Нараһатлыгларла долу дүнјада үмид
«АДИ вәтәндашлар ҹәмијјәт үчүн хејирхаһ ишләр ҝөрмәјә вә проблемләри һәлл етмәјә инди әввәлкиндән даһа чох гадирдирләр». Бу сөзләри Бирләшмиш Штатларын сабиг президенти Бил Клинтон 2006-ҹы илин мартында Канаданын Оттава шәһәриндә кечирилән конфрансда сөјләмишди. О, белә гәнаәтә ҝәлмишдир ки, 2004-ҹү илдә баш верән сунамидән сонра халглар бир-биринә јардым әлини узатмаға даһа чох мејлли олмушлар вә сәсиндә никбинлик, әлавә етмишдир ки, инди дүнја «ҝөрүнмәмиш гаршылыглы асылылыг вәзијјәтиндәдир».
Тәбии фәлакәтләрин ишыглы ҝәләҹәк наминә чалышмаг үчүн инсанлары бирләшдирәҹәјини ҝөзләјә биләрикми? «Ҝөрүнмәмиш гаршылыглы асылылыг» ҝәләҹәкдә һәгиги әмин-аманлыг вә даими тәһлүкәсизлијин олаҹағына инанмаға әсас верирми?
Һәгиги үмид мәнбәји
Бәшәријјәтин алты мин илдән чох дөврү әһатә едән тарихи ҝөстәрир ки, инсанлар дөнә-дөнә бир-бирләринин үмидләрини пуча чыхармышлар. Елә бу сәбәбдән дә Аллаһдан илһам алмыш Јазылар бизә мәсләһәт ҝөрүр: «Әсилзадәләрә, сизи гуртара билмәјән бәшәр оғлуна ҝүвәнмәјин» (Мәзмур 146:3). Үмидимизи дүнјанын тәшкилатларына, онун наз-не’мәтләринә бағламаг, онун арзулары илә јашамаг јалныз мә’јуслуға ҝәтириб чыхарыр. Белә ки «дүнја вә онун еһтирасы кечиб ҝедир» (1 Јәһја 2:17).
Анҹаг әсрләр бојунҹа салеһ инсанлар Аллаһа үмид бәсләмишләр, онларын үмиди исә һеч вахт боша чыхмамышдыр. Мүгәддәс Китаб Аллаһы гәдим «Исраилин Үмидҝаһы», Исраилин «аталарынын Үмидҝаһы», һәмчинин үмид, инам, е’тибар ифадә олунан бир чох башга титулларла адландырыр (Јеремја 14:8; 17:13; 50:7). Бәли, Мүгәддәс Јазылар бизи ‘Рәббә үмид бағламаға’ тәшвиг едир (Мәзмур 27:14).
Сүлејманын мәсәлләри 3:5, 6 ајәләриндә Аллаһ өјүд верир: «Бүтүн гәлбинлә Рәббә ҝүвән, өз идракына е’тибар етмә. Бүтүн јолларында Ону таны, О сәнин јолларыны дүзәлдәр». Бу вә’дә үрәкдән е’тибар етмәјә сизин там әсасыныз вардыр, чүнки Јеһова дәјишмәз, е’тибарлы вә сөзүнә садиг Аллаһдыр (Малаки 3:6; Јагуб 1:17). О сизин јахшылығынызы истәјир, әҝәр сиз Онун Кәламы олан Мүгәддәс Китабда јазыланлара һәмишә әмәл етсәниз, орадакы мәсләһәтләр бу горхулу дүнјада сизә дүз јолу ҝөстәрәҹәк (Јешаја 48:17, 18).
