¿Kunas yaqha religionanakampejj pasani?

1. ¿Taqe religionanakat Diosar yupaychapjjpacha?

Taqe religionanakanwa, Diosar taqe chuyma yupaychañ muniri ukat llampʼu chuymani jaqenakajj utji. ¿Kunjamsa Diosajj jupanakar uñji? Munasiñampiw uñji ukat wal jupanakat llakisiraki. Ukampis llakkañawa, iglesian sutipjjaruw jaqenakajj kunayman jan walinak lurawayapjje (2 Corintios 4:3, 4; 11:13-15). Kunjamtï noticianakan yatiyaskejja, yaqhep religionanakajj terrorismonakana, jaqe jiwayañanakana ukat guerranakanwa mitisiwayapjje, yaqhepasti wawanakaruw abusawayapjjaraki. Diosar taqe chuyma yupaychañ munirinakajj taqe ukanak uñjasajj wali chuyma ustʼataw jikjjatasiwayapjje. Mateo 24:3-5, 11, 12 liytʼäta.

Cheqa religionajja Jehová Diosaruw jachʼañchi, ukampis kʼari religionajj jiskʼachiwa. Jupanakajj Diosatsa ukat jiwatanakajj kawkinkasipkisa uka toqetsa kʼarinakwa yatichapjje, janiw ukakïkiti, kuntï Bibliajj jan yatichi ukwa yatichapjje. Ukampis Jehová Diosajj kunatï Jupat cheqäki uk jaqenakan yatipjjañapwa muni. Eclesiastés 9:5, 10 ukat 1 Timoteo 2:3-5 liytʼäta.

2. ¿Kunas yaqha religionanakampejj pasani?

Diosajj janiw kʼari yupaychirinakampi engañayaskiti, jupanakajj “Diosar munasipjjtwa” sapjjchisa, chuymanakapanjj Supayan apnaqat akapacharuw munasipki (Santiago 4:4). Bibliarjamajj taqe kʼari religionanakajja, “Jachʼa Babilonia” satäpjjewa. ¿Kunatsa? Noé chachajj jakkäna uka urunakan Uma Juicio utjkäna uka pasatatwa, kʼari religionajj mä markan uñstäna, uka markaw Babilonia satäna. Cheqansa, Diosajj niyaw mä akatjamat kʼari religionanakar chhaqtayani, jupanakaw jaqenakar jan walinak lurapjje ukat engañapjjaraki. Apocalipsis 17:1, 2, 5, 16, 17 ukat 18:8 liytʼäta.

Ukampis yaqhep kʼari religionanakanjja, suma chuyman jaqenakajj utjaskiwa, Jehová Diosajj janiw jupanakat armaskiti, antisas tantachthapiskiwa. ¿Kunjamatsa? Cheqa yatichäwinakwa yatichaski. Miqueas 4:2, 5 liytʼäta.

3. ¿Kunsa suma chuyman jaqenakajj lurapjjañapa?

Jehová Diosajj kunatï cheqäki uk yatiñ munirinakaru ukat sum sarnaqañ munirinakarojja wali sum uñji. Ukatwa kʼari religionanakat mistjjapjjañapatakejj chʼamañchi. Jupanakatï cheqpachapuni Diosar munasipjjchejja, kuna cambionak lurañas wakisini ukanak lurapjjaniwa, ukhamat Diosan chuymap kusisiyañataki. Apocalipsis 18:4 liytʼäta.

Nayrïr maranakanjja, walja jaqenakaw suma chuymampi apostolanakan yatichäwinakap istʼapjjäna. Jehová Diosaw jupanakarojj suma kusisit jakasiña ukat jutïr urunak suma chuymamp suytʼañ yatichäna. Jupanakjamarakiw jiwasajj suma chuymampi Qollan Qellqatanakarjam sarnaqañasajja, ukatakejj Jehová Diosaw jakäwisan nayrankañapa. 1 Tesalonicenses 1:8, 9 ukat 2:13 liytʼäta.

Kʼari religionanak jaytasa, Diosan markapar mantañ munapki uka jaqenakarojja, wali munasiñampiw Jehová Diosajj katoqe. Cheqa yupaychäwinkapki, ukanakakiw Diosampi ukat cristian jilat kullakanakampi sum apasipjjaspa, ukat wiñay jakañsa suyapjjarakispa. ¿Janit taqe uka bendicionanak katoqañ munkasma? Marcos 10:29, 30 ukat 2 Corintios 6:17, 18 liytʼäta.

4. Aka Oraqen kusisita ukat sumankañan jakasiñasatakejja, ¿kunsa Diosajj lurani?

Kunapachatï Jehová Diosajj kʼari religionanakajj tʼunjani ukhajja, suman jakasiñaw aka Oraqen utjani. Janiw khiti jaqenakar engañiris ni tʼaqanoqtayiris utjjaniti. Taqe jaqenakaw mä sapa cheqpach Diosaruki yupaychjjapjjani. ¿Janit ukajj mä suma yatiyäwiki? Apocalipsis 18:20, 21 ukat 21:3, 4 liytʼäta.