CRISTIANJAM JAKAÑATAKI
Jukʼamp sum yatiyañataki: Territoriosan taqenir Diosat yatiyapjjañäni
KUNATSA UK LURAÑAJJ WAKISI. Zacarías profetajja, kunayman parlir arunaka ‘yaqha markankirinakaw’ Diosan suma yatiyäwinakap istʼapjjani sasaw säna (Zac 8:23). ¿Khitis uka jaqenakar yatiyañapäna? (Ro 10:13-15). Jiwasaw kawkjantï yatiyktan uka cheqan jakapki taqe uka jaqenakar yatiyañasa, ukajj mä bendicionawa (od-S pág. 84 párrs. 10, 11).
KUNJAMSA UK LURSNA:
Wakichtʼasiñasawa. ¿Kawkjantï yatiyktan uka cheqanakan yaqha aru parlir jaqenakajj utjiti? JW Language programan utjki uka yanaptʼampiw yaqha arut yatiyañ yateqsna. Ukatjja utanirojj celularapata, jan ukajj computadorapatwa, kunjamsa Internetar jw.org cheqar mantasin pachpa arupat Bibliat yatjjataspa uk yatichsna.
Khitinakarus yatiysna uk amuytʼañasawa. Yatiykasajja, khitinakatï uka cheqnam pasapki jan ukajj auto suyasipki ukanakaruw yatiysna. Walja jaqenakajj utjki uka cheqanakan yatiykasajja, sum yatiyañatak chʼamachasiñasawa.
Taqenimpi parlañatakiw chʼamachasiñasa. Utanitï jan ukankchi ukhajja, inas yaqha horasana jan ukajj yaqha uru kuttʼsna. Sapa utanimpi parlañatakiw chʼamachasiñasa. Awisajja, carta qellqasa, telefonot jawsasa jan ukajj callenwa yatiyañajj wakisirakispa.
Utanimpi mayan parlaskakiñatakejj chʼamachasiñasawa. Bibliat yatjjatañ munchi ukhajja, utanirojj jankʼakiw visittʼir kuttʼañasa. Utanitï yaqha aru parlchi ukhajja, pachpa arup parlir mä jilataru jan ukajj kullakaruw visittʼañapatak maysna. Ukañkamajja visittʼir saraskakiñasawa (od-S págs. 93, 94 párrs 39, 40).
“TAQE AKA ORAQPACHANA” YATIYASKTANJJA SAT VIDEO UÑTASAJJA, AKA JISKTʼANAKARUW QHANAÑCHAPJJÄTA:
Jilat kullakanakajja, ¿kunjamsa jan yatiyatäkäna uka cheqanakan yatiyañatak wakichasipjjäna? (1Co 9:22, 23).
¿Kuna jan walinakansa uñjasipjjäna?
¿Kuna bendicionanaksa katoqapjjäna?
Yatiyapkta uka cheqan jakir jaqenakar yatiyañatakejja, ¿kunsa lurasma?