Аллаһын рәһбәрлијинә үрәкдән табе олан инсан нөвбәти вә’дә инана биләр: «Горхма, чүнки Мән сәнинләјәм, дәһшәтә ҝәлмә, чүнки Аллаһын Мәнәм. Сәни гүввәтләндирәҹәјәм, сәнә көмәк едәҹәјәм. Садиг сағ әлимлә Сәнә дајаг олаҹағам» (Јешаја 41:10). Бу вә’д үзәриндә дүшүнмәклә јанашы сәмими дуалар етмәк Јеһова Аллаһы һәгигәтән севәнләрә бөјүк тәсәлли верир, чүнки беләликлә онлар чәтинликләрин вә нараһатчылыгларын өһдәсиндән ҝәлә билирләр.
Јеһованын Шаһиди олан ики ушаг анасы Андреа дејир: «Дара дүшәндә јалныз дуалар вә Јеһованын вә’дләри үзәриндә дүшүнмәк мәнә ҝүҹ верир. Јеһова илә сых мүнасибәтими горујанда, бу мәнә руһдан дүшмәмәјә көмәк едир».
Јеһоваја үмидинизи мөһкәмләндирин
Јеһоваја үмид бағламағын ваҹиблијини гејд едәрәк бир мәзмурчу јазырды: «Ганунуну севәнләр бөјүк әмин-аманлыг тапырлар, онлар һеч нә илә бүдрәмәзләр» (Мәзмур 119:165). Аллаһын Кәламыны дүз нијјәтлә өјрәнәрәк зеһнинизи вә үрәјинизи ‘доғру, еһтирамлы, әдаләтли, пак, ҹазибәли, е’тибарлы, фәзиләт вә тә’рифә лајиг’ фикирләрлә долдураҹагсыныз. Бу сизин руһанилијинизә јахшы тә’сир ҝөстәрәҹәк. Әҝәр белә шејләри ешитмәк, өјрәнмәк, онлары һәјатда тәтбиг етмәк үчүн сә’ј ҝөстәрсәниз, «сүлһ верән Аллаһ сизинлә олаҹагдыр» (Филипилиләрә 4:8, 9).
Ҹон өзүнүн бөјүк тәҹрүбәсиндән ирәли ҝәләрәк дејир: «Ҝәләҹәјә никбин бахмаг үчүн әввәлҹә өз шәхсијјәтимдә вә дүшүнҹә тәрзимдә көклү дәјишикликләр етмәли, руһани инсан олмалы идим ки, ҝөрүнмәз Аллаһа јахынлашмағын ваҹиблијини дәрк едим. Руһани инсан олмаг исә Мүгәддәс Китабы охујуб, үзәриндә дүшүнәрәк Аллаһын нөгтеји-нәзәринә јијәләнмәк демәкдир».
Сиз Аллаһдан илһам алмыш Јазылардакы тәравәтләндириҹи, һәјат верән һәгигәт суларыны ичсәниз, һәр ҝүн күтләви информасија васитәләри илә јајылан, сону олмајан пис хәбәрләр селинә гаршы еффектив вә сынагдан чыхмыш әлаҹы тапмыш олаҹагсыныз. Мүгәддәс Китаб мәсләһәтләринә әмәл етсәниз, аилә телләриниз мөһкәмләнәр вә нараһатчылығыныз азалар. Бундан башга, Аллаһ вә’д едир ки, О, ‘үрәји бүтүнлүклә Онунла оланлары гүввәтләндирмәјә’ һазырдыр (2 Салнамәләр 16:9). О, ишләри јолуна елә гојаҹаг ки, горхмаға һеч бир сәбәбиниз галмајаҹаг.
