Таразлы шәкилдә мүлајимлик ҝөстәрин

‘Иманлылара хатырлат ки... мүлајим олсунлар’. ТИТ. 3:1, 2

1, 2. Мүгәддәс Јазылар мүлајимлик барәдә нә дејир вә бу нә үчүн мүнасибдир?

МӘҺӘББӘТЛИ Атамыз Јеһованын мүдриклијинин һәдди-һүдуду јохдур. Јараданымыз олдуғу үчүн, биз һәјатда рәһбәрлији Ондан ҝөзләјирик (Мәз. 48:14). Шаҝирд Јагубун сөзләринә әсасән, «јухарыдан назил олан һикмәт әввәлән сафдыр, сонра да сүлһпәрвәр, мүлајим, итаәткар, мәрһәмәтли вә хејирли бәһрә илә долу, гәрәзсиз вә ријасыздыр» (Јаг. 3:17).

² Һәвари Павел: «Гој сизин мүлајимлијиниз бүтүн инсанлара мәлум олсун», — дејә тәшвиг едирдиa (Филип. 4:5). Иса Мәсиһ мәсиһчи јығынҹағынын Башыдыр (Ефес. 5:23). Неҹә дә ваҹибдир ки, һәр биримиз ағыллы давранараг, Мәсиһин ҝөстәришләринә табе олаг вә башга инсанларла мүлајим рәфтар едәк!

3, 4. а) Мүлајимлијин ҝәтирдији фајдалары нүмунә әсасында ҝөстәрин. б) Бу мәгаләдә нәји нәзәрдән кечирәҹәјик?

³ Јериндә мүлајимлик ҝөстәрмәјин бизә фајдасы вар. Нүмунә үчүн: Британијада террористләрин план гурдуғу ашкар оланда, әввәлләр салона ҝөтүрүлмәсинә иҹазә верилән әшјаларын ичәри апарылмасы гадаған едилди, тәјјарә сәрнишинләри дә үмумиликдә бу ҝөстәришә табе олурдулар. Јахуд автомобил сүрәркән гәза баш вермәмәси үчүн бәзән ганунун јол вердијиндән ашағы сүрәтлә сүрмәк лазым ҝәлә биләр.

⁴ Чохларымыза мүлајим олмаг һеч дә асан дејил. Ҝәлин бизә көмәк едәҹәк үч мәгамы: нијјәтләримизи, һакимијјәтә мүнасибәтимизи вә нә дәрәҹәдә мүлајимлик ҝөстәрмәли олдуғумузу нәзәрдән кечирәк.

Нә үчүн мүлајим олмаг лазымдыр?

5. Мусанын Ганунуна әсасән, гулу ағасынын табечилијиндә галмаға нә вадар едә биләрди?

⁵ Мәсиһчиликдән әввәлки дөврә аид бир нүмунә һансы дүзҝүн нијјәтин мүлајимлијә ҝәтирдијини вурғулајыр. Мусанын Ганунуна әсасән, гул едилмиш ибраниләр, һансы биринҹи ҝәләрсә, ја көләликләринин једдинҹи илиндә, ја да Азадлыг илиндә азад едилмәли идиләр. Лакин гул көләликдә галмағы да сечә биләрди. (Чыхыш 21:5, 6 ајәләрини оху.) Гулу буна нә вадар едә биләрди? Мәһәббәт тәшвиг едирди ки, гул диггәтли ағасынын табечилијиндә галсын.

6. Мүлајим олмагда мәһәббәтин һансы ролу вар?

⁶ Буна бәнзәр тәрздә, Јеһоваја олан мәһәббәтимиз бизи тәшвиг едир ки, һәјатымызы Она һәср едәк, сонра исә һәср олунмамыза ујғун јашајаг (Ром. 14:7, 8). Һәвари Јәһја јазырды: «Аллаһы севмәк, Аллаһын әмрләринә риајәт етмәк демәкдир. Онун әмрләри исә ағыр дејилдир» (1 Јәһ. 5:3). Белә мәһәббәт өз мәнфәәтини ахтармыр (1 Кор. 13:4, 5). Јахынларымыза олан мәһәббәт инсанларла мүнасибәтдә ҝүзәштә ҝетмәјә вә онларын мәнфәәтини өзүмүзүнкүндән үстүн тутмаға тәшвиг едир. Худбин олмагданса, биз башгаларынын марагларыны нәзәрә алырыг (Филип. 2:2, 3).

