Biliyimizi təcrübədə tətbiq etməyə kömək edən məktəb
1 Teokratik Xidmət Məktəbinin 2006-cı il üçün proqramındakı materialı öyrənən zaman, Müqəddəs Kitaba əsaslanan məsləhətləri xidmətimizdə və gündəlik həyatımızda tətbiq edərək onlardan faydalanmağa çalışacağıq. Məqsədimiz öyrəndiklərimizi tətbiq etməkdir (Yəh. 13:17; Filip. 4:9).
2 Şərhlər. Bu il üçün olan proqramda Müqəddəs Kitabdan diqqətəlayiq fikirlər bəndində dinləyicilərin iştirakı üçün əlavə bir dəqiqə nəzərdə tutulubdur. Bu o deməkdir ki, diqqətəlayiq fikirləri təqdim edən qardaş, bəndinin birinci hissəsini altı dəqiqə əvəzinə beş dəqiqəyə qurtarmalıdır. Şərh verənlər isə diqqətli olmalıdırlar ki, onlara ayrılan vaxtdan artıq şərh verməsinlər. Yaxşı düşünüb hazırlaşaraq, 30 və ya daha az saniyə ərzində qiymətli fikirlər söyləmək olar. Auditoriya üçün ayrılmış beş dəqiqə ərzində təxminən on nəfər mə’nalı şərhlər verə bilər.
3 Tə’lim verən nitqlər. Müqəddəs Kitabdan diqqətəlayiq fikirlər və tə’lim nitqləri, diqqəti materialın xidmətimizin və gündəlik həyatımızın müxtəlif sahələrinə aid olan cəhətlərinə yönəltməlidir. Natiqin vəzifəsi dinləyicilərdə yalnız fəaliyyət göstərməyə həvəs oyatmaqdan ibarət deyildir. O, nə etməyi və bunu necə həyata keçirməyi göstərməli və məhz bu cür davranmağın nəyə görə faydalı olduğunu izah etməlidir. O, bunu belə söyləməklə edə bilər: «Bu mətn bizə belə bir rəhbərlik təqdim edir» və ya «Biz bu ayələrdən xidmətdə belə istifadə edə bilərik». Ağsaqqallar və xidməti köməkçilər materialın necə tətbiq edilməsini yerli şəraiti mümkün qədər nəzərə alaraq göstərməlidirlər.
4 Materialın tətbiq edilmə üsullarını göstərərkən, Müqəddəs Kitab nümunələrini misal çəkmək xüsusilə effektli ola bilər. Müqəddəs Kitab nümunəsinə müraciət etdikdən sonra, natiq söyləyə bilər: «Biz də buna bənzər vəziyyətlə qarşılaşa bilərik». O əmin olmalıdır ki, gətirilən Müqəddəs Kitab nümunəsi kontekstlə, bütövlükdə Müqəddəs Kitabla və «sadiq və ağıllı qul»un nəşrləri ilə uzlaşır (Mat. 24:45).
5 Müdriklik bilik və idrakdan uğurla istifadə etmək bacarığıdır. «Hikmət hər şeydən üstündür» (Sül. məs. 4:7). «Teokratik Xidmət Məktəbi»ndə aldığımız tə’lim vasitəsilə praktiki müdriklik əldə etdikcə, gəlin, bunu başqaları ilə bölüşmək qabiliyyətini də inkişaf etdirək.