Теократик мәктәбләр — Јеһованын мәһәббәтинин сүбутудур

ЈЕҺОВА бизим Мүрәббимиз вә ја «Јени Дүнја тәрҹүмәси»нә әсасән, Даһи Нәсиһәтчимиздир (Јешаја 30:20). Ону башгаларыны өјрәтмәјә, онлара тәлим вермәјә тәшвиг едән хүсусијјәт мәһәббәтдир. Мәсәлән, дәрин мәһәббәтиндән ирәли ҝәләрәк, Јеһова «етдији һәр шеји» Исаја ҝөстәрир (Јәһ. 5:20). Бизә, јәни Шаһидләринә бәсләдији мәһәббәт Аллаһы тәшвиг едир ки, Ону иззәтләндирмәјә вә башгаларына көмәк етмәк үчүн вар ҝүҹүмүзлә сәј ҝөстәрән бизләрә «савадлыларын дилини» версин (Јешаја 50:4).

Һал-һазырда тәшкилатда кечирилән он теократик мәктәб васитәсилә Јеһованын мәһәббәт нүмунәсини тәглид едән Рәһбәрлик Шурасынын Тәлим комитәси һәмин мәктәбләрә јазылмаг үчүн арзулары вә шәраитләри үст-үстә дүшәнләрә тәлим верир. Сиз бу мәктәбләрин Јеһованын мәһәббәтинин тәзаһүрү олдуғуну ҝөрүрсүнүзмү?

Үмидварыг ки, бу мәктәбләрин гыса иҹмалыны вә орада тәлим кечән баҹы-гардашларын үрәк сөзләрини охумаг сизин үчүн фајдалы олаҹаг. Сонра өзүнүзә белә бир суал верин: «Бу илаһи тәһсилдән мән неҹә фајдалана биләрәм?»

ТЕОКРАТИК ТӘҺСИЛДӘН ФАЈДАЛАНЫН

«Мәһәббәт... Аллаһы» олан Јеһованын вердији тәһсил һәјатымызы мәналы едир, бизи үзләшәҹәјимиз чәтинликләри дәф етмәјә һазырлајыр вә хидмәтдән бөјүк севинҹ әлдә етмәјимизә көмәк едир (2 Кор. 13:11). Бизә башгаларына «һәр шејә риајәт етмәји» өјрәтмәк әмри верилиб. Биринҹи әсрдәки шаҝирдләр кими, биз дә бу ишдә инсанлара көмәк етмәк үчүн лазым олан һәр бир шејлә тәҹһиз олунмушуг (Мат. 28:20).

Бу мәктәбләрин һамысында охумаг мүмкүн олмаса да, онларын бир вә ја бир нечәсиндән фајдалана вә Мүгәддәс Китаба әсасән верилән өјүд-нәсиһәтләри тәтбиг едә биләрик. Үстәлик, јахшы тәлим кечмиш һәмиманлыларымызла чијин-чијинә әмәкдашлыг едәрәк хидмәтдә пүхтәләшә биләрик.

Өзүнүздән сорушун: «Мәним шәраитим бу мәктәбләрин һәр һансы бириндә иштирак етмәјә имкан верирми?»

Јеһованын хидмәтчиләри бу дәјәрли мәктәбләрдә тәлим алмағы вә онлары дәстәкләмәји өзләринә шәрәф һесаб едирләр. Гој бу мәктәбләрдә алдығыныз тәлим сизи Аллаһа јахынлашдырсын вә Онун сизә һәвалә етдији мәсулијјәтләри, хүсусилә дә хош хәбәри тәблиғ етмәк кими тәҹили тапшырығы һәјата кечирмәк үчүн лазым олан һәр бир шејлә тәмин етсин.

[13—17–ҹи сәһифәдәки чәрчивә/шәкилләр]

ТЕОКРАТИК МӘКТӘБЛӘРИН ГЫСА ИҸМАЛЫ

Теократик Хидмәт Мәктәби

Мәгсәд: тәблиғчиләрә хош хәбәри мәһарәтлә тәблиғ етмәји вә тәлим вермәји өјрәтмәк.

Кечирилмә мүддәти: давамлы.

Кечирилдији јер: јерли Падшаһлыг залы.

Тәләб: јығынҹаг ҝөрүшләриндә мүтәмади иштирак етмәк, Мүгәддәс Китаб тәлимләри илә разы олмаг, еләҹә дә һәјат тәрзини мәсиһчи принсипләринә ујғунлашдырмаг.

