Гој аддымларыны Аллаһын сөзү јөнәлтсин
«Сөзүн һәр аддымым үчүн чырагдыр, јолларыма ишыгдыр» (МӘЗМУР 119:105).
1, 2. Нәјә ҝөрә инсанларын әксәријјәти һәгиги әмин-аманлығы вә хошбәхтлији тапмаға мүвәффәг олмајыб?
ҺЕЧ кимдәнсә јолу сорушмалы олмусанмы? Ола билсин, мәнзилбашына јахын ахырынҹы јолајрыҹында дурараг һара ҝедәҹәјини билмәмисән. Јахуд бәлкә дә аздығын үчүн јолуну тамамилә дәјишмәк лазым ҝәлмишди. Һәр ики һалда оралары јахшы таныјан адама гулаг асмаг ағыллы һәрәкәт олмаздымы? О сәнә ҝетдијин јерә чатмаға көмәк едәрди.
2 Минилликләр әрзиндә бүтүн бәшәријјәт Јараданын рәһбәрлијини ахтармадан өз истәдији кими јашамаға чалышмышдыр. Өз билдикләри кими јашадыглары үчүн гејри-камил инсанлар тамамилә јолларыны азмышлар. Онлар әсл әмин-аманлыға вә хошбәхтлијә апаран јолу тапмаға садәҹә олараг гадир дејилләр. Нә үчүн? Тәхминән 2 500 ил әввәл Јеремја пејғәмбәр демишди: «Аддымларыны дүзәлтмәк ҝедән адамын иши дејил» (Јеремја 10:23). Аддымларыны лазыми көмәји алмадан дүзәлтмәк истәјән һәр кәсин үмидләри мүтләг пуча чыхаҹаг. Һәгигәтән дә, бәшәријјәтин бәләдчијә еһтијаҹы вар!
3. Нә үчүн јалныз Јеһова Аллаһ бәшәријјәтә рәһбәрлик верә биләр вә О нәји вә’д едир?
3 Јалныз Јеһова Аллаһ белә рәһбәрлији вермәјә гадирдир. Чүнки О, инсан хисләтинә һамыдан јахшы бәләддир. Јеһова инсанларын неҹә дүз јолдан дөнүб аздығындан там аҝаһдыр. О, һәмчинин онларын дүз јола гајытмалары үчүн нә лазым олдуғуну билир. Бундан әлавә, Јеһова Јарадан олдуғундан бизим үчүн нәјин ән јахшы олдуғуну һәмишә билир (Јешаја 48:17). Буна ҝөрә дә Онун Мәзмур 32:8 ајәсиндә јазылмыш вә’динә там е’тибар едә биләрик: «Сәнә тә’лим верәҹәјәм, ҝедәҹәјин јолу өјрәдәҹәјәм. Нәсиһәт верәҹәјәм, ҝөзүм сәнин үстүндә олаҹаг». Бәли, Јеһованын ән мүкәммәл рәһбәрлији тәгдим етмәсинә һеч бир шүбһә јохдур. Бәс О бизә неҹә јол ҝөстәрир?
4, 5. Аллаһын сөзләри бизә неҹә рәһбәрлик верә биләр?
4 Мәзмурчу дуасында Јеһоваја демишди: «Сөзүн һәр аддымым үчүн чырагдыр, јолларыма ишыгдыр» (Мәзмур 119:105). Аллаһын сөзләри вә хатырлатмалары Мүгәддәс Китабда јазылыб, онларын көмәјилә биз јолумузун үстүндәки манеәләри арадан галдыра биләрик. Мүгәддәс Китабы охујанда вә аддымларымызы јөнәлтмәсинә јол верәндә Јешаја 30:21 ајәсиндә јазыланларын өзүмүз шаһид олуруг: «Арханыздан “Јол будур, ҝедин бу јола” дејилән сәси ешидәҹәксиниз».