7. Хидмәтимиздә мүлајимлијин ролу нәдән ибарәтдир?

⁷ Нә данышығымыз, нә дә һәрәкәтләримиз башгаларыны бүдрәтмәмәлидир (Ефес. 4:29). Доғрудан да, мәһәббәт бизи тәшвиг едәҹәк ки, мүхтәлиф мәншәји вә мәдәнијјәти олан инсанларын руһани инкишафына мане ола биләҹәк һәрәкәтләрдән гачаг. Бунун үчүн биздән чох вахт мүлајимлик тәләб олунур. Мәсәлән, косметикадан истифадә етмәјә вә нејлон ҹораб ҝејмәјә пис бахылан јерләрдә, миссионер баҹылар онлардан истифадә етмәјәҹәкләр ки, башгаларыны бүдрәтмәсинләр (1 Кор. 10:31-33).

8. Аллаһа мәһәббәт өзүмүзү ‘кичик’ кими апармаға неҹә көмәк едәр?

⁸ Јеһоваја олан мәһәббәт гүрурумузу боғмаға көмәк едир. Шаҝирдләринин арасында кимин бөјүк олдуғуна даир ҝедән мүбаһисәдән сонра, Иса балаҹа ушағы онларын арасына ҝәтириб изаһ етди: «Ким бу көрпәни Мәним намимә гәбул едәрсә, Мәни гәбул етмиш олар вә ким Мәни гәбул едәрсә, Мәни Ҝөндәрәни гәбул етмиш олар; зира сизләрдән ким һамыдан кичикдирсә, о бөјүк олаҹагдыр» (Лука 9:48; Марк 9:36). Шәхсән бизә өзүмүзү ‘кичик’ кими апармаг чәтин ола биләр. Мирас алдығымыз гејри-камиллик вә гүрурлулуға мејл бизи шөһрәт ахтармаға тәшвиг едә биләр, анҹаг һәлимлик ҝүзәштә ҝетмәјә көмәк едәҹәк (Ром. 12:10).

9. Мүлајим олмаг үчүн биз нә етмәлијик?

⁹ Мүлајим олмаг үчүн биз Аллаһын сәлаһијјәт вердији кәсләрин һакимијјәтини гәбул етмәлијик. Бүтүн һәгиги мәсиһчиләр башчылыг принсипинин ваҹиблијини дәрк едирләр. Һәвари Павел буну коринфлиләрә ајдын шәкилдә ҝөстәрмишди: «Буну да билмәнизи истәјирәм ки, һәр әрин башы Мәсиһ, арвадын башы әр, Мәсиһин башы исә Аллаһдыр» (1 Кор. 11:3).

10. Јеһованын һакимијјәтинә табе олмағымыз нәји ҝөстәрир?

¹⁰ Аллаһын һакимијјәтинә табе олмаг Она севән Ата кими етибар етдијимизи вә инандығымызы ҝөстәрир. О, баш верән һәр шејдән хәбәрдардыр, буна ҝөрә дә бизи мүкафатландыра биләр. Буну билмәк, башгалары бизимлә һөрмәтлә рәфтар етмәјәндә вә јахуд һирсләниб өзләриндән чыханда, мүлајимлик ҝөстәрмәјимизә көмәк едир. Павел јазырды: «Мүмкүнсә, әлиниздән ҝәлдији гәдәр бүтүн адамларла сүлһдә олун». О бу мәсләһәти нөвбәти ҝөстәриши верәрәк вурғулајыр: «Еј севимлиләр, гисас алмајын, анҹаг Аллаһын гәзәбинә јол верин. Чүнки јазылмышдыр: “Рәбб дејир: Гисас Мәнимдир, әвәзини Мән верәҹәјәм”» (Ром. 12:18, 19).

11. Мәсиһин башчылығына табе олдуғумузу неҹә ҝөстәрә биләрик?