Јазылма гајдасы: Теократик Хидмәт Мәктәбинин нәзарәтчиси јазыр. Јан амиотрофик склероз хәстәлији уҹбатындан ифлиҹ галан Шарон дејир: «Теократик Хидмәт Мәктәби мәнә ахтарышлар апармағы вә мәлуматы мәнтиги ардыҹыллыгла тәгдим етмәји өјрәдиб. Мән һәмчинин јалныз өз руһани тәләбатларымы јох, башгаларынынкыны да дүшүнмәји өјрәндим».

Узун мүддәтдир ки, сәјјар нәзарәтчи кими хидмәт едән Арне дејир: «Мән ушаглыгдан кәкәләјирдим вә башгалары илә ҝөз тәмасы гурмагда чәтинлик чәкирдим. Бу мәктәб мәнә әминлик әлдә етмәјә вә өзүмү лазымлы һисс етмәјә көмәк етди. Јеһованын бу мәктәб васитәсилә вердији тәлим мәнә дүзҝүн нәфәс алмағы вә диггәтими ҹәмләмәји өјрәтди. Јығынҹагда вә хидмәтдә Аллаһы иззәтләндирмәк шәрәфинә лајиг ҝөрүлдүјүм үчүн Она чох миннәтдарам».

Јени Бет-Еллиләр үчүн Мәктәб Мәгсәд: бу мәктәб јени бет-еллиләрә хидмәтләрини сәмәрәли јеринә јетирмәјә көмәк едир.

Кечирилмә мүддәти: 16 һәфтә әрзиндә һәфтәдә бир дәфә 45 дәгигә.

Кечирилдији јер: Бет-Ел. Тәләб: Бет-Ел аиләсинин даими үзвү, јахуд да бир ил вә ја даһа чох мүддәт үчүн тәјин едилән мүвәггәти көнүллү олмаг лазымдыр.

Јазылма гајдасы: Бет-Ел аиләсинин јени үзвләри автоматик олараг бу мәктәбә дүшүрләр.

1980-ҹи илләрдә бу мәктәби кечән Димитри дејир: «Бу мәктәб мәнә даһа јахшы арашдырма апармағы өјрәтди вә Бет-Елдә узун мүддәт хидмәт етмәк үчүн һазырлады. Тәлиматчылар, тәлим планы вә практики мәсләһәтләр мәни Јеһованын мәһәббәт вә гајғысына, еләҹә дә Онун мәним Бет-Елдә уғур әлдә етмәјими истәдијинә әмин етди».

Кетлин дејир: «Бу мәктәб мәнә диггәтими ән ваҹиб шејә — руһани инсан олмаға ҹәмләмәји өјрәтди, һәмчинин Јеһоваја, Онун евинә вә тәшкилатына ҝөрә миннәтдарлығымы даһа да артырды».

Падшаһлыг Хидмәти Мәктәби

Мәгсәд: сәјјар нәзарәтчиләрә, ағсаггаллара, бәзән дә хидмәти көмәкчиләрә нәзарәт етмәк вә тәшкилатчылыг кими вәзифәләрини даһа јахшы јеринә јетирмәји өјрәтмәк (Һәв. иш. 20:28). Мәктәбдә јығынҹагларын ҹари вәзијјәти, тәмајүл вә тәләбатлары мүзакирә едилир. Мәктәб Рәһбәрлик Шурасынын гәрары илә бир нечә илдән бир кечирилир.

Кечирилмә мүддәти: сон илләрдә бу мәктәб сәјјар нәзарәтчиләр үчүн ики вә ја ики ҝүн јарым, ағсаггаллар үчүн бир ҝүн јарым, хидмәти көмәкчиләр үчүн исә бир ҝүн кечирилир.

Кечирилдији јер: адәтән, Падшаһлыг вә ја Конгрес залы.

Тәләб: гардаш сәјјар нәзарәтчи, ағсаггал вә ја хидмәти көмәкчи олмалыдыр.

Јазылма гајдасы: ағсаггаллар вә хидмәти көмәкчиләр рајон нәзарәтчисиндән дәвәтнамә алырлар. Сәјјар нәзарәтчиләри исә филиал дәвәт едир.

«Мәзмунлу мәлуматын гыса вахт әрзиндә тәгдим олунмасына бахмајараг, бу мәктәб ағсаггаллара ҝүҹ-гүввәт верир, о ҹүмләдән севинҹләрини горумаға вә Јеһоваја ҹәсарәтлә хидмәт етмәјә көмәк едир. Һәм јени, һәм дә чохданын ағсаггаллары еффектив шәкилдә сүрүнүн гајғысына галмағы вә һәмфикир олмағы өјрәнирләр» (Куин, ашағыда).

