Müntəzəm jurnal aparmaq öyrənmə başlamaq üçün əla fürsətdir
1. Yehovanın təşkilatı nə üçün təbliğçiləri maraqlananlara müntəzəm jurnal aparmağa təşviq edir?
1 Bəzi insanlar bizimlə Müqəddəs Kitabı öyrənməsələr də, jurnallarımızı sevə-sevə oxuyurlar. Buna görə də Yehovanın təşkilatı təbliğçiləri maraqlananlara müntəzəm jurnal aparmağa təşviq edir. Jurnallarımızı müntəzəm oxuyan insanlarda çox vaxt Allahın Kəlamına qarşı güclü istək yaranır (1 Pet. 2:2). Nəticə etibarilə, onların oxuduqları hər hansı fikir Müqəddəs Kitab öyrənməsinə razılaşmalarına təkan ola bilər.
2. Müntəzəm jurnal verdiyimiz adamın marağını necə artıra bilərik?
2 Həqiqət toxumunu sula. Jurnalları maraqlanan insana verib tez getmək əvəzinə, onunla ünsiyyət et və yaxşı münasibət qurmağa çalış. Bu, sənə onun şəraitini, maraq dairəsini və nələrə inandığını öyrənməyə və müdrikliklə danışmağa kömək edəcək (Sül. məs. 16:23). Hər başçəkməyə hazırlaş. Mümkünsə, jurnaldan müəyyən fikri və müvafiq ayəni qısaca vurğulamaqla onun ürəyində olan həqiqət toxumunu sula (1 Kor. 3:6). Hər dəfə gəldiyin tarixi, saxladığın jurnalı, müzakirə etdiyin mövzunu və ayəni qeyd et.
3. Müntəzəm jurnal verdiyimiz adamın yanına nə qədər vaxtdan bir getməliyik?
3 Nə qədər vaxtdan bir gəlməli? Ayda bir dəfə jurnalların son saylarını gətirərək təkrar baş çəkə bilərsən. Ancaq şəraitindən və insanın marağından asılı olaraq, bir az da tez-tez gələ bilərsən. Məsələn, jurnal saxladıqdan bir və ya iki həftə sonra yenidən baş çəkə və deyə bilərsən: «Mən saxladığım jurnaldan bir-iki fikri qısaca bölüşüb gedirəm». Bu, onda həmin məqaləni oxumaq üçün iştaha oyadacaq. Əgər o, artıq həmin məqaləni oxuyubsa, ondan məqalə haqda nə fikirləşdiyini soruşa və qısaca müzakirə edə bilərsən. Yaxud insan ədəbiyyatlarımızı məmnuniyyətlə oxuyursa, həmin ay təqdim edilən traktatı, broşüranı və kitabı ona vermək üçün təkrar gələ bilərsən.
4. Müntəzəm jurnal verdiyimiz insanın Müqəddəs Kitabı öyrənmək istəyib-istəməyəcəyini müəyyən etmək üçün vaxtaşırı olaraq nə etməliyik?
4 Gözləmə ki, insan özü səndən öyrənmə keçirməyini xahiş etsin. Özün təşəbbüs göstər. Hətta, ola bilsin, əvvəllər o, Müqəddəs Kitabı öyrənməyə razılıq verməyib, bununla belə vaxtaşırı olaraq «Gözətçi qülləsi» jurnalından «Müqəddəs Yazılara aid suallara cavab» rubrikasını təklif edə və onun bu mövzunu səninlə araşdırmaq istəyib-istəmədiyini müəyyən edə bilərsən. Bəlkə də, sən qapı ağzında öyrənmə başladın. Lakin əgər öyrənmə başlamaq alınmırsa, onun marağını daha da artırmaq üçün jurnal gətirməyə davam edə bilərsən.