‘Аллаһ гаршысында зәнҝинсәнми?’

«Аллаһ гаршысында зәнҝин олмаг әвәзинә, өзү үчүн дөвләт топлајан һәр бир адамын агибәти белә олур» (ЛУКА 12:21).

1, 2. а) Инсанлар тарих бојунҹа нәјә ҝөрә бөјүк гурбанлар вермәјә һазыр олмушлар? б) Мәсиһчиләр һансы чәтинлик вә тәһлүкәләрлә үзләширләр?

ТАРИХ бојунҹа инсанлар варланмаг мәгсәди илә өзләрини ода-көзә атыблар. Мәсәлән, 19-ҹу әсрдә гызыл тапмаг һәвәси узаг јерләрдән инсанлары Австралијаја, Ҹәнуби Африкаја, Канадаја вә Бирләшмиш Штатлара чәкиб ҝәтирирди. Онлар өз јурд-јуваларыны, доғмаларыны тәрк едиб, танымадыглары, бә’зән исә шәраитсиз јерләрдә хошбәхтлик сорағында идиләр. Бәли, чохлары арзусунда олдуглары хәзинәләри тапмаг үчүн һәјатларыны тәһлүкәјә атмаға вә бөјүк гурбанлар вермәјә һазырдырлар.

² Дүздүр, инсанлар бу ҝүн һәгиги мә’нада хәзинә ахтармырлар, анҹаг доланмаг үчүн ҝеҹәни ҝүндүзә гатыб ишләјирләр. Јашадығымыз зәманәдә чөрәк пулу газанмаг ағыр, мүшкүл мәсәләдир. Јемәк, ҝејим, ев инсанын башыны елә асанлыгла гата биләр ки, даһа ваҹиб шејләр арха плана кечәр вә һәтта тамамилә унудула биләр (Ромалылара 14:17). Иса инсандакы бу мејли дәгигликлә тәсвир едән бир мәсәл чәкди. Һәмин мәсәл Лука 12:16-21 ајәләриндә јазылыб.

3. Исанын Лука 12:16-21 ајәләриндә јазылан мәсәлини гысаҹа данышын.

³ Иса бу мәсәли тамаһкарлыға гаршы хәбәрдарлыгла әлагәдар чәкмишди. Бу хәбәрдарлығын бә’зи хырдалыгларыны өтән мәгаләдә мүзакирә етмишдик. Мәсәлдә сөһбәт ондан ҝедир ки, бир варлы адам ағзынаҹан долу анбарлары илә кифајәтләнмәјиб, онлары сөкүр, даһа чох шеј јығмаг үчүн бөјүкләрини тикир. Тәзәҹә раһат јашајаҹағыны дүшүнүрдү ки, Аллаһ елә бу ан она һәјатынын сона чатдығыны, јығдығы бүтүн вар-дөвләтин исә башгасына галаҹағыны дејир. Иса мәсәлинә белә јекун вурду: «Аллаһ гаршысында зәнҝин олмаг әвәзинә, өзү үчүн дөвләт топлајан һәр бир адамын агибәти белә олур» (Лука 12:21). Бу мәсәлдән һансы ибрәт дәрсини алырыг? Ону өз һәјатымызда неҹә тәтбиг едә биләрик?

Киши чәтинлијә дүшүб

4. Исанын мәсәлиндәки киши илк бахышдан һансы тәәссүраты бағышлајыр?

⁴ Исанын чәкдији мәсәл бир чох өлкәләрдә инсанлара јахшы танышдыр. О, мәсәлинә белә башлады: «Варлы бир адамын торпағы бол мәһсул верди». Иса демәди ки, һәмин адам вар-дөвләтини әјри јолла, ганунсузлугла әлдә етди. Башга сөзлә десәк, о, пис адам кими тәсвир олунмур. Исанын сөзләриндән белә гәнаәтә ҝәлмәк олар ки, киши зәһмәткешдир вә ола билсин, аиләсинин ҝәләҹәји үчүн чалышыр, вар-дөвләт топлајыр. Беләликлә, дүнјанын нөгтеји-нәзәри илә бахсаг, о өз мәс’улијјәтләринә ҹидди јанашан, чалышган адам иди.