«Мәктәбдә алдығым тәлим сајәсиндә иманымызла бағлы олан мәсәләләри даһа јахшы баша дүшдүм, тәһлүкәләр барәдә хәбәрдарлыглар алдым вә сүрүнүн гајғысына галмаға даир практики мәсләһәтләр ешитдим. Јеһованын бизә көмәк етмәси неҹә дә ҝөзәлдир» (Мајкл).

Пионер Хидмәти Мәктәби

Мәгсәд: пионерләрә хидмәтләрини там јеринә јетирмәјә көмәк етмәк (2 Тим. 4:5).

Кечирилмә мүддәти: ики һәфтә.

Кечирилдији јер: филиал тәрәфиндән мүәјјәнләшдирилир; адәтән, Падшаһлыг залы.

Тәләб: бир ил вә ја даһа чох даими пионер кими хидмәт едәнләрa.

Јазылма гајдасы: бир ил пионер кими хидмәт едәнләр автоматик олараг сијаһыја дахил едилирләр вә бу барәдә онлара рајон нәзарәтчиси хәбәр верир.

Лили (сағда) дејир: «Бу мәктәб мәнә хидмәтдә вә һәјатда гаршылашдығым чәтинликләрин өһдәсиндән ҝәлмәјә көмәк етди. Мәктәбдән сонра арашдырма апармаг, тәлим вермәк вә Мүгәддәс Китабдан истифадә етмәк баҹарығым хејли јахшылашды. Инди мән башгаларына көмәк етмәк, ағсаггаллары дәстәкләмәк вә јығынҹағын инкишафына төһфә вермәк үчүн даһа һазырлыглыјам».

Ики дәфә пионер мәктәбини кечән Бренда дејир: «Мәктәб мәнә 100 фаиз ибадәтин ичиндә олмаға, виҹданымы мөһкәмләндирмәјә вә диггәтими башгаларына көмәк етмәјә ҹәмләмәјә көмәк етди. Һәгигәтән дә, Јеһова сәхавәтли Аллаһдыр!»

[Һашијә]

Јығынҹаг Ағсаггаллары үчүн Мәктәб

Мәгсәд: ағсаггаллара јығынҹагдакы мәсулијјәтләринин өһдәсиндән ҝәлмәјә вә руһаниликләрини артырмаға көмәк етмәк.

Кечирилмә мүддәти: беш ҝүн.

Кечирилдији јер: филиал гәрар верир; адәтән, Падшаһлыг вә ја Конгрес залы.

Тәләб: гардаш тәјин олунмуш ағсаггал олмалыдыр.

Јазылма гајдасы: ағсаггаллары филиал дәвәт едир.

Америка Бирләшмиш Штатларында кечирилән мәктәбин 92-ҹи синфиндә иштирак едәнләрин үрәк сөзләринә диггәт јетирәк:

«Мәктәбин мәнә хејли фајдасы олду: өзүмә кәнардан бахдым вә Јеһованын сүрүсүнүн гајғысына неҹә гала биләҹәјими ҝөрдүм».

«Инди мән Мүгәддәс Китабын көмәјилә һамыны руһландырмаға даһа чох һазырлыглыјам».

«Бу мәктәбдән өјрәндикләрим өмрүмүн сонуна гәдәр мәнә јетәр».

Сәјјар Нәзарәтчиләр вә Һәјат Јолдашлары үчүн Мәктәб

Мәгсәд: «ҹанла-башла данышан вә өјрәдән» рајон вә вилајәт нәзарәтчиләринә јығынҹаглара даһа сәмәрәли хидмәт етмәләринә көмәк етмәк (1 Тим. 5:17; 1 Пет. 5:2, 3).

Кечирилмә мүддәти: ики ај.

Кечирилдији јер: филиал гәрар верир.

Тәләб: гардаш рајон вә ја вилајәт нәзарәтчиси олмалыдыр.

Јазылма гајдасы: сәјјар нәзарәтчиләр вә онларын һәјат јолдашлары филиал тәрәфиндән дәвәт олунурлар.

«Бу мәктәбдән сонра Исанын тәшкилата башчылыг етмәсини даһа чох гијмәтләндирдик. Биз баша дүшдүк ки, хидмәт етдијимиз гардашлары руһландырмаг вә јығынҹағын бирлијини мөһкәмләндирмәк лазымдыр. Үстәлик, биз дәрк етдик ки, сәјјар нәзарәтчи мәсләһәт верәндә вә ја бәзән дүзәлишләр едәндә онун әсас мәгсәди гардашлара Јеһованын онлары севдијини ҝөрмәләринә көмәк етмәкдир» (Ҹоел, 1-ҹи синиф, 1999-ҹу ил).

