7 yatichäwi

¿Diosar qallasisax kunarus aptʼawayapxistu?

1-3. ¿Kunjamsa tiempox Jehová Diosan arsutapaxa chiqätap uñachtʼäwayi?

DIOSAN Apnaqäwipar qallasïwipat aksaruxa, Diosat jithiqtat apnaqäwinakaxa, ¿kunanaksa uñachtʼäwayapxi? ¿Jaqinakax Diosat sipansa jukʼamp sumti apnaqasipxi? Janiw ukhamäkiti, ukwa waranq waranqa maranak jaqin sarnaqäwipax uñachtʼayi.

² Kunapachatï nayrïr awk taykasax Diosan Apnaqäwipar qallasipxäna ukhaxa, jan waltʼäwinakanpun uñjasiwayapxi. Tʼaqhisiñaruw purtʼasiwayapxi ukat uka pachpa tʼaqhisiñaruw taqinirus purtʼäyawäpxistu. Ukatwa jupanak pacha juchañchasipxäna. Diosan Arupax akham sasaw qhanañchi: “Diosarux ñanqhachapxtawa, janirakiw wawapat uñtʼatäñatakis askïpktati” sasa (Deuteronomio 32:5).

³ Diosax Adanamp Evampirux akham sasaw iwxtʼatayna: kamachinakajar jan istʼasa sarnaqapxäta ukhaxa, jan waltʼäwin uñjasisaw chuymankipstasin jiwapxäta sasa. Uka arsutapax chiqätapwa jaqinakan sarnaqäwipax uñachtʼäwayistu (Génesis 2:17; 3:19). Jupanakax janiw kamachinakaparux istʼapkänti, ukatwa chuymankipstasin jiwapxäna.

4. ¿Kunatsa taqinis juchanïtanxa, usunttansa ukat jiwañarus purtanxa?

⁴ Kunjamtï wawanakapax uñjasipxañapäna ukaxa, Romanos 5:12 jiskʼa tʼaqanwa qhanañchasi: “Mä sapa jaqi tuqi juchax aka uraqir mantankixa, ukat jiwax uka jucha laykurak utjixa, ukhamarakiw jiwax taqi jaqirux katuntawayi”. Ukhamaxa, nayrïr awk taykasax Diosan jan apnaqatäñ munasaw jucharar tukupxatayna. Jupan wawanakapätanwa ukatwa taqinis juchanïtanxa. Ukhamasti, taqiniw juchan yuritätanxa, ukatwa usunttansa jiwaraktansa.

5, 6. Jaqinakan sarnaqäwipanxa, ¿kunaksa jaqin apnaqäwipax uñachtʼäwayi?

⁵ Adanamp Evampi juchachasitapatxa waranq waranqa maranakaw saraqxi. Kunayman apnaqäwinakaw uñsti ukat chhaqtaraki. Kunayman tuqitwa apnaqañ yantʼapxi. Ukampisa, jukʼamp jan waltʼäwinakanakwa jaqix uñjasi. Suxta waranqa maranak qhipatxa jaqinakax sumankañxa yatiqxapxañapänwa, ukat taqi kunas chiqapar uñjatäñaparakïnwa, taqi kunas sumäñapänwa, taqiniw khuyaptʼayasiri yanaptʼasiri ukhamäxapxañapäna.

⁶ Chiqpachansa, janiw ukhamäkiti. Janiw kuna kast jaqin uttʼayat apnaqäwis nayrar sartayasax sumankaña taqinitak utjaykiti. Waranq waranqa jaqinakaruw 1900 maranakanxa Alemania markan jiwarapxäna ukat jachʼa chʼaxwäwinakanxa, niya 100.000.000 jaqinakaw jiwarapxarakïna. Ukhamarakiw jichhürunakanxa, político tuqit jan waltʼayasisax jaqinakarux tʼaqhisiyapxi, jiwayapxi ukat carcelar jistʼantayapxi.

Jichhürunakanxa kunjamakisa

7. ¿Taqi chiqansa kunjamakis jaqinakaxa?

⁷ Jichhürunakanxa, kunjamäsipkisa jaqinakaxa, uka tuqit yatxatañäni. Lunthatasiña nuwasiña ukanakakiw utjaski. Jan wali qullanakampi qulljasiñax waltʼatapuniwa. Jan wali sarnaqasinxa, kunayman usunakwa aptasipxi. Waranq waranqaniw SIDA jan qullañjam usu aptasipxi. Walja jaqinakaw manqʼatjama jan ukax usuntasa jiwarasipki, maysa tuqitxa, mä jukʼanikiw qamiriptasipki. Jaqix jan walinakampiw Uraq qʼañuchasipki ukat tukjasipkaraki. Familiansa yaqha chiqanakansa jan walinakak lurxapxi. Jakäwix Supaya, ‘akapach diosan’ munañapar apnaqatawa. Jan munasiri, jan sinttʼasiri ukat jan walinak luriri jaqinakax taqi chiqanwa utji (2 Corintios 4:4).