5. Мәсәлдәки киши һансы чәтинлијә дүшүр?

⁵ Иса бу адамын варлы адландырды. Демәли, онун артыг чохлу малы-мүлкү вар иди. Анҹаг киши, Исанын дедијинә ҝөрә, чәтин вәзијјәтә дүшүр. Онун торпағы ҝөзләдијиндән, лазым олдуғундан вә сахлаја биләҹәјиндән даһа чох мәһсул верир. Бәс инди о нә етсин?

6. Аллаһын бир чох хидмәтчиләри һансы сечимлә үзләширләр?

⁶ Бу ҝүн Јеһованын бир чох хидмәтчиләри бу варлы адамын вәзијјәтинә охшар вәзијјәтлә үзләширләр. Һәгиги мәсиһчиләр дүзҝүн, чалышган вә мәс’улијјәтли ишчи олмаға чалышырлар (Колослулара 3:22, 23). Истәр һарадаса ишләсинләр, истәрсә дә өзләринин бизнеси олсун, чох вахт онларын иши јахшы ҝедир. Онлара јүксәк вәзифә тәклиф олунанда вә ја гаршыларында јени имканлар ачыланда сечим гаршысында галырлар: «тәклифи гәбул едим, ја етмәјим», «ишими ҝенишләндирим, јохса оланымла кифајәтләним?» Бир чох ҝәнҹ шаһидләр дә мәктәбдә ә’ла охудуглары үчүн гаршыларында нүфузлу али тәһсил оҹагларына гәбул олмаг имканы ачылыр. Онлар садәҹә ахынын ардынҹа ҝедиб бу имкандан истифадә етмәлидирләрми?

7. Мәсәлдәки киши проблемини неҹә һәлл едир?

⁷ Ҝәлин Исанын мәсәлинә гајыдаг. Торпағын вердији мәһсулу јығмаға јери олмајанда варлы киши нә едир? О, көһнә анбарлары сөкүб, бөјүкләрини тикмәји гәрара алыр ки, тахылыны вә дөвләтини ора јығсын. Кишинин планы о гәдәр хошуна ҝәлир вә архајынлыг ҝәтирир ки, о өз-өзүнә фикирләшир: «Ҹаныма дејәрәм: “Еј ҹаным! Узун илләр үчүн топланмыш чохлу дөвләтин вар: раһат ол; је, ич, кеф чәк”» (Лука 12:19).

Нәјә ҝөрә «ағылсыз»?

8. Мәсәлдәки киши һансы ваҹиб шеји нәзәрә алмамышды?

⁸ Исанын сонракы сөзләриндән ҝөрүнүр ки, варлы кишинин планы она јанлыш архајынчылыг ҝәтирди. Гурдуғу план ағыллы ҝөрүнсә дә, о, ваҹиб бир шеји — Аллаһын ирадәсини нәзәрә алмамышды. Киши анҹаг өзүнү фикирләширди: индән белә неҹә раһат јашајаҹаг, неҹә јејиб, ичиб, кеф чәкәҹәк. О елә билирди ки, әҝәр ‘чохлу дөвләти’ варса, демәли ‘узун илләр’ јашајаҹаг. Анҹаг онун фикирләшдији кими олмады. Исанын бир аз әввәл дедији кими, «инсан һәјаты онун вар дөвләтинин чохлуғундан асылы дејилдир» (Лука 12:15). Кишинин јығдығы шејләр елә һәмин ҝеҹә бүтүн дәјәрини итирди, чүнки Аллаһ она деди: «Ағылсыз! Сәнин ҹаныны елә бу ахшам алаҹаглар; сәнин һазырладығын шејләр бәс кимә галаҹаг?» (Лука 12:20).

9. Мәсәлдәки киши нәјә ҝөрә «ағылсыз» адландырылды?