5 Диггәт јетирин ки, Мәзмур 119:105 ајәсиндә Аллаһын Кәламынын бир-бири илә бағлы ики ҹәһәти вурғуланыр. Биринҹиси, о, һәр аддымымыз үчүн чырагдыр. Ҝүндәлик проблемләрлә үзләшәндә Мүгәддәс Китаб принсипләри аддымларымызы јөнәлтмәлидир ки, мүдрик гәрарлар гәбул едәрәк дүнјанын тәләләринә дүшмәјәк. Икинҹиси, Аллаһын хатырлатмалары јолларымыза ишыгдыр. Онлар көмәк едир ки, Аллаһын вә’д етдији Ҹәннәтдә әбәди јашамаг үмидинә ујғун сечимләр едәк. Јол јахшы ишыглананда һансыса сечимин нәтиҹәсинин јахшы вә ја пис олдуғуну ҝөрә биләҹәјик (Ромалылара 14:21; 1 Тимотејә 6:9; Вәһј 22:12). Ҝәлин ҝөрәк Аллаһын сөзләри аддымларымыза чыраг вә јолларымыза ишыг неҹә ола биләр.
‘Һәр аддымым үчүн чыраг’
6. Аллаһын сөзләри һансы һалларда аддымларымыз үчүн чыраг олур?
6 Биз һәр ҝүн гәрарлар гәбул едирик. Бә’зи гәрарлар аз әһәмијјәтли олур. Анҹаг һәрдән әхлагымызын, дүзлүјүмүзүн вә ја битәрәфлијимизин сынаға чәкилдији һалларла үзләширик. Бу сынагларын өһдәсиндән мүвәффәгијјәтлә ҝәлмәк истәјириксә, ‘һиссләримизи хејирлә шәри ајырд етмәк үчүн тәрбијә’ етмәлијик (Ибраниләрә 5:14). Биз виҹданымызы Аллаһын Кәламыны јахшы өјрәнәрәк вә принсипләрини баша дүшәрәк тәрбијә едирик. Бунун сајәсиндә Јеһованы севиндирән гәрарлар верәҹәјик (Сүлејманын мәсәлләри 3:21).
7. Мәсиһчидә иманда олмајан иш јолдашлары илә сых үнсијјәт гурмаға мејл неҹә јарана биләр?
7 Сән сәмими гәлбдән Јеһованы севиндирмәјә чалышырсанмы? (Сүлејманын мәсәлләри 27:11). Әҝәр беләдирсә, буна ҝөрә тә’рифә лајигсән. Анҹаг бир анлыг тәсәввүрүнә ҝәтир ки, иш јолдашларын һәр һансы идман јарышына сәнә билет тәклиф едирләр. Ишдә мүнасибәтләриниз јахшы олдуғу үчүн онлар ишдән кәнарда да сәнинлә вахт кечирмәк истәјирләр. Сән бу инсанларын пис олмадыгларына әминсән. Онларын һарадаса јахшы хүсусијјәтләри дә вар. Сән нә едәҹәксән? Дә’вәти гәбул етмәкдә тәһлүкә вармы? Аллаһын Кәламы бу мәсәләдә дүзҝүн гәрар гәбул етмәјә сәнә неҹә көмәк едә биләр?
8. Үнсијјәт мәсәләсиндә Мүгәддәс Китабын һансы принсипләри бизә көмәк едир?
8 Бир нечә Мүгәддәс Китаб принсипинә диггәт јетирәк. Илк олараг 1 Коринфлиләрә 15:33 ајәси јада дүшүр: «Пис достлуг јахшы әхлагы позар». Бу принсип мәсиһчи олмајанлардан тамамилә кәнар ҝәзмәјими тәләб едир? Мүгәддәс Јазылар бу суала «јох» ҹавабыны верир. Ахы һәвари Павелин өзү, имансызлар да дахил олмагла, ‘һәр кәслә’ нәзакәтлә давранырды (1 Коринфлиләрә 9:22). Елә мәсиһчилијин маһијјәти, иманымыза шәрик олмајанлар да дахил олмагла, бүтүн инсанлара мараг ҝөстәрмәкдир (Ромалылара 10:13-15). Доғрудан да, көмәјимизә еһтијаҹы олан инсанлардан өзүмүзү тәҹрид етсәк, ‘һамыја јахшылыг един’ мәсләһәтинә неҹә риајәт едәрик? (Галатијалылара 6:10).
9. Мүгәддәс Китабын һансы мәсләһәти иш јолдашларымызла мүнасибәтдә таразлығы горумаға көмәк едир?
