Доғруданмы пислик галиб ҝәлиб?
ХЕЈИР вә шәр гүввәләрин каинатдакы мүбаризәси һаггындакы идеја әсрләр боју јазычы вә философларын диггәтини ҹәлб етмиш вә сонсуз фәрзијјәләр доғурмушдур. Лакин Аллаһла Иблис арасындакы мүбаризә һаггында дәгиг мә’лумат верән тәк бир китаб вар. Бу, Мүгәддәс Китабдыр. Мүгәддәс Китаб бу гаршыдурма илә әлагәдар јаранан суаллары ишыгландырыр вә әслиндә кимин гәләбә чалдығыны мүәјјән етмәјә јол верир.
Илк киши вә гадын јарадылдыгдан тез сонра, ҝөзәҝөрүнмәз руһани варлыг Шејтан Иблис, Аллаһын һөкмранлығыны рәдд етди. Неҹә? Шејтан кинајә илә ишарә етди ки, Аллаһ өз јаратдыгларындан нә исә јахшы бир шеји ҝизләдир вә инсанлар Аллаһдан асылы олмасалар, даһа јахшы јашајарлар (Тәквин 3:1-5; Вәһј 12:9).
Даһа сонра, тајфа башчысы Ејубун ҝүнләриндә, Шејтан башга бир суал галдырды. О, Ејубун Аллаһа олан сәдагәтини сындырмаға чалышараг деди: “Дәри јеринә дәри, бәли, инсан ҹаны үчүн нәји варса верәр” (Ејуб 2:4). Неҹә дә әсассыз иддиадыр! Ејуб адынын әвәзинә үмуми “инсан” сөзүнү ишләдәрәк, Шејтан јер үзүндә јашајан һәр бир инсанын нөгсансызлығыны шүбһә алтына алды. Шејтан әслиндә демәк истәјирди ки, “инсан ҹаныны гуртармаг үчүн һәр шеј едәр. Мәнә имкан версәниз, мән һәр бир кәси Аллаһдан дөндәрә биләрәм”.
Аллаһын, јохса Иблисин гәләбә чалдығыны мүәјјән етмәк үчүн, ики суала ҹаваб вермәк лазымдыр: Инсанлар өзләрини мүвәффәгијјәтлә идарә едә билирләрми? Иблис бүтүн инсанлары һәгиги Аллаһдан дөндәрмәјә мүвәффәг олубму?
Инсанлар өзләрини мүвәффәгијјәтлә идарә едә билирләрми?
Минилликләр әрзиндә инсанлар мүхтәлиф идарә формаларыны тәҹрүбәдән кечирмишләр. Тарих монархија, аристократија, демократија, автократија, фашизм вә коммунизм кими дөвләт гурулушлары ҝөрмүшдүр. Бу гәдәр тәҹрүбә апармаг лазым ҝәлмишдирсә, јухарыда садаланан идарәетмә формаларынын баҹарыгсыз олдуглары ајдын дејилми?
Һерберт Уеллс “Тарихин гыса хүласәси” әсәриндә јазырды: “Рома халгы, демәк олар ки, өзү үчүн тамамилә ҝөзләнилмәз јени инзибати тәҹрүбәјә ҹәлб едилмишди. Идарәетмә үсуллары, һеч вахт сабит форма алмадан, һәмишә дәјиширди. Бир тәрәфдән тәҹрүбә ифласа уғрамыш, диҝәр тәрәфдән исә, тәҹрүбә давам едир вә бу ҝүн Авропа вә Америка, илк дәфә ромалыларын гаршылашдығы дөвләти идарә етмәјин сирри үзәриндә баш сындырыр” (“A History of the World”, 1922).
Дөвләти идарә етмәк үзрә кечирилән тәҹрүбәләр ХХ әсрдә дә давам етмишдир. Әсрин сонунда демократија гурулушу даһа чох нүфуз газанды. Нәзәри бахымдан демократија дедикдә, дөвләтин идарә олунмасында бүтүн инсанларын иштиракы нәзәрдә тутулур. Бәс демократија, Аллаһын рәһбәрлији олмадан инсанларын мүвәффәгијјәтлә идарә едә билдикләрини ҝөстәрдими? Һиндистанын кечмиш баш назири Ҹаваһирләл Неһру демократијаны арзу олунан бир шеј адландырмыш вә әлавә етмишдир: “Мән буну она ҝөрә дејирәм ки, диҝәр идарә системләри даһа писдир”. Франсанын кечмиш президенти Валери Жискар д’Естен демишдир: “Биз нүфузлу демократијанын бөһраныны мүшаһидә едирик”.