⁹ Елә бурада Исанын мәсәлинин әсас мәғзинә ҝәлиб чатырыг. Аллаһ кишини ағылсыз адландырды. «Әһди-Ҹәдидин изаһлы лүғәти»ндә дејилир ки, бу јунан сөзүнүн формалары «һәмишә дәрракәсизлијә ишарә едир». Орада дејилир ки, Исанын мәсәлиндә Аллаһ бу сөзү «варлы адамын ҝәләҹәк планларынын мә’насыз олдуғуну» ҝөстәрмәк үчүн ишләдир. Бу сөз ағлы олмајан адама дејил, «Аллаһдан асылылығыны гәбул етмәјәнә» аиддир. Варлы киши һаггында дејилән сөзләр Исанын сонралар Кичик Асијанын Лаодикија шәһәриндәки јығынҹағын мәсиһчиләринә дедији сөзләри јадымыза салыр: «Дејирсән: мән зәнҝинәм вә варланмышам, һеч нәјә еһтијаҹым јохдур. Амма билмирсән ки, заваллы, јазыг, јохсул, кор вә чылпагсан» (Вәһј 3:17).

10. ‘Чохлу дөвләтин’ олмасы нәјә ҝөрә ‘узун илләрин’ олаҹағына зәманәт дејил?

¹⁰ Јахшы оларды ки, бу мәсәлин үзәриндә ҹидди дүшүнәк. Ола биләрми ки, биз дә о варлы адам кими ‘чохлу дөвләтимиз’ олсун дејә, ҝеҹә-ҝүндүз ишләјәк, анҹаг ‘узун илләри’ газанмаг үчүн ваҹиб шејләри етмәјәк? (Јәһја 3:16; 17:3). Мүгәддәс Китабда дејилир ки, «һеч кими вар-дөвләти гәзәб ҝүнүндән хилас етмәз» вә «сәрвәтинә ҝүвәнәнләр јыхылар» (Сүлејманын мәсәлләри 11:4, 28). Буна ҝөрә дә Иса сонунҹу хәбәрдарлыг илә мәсәли битирир: «Аллаһ гаршысында зәнҝин олмаг әвәзинә, өзү үчүн дөвләт топлајан һәр бир адамын агибәти белә олур» (Лука 12:21).

11. Нә үчүн үмид вә архајынчылығы мал-мүлкә бағламаг әбәсдир?

¹¹ Иса «агибәти белә олур» демәклә мәсәлдәки варлы кишинин башына ҝәләнин, һәјатыны, үмид вә архајынчылығыны јалныз мал-мүлкә бағлајанларын да башына ҝәләҹәјини ҝөстәрди. Сәһв ‘дөвләт топламагда’ дејил, «Аллаһ гаршысында зәнҝин» олмамагдадыр. Шаҝирд Јагуб да буна бәнзәр бир хәбәрдарлыг јазмышды: «Инди бах, сиз дејирсиниз ки, “Бу ҝүн, ја сабаһ биз филан шәһәрә ҝедиб, орада бир ил галаҹағыг вә тиҹарәт едиб, газанҹ әлдә едәҹәјик”. Һалбуки, сабаһ нә баш верәҹәјини билмирсиниз. Һәјатыныз нәдир? О мүвәггәти олараг ҝөрүнүб, сонра да гејб олан бухардыр. Бунун әвәзинә: “Әҝәр Рәбб истәјәрсә, јашајыб, бу вә ја диҝәр иши ҝөрәрик”, — демәлисиниз» (Јагуб 4:13-15). Инсанын нә гәдәр малы-мүлкү, вары-дөвләти олурса-олсун, әҝәр Аллаһ гаршысында зәнҝин дејилсә, онлардан һеч бир хејир тапмајаҹаг. Елә исә, Аллаһ гаршысында зәнҝин олмаг нә демәкдир?

Аллаһ гаршысында зәнҝин олмаг

12. Нәјин сајәсиндә Аллаһ гаршысында зәнҝин ола биләрик?

¹² Исанын мәсәлиндә Аллаһ гаршысында зәнҝин олмагла инсанын өзү үчүн мал-мүлк јығмасы гаршы-гаршыја гојулур. Иса бунунла дејирди ки, һәјатымызда ән ваҹиб шеј вар-дөвләт топламаг вә ја оланымыздан һәзз алмаг олмамалыдыр. Әксинә, вәсаитләримиздән елә истифадә етмәлијик ки, Јеһова илә мүнасибәтләримизи јахшылашдыраг, башга сөзлә, мөһкәмләндирәк. Белә етмәклә биз Аллаһ гаршысында зәнҝин олаҹағыг. Чүнки Аллаһымыз үзәримизә хејир-дуалар јағдыраҹаг. Мүгәддәс Китабда дејилир: «Рәббин хејир-дуасы инсана сәрвәт ҝәтирәр, даһа она гүссә вермәз» (Сүлејманын мәсәлләри 10:22).