9 Лакин иш јолдашы илә достјана рәфтар етмәклә онун досту олмаг бир-бириндән фәргли шејләрдир. Мәһз бурада Мүгәддәс Китабын диҝәр принсипи өнә чыхыр. Һәвари Павел мәсиһчиләрә хәбәрдарлыг едирди: «Имансызларла ејни бојундуруға ҝирмәјин» (2 Коринфлиләрә 6:14). «Ејни бојундуруға ҝирмәјин» нә демәкдир? Бә’зи Мүгәддәс Китаб тәрҹүмәләриндә бу ифадә «бирләшмәјин», «тај-туш кими бир јердә иш ҝөрмәјин» вә ја «намүнасиб әлагәләрә сон гојун» кими верилмишдир. Иш јолдашы илә мүнасибәтләр нә вахт намүнасиб олур? Нә заман өз ҹызығындан чыхыр вә ејни бојундуруға чеврилир? Аллаһын Кәламы олан Мүгәддәс Китаб белә вәзијјәтдә сәнин аддымларына истигамәт верә биләр.
10. а) Иса өзүнә неҹә достлар сечирди? б) Һансы суаллар бизә ағылла дост сечмәјә көмәк едәҹәк?
10 Инсанларын јарандығы ҝүндән онлары севән Иса Мәсиһин нүмунәсинә бахаг (Сүлејманын мәсәлләри 8:31). Иса јер үзүндә оланда давамчылары илә мүнасибәти јахын олмушду (Јәһја 13:1). Мүгәддәс Китабда дејилир ки, о, һәтта јанлыш дини фикирләри олан бир нәфәри «севди» (Марк 10:17-22, И–93). Лакин Иса достлар сечәндә конкрет принсипләри рәһбәр тутурду. О, Атасынын ирадәси илә сәмими марагланмајан инсанларла јахын мүнасибәтләр јаратмырды. Бир дәфә Иса демишди: «Әҝәр сизә әмр етдијим шејләрә әмәл етсәниз, Мәним достларымсыныз» (Јәһја 15:14). Дүздүр, ола биләр ки, һансыса иш јолдашынла јахшы јола ҝедирсән. Анҹаг өзүндән соруш: «Бу адам Исанын әмрләрини јеринә јетирмәк, Јеһова һаггында өјрәниб, Она ибадәт етмәк истәјирми? О да мәним кими мәсиһчи нормаларыны рәһбәр тутурму?» (Матта 4:10). Иш јолдашларынла данышдыгҹа вә Мүгәддәс Китаб нормаларына ујғун даврандыгҹа бу суалларын ҹавабы ајдын олаҹаг.
11. Аллаһын сөзләри һансы һалларда аддымларымызы јөнәлдә биләр?
11 Бир чох башга һалларда да Аллаһын сөзләри аддымларымыза чырагдыр. Мәсәлән, ишсиз галмыш вә иш ахтаран мәсиһчијә иш тәклиф олунур. Анҹаг бу иш онун һәм вахтынын, һәм дә ҝүҹүнүн чохуну алаҹаг вә әҝәр она разылашса, бә’зи мәсиһчи ҝөрүшләриндән галаҹаг вә һәгиги ибадәтлә бағлы диҝәр ишләрдә иштирак етмәјә имканы олмајаҹаг (Мәзмур 37:25). Диҝәр мәсиһчидә исә Мүгәддәс Китаб принсипләринә ачыг-ајдын зидд ҝедән әјләнҹәли верилишләрә бахмаға ҝүҹлү истәк јарана биләр (Ефеслиләрә 4:17-19). Бир башгасы һәмиманлыларын гејри-камиллијиндән тез-тез инҹијә биләр (Колослулара 3:13). Бүтүн бу һалларда Аллаһын Кәламынын аддымларымыза чыраг олмасына јол вермәлијик. Бәли, Мүгәддәс Китаб принсипләринә риајәт етмәклә, биз һәјатын истәнилән чәтинлијинә уғурла синә ҝәрә биләрик. Аллаһын Кәламы «тә’лим, тәкзиб, ислаһ, салеһлик тәрбијәси үчүн фајдалыдыр» (2 Тимотејә 3:16).
«Јолларыма ишыгдыр»
12. Аллаһын сөзләри јолумузу неҹә ишыгландырыр?
