Падшаһлығын 100 иллик фәалијјәти сизә неҹә тәсир едир?

1, 2. Аллаһын Падшаһлығы нәји һәјата кечирәҹәк вә биз Падшаһлығын мүтләг ҝәләҹәјинә нәјә ҝөрә әмин ола биләрик?

ЕРАМЫЗЫН 31-ҹи илинин јазында Иса Мәсиһ Капернаһум јахынлығындакы дағда давамчыларына: «Гој падшаһлығын ҝәлсин», — дејә дуа етмәји өјрәдирди (Мат. 6:10). Бу ҝүн чохлары Падшаһлығын нә вахтса ҝәләҹәјинә шүбһә едирләр. Лакин биз әминик ки, Аллаһын Падшаһлығынын ҝәлмәси барәдә етдијимиз сәмими дуалара мүтләг ҹаваб вериләҹәк.

² Јеһова Падшаһлыг васитәсилә ҝөјдәки вә јердәки аиләсини бирләшдирәҹәк. Аллаһын бу нијјәти ҝерчәкләшәҹәк (Јешаја 55:10, 11). Әслиндә, Јеһова артыг Падшаһдыр. Өтән 100 ил әрзиндә баш вермиш һәјәҹанландырыҹы һадисәләр буна сүбутдур. Јеһова милјонларла садиг тәбәәси наминә бөјүк вә мөһтәшәм ишләр ҝөрүр (Зәк. 14:9; Вәһј 15:3). Бунунла белә, Јеһованын Падшаһ олмасы вә Исанын һаггында дуа етмәји өјрәтдији Аллаһын Падшаһлығынын ҝәлмәси фәргли шејләрдир. Бәс бу һадисәләр арасында фәрг нәдәдир вә онлар сизә неҹә тәсир едир?

ЈЕҺОВАНЫН ТАХТА ЈҮКСӘЛДИЛМИШ ПАДШАҺЫ ҺӘРӘКӘТӘ КЕЧИР

3. а) Иса нә вахт вә һарада Падшаһ тәјин едилди? б) Падшаһлығын 1914-ҹү илдә гурулдуғуна сизи нә әмин едиб? (Һашијәјә бах.)

³ Даниел пејғәмбәрин 2500 ил әввәл дедији сөзләрә XIX әсрин сонларына јахын ајдынлыг ҝәтирилди. Пејғәмбәрликдә дејилир: «О падшаһларын дөврүндә ҝөјләрин Аллаһы һеч вахт дағылмајан бир падшаһлыг гураҹаг» (Дан. 2:44). Мүгәддәс Китаб Тәдгигатчылары 1914-ҹү илин әламәтдар ил олаҹағыны мүәјјәнләшдирмәк үчүн онилликләр сәрф етмишләр. Һәмин вахт әксәр инсанлар никбин әһвал-руһијјәдә идиләр. Неҹә ки бир шаир демишди: «1914-ҹү илдә дүнја үмидлә вә вәдләрлә долу иди». Анҹаг һәмин илин сонларында Биринҹи Дүнја мүһарибәсинин башламасы илә Мүгәддәс Китаб пејғәмбәрлији јеринә јетди. Бунун ардынҹа гытлыгларын, зәлзәләләрин вә епидемијаларын олмасы, о ҹүмләдән, Мүгәддәс Китабын диҝәр пејғәмбәрликләринин јеринә јетмәси Иса Мәсиһин 1914-ҹү илдән ҝөјдә Аллаһын Падшаһлығынын Падшаһы кими идарә етмәјә башладығыны там сүбут едирa. Јеһова Оғлуну Падшаһ тәјин етмәклә, әслиндә, јени мәнада Падшаһ олду.

4. Јени тәјин олунмуш Падшаһ дәрһал нә етди вә сонра о, диггәтини кимләрә јөнәлтди?

⁴ Аллаһын јени тәјин едилмиш Падшаһынын илк иши Атасынын баш дүшмәни олан Шејтанла вурушмаг олду. Иса мәләкләрилә бирҝә Иблиси вә онун ҹинләрини ҝөјдән јерә атды. Бу, ҝөјдә бөјүк севинҹә, јердә исә ҝөрүнмәмиш бәлалара сәбәб олду. (Вәһј 12:7—9, 12 ајәләрини оху.) Сонра Падшаһ јердәки тәбәәләрини тәмизләмәк, тәлим вермәк, еләҹә дә онлары Аллаһын ирадәсини јеринә јетирмәк ишинә тәшкил етмәк үчүн јерә нәзәр салды. Ҝәлин ҝөрәк онлар Падшаһлығын ҝөрдүјү бу үч ишә мүсбәт һај вермәклә бизә неҹә ҝөзәл нүмунә гојублар.

