¿Kawkïr gobiernos aka oraq wiñayatak apnaqaspa? | ¿Bibliajj uka toqet kamsisa?

Aka oraqpachankir gobiernonakajj aynachtʼasipkiwa. Yaqhep markanakan gobiernopajj suma uttʼayatjamäpkchisa, política toqen tʼakjtañanakasa, chʼajjwañanakasa, jan waltʼayasiñanakas qʼalwa aynachtʼayaski, eleccionanakapas janirakiw sum apaskiti.

Ukampis wiñayatak apnaqeri mä gobiernow utji sasaw Bibliajj qhanañchi. Uka gobiernot parlir istʼpachätawa, pachpa Jesucristow nanakan awkija sat oracionan uka gobiernot parläna.

• “Jumanakajj akham sasaw orasipjjañama: ‘Alajjpachankir nanakan Awkija, sutimajj jachʼañchatäpan. Reinomajj jutpan. Munañamajj luratäpan, kunjamtï alajjpachan luraski ukhamarak aka oraqens luraspan’” sasa (Mateo 6:9, 10).

¿Kunsa Bibliajj uka Reinot yatichi?

Diosan Reinopajj wiñayatakïniwa

Diosan Reinopajj alajjpachatwa apnaqanini.

•  Jesusajj uka Reinot parlkasajj ‘alajjpachankir Reino’ sasaw säna (Mateo 4:17; 5:3, 10, 19, 20). Ukatwa “Reinojajj janiw aka mundonkirïkiti” sasin sarakïna (Juan 18:36).

Diosan Reinopajj jaqenakan apnaqata gobiernonak lantiw apnaqani.

•  Bibliajj akham siwa: “Uka reinow taqe uka gobiernonakarojj tʼunjani, chhaqtayani, uka reinokiw wiñayatak utjarakini” sasa (Daniel 2:44, nota).

Diosan Reinopajj janiw kunapachas chhaqtayatäkaniti, Jesucristow uka Reinon Reyjam apnaqarakini.

•  Bibliajj akham siwa: “Jupan gobernatapajj wiñayatakïniwa, janiw tukuskaniti, reinopajj janirakiw tukjatäkaniti” sasa (Daniel 7:13, 14).

Diosan Reinopajj kusisit jakasiña, sumankañwa aka oraqen utjayani.

•  Bibliajj akham siwa: “Sapa mayniw uvas alipan chʼiwipar qontʼasipjjani ukhamarak higos qoqapan chʼiwipar qontʼasipjjani, jupanakarojj janiw khitis ajjsaraykaniti” sasa (Miqueas 4:4).

Diosan Reinopat jukʼamp yatjjatam

Jesusajj aka oraqenkkäna ukhajja, ‘Reinon suma yatiyäwinakapatwa jaqenakar parläna’ (Mateo 9:35). Ukatjja, akham sarakïnwa:

• “Reinon aka suma yatiyäwinakapajja, aka oraqpachanwa yatiyasini, ukhamat taqe markanakan yatipjjañapataki. Ukjjaruw akapachan tukusiñapajj jutani” sasa (Mateo 24:14).

Jichhürunakanjja, Reinon suma yatiyäwinakapajj 240 jila markanakanwa yatiyasiski. ¿Kuna bendicionanaksa uka Reinojj apanini? ¿Kunjamsa jumajj uka bendicionanak katoqasma? Diosan Reinopat jukʼamp yatjjatañamatakiw chʼamañchtʼapjjsma.

¿Kunas Diosan Reinopajja? sat video uñtam.