12 Мәзмур 119:105 ајәсиндә һәм дә дејилир ки, Аллаһын сөзләри гаршымыздакы јолу ишыгландырыр. Ҝәләҹәјимизә ҝәлдикдә, о бизим үчүн гаранлыг дејил, чүнки Мүгәддәс Китаб дүнјанын нә үчүн пис вәзијјәтдә олдуғуну вә бунун нә илә нәтиҹәләнәҹәјини изаһ едир. Бәли, пис дүнјанын ‘ахыр ҝүнләриндә’ јашадығымыз бизим үчүн сирр дејил (2 Тимотејә 3:1-5). Ҝәләҹәји билмәк һал-һазырда неҹә һәјат сүрмәјимизә әһәмијјәтли дәрәҹәдә тә’сир ҝөстәрмәлидир. Һәвари Петер јазырды: «Әҝәр бүтүн бунлар бу ҹүр мәһв едиләҹәксә, сиз неҹә инсанлар олмалысыныз? Аллаһын Ҝүнүнүн зүһуруну ҝөзләјиб, ону сүр’әтләндирәрәк мүгәддәс вә Аллаһа ихласкар бир һәјат јашамалысыныз» (2 Петер 3:11, 12).
13. Ахыр ҝүнләрдә јашамағымыз дүшүнҹә вә һәјат тәрзимизә неҹә тә’сир ҝөстәрмәлидир?
13 Бизим дүшүнҹә вә һәјат тәрзимиз ‘дүнја вә онун еһтирасынын кечиб ҝедәҹәјинә’ там әмин олдуғумузу ҝөстәрмәлидир (1 Јәһја 2:17). Мүгәддәс Китабын рәһбәрлији ҝәләҹәк мәгсәдләримизә даир мүдрик гәрарлар вермәјә көмәк едәҹәк. Мәсәлән, Иса демишдир: «Әввәлҹә Аллаһын Сәлтәнәтини вә Онун салеһлијини ахтарын; вә бунларын һамысы сизә әлавә олараг вериләҹәкдир» (Матта 6:33). Неҹә дә тә’рифәлајигдир ки, бир чох ҝәнҹләр таммүддәтли хидмәти сечәрәк Исанын бу сөзләринә иман ҝәтирирләр! Башга тәблиғчиләр, һәтта бә’зиләри аиләви олараг, көнүллү сурәтдә Падшаһлығын тәблиғчиләринә бөјүк еһтијаҹ олан јерләрә көчмүшләр.
14. Бир мәсиһчи аиләси хидмәтини неҹә ҝенишләндириб?
14 Дөрд нәфәрдән ибарәт мәсиһчи аиләси Бирләшмиш Штатлардан Доминикан Республикасынын 50 000 нәфәр әһалиси олан шәһәринә хидмәт етмәјә көчмүшдү. Бурадакы јығынҹагда тәхминән 130 тәблиғчи вар иди. Лакин 2006-ҹы ил апрелин 12-дә Мәсиһин өлүмүнүн Хатирә Ҝеҹәсинә 1 300-ә јахын адам ҝәлмишди! Бу әразидәки тарла бичилмәк үчүн елә ағарыб ки, тәхминән беш ајдан сонра бу аилә 30 Мүгәддәс Китаб өјрәнмәси кечирирди (Јәһја 4:35). Аиләнин башчысы дејир: «Јығынҹагда башга јерләрдән көчүб ҝәлмиш 30 баҹы-гардаш вардыр. Онлардан тәхминән 20-и Бирләшмиш Штатлардан, диҝәрләри исә Баһам Адалары, Канада, Италија, Јени Зеландија вә Испанијадан ҝәлмишләр. Онлары бура ҝәтирән хидмәт етмәк арзусудур вә јерли гардашлар онларын сә’јини ҝөрүб һәвәсә ҝәлирләр».
15. Падшаһлығын марагларыны биринҹи јерә гојдуғун үчүн һансы хејир-дуалары бичмисән?