13. Јеһованын хејир-дуалары неҹә ‘сәрвәт ҝәтирир’?

¹³ Јеһова халгына хејир-дуалар верәндә һәмишә ән јахшысыны верир (Јагуб 1:17). Мәсәлән, Јеһованын исраиллиләрә јашамаг үчүн вердији дијар ‘сүдлә бал ахан торпаг’ иди. Бахмајараг ки, Мисир дијары да белә тәсвир олунурду, Јеһованын исраиллиләрә вердији торпаг ән азы бир ваҹиб шејлә фәргләнирди. Муса исраиллиләрә демишди ки, ‘ора Аллаһыныз Рәббин лүтф ҝөстәрдији торпагдыр’. Башга сөзлә десәк, Јеһова онларын гајғысына галдығы үчүн онлар фираван јашајаҹагдылар. Исраиллиләр нә гәдәр ки, Јеһоваја садиг галырдылар, Ондан бол-бол хејир-дуа алырдылар, һәм дә онларын һәјатынын әтраф халглардан үстүн олдуғу ҝөз габағында иди. Бәли, инсана ‘сәрвәт ҝәтирән’ Јеһованын хејир-дуаларыдыр! (Сајлар 16:13; Ганунун тәкрары 4:5-8; 11:8-15).

14. Аллаһ гаршысында зәнҝин олан инсан һаггында нә демәк олар?

¹⁴ Варлы адамлары, әсас е’тибарилә, башгаларынын ҝөзүндә неҹә ҝөрүндүкләри марагландырыр. Бу, чох вахт өзүнү онларын һәјат тәрзиндә бүрузә верир. Онлар вар-дөвләтләри илә инсанларын ҝөзүнү гамашдырмаг истәјирләр (1 Јәһја 2:16). Аллаһ гаршысында зәнҝин оланлар исә Онун лүтфүнү вә разылығыны алыр, һәмчинин Онунла сых шәхси мүнасибәтләр гурурлар. Бу исә онлара һеч бир вар-дөвләтин верә билмәдији хошбәхтлик вә архајынчылыг һисси ҝәтирир (Јешаја 40:11). Бир суал галыр: Аллаһ гаршысында зәнҝин олмаг үчүн нә етмәлијик?

Аллаһ гаршысында неҹә зәнҝин ола биләрик?

15. Аллаһ гаршысында зәнҝин олмаг үчүн биз нә етмәлијик?

¹⁵ Исанын мәсәлиндәки киши јалныз өзүнә вар-дөвләт јығмаг үчүн план гуруб зәһмәт чәкдијиндән ағылсыз адландырылды. Аллаһ гаршысында зәнҝин олмаг үчүн биз сә’јлә чалышмалы, Онун ҝөзүндә һәгигәтән дә дәјәрли вә мә’налы ишләрдә там иштирак етмәлијик. Бу ишләрә Исанын «ҝедин, бүтүн халглары шаҝирдим един» әмри дә дахилдир (Матта 28:19). Вахтымызы, гүввәмизи вә баҹарығымызы јүксәк пилләләрә галхмаға дејил, Падшаһлығын тәблиғинә, шаҝирд һазырламаг ишинә сәрф етсәк, бу, һесаба пул јығмаға бәнзәјәр. Нөвбәти нүмунәләрдән ҝөрүндүјү кими, белә едәнләр бөјүк руһани газанҹ әлдә етмишләр (Сүлејманын мәсәлләри 19:17).

16, 17. Инсаны Аллаһ гаршысында зәнҝин едән һәјат јолуну ҝөстәрән һансы нүмунәләри чәкә биләрсиниз?

