Мәктуб васитәсилә әлагә

МӘКТУБ милјонларла инсанын һәјатыны вә давранышыны јахшылашдырыб. Јунанҹа Мүгәддәс Јазыларда олан китабларын әксәријјәти мәктуб шәклиндә јазылыб. Биз бу ҝүн һәгигәтә јени ҝәләнләри мөһкәмләндирмәк, достларла әлагә сахламаг, үзәриндә хүсуси мәсулијјәтләр олан баҹы-гардашлары руһландырмаг, чәтинликләрлә үзләшәнләрә дајаг олмаг вә јығынҹағын фәалијјәти үчүн лазым олан мәлуматы чатдырмаг мәгсәдилә мәктуб јаза биләрик (1 Салон. 1:1-7; 5:27; 2 Пет. 3:1, 2).

Мәктуб јазмаг һәм дә шаһидлик етмәк үчүн јахшы үсулдур. Бәзи јерләрдә чохлары мүһафизә олунан биналарда јашадыгларындан хош хәбәри онлара чатдырмаг мүшкүл мәсәләдир. Бәзиләри исә әксәр вахтларда евдә олмурлар, буна ҝөрә дә евдән-евә тәблиғ едәндә онлары тапа билмирик. Бир башгалары һәбсханада јатыр вә ја уҹгар јерләрдә јашајырлар.

Һәрдән хәстәлик, пис һава вә ја комендант сааты уҹбатындан евдә бағланыб галмалы оларсан. Бу һалда сөһбәти давам етдирмәк үчүн гејри-рәсми шаһидлик етдијин бир адама вә ја гоһумуна мәктуб јаза биләрсәнми? Бәлкә Мүгәддәс Китабы өјрәтдијин адам башга јерә көчүб? Онун руһани шејләрә марағынын сөнмәмәси үчүн мәктуб јазмағын лап јеринә дүшәрди. Јахуд тәзәликҹә аилә гуран, валидејн олан вә ја јахыныны итирән танышларына Мүгәддәс Јазылардан мүвафиг мәлуматы чатдыра биләрсән.

Мәктуб васитәсилә шаһидлик

Танымадығын адама мәктуб јазанда әввәлҹә өзүнү тәгдим ет. Изаһ едә биләрсән ки, көнүллүләрдән ибарәт олан бејнәлхалг ишдә иштирак едирсән. Мүнасиб билирсәнсә, Јеһованын Шаһиди олдуғуну гејд ет. Һәмчинин шәхсән баш чәкмәјиб мәктуб јазмағынын сәбәбини билдир. Мәктубу елә јаз ки, санки онунла үз-үзә сөһбәт едирсән. Бунунла белә, «иланлар кими мүдрик вә ҝөјәрчинләр кими мәсум олун» мәсләһәтинә ујғун олараг өзүн барәдә нә гәдәр мәлумат верәҹәјини ҹидди фикирләш (Мат. 10:16).

Һәмин адама баш чәкәркән нә дејәрдинсә, ејни сөзләри мәктубда јаз. «Мүгәддәс Китаб әсасында сөһбәтә башламағын вә давам етмәјин үсуллары» брошүрасындакы вә ја «Бизим Падшаһлыг Хидмәтимиз»ин сонунҹу сајындакы тәгдимәләрдән истифадә едә биләрсән. Суал галдырыб, ону бу һагда дүшүнмәјә тәшвиг етмәк олар. Бәзи тәблиғчиләр Мүгәддәс Китаба аид суаллара пулсуз олараг ҹаваб вердијимизи изаһ едир, сонра өјрәнмә вәсаитиндәки фәсилләрдән бир нечәсинин адыны јазырлар. 73-ҹү сәһифәдә шаһидлик етмәк үчүн мәктубун неҹә јазылмалы олдуғуну ҝөстәрән нүмунә вар. Бу нүмунә үмуми тәсәввүр јаратса да, јахшы олар ки, мәктубларын мәзмуну һәмишә фәргли олсун. Әкс һалда, вахт кечдикҹә адамлар ејни мәктубу бир нечә дәфә аларлар.

Бәзиләринин танымадыглары адамдан алдыглары узун мәктубу охумаға һәвәси олмур. Буна ҝөрә дә мәктубу гыса јазмаг мүдриклик оларды. Мәктуб узун олса, ону охумагдан безәрләр. Мәктуба Падшаһлыг Залында кечирилән ҝөрүшләр үчүн олан дәвәтнамәни әлавә етмәк мүнасиб оларды. Һәмчинин зәрфә трактат, брошүра, «Ҝөзәтчи Гүлләси» вә ја «Ојанын!» журналыны гојуб, изаһ етмәк олар ки, әҝәр истәјәрләрсә, мүнтәзәм олараг онлара әдәбијјат ҝөндәрә биләрсән. Јахуд мүзакирә олунан мөвзу илә бағлы сөһбәти давам етдирмәк үчүн она баш чәкмәјә иҹазә алмаг олар.