Мүһарибәнин дәһшәтләринин вә сојгырымынын шаһиди олан Финеес дејир: «Мән һәјатымы Јеһованын гајғыкеш әлләринә е’тибар етмәји өјрәндим. Мүгәддәс Китаб принсипләри илә јашамағын сајәсиндә бир чох проблемләрдән өзүмү горумушам». Сиз һәгигәтән дә Јеһова Аллаһа ҝүвәнсәниз, О сизә дәфедилмәз дағ кими ҝөрүнән проблемләрин өһдәсиндән ҝәлмәјә көмәк едәҹәк (Мәзмур 18:29). Валидејнләри илә јахын мүнасибәти олан ушаг хәстәләнәндә вә ја башга шејә ҝөрә нараһат оланда да ата-анасына ҝүвәнир вә онларын һимајәсиндә өзүнү тәһлүкәсизликдә һисс едир. Јеһоваја үмид етмәјә сә’ј ҝөстәрсәниз, сиз дә өзүнүзү белә һисс едәҹәксиниз (Мәзмур 37:34).
Үмид үчүн мөһкәм тәмәл
Иса Мәсиһ шаҝирдләринә демишди: «Белә дуа един: “Еј ҝөјләрдә олан Атамыз, адын мүгәддәс тутулсун. Сәлтәнәтин ҝәлсин. Ҝөјдә олдуғу кими, јердә дә Сәнин ирадән олсун”» (Матта 6:9, 10). Сәмави Падшаһлыг — Иса Мәсиһин башчылыг етдији һөкумәт васитәсилә Аллаһ Јер үзәриндә Өз әдаләтли һакимијјәтини һәјата кечирәҹәк (Мәзмур 2:7-12; Даниел 7:13, 14).
Һәјатын һәр саһәсинә тә’сир едән горху һисси ачыг-ајдын ҝөстәрир ки, Аллаһын мүдахиләсинә еһтијаҹ вар. Хошбәхтликдән, Аллаһ тезликлә һәрәкәтә кечәҹәк. Аллаһ тәрәфиндән Хиласкар Падшаһ кими тахта чыхарылан Иса Мәсиһә Јеһованын һакимијјәтинә бәраәт газандырмаг вә Онун адыны тәмизә чыхармаг сәлаһијјәти һәвалә олунуб (Матта 28:18). Тезликлә Падшаһлыг диггәтини Јер күрәсинә јөнәлдиб, горху вә нараһатчылыға сәбәб олан һәр шеји арадан галдыраҹаг. Јешаја 9:6 ајәси сүбутлар ҝәтирир ки, Иса Мәсиһ буну етмәјә гадир бир Падшаһдыр. Мәсәлән, о, «Әбәди Ата», «Е’ҹазкар Мәсләһәтчи» (ЈД) вә «Әмин-аманлыг Һөкмдары» адланыр.
Ҝәлин ҝөрәк Иса һансы мә’нада «Әбәди Ата»дыр. Онун фидијә гурбанлығы сајәсиндә итаәткар инсанлара јер үзүндә әбәди јашамаг үмидини вермәјә нәинки гүввәси вә сәлаһијјәти чатыр, бу, һәм дә онун арзусудур. Бу о демәкдир ки, адамлар әввәл-ахыр илк инсан олан Адәмдән мирас алдыглары ҝүнаһ вә гејри-камилликдән азад олаҹаглар (Матта 20:28; Ромалылара 5:12; 6:23). Мәсиһ, һәмчинин Аллаһын она вердији сәлаһијјәтдән истифадә едәрәк һәјатыны итирмиш бир чох инсанлары дирилдәҹәк (Јәһја 11:25, 26).
Иса јер үзүндә оланда «Е’ҹазкар Мәсләһәтчи» олдуғуну сүбут етди. Аллаһын Кәламыны билдији вә инсан тәбиәтини чох ҝөзәл баша дүшдүјү үчүн, Иса ҝүндәлик проблемләри неҹә һәлл етмәк лазым олдуғуну билирди. О, ҝөјдә тахта чыхандан сонра да, Јеһованын инсанларла әсас үнсијјәт васитәси кими хидмәт едәрәк, «Е’ҹазкар Мәсләһәтчи» олараг галмагдадыр. Исанын Мүгәддәс Китабда јазылан мәсләһәтләри мүдрик вә гүсурсуздур. Бунлары билмәк вә онлара инанмаг сизин һәјатынызы гејри-мүәјјәнликдән вә ифлиҹедиҹи горхудан азад едәҹәкдир.
