Аллаһ инди нә тәдбир ҝөрүр?

«Ја Рәбб [«Јеһова», ЈД], нә үчүн узагда дурмусан? Мән дара дүшәндә нијә ҝизләнирсән?» (МӘЗМУР 10:1).

САДӘҸӘ олараг хәбәр башлыгларына ҝөз ҝәздирмәклә «ахыр ҝүнләрдә» јашадығымыза әмин ола биләрик. Аиләмизин башыны гара булудлар аланда — ҹинајәтин, бәдбәхт һадисәнин гурбаны оланда, јахуд әзизимиз өләндә биздә суал јарана биләр: «Аллаһ һара бахыр? Баш верәнләрә ҝөрә Аллаһ нараһатдырмы? Үмумијјәтлә, О, мөвҹуддур, ја јох?»

Ола биләрми ки, Аллаһдан ҝөзләдикләримиз јанлыш тәсәввүрә әсаслансын? Тәсәввүр един ки, балаҹа бир ушаг атасы ишә ҝетдији үчүн чох мәјусдур. Ушаг атасы үчүн дарыхыр вә онун тез бир заманда евә гајытмасыны истәјир. О, өзүнү атылмыш кими һисс едир. Ушаг бүтүн ҝүнү отуруб-дуруб ејни сөзү дејир: «Атам һарададыр?»

Ушағын һәр шеји там баша дүшмәдијини асанлыгла дејә биләрик. Чүнки атанын һәмин вахт аиләсини доландырмаг үчүн ишләдијини билирик. Биз дә «Аллаһ һарададыр?» суалыны верәндә һәмин ушаг кими давранмыш олмуругму?

Мәсәлән, бәзиләри истәјирләр ки, Аллаһ ҝүнаһ ишләдән инсанлары дәрһал ҹәзаландыран бир ҹәллад олсун. Диҝәрләринин исә фикринҹә, Аллаһ Шахта Баба кими бизә һәдијјәләр верир вә ишлә, һәјат јолдашы вә һәтта удушлу лотереја билети илә тәмин едир.

Һәр ики фикир ҝөстәрир ки, әҝәр Аллаһ әдаләти дәрһал бәргәрар етмирсә, јахуд көмәк үчүн етдијимиз дуалара ҹаваб вермирсә, демәли чәкдијимиз әзаб-әзијјәт Онун веҹинә дејил вә О, бизим еһтијаҹларымыздан бихәбәрдир. Лакин бу һеч дә белә дејил! Әслиндә, Јеһова Аллаһ һал-һазырда бүтүн бәшәр аиләсинин рифаһы үчүн чалышыр. Анҹаг буну бәзиләринин ҝөзләдији кими етмир.

Белә олан һалда, Аллаһ инди һансы тәдбирләри ҝөрүр? Бу суала ҹаваб вермәк үчүн биз бәшәр тарихинин башланғыҹына гајытмалыјыг. Мәһз һәмин вахт инсанларын Аллаһла мүнасибәти ҹидди шәкилдә позулмушду, амма вәзијјәт үмидсиз дејилди.

Ҝүнаһын аҹынаҹаглы нәтиҹәләри

Илләрлә бәрбад вәзијјәтдә олан бир еви тәсәввүр един: дам учуб, гапылар рәзәләриндән чыхыб, хариҹдән исә о, сыныг-салхаг вәзијјәтдәдир. Ахы бир вахтлар бу ев чох ҝөзәл иди! Дәјән зәрәрин һәҹмини нәзәрә алсаг, ону бәрпа етмәк елә дә асан иш дејил вә буну бир ҝеҹәнин ичиндә етмәк гејри-мүмкүндүр.