15 Мә’лум мәсәләдир ки, чохларынын шәраити тәблиғчиләрә даһа чох еһтијаҹ олан јерләрә көчүб, орада хидмәт етмәјә имкан вермир. Анҹаг имканы оланлар вә ја шәраитләрини дәјишә биләнләр хидмәтин бу нөвүндә иштирак едәрәк мүтләг чохлу хејир-дуалар бичәҹәкләр. Һарада хидмәт етдијиндән асылы олмајараг, вар ҝүҹүнлә хидмәт едәркән дујдуғун севинҹә лагејд јанашма. Јеһова вә’д едир ки, Падшаһлығын марагларыны биринҹи јерә гојсан, ‘үзәринә еһтијаҹларындан да чох бәрәкәт јағдыраҹаг’ (Малаки 3:10).
Јеһованын рәһбәрлији хејримизәдир
16. Аллаһын сөзләрини рәһбәр тутмағымыз бизә һансы фајданы ҝәтирәҹәк?
16 Ҝөрдүјүмүз кими, Јеһованын сөзләри ики үсулла аддымларымызы јөнәлдир. Онлар аддымларымыз үчүн чырагдыр, јә’ни дүз истигамәтдә һәрәкәт етмәјимизә көмәк едир вә гәрар гәбул едәркән бизә јол ҝөстәрир. Јеһованын сөзләри, һәмчинин гаршыда нә олаҹағыны бизә ҝөстәрәрәк јолумузу ишыгландырыр. Бунун да сајәсиндә биз Павелин нәсиһәтинә әмәл едә билирик: «Әглинизи фе’лә һазырлајын, ајыг олуб, Иса Мәсиһин зүһурунда сизә вериләҹәк лүтфә бүтүнлүклә үмид бәсләјин» (1 Петер 1:13).
17. Мүгәддәс Китабы өјрәнмәк Аллаһын рәһбәрлијинә әмәл етмәјә неҹә көмәк едәҹәк?
17 Јеһованын рәһбәрлик тәгдим етдијинә һеч бир шүбһә јохдур. Әсас мәсәлә сәнин ону гәбул едиб-етмәјәҹәјиндәдир. Јеһованын вердији рәһбәрлији баша дүшмәк үчүн Мүгәддәс Китабы һәр ҝүн оху. Охудугларынын үзәриндә дүшүн, ајры-ајры мәсәләләрдә Јеһованын ирадәсини анламаға чалыш вә охудугларыны һәјатынын һансы саһәләриндә тәтбиг едәҹәјини фикирләш (1 Тимотејә 4:15). Сонра ағылла гәрар гәбул ет.
18. Аллаһын Кәламынын аддымларымызы истигамәтләндирмәсинә јол верәндә һансы хејир-дуалары алырыг?
18 Әҝәр биз јол версәк, Аллаһын Кәламындакы принсипләр һәјатда дүзҝүн јолу тутмаг үчүн бизә билик вә рәһбәрлик верәҹәк. Әмин ола биләрик ки, Јеһованын јазылы сөзләри «тәҹрүбәсиз адама һикмәт верәр» (Мәзмур 19:7, КМ). Мүгәддәс Китабын бизи јөнәлтмәсинә имкан верәндә виҹданымыз тәмиз олур вә Јеһованы разы салдығымыз үчүн мәмнунлуг дујуруг (1 Тимотејә 1:18, 19). Аллаһын сөзләринин аддымларымызы һәр ҝүн истигамәтләндирмәсинә јол версәк, Јеһова бизә сонда ән бөјүк мүкафаты — әбәди һәјаты бәхш едәҹәк (Јәһја 17:3).
Хатырлајырсынызмы?
• Јеһова Аллаһын аддымларымызы истигамәтләндирмәсинә јол вермәк нә үчүн ваҹибдир?
• Аллаһын сөзләри һансы һалларда аддымларымыза чырагдыр?
• Аллаһын сөзләри јолумузу неҹә ишыгландырыр?
• Мүгәддәс Китабы өјрәнмәк бизә Аллаһын рәһбәрлијини изләмәјә неҹә көмәк едәҹәк?
[19-ҹу сәһифәдәки шәкил]
Мәсиһчи олмајан инсанла үнсијјәт нә заман һәддини ашыр?
[20-ҹи сәһифәдәки шәкил]
Исанын достлары Јеһованын ирадәсини јеринә јетирәнләр иди.
[21-ҹи сәһифәдәки шәкилләр]
Һәјат тәрзимиз Падшаһлығын марагларыны биринҹи јерә гојдуғумузу ҝөстәрирми?