Ruhani məqsədlərinə necə çata bilərsən?
1 İsa bütün məsihçilərə ‘əvvəlcə Allahın Padşahlığını axtarmağı’ tapşırmışdı. Əgər sən gənc məsihçisənsə, şübhəsiz ki, qarşına qoyduğun məqsədlər Yehovaya məhəbbətdən irəli gəlir və İsanın bu sözlərinə müvafiqdir (Mat. 6:33). Sənin məqsədin pioner xidmətinə başlamaqla və ya Padşahlıq təbliğçilərinə daha çox ehtiyac olan yerdə təbliğ etməklə xidmətini genişləndirmək ola bilər. Bə’ziləri Padşahlıq Zallarının tikintisində iştirak etmək, filialda və ya missioner kimi xidmət etmək barədə düşünürlər. Bunlar doğrudan da çox gözəl və tə’rifəlayiq məqsədlərdir!
2 Ruhani məqsədlərini özün üçün bir yerə yazmaq onlara çatmağına kömək edə bilər. «Gözətçi Qülləsi»nin 2004-cü il 15 iyul sayında (rus.) yazılmışdır: «Müəyyənləşməmiş ideyalar sözlərlə ifadə edildikdə aydınlaşır və konkretləşir. Buna görə də, ola bilsin ki, sən məqsədlərini və onlara çatmaq üçün qurduğun planı yazmaq istəyərsən». Bundan əlavə, hal-hazırda sənin üçün əlçatan olan məqsədlər ruhani inkişafına qiymət verməyə və nəzərdə tutduğun məqsəddən yayınmamağa kömək edəcək.
3 Hazırda əlçatan olan məqsədlər. Əgər sən hələ vəftiz olmamısansa, bu məqsədə çatmaq üçün səndən nə tələb olunduğu haqda düşün. Ola bilsin, sənə Müqəddəs Kitabın əsas tə’limlərini daha aydın başa düşmək lazımdır. Bu halda, sitat gətirilən bütün ayələri oxuyaraq «Müqəddəs Kitab öyrədir» kitabını öyrənməyi qarşına məqsəd qoy (1 Tim. 4:15). Başqa bir məqsəd, Bet-Ellilər və Gilead tələbələrindən tələb edildiyi kimi, Müqəddəs Kitabı «Yaradılış»dan «Vəhy»ə kimi oxumaqdır. Bundan sonra da Müqəddəs Kitabı gündəlik oxumağa davam et (Məz. 1:2, 3). Bunun ruhani inkişafına nə qədər kömək edəcəyini bir təsəvvür et! Hər dəfə şəxsi öyrənməyə və Müqəddəs Kitabı oxumağa başlayanda və qurtaranda ürəkdən dua et, öyrəndiklərini tətbiq etmək üçün həmişə imkanlar axtar (Yaq. 1:25).
4 Əgər artıq vəftiz olunmusansa, daha hansı məqsədlərə can ata bilərsən? Təbliğ xidmətini təkmilləşdirməyə ehtiyac duyursanmı? Məsələn, təbliğdə Allahın Kəlamından daha məharətlə istifadə etməyi qarşına məqsəd qoya bilərsənmi? (2 Tim. 2:15). Xidmətini necə genişləndirə bilərsən? Qarşına yaşına və şəraitinə müvafiq konkret məqsədlər qoy. Bunlar nəzərdə tutduğun məqsədinə çatmağa sənə kömək edəcək.
5 Uğurlu əhvalat. 19 yaşlı Toni Yehovanın Şahidlərinin filialında olduqdan sonra, ürəyində Bet-Eldə xidmət etmək arzusu yarandı. Lakin o, müvafiq həyat tərzi sürmür və hələ Allaha həsr olunmamışdı. Toni həyatını Yehovanın normalarına uyğunlaşdırmağı qərara aldı və qarşısına vəftiz olunmaq məqsədi qoydu. Buna nail olandan sonra o, köməkçi, sonra isə daimi pioner xidmətini məqsəd qoyaraq, təqvimində xidmətə başlamaq istədiyi tarixi qeyd etdi. Bir müddət pioner kimi xidmət etdikdən sonra Bet-Elə də’vət alanda onun sevincini təsəvvürünə gətir!
6 Sən də əvvəlcə Allahın Padşahlığını axtarsan, ruhani məqsədlərinə çata bilərsən. Dua edərək ‘işlərini Rəbbə ver’ və onlara nail olmaq üçün sə’ylə çalış (Sül. məs. 16:3; 21:5).
[Öyrənilmə üçün olan suallar]
1. Bə’zi gənc məsihçilərin hansı ruhani məqsədləri vardır?
2. Ruhani məqsədlərinə çatmaqda sənə nə kömək edə bilər?
3. Vəftiz üçün tələblərə müvafiq olmağa kömək edəcək əlçatan məqsədlərdən bir neçəsini söylə.
4. Məqsədləri Bet-Eldə və ya missioner kimi xidmət etmək olan məsihçilər hansı əlçatan məqsədlər qoya bilərlər?
5. Bet-El xidmətinə can atan bir qardaşa qarşısına qoyduğu əlçatan məqsədlər həmin məqsədinə nail olmaqda necə kömək etmişdir?
6. Ruhani məqsədlərinə nail olmaqda sənə nə kömək edə bilər?