Инди исә ҝәлин 6 000 ил бундан габаг, ҝөзәҝөрүнмәз руһани варлыг олан Шејтанын Адәмлә Һәвваны Аллаһа гаршы үсјана тәһрик етдији заман бәшәријјәтә вурулан зәрәрә нәзәр салаг. Буна гәдәр бу илк инсанын мүкәммәл сағламлығы вар иди. Һәмчинин онлар ҝәләҹәк нәсилләри илә бирликдә әбәди јашаја биләрдиләр (Јарадылыш 1:28). Ҝүнаһ ишләдәндә исә Адәмлә Һәвва һәлә дүнјаја ҝәлмәмиш бәшәр аиләсинә зәрәр вурдулар.

Үсјанын аҹынаҹаглы нәтиҹәләринә ади бир шеј кими бахмамалыјыг. Мүгәддәс Китабда дејилир: «Ҝүнаһ тәк бир адам [Адәм] васитәсилә вә өлүм ҝүнаһ васитәсилә дүнјаја ҝирди» (Ромалылара 5:12). Ҝүнаһ өлүм ҝәтирмәклә јанашы, Јараданла мүнасибәтләримизә дә хәтәр јетирди вә онун тәсири физики, әгли вә мәнәви вәзијјәтимиздән ҝөрүнүр. Нәтиҹә етибарилә бизим вәзијјәтимиз дә бәрбад вәзијјәтдә олан еви хатырладыр. Салеһ Әјјуб ‘инсанын өмрүнүн аз, һәјатынын сыхынты илә долу’ олдуғуну дејәндә бизим вәзијјәтимизи дүзҝүн шәкилдә тәсвир етмишди (Әјјуб 14:1).

Бәс Адәмлә Һәвва ҝүнаһ ишләтдикдән сонра Аллаһ инсанлардан үз дөндәрдими? Әсла! Сәмави Атамыз о вахтдан индијә кими бәшәр аиләсинин рифаһы наминә чалышыр. Онун бизим уғрумузда нәләр етдијини даһа јахшы баша дүшмәкдән өтрү ҝәлин евин бәрпасы үчүн тәләб олунан үч аддымы нәзәрдән кечирәк. Һәмчинин һәр бир аддымын Аллаһын бәшәријјәти камиллијә гајтармагла бағлы ҝөрдүјү тәдбирләрлә неҹә әлагәли олдуғуна бахаг.

1 Евә ҝөз ҝәздирәндән сонра ев саһиби ону ја дағыдаҹағына, ја да ки бәрпа едәҹәјинә гәрар вермәлидир.

Еден бағында галдырылан үсјандан дәрһал сонра Јеһова Аллаһ бәшәријјәти камиллијә гајтармаг нијјәтиндә олдуғуну бәјан етди. О, үсјанын архасында дуран ҝөзәҝөрүнмәз руһани варлыға деди: «Мән сәнинлә гадын арасына, сәнин баланла онун өвлады арасына дүшмәнчилик салырам. Бу өвлад сәнин башындан вураҹаг, сән дә ону дабанындан санҹаҹагсан» (Јарадылыш 3:15).

Бу сөзләрлә Јеһова Еден бағында галдырылан үсјанын сәбәбкарыны мәһв едәҹәјини вәд етди (Ромалылара 16:20; Вәһј 12:9). Бундан әлавә, Јеһова һәмин «өвлад»ын бәшәријјәти ҝүнаһдан азад едәҹәјини дә сөјләдиa (1 Јәһја 3:8). Бу вәдләр чох ваҹиб бир һәгигәти үзә чыхарыр: Јеһова јаратдыгларыны мәһв етмәјәҹәк, онлары камиллијә гајтараҹаг. Лакин бунун үчүн вахт тәләб олунур.

2 Мемар евин тамамланмыш вәзијјәтинин неҹә олаҹағыны ајдын ҝөстәрән чертјож һазырлајыр.

Јеһова Аллаһ исраиллиләрә ганунлар топлусу вә ибадәт үчүн нәзәрдә тутулан мәбәдин тәсвирини вермишди. Мүгәддәс Китабда дејилир: «Бунлар, ҝәләҹәк шејләрин көлҝәсидир» (Колослулара 2:17). Чертјожлар кими, бу ганунлар вә мәбәдин тәсвири даһа мөһтәшәм шејләрә ишарә едирди.

