LECCIÓN 4

Janïr mä texto liytʼkasajj sum qhanañchtʼaña

Mateo 22:41-45

¿KUNSA LURAÑAMA? Janïr mä texto liytʼkasajja, kuna toqetsa liytʼäta uk amuytʼapjjañapatakiw istʼirinakarojj wakichtʼañama.

Kunatsa mä texto liytʼäta uk sum amuytʼam. Mä texto janïr liytʼkasajja, mä qhawqha arunak sañama. Ukajja kuntï yatichañ munkta uk sum amuyapjjañapatakiw istʼirinakar yanaptʼani.

Liytʼkäta uka textojj kuna toqetsa parli uk sumwa yatjjatañama. Mä texto janïr liytʼkasajja, khitis uka arunak arsüna, jan ukajj khitis Biblian uka librop qellqäna ukwa sañama.
Bibliampipun yaticham. Diosar creyir jaqenakamp parlkäta ukhajja, Bibliajj Diosan Arupawa sasaw sañama. Ukhamatwa kuntï yatichkta ukajj Diosat jutatap uñachtʼayäta.
Kuntï Bibliajj siski uk jukʼamp yatiñ munapjjañapatak yanaptʼam. Jisktʼasajja, Bibliampiw uka jisktʼarojj qhanañchañama. Kunjamsa Bibliajj jan walinak askichañatak yanaptʼistaspa ukwa qhanañchtʼañama, jan ukajj liytʼkäta uka texton kuna suma yatichäwis utji ukwa sarakisma.

Kuna toqettï parlkäta uk istʼirinakajj yatipjjeti janicha, liytʼkäta uka texto uñtʼapjjeti janicha ukwa amuytʼañama. Wali uñtʼat textökchisa, janïr liytʼkasajj uka textot jukʼamp yatiñ munapjjañapatakiw istʼirinakar qhanañchtʼañama. Uka texto sum amuytʼapjjañapatakisa, kuna yaqha yatichäwinaksa yateqapjjarakispa ukwa amuytʼayañama.