Xidməti Təkmilləşdirmə Məktəbi fəaliyyət üçün “geniş qapı” açır
1 Yeremya peyğəmbərin vasitəsilə Yehova qabaqcadan demişdir: “[Xalqımın üzərinə] onları güdəcək çobanlar qoyacağam; və artıq qorxmayacaqlar və əsməcəyə düşməyəcəklər və əksilməyəcəklər” (Yer. 23:4). Bu gün on minlərlə ağsaqqallar bütün millətlərdən olan insanların arasında bu cür çobanlıq işini icra edirlər. Bundan əlavə, şehə bənzər çoxsaylı gənclər Yehovaya həvəslə xidmət edirlər (Məz. 110:3). Yehovanın xalqının yığıncaqları üçün bu təvazökar qardaşlar əsl xeyir-duadırlar! Ruhani biçin davam edir, buna görə qardaşlarına xidmət etməyə hazır olan təcrübəli kişilərə ehtiyac hələ də çoxdur.
2 Subay ağsaqqal və xidməti köməkçilər Xidməti Təkmilləşdirmə Məktəbində gözəl tə’lim alırlar. Bu isə onlara üzərlərinə daha çox məs’uliyyət götürməyə kömək edir. Məktəbin tə’sis edildiyi 1987-ci ildən bəri 999 sinifdə təxminən 140 ölkədən olan 22 000-dən artıq tələbə tə’lim almışdır. Məktəbin sayəsində bu qardaşlar üçün “böyük və fəaliyyət üçün geniş qapı” açılmışdır (1 Kor. 16:9).
3 Məktəbin məqsədi. Xidməti Təkmilləşdirmə Məktəbi təşkilatın tələbatlarından asılı olaraq müxtəlif məsələləri həll etmək üçün tələblərə müvafiq olan qardaşlar hazırlayır. Məktəbdə onlar təbliğ fəaliyyətinə daha yaxşı rəhbərlik etməyi, çobanlıq işini görməyi və yığıncaqda öyrətməyi öyrənirlər. Buraxılışdan sonra tələbələrin bə’zilərini öz ölkələrinə, ya da xarici ölkələrə xüsusi pioner və ya səyyah nəzarətçi tə’yin edirlər. Digərlərini öz yığıncaqlarına, ya da filialın tabeliyində olan və onların köməyi tələb olunan ərazilərə tə’yin edirlər.
4 Səkkiz həftəlik kurs müddətində tələbələr Müqəddəs Kitabı dərindən öyrənirlər. Tə’lim kursu bir çox Müqəddəs Kitab tə’limlərini, çobanlıq vəzifəsini və məsihçi həyatındakı problemləri həll etməkdə kömək edən prinsipləri əhatə edir. Onlar həmçinin Müqəddəs Yazılarda teokratik rəhbərliyə, hüquqi və təşkilati məsələlərə dair nə deyildiyini tədqiq edirlər. Onlar açıq mə’ruzələrlə çıxış etmək üçün xüsusi tə’lim alır və ruhani inkişaflarının sür’ətini artırmaq üçün onların hər birinə şəxsi kömək göstərilir.
5 Tələıblər. Əlbəttə, Xidməti Təkmilləşdirmə Məktəbində oxumaq istəyən namizədlərə qarşı tələblər yüksəkdir. Namizəd fasiləsiz ən azı iki il ağsaqqal və ya xidməti köməkçi kimi xidmət etmiş olmalıdır. O, subay və yaşı isə 23-dən 50-dək olmalıdır. Namizəd məktəb keçirilən dildə səlis oxumağı, yazmağı və danışmağı bacarmalıdır. Onun səhhəti yaxşı olmalı və xüsusi qayğıya və ya qidaya ehtiyacı olmamalıdır. Üstünlük pionerlərə verilir.
6 Məktəbdə oxumaq istəyənlər kömək tələb olunan yerdə xidmət etməyə hazır və qabiliyyətli olmalıdırlar. Bunun üçün İşaya peyğəmbərdəki ruhu əks etdirmək tələb olunur. O, özünü xüsusi bir tapşırığı yerinə yetirmək üçün təqdim etmişdir: “Budur, mən, məni göndər” (İş. 6:8). İşaya həmçinin bütün həyatı boyu təvazökarlıq təzahür etdirirdi. Xidməti Təkmilləşdirmə Məktəbinə ərizə yazan kəslərin məqsədi yüksək mövqeyə sahib olmaq yox, qardaşlarına məhəbbət göstərmək və xidmət etmək arzusu olmalıdır. Məktəb mə’zunlarından gözlənilir ki, onlar öyrəndiklərini başqalarının faydası üçün tətbiq etsinlər (Luka 12:48).
7 Məktəbdə əldə olunan faydalar. Tələbələr səkkiz həftə ərzində keçirilən səmərəli öyrənmə zamanı ‘imanın və... yaxşı tə’limatın sözləri ilə bəslənirlər’ (1 Tim. 4:6). Tə’yin olunduqları yığıncaqlarda və rayonlarda təbliğçilərə kömək etmək və onları ruhlandırmaq üçün onlar yaxşı hazırlıq alırlar. Xidməti Təkmilləşdirmə Məktəbini bitirən tələbələrin tə’yin olunduqları bir çox yerlərdə təbliğ fəaliyyəti genişlənmişdir; pionerlərin sayı, xüsusilə də cavanlar arasında artmışdır; və Allahın xalqına təzəlikcə qoşulan insanlara daha çox şəxsi maraq göstərilməyə başlanılmışdır.
8 Sən subay və 23-dən 50-dək yaşı olan ağsaqqal və ya xidməti köməkçisənmi? Onda nəyə görə Xidməti Təkmilləşdirmə Məktəbinə ərizə təqdim etməyəsən? Sən bir gənc qardaş kimi Yehovaya xidmət etmək üçün uzunmüddətli planlar qurursanmı? Nəyə görə maneəsiz olan sadə həyat sürməyə çalışmayasan? O zaman sənin qarşında “böyük və fəaliyyət üçün geniş qapı” açılacaqdır. Bu sənə böyük sevinc və məmnunluq bəxş edəcək. Xidməti Təkmilləşdirmə Məktəbi tək onun mə’zunları üçün yox, bütün dünyada Allahın xalqının yığıncaqları üçün də xeyir-duadır.
[3 səhifədəki çərçivə]
Tə’limdən əldə etdikləri faydalar
“Mən Məktəbdə Müqəddəs Yazıları istifadə etməyi öyrənmişəm, bu isə doğrudan da xidmətimi və sürüyə hikmətlə qayğı göstərmək bacarığımı yaxşılaşdırdı”.
“Məktəbdən sonra yığıncaqdakı vəzifələrimi yerinə yetirərkən özümü daha arxayın hiss edirəm”.
“Demək olar ki, Məktəb mənim bütün həyatımı, o cümlədən teokratiyaya və Allahın təşkilatına olan münasibətimi də dəyişdi”.
“Məktəb mənə, tələbat olan yerlərdə xidmət etməyə hazır olmaq ruhunu təzahür etdirməyi öyrətdi”.