¹¹ Мәсиһчи јығынҹағында Аллаһын сәлаһијјәт вердији кәсләрә дә табе олмалыјыг. «Вәһј» китабынын 1-ҹи фәслиндә Иса Мәсиһин сағ әлиндә јығынҹағын ‘улдузларыны’ тутдуғу тәсвир олунур (Вәһј 1:16, 20). Үмумиликдә, бу ‘улдузлар’ ағсаггаллар шурасыны вә ја јығынҹаглардакы нәзарәтчиләри тәмсил едир. Тәјин олунмуш бу ағсаггаллар Мәсиһин башчылығына табе олур вә онун инсанларла хејирхаһ давранышыны тәглид едирләр. Јығынҹагда һамы Исанын вахтлы-вахтында руһани гида вермәк үчүн тәјин етдији «садиг вә ағыллы гул»а табе олур (Мат. 24:45-47). Бу ҝүн бу материалы өјрәниб тәтбиг етмәјә һазыр олмағымыз ҝөстәрир ки, шәхсән биз Мәсиһин сүлһ вә бирлик ҝәтирән башчылығына табе олуруг (Ром. 14:13, 19).

Нә дәрәҹәдә мүлајим олмалыјыг?

12. Нә дәрәҹәдә мүлајим олмалыјыг?

¹² Анҹаг мүлајим олмаг иманымыза вә ја Аллаһын принсипләринә зидд давранмаг демәк дејил. Дин рәһбәрләри еркән мәсиһчиләрә Исанын ады илә тәлим вермәји гадаған едәндә онлар неҹә даврандылар? Петер вә башга һәвариләр ҹәсарәтлә дедиләр: «Инсанлардан артыг, Аллаһа итаәт етмәк ҝәрәкдир» (Һәв. иш. 4:18-20; 5:28, 29). Беләликлә, бу ҝүн һакимијјәт органлары хош хәбәрин тәблиғини дајандырмағымыз үчүн тәзјиг ҝөстәрәндә, биз тәблиғи дајандырмыр, тәблиғ үсулумузу дәјишдирәрәк вәзијјәтдән чыхыш јолу тапырыг. Әҝәр евдән-евә тәблиғә мәһдудијјәт гојулурса, ев сакинләри илә әлагә јаратмаг вә Аллаһын вердији тапшырығы јеринә јетирмәк үчүн башга јоллар ахтара биләрик. Ејни тәрздә ‘үзәримиздә олан һакимләр’ јығынҹаг ҝөрүшләрини кечирмәји гадаған едәндә, биз еһтијатла давранараг кичик груплар шәклиндә јығылырыг (Ром. 13:1; Ибр. 10:24, 25).

13. Иса сәлаһијјәтли шәхсләрә табе олмаг барәдә нә демишди?

¹³ Иса Дағүстү тәблиғиндә сәлаһијјәтли шәхсләрә табе олмағын ваҹиблијини ҝөстәрди: «Әҝәр бири мәһкәмәјә ҝедиб сәнин көјнәјини алмаг истәрсә, она үст палтарыны да вер. Вә ким сәнинлә бир мил ҝетмәк истәрсә, онунла ики мил ҝет» (Мат. 5:40, 41)b. Һәмчинин башгаларына гаршы диггәтли олмаг вә онлара көмәк етмәк арзусу, бизи, неҹә дејәрләр, даһа артыг мил ҝетмәјә тәшвиг едәҹәк (1 Кор. 13:5; Тит. 3:1, 2).

14. Нә үчүн дөнүклүјә һеч вахт ҝүзәштә ҝетмәмәлијик?

¹⁴ Бизим мүлајим олмаг арзумуз һеч вахт дөнүкләрә ҝүзәштә ҝетмәјимизә ҝәтириб чыхармамалыдыр. Һәгигәтин тәмизлијини вә јығынҹағын бирлијини горумаг үчүн бу саһәдә ајдын вә мөһкәм мөвге тутмалыјыг. Павел ‘јаланчы гардашларла’ бағлы јазырды: «Онлара бир анлыг да олса баш әјиб тәслим олмадыг ки, Мүждәнин һәгигәти сизин үчүн һифз олунсун» (Галат. 2:4, 5). Надир һалларда баш верән дөнүклүк садиг мәсиһчиләри доғру оланы етмәк гәтијјәтиндән дөндәрмәјәҹәк.

Нәзарәтчиләр мүлајим олмалыдырлар

15. Мәсиһчи ағсаггаллар бир јерә јығыларкән неҹә мүлајимлик ҝөстәрә биләрләр?