ПАДШАҺ ӨЗ САДИГ ТӘБӘӘЛӘРИНИ САФЛАШДЫРЫР

5. 1914-ҹү илдән 1919-ҹу илин әввәлләринә гәдәр һансы тәмизлик иши ҝөрүлдү?

⁵ Тахта јүксәлмиш Падшаһ ҝөјләри Шејтанын вә ҹинләринин пис тәсириндән тәмизләдикдән сонра Јеһова Исаја јердәки давамчыларынын руһани вәзијјәтини јохламағы вә сафлашдырмағы тапшырды. Малаки пејғәмбәр буну руһани тәмизләнмә кими тәсвир етмишди (Мал. 3:1—3). Тарих ҝөстәрир ки, бу һадисә 1914-ҹү илдән 1919-ҹу илин әввәлләринә гәдәр давам етдиb. Јеһованын ваһид аиләсинин бир һиссәси олмаг үчүн биз тәмиз, јәни мүгәддәс олмалыјыг (1 Пет. 1:15, 16). Биз јалан динлә вә ја сијасәтлә өзүмүзү мурдарламамалыјыг.

6. Биз руһани гида илә неҹә тәмин олунуруг вә бу нә үчүн ваҹибдир?

⁶ Сонра Иса падшаһлыг сәлаһијјәтиндән истифадә едәрәк «садиг вә ағыллы нөкәр» тәјин етди. Бу нөкәр Исанын һимајәси алтында олан «бир сүрүдә» бирләшмиш һәр кәси мүнтәзәм олараг сағлам руһани гида илә тәмин етмәли иди (Мат. 24:45—47; Јәһ. 10:16). 1919-ҹу илдән бәри мәсһ олунмуш гардашлардан ибарәт кичик груп «[евдәки] гуллугчулара» гида вермәк мәсулијјәтини сәдагәтлә јеринә јетирир. Онун тәјин етдији бу канал васитәсилә верилән бол руһани гида бизә иманда мөһкәмләнмәјә көмәк едир. Бу, бизим руһани, әхлаги, әгли вә физики ҹәһәтдән тәмиз галмаг әзмимизи ҝүҹләндирир. Бу руһани гида һәмчинин бизи маарифләндирир вә бу ҝүн јер үзүндә ҝөрүлән ән ваҹиб ишдә там иштирак етмәк үчүн јарагландырыр. Бәс сиз бу тәдбирләрин һәр бириндән там олараг фајдаланырсынызмы?

ПАДШАҺ ӨЗ ТӘБӘӘЛӘРИНИ БҮТҮН ДҮНЈАДА ТӘБЛИҒ ЕТМӘЈӘ ҺАЗЫРЛАЈЫР

7. Иса јердә оларкән һансы ваҹиб ишин тәмәлини гојду вә бу иш нә вахта гәдәр давам етмәли иди?

⁷ Иса јерүзү хидмәтинә башлајанда елан етмишди: «Мән Аллаһын падшаһлығы һаггында хош хәбәри башга шәһәрләрә дә бәјан етмәлијәм, ахы Аллаһ мәни бу иш үчүн ҝөндәриб» (Лука 4:43). Иса үч ил јарым әрзиндә һәјатыны тамамилә бу ишә һәср етмишди. О, шаҝирдләринә өјрәдирди: «Ҝетдијиниз јерләрдә: “Сәмави падшаһлыг јахынлашыб”, — дејәрәк тәблиғ един» (Мат. 10:7). Дирилдикдән сонра Иса пејғәмбәрлик етмишди ки, онун шаҝирдләри бу хәбәри «јерин уҹгарларынадәк» јајаҹаглар (Һәв. иш. 1:8). О, бу ваҹиб ишдә бизим ҝүнләрәдәк шәхсән иштирак едәҹәјини вәд етмишди (Мат. 28:19, 20).

8. Падшаһ јердәки тәбәәләрини фәалијјәтә неҹә тәшвиг етди?