Мәсәлән, ҝүнаһларын бағышланмасы үчүн исраиллиләр һејван гурбаны ҝәтирирдиләр (Левилиләр 17:11). Бу, әсрләр сонра ҝәтириләҹәк вә бәшәријјәт үчүн әсил фидјә олаҹаг даһа мөһтәшәм гурбана ишарә едирдиb. Исраиллиләрин ибадәт етдији Мүгәддәс мәскәнин вә мәбәдин гурулушу ҝәләҹәкдә пејда олаҹаг Мәсиһин фидјә гурбанлығындан тутмуш ҝөјә галхмасына гәдәр нә едәҹәјини тәмсил едирди. (7-ҹи сәһифәдәки схемә бахын.)

3 Бәрпа ишләрини чертјож әсасында ҝөрәҹәк бәнна сечилир.

Иса пејғәмбәр бәшәријјәти хилас етмәк үчүн исраиллиләрин ҝәтирдији гурбанлар тимсалында өз ҹаныны фидјә кими вермәли олан вәд едилмиш Мәсиһ иди. Јериндә олараг Вәфтизчи Јәһја ону «дүнјанын ҝүнаһыны арадан галдыран Аллаһ Гузусу» адландырды (Јәһја 1:29). Иса Мәсиһ бу тапшырығы јеринә јетирмәјә ҹанла-башла разы олду. О демишди: «Мәним ирадәми дејил, Мәни ҝөндәрән Атамын ирадәсини јеринә јетирмәк үчүн ҝөјдән ендим» (Јәһја 6:38).

Аллаһын ирадәсинә Исанын ‘бир чохлары үчүн ҹаныны фидијә олараг вермәси’ илә јанашы, давамчылары илә Падшаһлыг әһдини бағламасы да дахилдир (Матта 20:28; Лука 22:29, 30). Аллаһ бәшәријјәт үчүн олан нијјәтини бу Падшаһлыг васитәси илә һәјата кечирәҹәк. Аллаһын Падшаһлығы һаггында хәбәр Онун ҝөјдән јер үзүнү идарә етмәк үчүн гурдуғу һөкумәтдән бәһс етдијинә ҝөрә ‘мүждә’ адланыр (Матта 24:14; Даниел 2:44)c.

Бәрпа иши давам едир

Ҝөјә галхмаздан әввәл Иса давамчыларына бу әмри верди: «Бүтүн халглары шаҝирдим един, онлары Ата, Оғул вә Мүгәддәс Руһ наминә вәфтиз един... вә будур, Мән, дөврүн сонуна гәдәр һәр ҝүн сизинләјәм» (Матта 28:19, 20).

Беләликлә, бәшәријјәтин камиллијә гајтарылмасы Исанын өлүмү илә баша чатмады. Бу, «дөврүн сонуна гәдәр» — Аллаһын Падшаһлығынын јер үзүнү идарә едәҹәји вахта кими давам едәҹәк. Биз артыг бу вахтын астанасындајыг. Буну Исанын «дөврүн сонуна» даир вердији вә һал-һазырда јеринә јетән әламәтә әсасән дејә биләрикd (Матта 24:3—14; Лука 21:7—11; 2 Тимотејә 3:1—5).

