir sarañataki) sat revistan qhipax janapanxa, kuna jisktʼanakattï jaqinakax yatxatañ munapkaspa ukanakaw utji ukat qhanañchäwipax kuna janansa jikxatasi ukas uñstarakiwa.

Kunjamsa parlañ qalltsna ukxa, uka jisktʼanakaw amuytʼayistaspa. Ukhamatwa kawkhantï sapa kut yatiyktan uka chiqanakan sapa semana yaqha jisktʼanakata revistanakamp yatiysna. Ukat khitimpitix parlktan ukax jan tiemponïkani ukhaxa, mä jukʼakwa parltʼsna ukat revistan qhipax janan utjki uka jisktʼanak uñxatayasax akham sisnawa: “Aka jisktʼan qhanañchäwip yatxatañ munsta ukhaxa, aka revista jaytawayäma ukat tiemponïkäta ukhaw jukʼamp parltʼañäni” sasa. Yaqhip jilat kullakanakaxa, revistan qhipax janan utjki uka jisktʼanakwa utanirux uñachtʼayapxi ukat kawkïr jisktʼats yatxatañ muni uk ajlltʼayapxi. Ukatsti, jisktʼan qhanañchäwipax kawkhansa jikxatasi uk uñachtʼayapxi ukat ajlltʼkäna uka jiskʼa tʼaqanakwa Bibliat liytʼarapipxi. ¿Kunjamanakatsa Yatiyañataki revistan utjki uka jisktʼanakamp jumax yatiyasma uk amuytʼaraktati?