Һәлә б. е. ә. В әсрдә јунан философу Платон, демократик идарәетмә формасынын зәиф јерләрини ашкар етмишдир. Бир әсәрә ҝөрә, Платон “сијасәтчиләрин наданлығыны вә баҹарыгсызлығыны” тәнгид етмиш вә бу хүсусијјәтләрин “әсасән дә демократик өлкәләрин бәдбәхтлији олдуғуну” гејд етмишдир (“A History of Political Theory”). Мүасир дөвләт хадимләринин чоху шикајәтләнирләр ки, һакимијјәт даирәләриндә ишләмәјә јарарлы олан габилијјәтли инсанлары тапмаг чәтиндир. “Uoll-strit cornel”дә гејд олундуғу кими, инсанлар “јаранан нәһәнҝ проблемләрлә мүгајисәдә ҹыртдан кими ҝөрүнән рәһбәрләрдән наразыдырлар”. Һәмин нәшрдә даһа сонра гејд олунур: “Рәһбәрлик үчүн мүраҹиәт едәрәк, гәтијјәтсизлик вә коррупсијаны ҝөрмәк, онлар үчүн ијрәнҹдир”.
Инди исә гәдим Исраил падшаһы Сүлејманын һөкмранлығыны нәзәрдән кечирәк. Јеһова Аллаһ Сүлејмана фөвгәл’адә мүдриклик вермишди (1 Краллар 4:29-34). Сүлејманын 40 иллик һакимијјәти дөврүндә Исраил халгы неҹә јашајырды? Мүгәддәс Китаб ҹаваб верир: “Јәһуда вә Исраил сајҹа дәниз кәнарында олан гум кими чох иди, јејиб ичмәкдә вә севинҹдә идиләр. Вә Сүлејманын бүтүн ҝүнләриндә Дандан Беер-шебаја гәдәр Јәһуда вә Исраил, һәр кәс өз асмасы вә әнҹир ағаҹы алтында, сүлһ ичиндә јашадылар” (1 Краллар 4:20, 25). Ҝөрүнмәз Али Һөкмдарын, Јеһова Аллаһын јер үзүндәки нүмајәндәси олан мүдрик падшаһын рәһбәрлији алтында халг тәрәгги едир вә севинирди, өлкәдә исә мисли ҝөрүнмәмиш сабитлик һөкм сүрүрдү.
Аллаһын вә инсанын һакимијјәт системи арасында неҹә дә кәскин тәзад вардыр! Ким исә әминликлә дејә биләрми ки, Шејтан һакимијјәт мәсәләсиндә галиб ҝәлиб? Хејр. Буну Јеремја пејғәмбәр тәсдиг едир: “Ја Рәбб, билирәм ки, инсанын јолу өз әлиндә дејилдир; аддымларыны доғрултмаг јеријән инсанын әлиндә дејилдир” (Јеремја 10:23).
Шејтан бүтүн инсанлары Аллаһдан дөндәрмәјә гадирдирми?
Шејтан бүтүн инсанлары Аллаһдан дөндәрә биләҹәјини сүбут едә билдими? “Ибраниләрә” китабынын 11-ҹи фәслиндә һәвари Павел Мәсиһдән габаг јашамыш бә’зи садиг киши вә гадынларын адларыны чәкдикдән сонра јазыр: “Ҝидон [Ҝидеон], Барак, Шимшон, Јефтаһ, Давуд вә Шәмуел вә башга пејғәмбәрләр һаггында нәгл етмәк үчүн вахтым чатмаз” (Ибраниләрә 11:32). Павел Аллаһын бу садиг хидмәтчиләрини садәҹә олараг “шаһидләр булуду” адландырыр (Ибраниләрә 12:1). Бурада “булуд” кими тәрҹүмә олунан јунан сөзү, мүәјјән өлчүдә вә формада олан тәк бир булуду јох, формасыз нәһәнҝ булудлар күтләсини нәзәрдә тутур. Бу чох мүнасиб мүгајисәдир, чүнки кечмишдә Аллаһын о гәдәр чох садиг хидмәтчиси олмушдур ки, онлар доғрудан да нәһәнҝ булудлар күтләсини хатырладырдылар. Әсрләр боју сајсыз-һесабсыз инсанлар өз истәкләри илә Јеһова Аллаһа сәдагәтли галмаг јолуну сечмишләр (Јешу 24:15).