Бу ҝүн Јеһованын Шаһидләри Исанын әмринә риајәт едәрәк Аллаһын Падшаһлығы һаггында хош хәбәри 236 өлкә вә әразидә тәблиғ едирләр. Елә әлиниздә тутдуғунуз бу журналын мәгсәди дә Падшаһлыг вә онун едәҹәји ишләр һаггында даһа чох өјрәнмәјинизә көмәк етмәкдир. «Ҝөзәтчи Гүлләси»нин һәр бир сајынын 2-ҹи сәһифәсиндә белә бир гејдә раст ҝәлирик: «Бу журнал... артыг ҝөјдә гурулмуш һөкумәт олан Аллаһын Падшаһлығынын тезликлә бүтүн писликләри мәһв едәҹәји вә јер үзүнү Ҹәннәтә чевирәҹәји һаггындакы хош хәбәрлә инсанлара тәсәлли верир. Һазырда Аллаһын тәјин етдији Падшаһ кими һөкмранлыг едән, төкүлән ганы илә бәшәријјәтин әбәди һәјата наил олмасына јол ачан Иса Мәсиһә иман етмәјә тәшвиг едир».

Дүздүр, бу ҝүн сиз террор актлары, тәбии фәлакәтләр һаггында ешидә биләрсиниз. Ејни заманда, бәдбәхтлик сиздән дә јан кечмәјә биләр. Анҹаг Мүгәддәс Китабы өјрәнмәјин сајәсиндә сиз Аллаһын бәшәријјәти тәрк етмәдијинә әмин олаҹагсыныз. Орада дејилир ки, «О, һеч биримиздән узаг дејил» (Һәвариләрин ишләри 17:27). Һәмчинин Јеһова Аллаһ улу валидејнләримизин итирдикләрини ҝери гајтармагла бағлы вердији вәдини мүтләг һәјата кечирәҹәк! (Јешаја 55:11).

[Һашијәләр]

[7-ҹи сәһифәдәки шәкилләр/чәрчивә]

(Чәрчивәјә нәшрдә бахын)

Ҝерчәклијин сурәти. Мүгәддәс мәскән нәји тәмсил едирди?

ГУРБАНҜАҺ

Аллаһын Исанын гурбанлығыны гәбул етмәјә һазыр олмасы (ИБРАНИЛӘРӘ 13:10—12).

БАШ КАҺИН

Иса (ИБРАНИЛӘРӘ 9:11).

1 Кәффарә ҝүнү баш каһин инсанларын ҝүнаһына ҝөрә гурбан тәгдим едирди (ЛЕВИЛИЛӘР 16:15, 29—31).

1 Ерамызын 33-ҹү илинин 14 нисанында Иса бизим уғрумузда өз һәјатыны гурбан верди (ИБРАНИЛӘРӘ 10:5—10; 1 ЈӘҺЈА 2:1, 2).

МҮГӘДДӘС ЈЕР

Аллаһын руһунун Исада олмасы (МАТТА 3:16, 17; РОМАЛЫЛАРА 8:14—17; ИБРАНИЛӘРӘ 5:4—6).

ПӘРДӘ

Исанын бәдәни — онун ҝөјдәки һәјатыны јер үзүндәки һәјатындан ајыран манеә (1 КОРИНФЛИЛӘРӘ 15:44, 50; ИБРАНИЛӘРӘ 6:19, 20; 10:19, 20).

2 Баш каһин Мүгәддәс јери Ән Мүгәддәс јердән ајыран пәрдәнин ич тәрәфинә кечирди.

2 Дирилдикдән сонра Иса ҝөјә галхыб ‘уғрумузда Аллаһын һүзурунда зүһур едәрәк’ пәрдәнин ич тәрәфинә кечди (ИБРАНИЛӘРӘ 9:24—28).

ӘН МҮГӘДДӘС ЈЕР

Ҝөј (ИБРАНИЛӘРӘ 9:24).

3 Илдә бир дәфә баш каһин ҝәтирилән гурбанларын ганыны Ән Мүгәддәс јердә, Әһд сандығынын гаршысында чиләјирди (ЛЕВИЛИЛӘР 16:12—14).

3 Иса төкүлән ганынын дәјәрини тәгдим едәрәк ҝүнаһларымыза ҝөрә әсил кәффарә вермиш олду (ИБРАНИЛӘРӘ 9:12, 24; 1 ПЕТЕР 3:21, 22).