¹⁶ Шәргдә јашајан бир мәсиһчи компүтер үзрә мүтәхәссис иди вә јүксәк мәваҹибли ишдә чалышырды. Анҹаг иши, демәк олар ки, бүтүн вахтыны алдығы үчүн өзүнү руһани ҹәһәтдән тагәтсиз һисс едирди. О, ишиндә ирәлиләмәјә чалышмады, әксинә, ишдән чыхды, дондурма дүзәлдиб, күчәдә сатмаға башлады. Буна ҝөрә дә руһани еһтијаҹларыны өдәмәјә вә мәс’улијјәтләрини јеринә јетирмәјә даһа чох вахты галды. Кечмиш иш јолдашлары ону лаға гојурдулар. Бәс бу ишин ахыры нә олду? О дејирди: «Дондурма сатанда өзүмү әввәлкиндән јахшы тә’мин едирдим, үстәлик кечмиш ишимдәки ҝәрҝинлик вә нараһатчылыг олмадығы үчүн даһа раһат идим. Ән ваҹиби исә, инди өзүмү Јеһоваја даһа јахын һисс едирәм». Етдији дәјишикликләрин сајәсиндә гардаш таммүддәтли хидмәтә башлады вә һазырда өз өлкәсиндәки филиалда хидмәт едир. Јеһованын хејир-дуалары һәгигәтән дә ‘сәрвәт ҝәтирир’.

¹⁷ Бир баҹы исә тәһсилин мүһүм һесаб едилдији аиләдә бөјүмүшдү. О, Франса, Мексика, Исвечрә университетләриндә охумуш, гаршыда исә ону карјера ҝөзләјирди. О дејирди: «Бүтүн гапылар үзүмә ачыг иди, һөрмәт газанмышдым. Анҹаг дахилимдә бошлуг вар иди, елә бил нә исә чатышмырды». Сонра о, Јеһова һаггында өјрәнмәјә башлады. О давам едирди: «Руһән јеткинләшдикҹә Јеһованы разы салмаг вә Онун етдикләринин азҹа да олса әвәзини гајтармаг арзусу ҝетмәли олдуғум јолу — таммүддәтли хидмәти ајдын ҝөрмәјә көмәк етди». О, ишдән чыхды вә тезликлә вәфтиз олду. Өтән 20 илини севиндириҹи таммүддәтли хидмәтдә кечирди. Баҹы дејир: «Бә’зиләри исте’дадымы пуч етдијими фикирләширләр, анҹаг онлар ҝөрүрләр ки, мән хошбәхтәм вә һәјат принсипләрим онлары валеһ едир. Һәр ҝүн Јеһоваја дуа едирәм ки, тәвазөкар олум вә Онун разылығыны газаным».

18. Биз дә Павел кими Аллаһ гаршысында неҹә зәнҝин ола биләрик?

¹⁸ Сонралар һәвари Павел олан Шаулу гаршыда јүксәк вәзифә ҝөзләјирди. Анҹаг о јазмышды ки, ‘Рәбб Мәсиһ Исаны танымағын үстүн дәјәри јанында һәр шеји зијан һесаб едир’ (Филипилиләрә 3:7, 8). Павел үчүн Мәсиһин васитәсилә әлдә етдији сәрвәт дүнјанын тәклиф едә биләҹәји һәр шејдән гат-гат үстүн иди. Худбин арзу вә истәкләримизи дәф едәрәк, Аллаһа садиг һәјат сүрәрәк биз дә Онун гаршысында зәнҝин һәјат јашаја биләрик. Аллаһын Кәламы бизи әмин едир: «Тәвазөкарлығын вә Рәбб горхусунун нәтиҹәси сәрвәт, шәрәф, һәјатдыр» (Сүлејманын мәсәлләри 22:4).

Изаһ едә биләрсинизми?

• Исанын мәсәлиндәки киши һансы чәтинлијә дүшдү?

• Нә үчүн мәсәлдәки киши ағылсыз адландырылды?

• Аллаһ гаршысында зәнҝин олмаг нә демәкдир?

• Аллаһ гаршысында неҹә зәнҝин ола биләрик?

[29-ҹу сәһифәдәки шәкил]

Гаршымызда ачылан имканлар иманымыз үчүн нијә сынаг ола биләр?

[30 вә 31-ҹи сәһифәдәки шәкил]

«Рәббин хејир-дуасы инсана сәрвәт ҝәтирәр».

[32-ҹи сәһифәдәки шәкил]

Нәјә ҝөрә варлы киши ағылсыз адландырылды?