Müqəddəs Kitabı araşdırmaq üçün vaxt təyin etmisinizmi?
ÖTƏN il Rəhbərlik Şurası yığıncaq görüşlərinin cədvəlində dəyişikliklər etmişdi ki, ailələrin Müqəddəs Kitabı birgə öyrənmək və müzakirə etmək üçün daha çox vaxtı olsun. Əgər sən ailə başçısısansa, həyat yoldaşın və uşaqlarınla müntəzəm və səmərəli ailəvi öyrənmə keçir. Uşaqları olmayan cütlüklər bu vaxtı Müqəddəs Kitabı birlikdə öyrənməyə sərf edə bilərlər. Ailə məsuliyyətləri olmayan subay bacı-qardaşlar isə bu vaxtı Müqəddəs Kitabı şəxsən öyrənməyə ayıra bilərlər.
Bir çoxları ailəvi ibadət axşamı üçün edilən dəyişikliklərə görə çox minnətdardırlar. Məsələn, ağsaqqal kimi xidmət edən Kevin yazır: «Yığıncağın hisslərini ifadə etmək üçün heç bir minnətdarlıq sözü bəs etməz. Biz ağsaqqallar həmin axşamı Rəhbərlik Şurasının nəzərdə tutduğu kimi ailəmizlə öyrənmə keçirmək üçün necə istifadə edə biləcəyimizi müzakirə etdik».
Əri ağsaqqal olan Codi yazır: «Bizim 15, 11 və 2 yaşlarında olan üç qızımız var. Biz bu yaxınlarda jest dili yığıncağına keçdik. Bütün görüşlərə hazırlaşmaq üçün çoxlu vaxt və qüvvə sərf etməli oluruq. İndi bu dəyişikliyin sayəsində diqqətimizi ailəvi ibadətə cəmləmək üçün əlavə vaxtımız var».
Daimi pioner kimi xidmət edən Con və Coann cütlüyü yazır: «Çox vaxt ailəvi öyrənməmiz təsadüf nəticəsində alınırdı, çünki çoxlu yığıncaq işlərimiz olduğundan ailəvi öyrənməyə güc-bəla ilə vaxt tapırdıq. Bu dəyişiklik Yehovanın bizə olan ənamıdır. Əgər ondan düzgün istifadə etsək, ruhən təravətlənəcəyik».
20 yaşlarında olan subay qardaş Toni şəxsi öyrənmə üçün çərşənbə axşamını ayırıb. Həftənin digər günlərini isə o, yığıncaq görüşlərinə hazırlaşmağa sərf edir. Toni deyir: «Çərşənbə axşamını səbirsizliklə gözləyirəm. Çünki bu axşamı yalnız Yehovaya ayırmışam. Təxminən iki saat ərzində Yehova ilə münasibətlərimi möhkəmləndirən mövzuları araşdırıram. Öyrənmə üçün çoxlu vaxtım olduğundan oxuduğum ayələr üzərində yaxşı-yaxşı düşünə bilirəm». Bu, hansı bəhrələri gətirib? O davam edir: «İndi Yehovanın məsləhətləri ürəyimdə əvvəlkindən daha dərin kök salıb». Qardaş nümunə gətirir: «“Müqəddəs Yazıların dərk edilməsi” ensiklopediyasından Davud və Yonatan arasındakı dostluq haqda oxumuşam. Yonatanın fədakarlığından çox şey öyrənmişəm. Onun nümunəsi mənə əsil dostluğun nə demək olduğunu daha aydın başa düşməyə kömək edib. Mən hər çərşənbə axşamını səbirsizliklə gözləyirəm ki, daha çox ləl-cəvahirat tapım!»
Şübhə yoxdur ki, Yehovanın bütün xidmətçiləri ailəvi ibadətin və Müqəddəs Kitab öyrənməsinin səmərəli olması üçün əlavə vaxtdan düzgün istifadə etməklə böyük xeyir-dualar biçəcəklər.