¹⁵ Нәзарәтчи кими хидмәт етмәјә тәјин олунанлар үчүн олан тәләбләрдән бири ҝүзәштә ҝетмәјә һазыр олмагдыр. Павел јазырды ки, ‘ҹәмијјәтин нәзарәтчиси мүлајим олмалыдыр’ (1 Тим. 3:2, 3). Ағсаггаллар јығынҹағын ишләрини һәлл етмәк үчүн бир јерә јығыланда, бу, хүсусилә ваҹибдир. Гәрар гәбул едилмәздән әввәл һәр кәс өз фикрини чәкинмәдән ачыг ифадә едә биләр, лакин һәр бир ағсаггалын фикир сөјләмәси шәрт дејил. Мүзакирә заманы диггәт тәтбиг олунан Мүгәддәс Китаб принсипләринә јөнәлдиләндә, киминсә фикри дәјишә биләр. Јеткин ағсаггал башгаларынын фикри илә разылашмајараг, өз дедијинин үстүндә дурмајаҹаг, әксинә, ҝүзәштә ҝедәҹәк. Әввәлҹә фикирләр мүхтәлиф ола биләр, анҹаг дуа едиб дүшүнмәк тәвазөкар вә мүлајим ағсаггалларын арасында бирлијин горунуб сахланылмасына көмәк едәҹәк. (1 Кор. 1:10; Ефеслиләрә 4:1-3 ајәләрини оху.)

16. Нәзарәтчи һансы руһу тәзаһүр етдирмәлидир?

¹⁶ Мәсиһчи ағсаггал бүтүн ишләриндә теократик низам-интизама риајәт етмәјә чалышмалыдыр. Бу ҹүр руһ сүрүјә нәзарәт едәндә дә өзүнү бүрузә вермәли, она башгаларына гаршы диггәтли вә илтифатлы олмаға көмәк етмәлидир. Петер јазырды: «Аллаһын сизә һәвалә олунан сүрүсүнү отарын. Она мәҹбури дејил, көнүллү вә Аллаһа мәгбул олан шәкилдә, биабырчы газанҹ үчүн дејил, шөвглә нәзарәт един» (1 Пет. 5:2).

17. Јығынҹагдакылар бир-бирилә мүнасибәтдә мүлајимлији неҹә ҝөстәрмәлидирләр?

¹⁷ Јығынҹағын јашлы үзвләри јашҹа онлардан кичик оланларын көмәјини чох гијмәтләндирир вә онлара һөрмәтлә јанашырлар. Ҝәнҹләр дә өз нөвбәсиндә Јеһоваја хидмәтдә чохиллик тәҹрүбәси олан јашлылара һөрмәт едирләр (1 Тим. 5:1, 2). Мәсиһчи ағсаггаллар мүәјјән мәсулијјәтләри һәвалә етмәк үчүн тәләбләрә ҹаваб верән гардашлар ахтарыр вә Аллаһын сүрүсүнүн гајғысына галмағы онлара өјрәдирләр (2 Тим. 2:1, 2). Һәр мәсиһчи Павелин Аллаһдан илһам алмыш мәсләһәтинә һөрмәтлә јанашмалыдыр: «Өз рәисләринизә итаәт един, онлара табе олун; чүнки һесабат верәҹәк оланлар кими, онлар һәр заман сизин ҹанларынызын гејдинә галырлар. Онлара табе олун ки, онлар буну ҹан чәкә-чәкә дејил, севинҹлә етсинләр. Чүнки әҝәр буну ҹан чәкә-чәкә етсәләр, сизә фајда олмаз» (Ибр. 13:17).

Аиләдә мүлајим олун

18. Нәјә ҝөрә аиләдә мүлајимлик ҝөстәрмәк лазымдыр?

¹⁸ Аилә үзвләри дә бир-бири илә мүнасибәтдә мүлајим олмалыдырлар. (Колослулара 3:18-21 ајәләрини оху.) Мүгәддәс Китаб мәсиһчи аиләсинин һәр бир үзвүнүн ролунун нәдән ибарәт олдуғуну ҝөстәрир. Әр һәм арвадын башчысыдыр, һәм дә ушагларын тәрбијәсиндә әсас мәсулијјәт онун үзәринә дүшүр. Гадын әринин башчылығыны гәбул етмәли, ушаглар исә итаәткар олмаға чалышмалыдырлар, чүнки бу, Рәббә мәгбулдур. Аиләнин һәр бир үзвү јериндә лазыми мүлајимлији ҝөстәрәрәк евдә бирлијин вә әмин-аманлығын һөкм сүрмәсинә көмәк едә биләрләр. Мүгәддәс Китабда бу мәгамы ачыглајан бәзи нүмунәләр вар.