Бәс вәзијјәт бизим зәманәдә неҹәдир? ХХ јүзилликдә Јеһованын Шаһидләринин пајына дүшән дәһшәтли тә’гиб вә мүгавимәтләрә бахмајараг, бүтүн дүнјада онларын сајы 6 милјондан артыгдыр. Онлара рәғбәт бәсләјән инсанларын сајы исә 9 милјона јахындыр вә онлардан бир чохлары Аллаһа јахынлашмаг әзминдәдирләр.
Инсанлары Аллаһдан дөндәрә биләҹәјинә даир Шејтанын ирәли сүрдүјү иддиаја ән гәти ҹавабы Аллаһын Оғлу Иса Мәсиһ верди. Һәтта ишҝәнҹә дирәјиндә дәһшәтли әзаб чәкәркән белә, о, Аллаһдан үз дөндәрмәди. Иса, сон нәфәсиндә нида етди: “Еј Ата! Өз руһуму Сәнин әлләринә верирәм” (Лука 23:46).
Шејтан инсанлары өз нәзарәти алтында сахламаға чалышараг, сынаглардан тутмуш ачыг һүҹумлара гәдәр һәр бир үсула әл атыр. Шејтан инсанлары “ҹисмани еһтирас, ҝөзләрин еһтирасы вә һәјатын тәкәббүрү” илә сынаға чәкәрәк, онлары Јеһовадан узаглашдырмаға вә ја онлара Аллаһа јахынлашмаға мане олмаға чалышыр (1 Јәһја 2:16). О, һәмчинин “имансызларын зеһинләрини кор етмишдир ки, ҝөрүнмәз Аллаһын сурәти олан Мәсиһин иззәти һаггындакы Мүждәнин нуру онлары ајдынлатмасын” (2 Коринфлиләрә 4:4). Шејтан өз мәгсәдинә наил олмаг үчүн, һәдә горху ҝәлмәјә вә инсан гаршысында горхудан истифадә етмәјә һазырдыр (Һәвариләрин ишләри 5:40).
Аллаһын тәрәфини тутанлар исә Иблисин һакимијјәти алтында дејилләр. Онлар Јеһованы танымыш вә ‘[Ону] бүтүн үрәкләрилә, бүтүн ҹанлары илә вә бүтүн дүшүнҹәләри илә севмишләр’ (Матта 22:37). Беләликлә, Иса Мәсиһин вә сајсыз-һесабсыз инсанларын сарсылмаз сәдагәти сүбут едир ки, Шејтан Иблис сарсыдыҹы мәғлубијјәтә уғрамышдыр.
Ҝәләҹәк нә ҝәтирәҹәк?
Инсанлар идарәетмә формаларыны тәҹрүбәдән кечирмәјә даима давам едәҹәкләрми? Даниел пејғәмбәр габагҹадан хәбәр вермишдир: “О падшаһларын ҝүнләриндә ҝөјләрин Аллаһы әбәдијјән дағылмајаҹаг бир падшаһлыг гураҹаг вә онун һакимијјәти башга бир халга верилмәјәҹәк; анҹаг бу падшаһлыгларын һамысыны о парчалајаҹаг вә мәһв едәҹәк, өзү исә әбәдијјән дураҹаг” (Даниел 2:44). Ҝөјләрин Аллаһынын гурдуғу Падшаһлыг, Иса Мәсиһин рәһбәрлији алтында олан ҝөјләр һөкумәтидир. Бу һәмин о Падшаһлыгдыр ки, Иса онун ҝәлмәси һаггында шаҝирдләрини дуа етмәјә өјрәдирди (Матта 6:9, 10). Бу Падшаһлыг, јахынлашмагда олан “Күлл-Ихтијар Аллаһын бөјүк ҝүнүндә баш верәҹәк” мүһарибәдә бүтүн инсан һакимијјәтләрини мәһв едәҹәк вә бүтүн јер үзүнү идарә едәҹәкдир (Вәһј 16:14, 16).