⁸ 1919-ҹу илдән бәри «Падшаһлыг һаггындакы бу хош хәбәр»ә јени мәна гатылды (Мат. 24:14). Падшаһ артыг ҝөјдән идарә едирди вә јердәки тәмизләнмиш тәбәәләриндән ибарәт кичик бир груп тәсис етмишди. Онлар Исанын мөһтәшәм тапшырығына — Аллаһын артыг ҝөјдә гурулмуш Падшаһлығы һагда хош хәбәри бүтүн дүнјаја тәблиғ етмәк тапшырығына шөвглә һај вердиләр! (Һәв. иш. 10:42). Мәсәлән, 1922-ҹи илин сентјабрында Оһајо штатынын (АБШ) Сидар-Поинт шәһәриндә кечирилән бејнәлхалг конгресдә Падшаһлығын 20 000-ә јахын тәрәфдары иштирак етмишди. Һәмин конгресдә Рутерфорд гардашын «Падшаһлыг» адлы нитгини сөјләјәркән бәјан етдији: «Будур! Падшаһ артыг һөкмранлыг едир! Сиз онун ҹарчыларысыныз. Буна ҝөрә дә Падшаһы вә онун Падшаһлығыны елан един, елан един, елан един», — сөзләринин орада оланлара неҹә тәсир етдијини бир тәсәввүр един! Нөвбәти ҝүн ики мин нүмајәндә конгресин әразисиндән 72 километр узаглыгда олан евләрә тәблиғ етмәјә ҝетдиләр. Бу ишдә иштирак едән бир гардаш бөлүшүр: «Падшаһлығы бәјан етмәк үчүн едилән чағырышы вә бу иши дәстәкләјәнләрин сәјини һеч вахт унутмајаҹағам!» Бу һиссләри кечирән тәкҹә о дејилди.

9, 10. а) Падшаһлығын тәблиғчиләрини һазырламаг үчүн һансы тәдбирләр ҝөрүлүб? б) Тәшкилатын вердији тәлимләрдән шәхсән сиз һансы фајданы әлдә етмисиниз?

⁹ 1922-ҹи илдә Падшаһлығын 17 000-дән чох мүждәчиси дүнјанын 58 өлкәсиндә фәалијјәт ҝөстәрирди. Анҹаг онлара тәлим кечмәк лазым ҝәлирди. Тәјин олунмуш Падшаһ биринҹи әсрдә шаҝирдләринә нәји, һарада вә неҹә тәблиғ етмәклә бағлы ајдын ҝөстәришләр вермишди (Мат. 10:5—7; Лука 9:1—6; 10:1—11). Буна мүвафиг олараг, бу ҝүн Иса Падшаһлығын тәблиғ ишиндә иштирак едән һәр кәсин тәлимат алмасынын вә еффектив тәблиғ етмәк үчүн вәсаитләрлә тәмин олунмасынын гајғысына галыр (2 Тим. 3:17). Иса мәсиһчи јығынҹағы васитәсилә өз давамчыларыны хидмәтә һазырлајыр. Онун тәлимвермә үсулларындан бири бүтүн дүнјада мөвҹуд олан 111 000-дән чох јығынҹағын һәр бириндә кечирилән Теократик Хидмәт Мәктәбидир. Һал-һазырда бу тәлимдән бәһрәләнән једди милјондан чох тәблиғчи «һәр ҹүр адам»а тәсир едәҹәк тәрздә тәблиғ етмәк вә өјрәтмәк үчүн јарагланыб. (1 Коринфлиләрә 9:20—23 ајәләрини оху.)

¹⁰ Теократик Хидмәт Мәктәби илә јанашы, јығынҹаг ағсаггалларына, субај гардашлара, мәсиһчи әр-арвадлара, филиал комитәләринин үзвләринә вә һәјат јолдашларына, сәјјар нәзарәтчиләрә вә һәјат јолдашларына, еләҹә дә хүсуси тәјинатлы мүждәчиләрә тәлим вермәк үчүн диҝәр теократик мәктәбләр тәсис едилибc. Мәсиһчи Әр-арвадлар үчүн Мүгәддәс Китаб Мәктәбиндә тәлим алмыш бир синфин тәләбәләри бу мәктәбә ҝөрә миннәтдарлыгларыны белә ифадә етмишләр: «Алдығымыз бу хүсуси тәлим сајәсиндә бизим Јеһоваја олан мәһәббәтимиз бирә-беш артды вә башгаларына көмәк етмәк үчүн даһа да сәриштәли олдуг».

11. Тәгибләрә бахмајараг, Падшаһлығын мүждәчиләри нәјин сајәсиндә тәблиғ ишини давам етдирирләр?