Мәктубун тәртибаты һагда

Ҝәл нүмунә үчүн олан мәктуба диггәт јетирәк. Нөвбәти мәгамлара фикир вер: 1) Мәктуб гармагарышырыг јох, сәлигәли ҝөрүнүр. 2) Зәрф итдији һалда белә, мәктубу алан адамда ҝөндәрәнин ады вә үнваны галаҹаг. 3) Мәктубун һансы мәгсәдлә јазылдығы биринҹи абзасда садә вә ајдын тәрздә билдирилиб. 4) Һәр әсас фикир јени абзасда верилиб. 5) Јазылма мәгсәдинә ујғун олараг мәктуб нә һәддиндән артыг сәмими, нә дә рәсми дејил.

Даһа рәсми мәктубларда, мәсәлән, јығынҹаг катибинин филиала ҝөндәрдији мәктубда јығынҹағын ады илә јанашы катибин ады, почт үнваны вә тарих јазылыр. Һәмчинин мәктубун ҝөндәрилдији адамын вә ја тәшкилатын ады вә үнваны да гејд олунур. Бундан сонра мүнасиб саламлама ҝәлир. Мәктубу битирәркән бәзи дилләрдә имзадан габаг «Һөрмәтлә» вә саирә ифадәләр јазылыр. Имза әл илә чәкилмәлидир.

Мәктуб јазанда сөзләрин дүзҝүн јазылышына, грамматикаја, дурғу ишарәләринә вә сөзсүз ки, сәлигәли олмасына фикир вер. Бүтүн бунлар мәктубун вә орада јазылан хәбәрин дәјәрини артыраҹаг.

Ҹаваб јазмалары үчүн зәрфин үстүндә һәмишә үнван јаз. Јахшы олар ки, бу, өз үнванын олсун. Әҝәр јад адамлара тәблиғ едәркән шәхси үнваныны вермәјин мүдриклик олмадығыны дүшүнүрсәнсә, ағсаггаллардан Падшаһлыг Залынын, јахуд јығынҹаға ҝәлән мәктублары алан ағсаггалын үнваныны вермәјә иҹазә истә. Белә вәзијјәтләрдә филиалын үнваныны вермәк олмаз, чүнки јанлыш олараг елә тәәссүрат ојанаҹаг ки, ҝуја сәнин мәктубун филиалдан ҝөндәрилиб вә бу да чашгынлыг јарадаҹаг. Әҝәр мәктуб ҝөндәрәнин үнваны јазылмаса вә мәктубла әдәбијјат ҝөндәрилсә, јенә дә елә фикир јаранаҹаг ки, мәктуб филиалдан ҝөндәрилиб.

Зәрфә, хүсусилә дә әдәбијјат ҝөндәрәндә, лазым олан гәдәр марка јапышдыр. Кифајәт гәдәр марка вурулмаса, пулу мәктубу алан шәхс өдәмәли олар вә бу, чатдырдығын хәбәрин дәјәрини ашағы салар. Јадда сахла ки, бир чох өлкәләрдә мәктуба журнал вә ја брошүра гојуланда онун үчүн ади мәктубдан чох пул өдәјирләр.

Дүзҝүн үслуб

Мәктубу битирәндән сонра мәзмунуну јохламаг үчүн ону оху. Неҹә сәсләнир? Достјана вә нәзакәтлидирми? Мәһәббәт вә лүтфкарлыг инсанларла мүнасибәтдә тәзаһүр етдирмәјә чалышдығымыз кејфијјјәтләр сырасындадыр (Галат. 5:22, 23). Әҝәр мәнфи тон вә ја бәдбинлик әламәти һисс едирсәнсә, мәтндә дәјишиклик ет.

Мәктуб сәнин ҝедә билмәдијин јерләрә чата биләр. Тәкҹә бу факт ону хидмәт үчүн јарарлы аләтә чевирир. Мәктуб сәни вә сәнин дәјәрләрини тәмсил етдијиндән орада јазыланлара, онун неҹә ҝөрүндүјүнә вә неҹә сәсләндијинә диггәт јетир. Бу мәктуб Јеһованын ҝөзүндә дәјәрли бир инсанын һәјат јолуна гәдәм гојмасы, бу јолда мөһкәмләнмәси вә руһланмасы үчүн мәһз лазым олан васитә ола биләр.