Субај Гардашлар үчүн Мүгәддәс Китаб Мәктәби

Мәгсәд: субај ағсаггаллары вә хидмәти көмәкчиләри Јеһованын тәшкилатында әлавә мәсулијјәтләрә һазырламаг. Мәзунларын чоху өз өлкәләриндә тәләбат олан јерләрә тәјин олунурлар. Әҝәр һазырлыг руһу ҝөстәрәрләрсә, диҝәрләри башга өлкәләрә тәјин олуна биләрләр. Бәзи мәзунлар исә мүвәггәти олараг хүсуси пионер кими тәјин олунараг тәблиғчиләрин ајағы дәјмәдији уҹгар вә тәҹрид олунмуш әразиләрә ҝөндәрилә биләрләр.

Кечирилмә мүддәти: ики ај.

Кечирилдији јер: филиал гәрар верир; адәтән, Конгрес вә ја Падшаһлыг залы.

Тәләб: јахшы сағламлығы олан вә тәләбат олан јерләрдә Падшаһлығын марагларына хидмәт етмәк истәјән 23—62 јаш арасында субај гардашлар (Марк 10:29, 30). Онлар ән азы ики ил фасиләсиз хидмәти көмәкчи вә ја ағсаггал, һәмчинин даими пионер олмалыдырлар.

Јазылма гајдасы: әлавә мәлуматы рајон конгресиндә кечирилән ҝөрүшдә алмаг олар.

Бирләшмиш Штатларда бу мәктәбин 23-ҹү синфиндә охујан Рик дејир: «Бүтүн диггәтими бу тәлимә јөнәлтмәјим сајәсиндә Јеһованын руһу дахилимдә дәјишикликләр етди. Јеһова хидмәтчисинә тәјинат верәндә һәр заман она дәстәк олур. Мән өјрәндим ки, диггәтими өзүмүн јох, Аллаһын ирадәсинә ҹәмләсәм, О, мәни мөһкәмләндирәҹәк».

Алманијада хидмәт едән Андреас гејд едир: «Аллаһын тәшкилаты мүасир дөврдә, санки, бир мөҹүзәдир. Мән бу мөҹүзәни гијмәтләндирмәји өјрәндим. Орада алдығым тәлим мәни гаршыдакы иш үчүн һазырлады. Үстәлик, бир чох Мүгәддәс Китаб нүмунәләри мәнә ваҹиб бир һәгигәти дәрк етмәјә көмәк етди: гардашларыма вә Јеһоваја хидмәт етмәк әсил хошбәхтлијин ачарыдыр».

Мәсиһчи Әр-арвадлар үчүн Мүгәддәс Китаб Мәктәби

Мәгсәд: евли ҹүтлүкләрә Јеһованын вә тәшкилатынын онлардан там шәкилдә истифадә едә билмәси үчүн хүсуси һазырлыг кечмәк. Бир чох мәзунлар өлкәләриндә даһа чох тәләбат олан әразиләрә тәјин олунаҹаглар. Һазырлыг руһу ҝөстәрәнләрин бәзиләри хариҹи өлкәләрә тәјин олуна биләрләр. Мәзунларын мүвәггәти олараг хүсуси пионер кими тәблиғчиләрин ајағы дәјмәдији уҹгар вә тәҹрид олунмуш әразиләрә ҝөндәрилмә еһтималы вар.

Кечирилмә мүддәти: ики ај.

Кечирилдији јер: бу мәктәб АБШ-да кечирилир, лакин 2012-ҹи илин сентјабр ајындан башлајараг мәктәб бүтүн дүнјада сечилмиш филиалларын әразиләриндә, Конгрес вә ја Падшаһлыг залында кечириләҹәк.

Тәләб: тәләбат олан әразидә хидмәт етмәк үчүн сағламлығы вә шәраити јол верән, еләҹә дә «Мән бурадајам. Мәни ҝөндәр» әһвал-руһијјәсини әкс етдирән 25—50 јаш арасында евли ҹүтлүкләр (Јешаја 6:8). Бундан әлавә, онлар ән азы ики ил евли олмалы вә фасиләсиз ики ил таммүддәтли хидмәтдә олмалыдырлар. Әр фасиләсиз олараг ики ил ағсаггал вә ја хидмәти көмәкчи олмалыдыр.

Јазылма гајдасы: вилајәт конгресиндә бу мәктәблә мараглананлар үчүн ҝөрүш кечирилир. Әҝәр сиз бу мәктәбә дүшмәк истәјирсинизсә вә сизин јашадығыныз өлкәдә вилајәт конгресиндә белә ҝөрүш кечирилмирсә, әлавә мәлумат үчүн филиала мәктуб јаза биләрсиниз.