¹¹ Ҝениш мигјасда һәјата кечирилән Падшаһлығын тәблиғи вә шаҝирд һазырламаг иши јағы дүшмән Шејтанын нәзәриндән јајынмыр. О, Падшаһлыг ишини дајандырмаг үчүн бу ишә вә хош хәбәри чатдыранлара гаршы бирбаша вә ја ҝизли һүҹумлар едир. Лакин дүшмәнин бу ҹәһдләри боша чыхыр. Јеһова Өз Оғлуну «һәр ҹүр һөкумәт, һакимијјәт, гүдрәт, игтидар» үзәринә тәјин едиб (Ефес. 1:20—22). Атасынын ирадәси јеринә јетсин дејә Иса өз Падшаһ сәлаһијјәтиндән истифадә едәрәк онлары горујур вә рәһбәрлик верирd. Хош хәбәр тәблиғ едилир вә милјонларла сәмими инсана Јеһованын јоллары өјрәдилир. Бу мөһтәшәм ишдә иштирак етмәк бизим үчүн неҹә дә бөјүк шәрәфдир!

ПАДШАҺ ТӘБӘӘЛӘРИНИ ДАҺА БӨЈҮК ИШ ҮЧҮН ТӘШКИЛ ЕДИР

12. Падшаһлыг гуруландан бәри һансы тәшкилати дәјишикликләр едилиб?

¹² Падшаһлыг 1914-ҹү илдә гуруландан сонра Падшаһ Атасынын ирадәсини јеринә јетирмәк үчүн Аллаһын тәшкил олунмуш хидмәтчиләринин јолуну сафлашдырмаға башлады. (Јешаја 60:17 ајәсини оху.) 1919-ҹу илдә тәблиғ ишини тәшкил етмәк үчүн һәр бир јығынҹаға хидмәт рәһбәри тәјин едилди. 1927-ҹи илдә исә һәр базар ҝүнү евдән-евә тәблиғ иши тәшкил едилди. Падшаһлығын тәрәфдарлары 1931-ҹи илдә Мүгәддәс Јазылара әсасән Јеһованын Шаһидләри адыны гәбул едәндә даһа бөјүк ишләр ҝөрмәјә тәшвиг олундулар (Јешаја 43:10—12). 1938-ҹи илдә јығынҹагларда мәсул кишиләрин демократик јолла сечилмәси теократик тәјинатла әвәз едилди. 1972-ҹи илдә јығынҹаға нәзарәт етмәк үчүн артыг бир нәзарәтчи јох, ағсаггаллар шурасы тәјин едилди. Тәләбләрә ҹаваб верән бүтүн кишиләр Аллаһын сүрүсүнү отармаг ишинә ҹан атмаға тәшвиг олунурду (1 Пет. 5:2). 1976-ҹы илдә Рәһбәрлик Шурасынын үзвләри бүтүн дүнјада Падшаһлыг ишинә нәзарәт етмәк үчүн алты комитәјә бөлүндү. Јеһованын тәјин олунмуш Падшаһы теократик јолла, јәни Аллаһын рәһбәрлији илә Падшаһлығын тәбәәләрини тәдриҹән артан истигамәтдә тәшкил едир.

13. Падшаһлығын 100 ил әрзиндә ҝөрдүјү ишләр сизә неҹә тәсир едиб?

¹³ Ҝәлин Падшаһын өз һакимијјәтинин илк 100 илиндә нәләри һәјата кечирдијинә нәзәр салаг. О, Јеһованын ады наминә халг тәмизләјиб. Падшаһлыг һагда хош хәбәрин 239 өлкә вә әразидә тәблиғинә рәһбәрлик едиб вә милјонларла инсана Јеһованын јолларыны өјрәдиб. О, өзләрини Атасынын ирадәсини јеринә јетирмәјә ҹанла-башла тәгдим едән једди милјондан артыг садиг тәбәәни бирләшдириб (Мәз. 110:3). Һәгигәтән дә, Јеһованын Өз Падшаһлығы васитәсилә ҝөрдүјү ишләр бөјүк вә еҹазкардыр! Гаршыда бизи бундан да һејрәтамиз ишләр ҝөзләјир!

АЛЛАҺЫН ПАДШАҺЛЫҒЫНЫН ҜӘТИРӘҸӘЈИ ХЕЈИР-ДУАЛАР

14. а) «Гој падшаһлығын ҝәлсин», — дејә дуа етмәклә биз Аллаһдан нәји хаһиш етмиш олуруг? б) 2014-ҹү илин иллик ајәси һансыдыр вә нә үчүн бу ајә јеринә дүшүр?

