¿Guerranakan kuna jan walinakas utji?
Jaqenakajj kunayman jan walinakanwa uñjasipjje, ukanakat sipans guerranakaw jukʼamp jan waltʼayi. Soldadonakarusa jan guerrar saririnakarus jan waltʼayapuniwa.
SOLDADONAKA
“Guerran sapa kutiw jan walinakajj uñjasi. Kunjamsa maynirojj usuchjapjje jiwayapjje ukanak uñjasajja, vidajajj janis segurökaspa ukhamaw jikjjatasta” (Gary, Gran Bretaña).
“Mä guerranjja ajanuta, jikhanitwa balanakamp usuchjapjjetäna. Ukat kunjamsa wawanakarusa, jilïrinakarus jiwayapjjäna uks uñjarakiyätwa. Guerrar sartan ukhajja, mayninakat sinttʼasiñajj chʼamakiwa” (Wilmar, Colombia).
“Jiwas nayraqatan maynir armamp disparir uñjtan ukajj janiw armañjamäkiti. Tʼaqesitapasa, arnaqasitapas jan armkayapuniwa” (Zafirah, Estados Unidos).
ALEQ JAQENAKA
“Janipuniw mayampis kusisitäjjati sasaw amuyayäta. Jiwañaruw ajjsarayäta, ukampis familiajas amigonakajas jiwarapjjaniwa, sasaw jukʼamp ajjsarayasiyäta” (Olexandra, Ucrania).
“Wali alwat (2:00 a.m.) wali arumkam (11:00 p.m.) manqʼa jikjjatañatak filasiñajj wali ajjsarkañänwa. Uka jakʼan balanakamp waktʼayataw uñjassna, uk janiw yatisktanti” (Daler, Tayikistán).
“Mä guerranwa awk taykajajj jiwawayapjje. Jan khiti chuymachtʼirini, wajchaw qheparta” (Marie, Ruanda).
Guerranakampi jan waltʼayatas uñjasiwayapkchejja, uka jaqenakajj sumankañwa jikjjatawayapjje. Maysa toqetjja, taqe uka guerranakajj niyaw chhaqtayatäni sasaw taqe chuym confiyapjje. Kunjamsa ukajj phoqasini uk Yatiyañataki sat aka revistajj Bibliat apstʼat textonakampiw sum qhanañchi.