8. Jaqin luräwinakapax janiw sum nayrar sartaykiti, ¿kunatsa ukham sistanxa?

⁸ Qullqi tuqit ukat ciencia tuqit nayrar sartañapatakiw Diosax jaqinakar tiempo churäna. Ukampisa, arco ukat flecha lantixa, jachʼa bombanaka, avionanaka ukat kunayman yänak jiwayañatakix lurapxi, ukampis ¿nayrar sartañax utjpachati? Inamayaw phaxsirusa sarasipki, ukampisa janiw suman jakasiñax utjkiti. Arumas urusa wali axsarasaw sarnaqapxi.

Kunas tiempompix yatisi

9, 10. 1) ¿Tiempox kuns uñachtʼäwayi? 2) ¿Kunatsa Diosax jaqinakar amtaparjam sarnaqayi?

⁹ Jaqinakax Diosan Apnaqäwipat jithiqtasaxa, janipuniw sum sarnaqapkaspati, ukaw waranq waranqa maranakanxa uñjasiwayi. Janipuniw uk amuyasiñ munapkiti. Ukampis amuyañjamäskiwa, kunjamtï manqʼampi, umampi ukat samanamp jakañatak luratätanxa, ukhamarakiw Luririsan munañaparjam sarnaqañatak luratätanxa.

¹⁰ Sapa maynis amtaparjam sarnaqasaw jan walin uñjasipxi, ukampis amuyasiñasatakiw uka jan walinak jan tukjkiti. Ukatwa tʼaqhisiñanakax utji. Amtaparjam sarnaqañatxa Diosax janiw jarkʼkiti, jan ukasti jupanakpacha amuyasipxañapatakiw uk luratayna, ukax mä suma churäwiwa. Kunatï chiqäki ukwa Bibliax akham sas qhanañchi: “Jaqix janiw alaskiti pachpa jakañapxa, janirakiw tukuyäwipsa munañapar apnaqkaspati” sasa. Ukat akham saskakiwa: ‘Ukhamarak jaqin chʼamanïtapsa masinakaparu jan walinak lurañatakikiwa’ sasa (Jeremías 10:23; Eclesiastés 8:9).

11. ¿Mä kasta apnaqäwis tʼaqhisiñanak chhaqtaykiti?

¹¹ Suxta waranqa maranak jaqinakan apnaqäwipanxa, janipuniw khitis jan waltʼäwinaka ukat tʼaqhisiñanak chhaqtaykiti, ukwa Diosax uñachtʼayawayi. Amuytʼañataki, Israel marka apnaqir Salomón chachax janiw yatiñkankañapampisa qullqipampisa ukat taqi chʼamapampis jaqin llakinakapxa askichirjamäkänti (Eclesiastés 4:1-3). Ukhamarakiw jichhürunakanxa, apnaqirinakax inamayaw ciencia tuqit wali suma yänakampi wakichtʼatäpxi, ukampisa janiw tʼaqhisiñanak chhaqtayapkiti. Diosat jithiqtat jaqinakan sarnaqäwipan tʼaqhisiñanak chhaqtayañat sipansa, jukʼamp jan waltʼäwirukiw apapxi.

Diosax jayäkipan amuytʼi

12-14. Ukham tʼaqhisiñ jan tukjatapatsti, ¿kuna askinaksa jutïritakix apanini?

¹² Uka tʼaqhisiñanak utjipanwa jiwasax llakita uñjasiraktanxa. Ukampisa askisatakirakiwa, uk Diosax nayratpach sum yatïna. Kuntï Jupax jiwasatak wakichki ukxa, janiw mä qhawqha maratakïkaniti, jan ukasti waranq waranqa maranakatakïniwa, ¡jïsa wiñayatakïniwa!

¹³ Maynitï jutïrin ukham amuyuparjam Diosar qallasiñ munani ukhaxa, janiw tiempox jupar churatäkaniti. Taqinin amuyasipxañapatakiw uka qallasirinakar utjayäna, ukhamatwa Diosax amuytʼasiñasataki mä kamachïkaspas ukham uttʼayäna, wiñayatakiw kawkinsa uk amuyapxañapäna.

¹⁴ Janiw khitis amtaparjam sarnaqasax nayrar sartkaspati, ukwa Jehová Diosax jan waltäwinak ukat tʼaqhisiñanak jan tukjasax uñachtʼäwayi. Janipuniw khiti jaqis ni angelanakas munañaparjam lurasax askinak apankaspati. Ukhamaxa, Diosax jan khitin kuns siskataw qallasirinakarux tukjani. ‘Ñanqha luririnakarusti tʼunjiwa.’ (Salmo 145:20; Romanos 3:4.)

[15 janan fotopa]

Nayrïr awk taykasaxa, Diosat jithiqtasaw tiempompix chuymankipstasin jiwapxäna

[16 janan fotonakapa]

Diosat jithiqtata jaqin apnaqäwipax jan waltʼäwinakarupuniw jaqirux aptʼawayi

[Fotojj khitin apsutasa]

Aka fotox Coast Guard ukankiwa