19, 20. а) Елинин вә Јеһованын мүлајимлијә даир нүмунәләрини мүгајисә един. б) Валидејнләр бу нүмунәләрдән нә өјрәнә биләрләр?

¹⁹ Шамуел ушаг оланда, Ели Исраилдә баш каһин кими хидмәт едирди. Анҹаг Елинин оғуллары Хофни вә Пинхас ‘Рәбби танымајан’ «јарамаз адамлар» иди. Ели онларын Һүзур чадырынын ҝиришиндә хидмәт едән гадынларла әхлагсызлыглары вә диҝәр пис ишләри барәдә ешитмишди. Бәс буна неҹә мүнасибәт ҝөстәрмишди? Онлара демишди ки, әҝәр Јеһоваја гаршы ҝүнаһ ишләдирләрсә, онлар үчүн дуа едән олмајаҹаг. Анҹаг онлара нә дүзәлиш вермишди, нә дә бир ҹәза тәдбири ҝөрмүшдү. Нәтиҹәдә, Елинин оғуллары өз пис јолларындан дөнмәдиләр. Ахырда Јеһова һаглы олараг гәрара ҝәлди ки, онлар өлүм ҹәзасына лајигдирләр. Оғулларынын өлүм хәбәрини ешидәндә Елинин өзү дә өлдү. Онларын агибәти неҹә дә кәдәрли олду! Ајдындыр ки, Елинин оғулларынын пис ишләринә јерсиз мүлајимлик ҝөстәрмәси, јәни пис ишләринә давам етмәләринә јол вермәси дүзҝүн дејилди (1 Шам. 2:12-17, 22-25, 34, 35; 4:17, 18).

²⁰ Бунун әксинә олараг, Аллаһын Өз руһани оғуллары илә неҹә рәфтар етмәсинә нәзәр салаг. Микеја пејғәмбәр һејрәтамиз ҝөрүнтүдә Јеһованын Өз мәләкләри илә бир јерә топлашдығыны ҝөрмүшдү. Јеһова сорушур ки, Исраилин пис падшаһы Ахавы һәлак олмасы үчүн ким товлаја биләр. О, руһани оғулларынын тәклифләрини динләјир. Сонра бир мәләк буну едәҹәјини дејир. Јеһова ондан неҹә едәҹәјини сорушур. Ҹавабдан разы галанда, бу иши јеринә јетирмәји һәмин мәләјә тапшырыр (1 Пад. 22:19-23). Аилә үзвләри бурадан мүлајимлијә даир дәрс ала билмәзләрми? Јахшы олар ки, мәсиһчи әр вә ата арвадынын вә ушагларынын фикир вә тәклифләрини нәзәрә алсын. Диҝәр тәрәфдән дә, гадын вә ушаглар нәзәрә алмалыдырлар ки, өз тәклиф вә истәкләрини ирәли сүрдүкдән сонра, ола билсин, аиләнин башчысынын гәрарына табе олмаг үчүн мүлајимлик тәзаһүр етдирмәли олаҹаглар, чүнки Мүгәддәс Јазылар гәрар гәбул етмәк сәлаһијјәтини әрә верир.

21. Нөвбәти мәгаләдә нәји арашдыраҹағыг?

²¹ Јеһованын мүлајимлијә даир вердији мәһәббәтли вә мүдрик хатырлатмаларына ҝөрә неҹә дә миннәтдарыг! (Мәз. 119:99). Нөвбәти мәгаләдә таразлы шәкилдә мүлајимлик ҝөстәрмәјин никаһда севинҹ тапмаға неҹә көмәк етдијини арашдыраҹағыг.

[Һашијәләр]

Неҹә ҹаваб верәрдиниз?

• Мүлајимлик һансы јахшы бәһрәләри ҝәтирә биләр?

• Нәзарәтчиләр мүлајимлији неҹә тәзаһүр етдирә биләрләр?

• Аилә һәјатында мүлајимлик нә үчүн ваҹибдир?

[4-ҹү сәһифәдәки шәкил]

Ағсаггаллар Мәсиһин инсанларла хејирхаһ давранышыны тәглид едирләр

[6-ҹы сәһифәдәки шәкил]

Јығынҹағын ағсаггаллары ҝөрүшәндә дуа едиб дүшүнмәк вә мүлајимлик бирлијин горунуб сахланылмасына көмәк едир