Бәс Шејтанла нә баш верәҹәк? Онун агибәти Мүгәддәс Китабда тәсвир олунур: “[Аллаһын мәләји]... иблис вә шејтан олан әждаһаны, көһнә иланы тутду вә мин иллијә зәнҹирләди. Вә ону дибсиз дәринликләрә атды, бағлады вә үзәринә мөһүр басды ки, мин ил тамам олунҹаја кими бир дә халглары аздырмасын” (Вәһј 20:1-3). Шејтан фәалијјәтсизлик гујусуна атылдыгдан сонра, Иса Мәсиһин Миниллик һөкмранлығы башлајаҹагдыр.
О заман Јер күрәси неҹә дә ҝөзәл јашајыш мәскәнинә чевриләҹәкдир! Писликләр вә пислијин сәбәбкарлары јох олаҹаглар. Мүгәддәс Китаб вә’д едир: “Шәрирләр кәсилиб атылаҹаг. [...] Фәгәт һәлимләр дүнјаны мирас алаҹаглар вә сүлһ боллуғунда ләззәт тапаҹаглар” (Мәзмур 37:9-11). Онларын әмин-аманлығына нә инсанлар, нә дә һејванлар тәһлүкә јаратмајаҹаглар (Ишаја 11:6-9). Һәтта кечмишдә Јеһова илә таныш олмаг имканы олмадығындан вә ја билмәдән Иблисин тәрәфини тутан милјонларла инсанлар да һәјата гајтарылаҹаг вә Аллаһдан тә’лим алаҹаглар (Һәвариләрин ишләри 24:15).
Миниллик һөкмранлығын сонунда Јер үзү Ҹәннәтә чевриләҹәк, инсанлар исә камиллијә чатаҹаглар. Сонра Шејтан, Аллаһын һакимијјәтинин бүтүн дүшмәнләри илә бирликдә һәмишәлик мәһв олунмаг үчүн, “гыса бир мүддәт”ә азад олунаҹаг (Вәһј 20:3, 7-10).
Сиз кимин тәрәфини тутаҹагсыныз?
ХХ әср, Шејтанын Јер күрәсини виран едиб ифласа уғратдығы дөвр олмушдур. Буҝүнкү шәраит Шејтанын галиб ҝәлдијини сүбут етмир, әксинә, бу индики натәмиз дүнјанын ахыр ҝүнләринин әламәтидир (Матта 24:3-14; Вәһј 6:1-8). Нә јер үзүндәки писликләрин чохлуғу, нә дә ки, инсанларын әксәријјәтинин рә’ји, кимин галиб ҝәлдијини мүәјјән етмәкдә һәлледиҹи амил ола билмәз. Һәлледиҹи амил, кимин идарә етмәк тәрзинин ән јахшы олмасы вә киминсә Аллаһа мәһәббәтдән хидмәт едиб-етмәмәсидир. Һәр ики саһәдә гәләбә газанан Јеһовадыр.
Әҝәр верилән вахт артыг Шејтанын сәһв олдуғуну ҝөстәрдисә, бәс Аллаһ писликләрин давам етмәсинә нә үчүн јол верир? Јеһова “сәбир едир вә истәјир ки, һамы төвбәјә ҝәлсин вә кимсә һәлак олмасын” (2 Петер 3:9). Аллаһ истәјир ки, “бүтүн инсанлар хилас олуб, һәгигәти дәрк етсинләр” (1 Тимотејә 2:4). Үмид етмәк истәјирик ки, сиз галмыш вахтдан Мүгәддәс Китабы өјрәнмәк, ‘ваһид һәгиги Аллаһы вә [Онун] ҝөндәрдији Иса Мәсиһи танымаг’ үчүн истифадә едәҹәксиниз (Јәһја 17:3). Јеһованын Шаһидләри, сизин дә милјонларла инсанлара гошулуб Галибин тәрәфиндә мөһкәм дурманыз үчүн белә билијә саһиб олманыза көмәк етмәјә шад олаҹаглар.
[5-ҹи сәһифәдәки шәкилләр]
Јеһованын Шаһидләри Аллаһа садиг галмагла Шејтанын мәғлуб олмасына сәбәб олмушлар.
[Иҹазә илә]
COVER: Mother and daughter: J.R. Ripper/SocialPhotos