Guerranaka jan waltʼäwinak utjipans ¿kunjamsa sumankañ jikjjatsna?
Gary jilatajja, nayrajj ejercitonkänwa jupajj akham siwa: “Janïr Bibliat yatjjatkayäta ukhajja, kunatsa walja problemanakasa, ina chʼusat tʼaqesiñanakas aka oraqen utji uk janiw amuykayätti. Ukampis jichhajj janiw ukanakat llakisjjti, Jehová Diosaw aka oraqen sum jakasiñ utjayani” sasa.
Janiw Gary jilatakejj ukham jikjjataskiti. Kunjamsa Bibliajj yaqhepar yanaptʼawayi uk uñjañäni.
BIBLIAJJ AKHAM SIWA: “Jehová Dios Tata, jumajj suma Diosätawa, perdonañatakis jankʼakirakïtawa” sasa (Salmo 86:5).
KUNJAMSA UKAJJ YANAPTʼISTU: “Uka arunakajj jan sinti llakisiñatakiw yanaptʼitu, kuna laykutejj Jehová Diosajj khuyapayasir Diosawa. Kunanaktï guerran lurawaykta ukanakat nayar perdonañatakejj jankʼakiwa” (Wilmar, Colombia).
BIBLIAJJ AKHAM SIWA: “Nayajj machaq alajjpachanakampi machaq oraqempwa luräjja, kunanakatï nayrajj utjkäna ukanakajja janiw amtatäjjaniti, janirakiw khitis ukanakat llakisjjaniti” sasa (Isaías 65:17).
KUNJAMSA UKAJJ YANAPTʼISTU: “Ejercitonkkayäta ukhajj kuna jan walinakatï paskitäna ukanakaw pʼeqer jutitu. Ukampis Jehová Diosajja, wal llakisiykitu uka jan wali amuyunak niyaw qʼal chhaqtayjjani, ukwa uka textojj amtayitu. Uka jan wali amuyunakajj janiw mayampis tʼaqesiyjjetaniti. ¡Ukajj mä suma regalopuniwa!” (Zafirah, Estados Unidos).
BIBLIAJJ AKHAM SIWA: “Reyejj apnaqkani uka tiemponjja cheqap sarnaqer jaqejj panqaraniwa, phajjsejj jan utj-jjani ukhakamajj sumankañajj waljapuniw utjani” sasa (Salmo 72:7).
KUNJAMSA UKAJJ YANAPTʼISTU: “Walja kutiw uka textonkir arunakat lupʼta. Kuna jan walinaktï guerrajj utjayawayki ukanakajj janiw amtatäjjaniti, familiaranakasajj sumti jakasisipki janicha uka toqets janiw llakisjjarakiñäniti” (Olexandra, Ucrania).
BIBLIAJJ AKHAM SIWA: “Jiwatanakamajj jakapjjaniwa […]. ¡Sartapjjam, kusisiñat arnaqasipjjam, laqʼa polvon jakirinaka!” sasa (Isaías 26:19).
KUNJAMSA UKAJJ YANAPTʼISTU: “Ruanda markan tutsi jaqenakar jiwarayasïna ukhajja, niya taqpach familiajaruw jiwarayapjjäna. Ukampis mayampiw munat familiarajar uñjäjja. Jupanakajj kunja kusisitas parltʼasipjjeri uk mayampiw jaktanjjapjjani ukhajj istʼäjja, ukwa uka textojj amtayitu” (Marie, Ruanda).
BIBLIAJJ AKHAM SIWA: “Mä jukʼa tiempotjja jan wali jaqenakajj janiw utj-jjaniti […]. Ukampis llampʼu chuymaninakajj oraqwa katoqapjjani, jan tukuskir sumankañampiw jupanakajj wal kusisipjjarakini” sasa (Salmo 37:10, 11).
KUNJAMSA UKAJJ YANAPTʼISTU: “Aka cheqan guerrajj tukusjjchisa, ina chʼusat tʼaqesiñanakasa jan wali jaqenakas utjaskakiwa. Uka textojj wal chʼamañchtʼitu, Jehová Diosajj taqe kun uñji, kunjamas jikjjatasta uks amuyarakituwa. Niyaw taqe uka jan walinakajj tukusjjani, janiw amtatäjjaniti sasaw jupajj arsuwayaraki” (Daler, Tayikistán).
Kuntï Bibliajj siski uk yatjjatasajja, walja Testigonakaw sumankañ jikjjatawayapjje jupanakat yaqhepanakarojj aka revistanwa liytʼawaytanjja. Janïr Bibliat yatjjatkasajja, inas jupanakajj yaqha markankirinakaru, yaqha jañchininakar uñisipjjchïna, ukampis taqe ukanakjja apanukuwayapjjewa (Efesios 4:31, 32). Jehová Diosan Testigonakapajj janiw politicanakar mitisipkiti, janirakiw jan walinaksa lurapkiti (Juan 18:36).
Jehová Diosan Testigonakapajja, mä familjamaw oraqpachan maynit maynikam yanaptʼasipjjta (Juan 13:35). Amuytʼañataki, parlaniwayktan uka Olexandra kullakitajja, guerran utjatap laykojj yaqha markaruw kullakapampejj escapjjapjjäna, jupajj akham siwa: “Frontera pasapjjayäta ukhajja, uka markankir Jehová Diosan Testigonakaparojj jankʼakiw uñjapjjayäta, nanakar katoqañatakejj listokïpjjänwa, jilat kullakanakan yanaptʼapampejj uka markar yatinoqtañajj janiw chʼamäkänti” sasa.
Reunionanakajar jutañamatakiw invittʼapjjsma, ukanwa kunjamsa jichhajj sumankañ jikjjatasma, ukat sumankañajj aka oraqen jilarkiriw utjani siski uka toqet jukʼampiw Bibliat yateqäta. Maysa toqetjja, jakaskta uka jakʼan Testigonakan tantachäwip thaqtañamatakisa ukat gratisak Bibliat yatichayasiñamatakisa, Internetar jw.org cheqar mantam. Jehová Diosan mä Testigopaw Wiñayatakiw kusisit jakasisma sat qellqatamp yatichätam.