Јешаја 9:6 ајәси Исаны һәм дә «Әмин-аманлыг Һөкмдары» адландырыр. Мәсиһ тезликлә гүввәсиндән истифадә едәрәк инсанлар арасындакы сијаси, сосиал вә игтисади бәрабәрсизлији арадан галдыраҹаг. О буну неҹә едәҹәк? Бәшәријјәти бир сүлһсевәр Падшаһлыға — Хиласкар Падшаһлыға табе етдирмәклә (Даниел 2:44).
Падшаһлығын рәһбәрлији алтында бүтүн јер үзүндә әмин-аманлыг әбәдијјән һөкм сүрәҹәк. Буна нә үчүн әмин ола биләрсиниз? Јешаја 11:9 ајәсиндә бунун сәбәби ҝәтирилир: «Мүгәддәс дағымын һеч бир јериндә һеч кимә зәрәр дәјмәјәҹәк, һеч бир кәс [Падшаһлығын тәбәәләри] о бирисини мәһв етмәјәҹәк, һәгигәтән, сулар дәнизи неҹә долдурурса, дүнја да Рәббин билији илә елә долаҹаг». Нәһајәт ки јер үзүндә јашајан һәр инсан Аллаһ һаггында дәгиг билијә малик олаҹаг вә Она табе олаҹаг. Мәҝәр бу үмид сизин гәлбинизи исиндирмирми? Әҝәр беләдирсә, јубанмадан Јеһова һаггында даһа чох өјрәнин.
Мүгәддәс Китабын буҝүнкү һадисәләр һаггында әслиндә нә өјрәтдијини вә ҝәләҹәјә даир вердији вә’дләри арашдырараг, Аллаһ һаггында иманы мөһкәмләдән вә һәјат верән билик әлдә едә биләрсиниз. Буна ҝөрә дә, биз сизи јахынлығынызда јашајан Јеһованын Шаһидләри илә әлагә сахламаға вә евдә пулсуз Мүгәддәс Китаб өјрәнмәсинә башламаға дә’вәт едирик. Горхуну сакитләшдирмәјин вә нараһатлыгларла долу дүнјада һәгиги үмид тапмағын јеҝанә чарәси будур.
[7-ҹи сәһифәдәки чәрчивә/шәкилләр]
Нә үчүн сәмави Падшаһлыға үмид етмәк олар?
Аллаһын Падшаһлығынын Падшаһы олан Иса Мәсиһә ҝөјдә вә јердә һөкмранлыг етмәк габилијјәти вә һүгугу верилиб (Матта 28:18). О, јерин еколоҝијасыны мүкәммәл сурәтдә бәрпа едәҹәк. Онун һәм дә хәстәликләр үзәриндә һакимијјәти вар. Исанын јер үзүндә етдији ишләр онун ҝәләҹәкдә камил вә е’тибарлы Падшаһ кими һөкмранлыг едәркән ҝөрәҹәји даһа бөјүк ишләрин нүмунәси иди. Хиласкар Падшаһын ашағыда ҝөстәрилән һансы хүсусијјәти сизин даһа чох хошунуза ҝәлир?
▪ Садә (Марк 10:13-16).
▪ Ағыллы вә гәрәзсиз (Марк 10:35-45).
▪ Мәс’улијјәтли вә өз хејрини ҝүдмәјән (Матта 4:5-7; Лука 6:19).
▪ Салеһ вә әдаләтли (Јешаја 11:3-5; Јәһја 5:30; 8:16).
▪ Гајғыкеш, нәзакәтли вә һәлим (Јәһја 13:3-15).
[4-ҹү сәһифәдәки шәкил]
Мүгәддәс Китабы охумаг вә үзәриндә дүшүнмәк үмидимизи Јеһоваја бағламаға көмәк едәр.