Valideynlər, övladlarınızı uşaqlıqdan tərbiyə edin!
1 “Uşağı gedəcəyi yola görə yetişdir, yaşlı olunca da ondan ayrılmaz” (Sül. məs. 22:6). Valideynlər, övladlarınızın həqiqət yolundan ayrılmalarını istəmirsinizsə onları nə vaxtdan tərbiyə etməyə başlamalısınız? Həyatlarının ilk çağından!
2 Timoteyin, “uşaqlıqdan e’tibarən” ruhani tərbiyə aldığını söyləyərkən, Pavel ehtimal ki, onun lap körpə çağlarından öyrədildiyini nəzərdə tuturdu (2 Tim. 3:14, 15). Bunun sayəsində Timotey çox gözəl, ruhani insan oldu (Filip. 2:19–22). Valideynlər, siz də övladlarınızı “uşaqlıqdan e’tibarən” tərbiyə etməlisiniz ki, onlar “Rəbbin önündə” böyüsünlər (1 Sam. 2:21).
3 Böyümələri üçün zəruri olan həqiqət suyu ilə tə’min edin. Böyümələri üçün, cavan ağaclar daima suvarılmaya ehtiyac duyduqları kimi, Allahın yetkin xidmətçiləri olmaq üçün də hər yaşda olan uşaqlar Müqəddəs Kitabın həqiqəti ilə suvarılmağa ehtiyac duyurlar. Uşaqlara həqiqəti öyrətməyin və Yehova ilə yaxın qarşılıqlı münasibət inkişaf etdirməkdə kömək etməyin əsas üsulu, Müqəddəs Kitabı müntəzəm olaraq ailəlikcə öyrənməkdir. Ancaq siz valideynlər, hər uşağın imkanını nəzərə almalısınız. Kiçik uşaqlar üçün, tez–tez keçirilən qısamüddətli öyrənmələr, ehtimal ki, hərdənbir və uzunmüddətli öyrənmələrdən daha effektlidir (Təs. 11:18, 19).
4 Uşaqların öyrənmək qabiliyyətini qiymətləndirməmək olmaz. Onlara Müqəddəs Kitab personajları haqqında danışın. Qoy onlar Müqəddəs Kitab əsasında epizodlar çəksinlər və orada təsvir olunan hadisələrə əsasən səhnəciklər qursunlar. Cəmiyyətimizin video və audiokasetlərindən, həmçinin kasetə yazılmış Müqəddəs Kitab dramlarından istifadə edin. Ailəvi öyrənməni uşaqlarınızın qabiliyyətlərinə və yaşlarına uyğunlaşdırın. Başlanğıcda onları sadə üsullarla və az–az öyrədin; sonra isə uşaq böyüdükcə, bunu daha geniş formada və məzmunlu edin. Qoy sizin məşğələləriniz canlı və müxtəlif olsun. Əgər uşağınızın Allahın Kəlamını “arzulamasını” istəyirsinizsə, öyrənməni olduqca maraqlı edin (1 Pet. 2:2).
5 Yığıncağın fəaliyyətinə cəlb edin. Övladlarınızın qarşısında, onlara yığıncağın bir hissəsi olmaqda kömək edə biləcək ardıcıl məqsədlər qoyun. Birinci məqsəd nə ola bilər? İki uşağın valideynləri söyləyir: “Biz hər ikisinə də Padşahlıq Zalında sakit oturmağı öyrətməkdən başladıq”. Sonra isə yığıncaqda iştirak etmək və Teokratik Xidmət Məktəbinə yazılmaq məqsədində olmaq olar. Təbliğ xidmətində isə traktat təqdim etmək, ayə sitat gətirmək, jurnal paylamaq və mə’nalı söhbət etmək kimi yaxşı məqsədlər də qoymaq olar.
6 Ruhlandırıcı nümunə olun. Uşaqlarınız sizin hər gün Yehova haqqında danışdığınızı, ona dua etdiyinizi, yığıncaqlara getdiyinizi, xidmətdə iştirak etdiyinizi və Allahın iradəsini yerinə yetirməkdən zövq aldığınızı görürlərmi? (Məz. 40:8). Onların bunu görmələri və bu işlərin hamısını birlikdə görməyiniz olduqca vacibdir. Sadiq Şahidlər kimi altı uşaq böyütmüş anası haqqında, böyük qız belə sözlər demişdir: “Hər şeydən çox, bizə anamızın nümunəsi tə’sir bağışlayırdı. Onun nümunəsi güclü ifadələrdən də tə’sirli idi”. Dörd uşağın anası bunları söylədi: “Ən vacibi Yehova necə istəyir” prinsipi sadəcə ifadə yox, bizim həyat tərzimiz idi”.
7 Valideynlər, uşaqlarınıza Allahın Kəlamından olan həqiqəti öyrədərək, qarşılarında ardıcıl məqsədlər qoyaraq və nümunə göstərərək onları körpə çağlarından tərbiyə etməyə başlayın. Buna peşman olmazsınız!