«Һәјатлары тамамилә дәјишән бу сәккиз һәфтә Јеһоваја даһа чох хидмәт етмәк истәјән әр-арвадлар үчүн чох ҝөзәл фүрсәтдир! Биз вахтымыздан мүдрикликлә истифадә етмәјимизә көмәк едәҹәк садә һәјат тәрзини горујуб сахламаға гәрарлыјыг» (Ерик вә Карина, 1-ҹи синиф, 2011-ҹи ил, ашағыда).

Ҝөзәтчи Гүлләсинин Мүгәддәс Китаб Мәктәби Ҝилеад

Мәгсәд: тәләбәләри әһалиси сых олан әразиләрдә хүсуси тәјинатлы мүждәчи ишинә, еләҹә дә сәјјар хидмәт вә ја Бет-Ел иши үчүн һазырламаг. Әсас мәгсәд саһә хидмәтини вә филиалларын фәалијјәтини мөһкәмләндирмәкдир.

Кечирилмә мүддәти: беш ај.

Кечирилдији јер: Ҝөзәтчи Гүлләсинин Патерсондакы (Нју–Јорк, АБШ) Тәлим Мәркәзи.

Тәләб: хүсуси таммүддәтли хидмәтин мүәјјән нөвләриндә олан евли ҹүтлүкләр: Ҝилеад Мәктәбиндә олмајан хүсуси тәјинатлы мүждәчиләр, хүсуси пионерләр, сәјјар нәзарәтчиләр вә ја бет-еллиләр. Онлар ән азы 3 ил фасиләсиз олараг бирҝә јухарыда садаланан хидмәт нөвләринин бириндә иштирак етмәлидирләр. Онлар инҝилис дилиндә сәлис данышмалы, охумалы вә јазмалыдырлар.

Јазылма гајдасы: ҹүтлүкләр филиал комитәси тәрәфиндән дәвәт олуна биләрләр.

АБШ-дан олан Лада вә Моник һал-һазырда Африкада хидмәт едирләр. Лада дејир: «Ҝилеад Мәктәби бизи дүнјанын истәнилән јеринә ҝетмәјә вә голларымызы чирмәләјиб әзиз гардашларымызла бәрабәр чалышмаға һазырлады».

Моник әлавә едир: «Аллаһын Кәламындан өјрәндикләрими тәтбиг едәндә тәјинатым мәнә бөјүк севинҹ ҝәтирир. Бу севинҹ Јеһованын мәһәббәтинин бир сүбутудур».

Филиал Комитәләринин Үзвләри вә Һәјат Јолдашлары үчүн Мәктәб

Мәгсәд: филиалларын комитә үзвләринә Бет-Елдә ҝөрүлән ишләрин гајғысына даһа јахшы галмаға, јығынҹагларла бағлы мәсәләләрлә мәшғул олмаға вә әразиләринә дахил олан рајон вә вилајәтләрә, еләҹә дә әдәбијјатларын тәрҹүмәсинә, чап едилмәсинә вә чатдырылмасына нәзарәт етмәјә көмәк етмәк.

Кечирилмә мүддәти: ики ај.

Кечирилдији јер: Ҝөзәтчи Гүлләсинин Патерсондакы (Нју–Јорк, АБШ) Тәлим Мәркәзи.

Тәләб: филиал вә ја өлкә комитәләринин үзвләри, јахуд да бу тәјинаты алаҹаг гардашлар.

Јазылма гајдасы: гардашлар вә һәјат јолдашлары Рәһбәрлик Шурасы тәрәфиндән дәвәт олунурлар.

25-ҹи синфи битирән Лоуел вә Кара Ниҝеријада хидмәт едирләр. Лоуел дејир: «Алдығым тәлим мәнә хатырлатды ки, нә гәдәр мәшғул олмағымдан вә ҝөрдүјүм ишдән асылы олмајараг, Јеһованы разы салмагда ән ваҹиб амил руһаниликдир. Тәлим заманы вурғуланырды ки, башгалары илә мүнасибәтдә Јеһованын хидмәтчиләринә ҝөстәрдији мәһәббәти тәглид етмәк ваҹибдир».

Кара әлавә едир: «Тәлим заманы сөјләнилән нөвбәти сөзләр мәни дүшүнмәјә вадар етди: әҝәр мән һансыса мөвзуну ајдын изаһ едә билмирәмсә, ону башгаларына өјрәтмәздән өнҹә өзүм арашдырмалыјам».