¹⁴ Јеһова Оғлу Иса Мәсиһи 1914-ҹү илдә Падшаһ тәјин етсә дә, бу, бизим «гој падшаһлығын ҝәлсин» дуамызын там ҹавабы дејил (Мат. 6:10). Мүгәддәс Китабда пејғәмбәрлик едилиб ки, Иса «дүшмәнләринин үзәриндә», јәни онларын арасында һөкмранлыг едәҹәк (Мәз. 110:2). Инсан һөкумәтләри Шејтанын тәсири алтында һәлә дә Падшаһлыға гаршы чыхырлар. Аллаһын Падшаһлығынын ҝәлмәси һагда дуа етмәклә биз Аллаһдан тәјин олунмуш Падшаһын вә онун һакимијјәт шәрикләринин инсан һакимијјәтинә сон гојмасыны вә Падшаһлығын бүтүн дүшмәнләрини јер үзүндән силмәсини диләмиш олуруг. Һәмин вахт Даниел 2:44 ајәсиндә Аллаһын Падшаһлығынын бүтүн «падшаһлыглары [әзиб-дағыдаҹағы]» һагда дејилән пејғәмбәрлик јеринә јетәҹәк. Бу, Падшаһлығын сијаси дүшмәнләринин сону олаҹаг (Вәһј 6:1, 2; 13:1—18; 19:11—21). Бунун баш вермәсинә чох аз галыб. Буна ҝөрә дә Аллаһын Падшаһлығынын ҝөјдә гурулмасынын 100-ҹү илиндә, 2014-ҹү илин иллик ајәси олараг Матта 6:10 ајәсиндә јазылан: «Гој падшаһлығын ҝәлсин», — сөзләринин сечилмәси лап јеринә дүшүр!

15, 16. а) Миниллик Һөкмранлыг заманы һансы мөһтәшәм ишләр баш верәҹәк? б) Иса Падшаһлығынын сонунда нә едәҹәк вә бунун Јеһованын бүтүн хилгәтлә бағлы нијјәтинә һансы аидијјәти олаҹаг?

¹⁵ Падшаһ Аллаһын дүшмәнләрини мәһв етдикдән сонра о, Шејтаны вә онун ҹинләрини миниллик дибсиз үммана атаҹаг (Вәһј 20:1—3). Дүшмәнин тәсири алтында олмајан бир мүһитдә Падшаһлыг Исанын фидјә гурбанлығынын фајдасыны тәтбиг едәҹәк вә Адәмин ҝүнаһынын нәтиҹәләрини тамамилә арадан галдыраҹаг. Падшаһ өлүм јухусунда олан сонсуз сајда инсаны дирилдәҹәк вә онлара Јеһова һагда билик вермәк үчүн ҝениш тәлим програмы тәшкил едәҹәк (Вәһј 20:12, 13). Бүтүн јер үзү Еден бағы кими ҹәннәт олаҹаг. Бүтүн садиг инсанлар камиллијә јетишәҹәк.

¹⁶ Мәсиһин Миниллик Һөкмранлығынын сонунда Аллаһын Падшаһлығы бу мәгсәдә чатаҹаг. Сонра Иса Падшаһлығы Атасына тәһвил верәҹәк. (1 Коринфлиләрә 15:24—28 ајәләрини оху.) Јеһова илә јер үзүндәки өвладлары арасында артыг васитәчијә еһтијаҹ галмајаҹаг. Аллаһын бүтүн сәмави оғуллары вә јердәки өвладлары ваһид бир аилә кими сәмави Аталары илә вәһдәтдә олаҹаглар.

17. Падшаһлыгла бағлы нәдә гәтијјәтлисиниз?

¹⁷ Падшаһлыг гуруландан бәри 100 ил әрзиндә баш верән һадисәләр бизи Јеһованын һәр шејә нәзарәт етдијинә вә Онун јер үзү үчүн олан нијјәтинин јеринә јетәҹәјинә әмин едир. Ҝәлин Аллаһын садиг тәбәәси олмаға, еләҹә дә Падшаһы вә онун Падшаһлығыны бәјан етмәјә давам едәк. Биз там әминик ки: «Гој падшаһлығын ҝәлсин», — дејә үрәкдән етдијимиз дуаны Јеһова мүтләг ҹавабландыраҹаг!