Müqəddəs Kitab əsasında söhbət. Allah pis insanları cəhənnəmə göndərir?

YEHOVANIN ŞAHİDLƏRİ qonşuluqda yaşayan insanlarla Müqəddəs Kitab haqqında söhbət etməyi sevirlər. Bəlkə, sizi Müqəddəs Kitabdan hansısa bir mövzu maraqlandırır? Yaxud da siz Yehovanın Şahidlərinin etiqadları və necə ibadət etdikləri barədə bilmək istəyirsiniz? Növbəti dəfə Yehovanın Şahidləri ilə rastlaşanda suallarınızı onlara verməkdən çəkinməyin. Əmin olun ki, onlar böyük məmnuniyyətlə sizin suallarınıza cavab verəcəklər.

Burada Yehovanın Şahidinin qonşuluqda yaşayan bir insanla söhbəti təqdim olunur. Təsəvvür edək ki, Murad adında bir Şahid Əhmədə baş çəkir.

Allah pis insanları cəzalandıracaqmı?

Murad: Xoş gördük, Əhməd!

Əhməd: Xoş gününüz olsun!

Murad: Keçən dəfəki söhbətimizin üzərində düşünmüşəm. Siz maraqlı bir məqama toxunmuşdunuz.

Əhməd: Hansı məqama?

Murad: Demişdiniz ki, Yehovanın Şahidlərinin cəhənnəmə inanmadığını biləndə çox təəccübləndiniz.

Əhməd: Elədir ki var. Düzünü desəm, sizinlə razılaşmaq mənim üçün çətindir.

Murad: Səmimi olaraq fikrinizi dediyiniz üçün çox sağ olun. Başqalarının nə düşündüyünü bilmək mənə maraqlıdır. Cəhənnəmlə bağlı müxtəlif fikirlər olduğundan mən sizin konkret olaraq nəyə inandığınızı bilmək istəyərdim.

Əhməd: Mən həmişə inanmışam ki, pis insanlar öləndə cəhənnəmə düşürlər və əbədi olaraq orada işgəncə çəkirlər.

Murad: Bu gün əksər insanlar sizin kimi düşünür. İcazənizlə sizə bir sual verim: heç həyatda faciə ilə üzləşmisinizmi?

Əhməd: Hə, beş il bundan əvvəl bacım qətlə yetirilib.

Murad: Allah səbir versin! Yəqin, onun üçün çox darıxırsınız?

Əhməd: Həm də necə. Bir gün də olsun yadımdan çıxmır.

Murad: Mən fikir vermişəm ki, cəhənnəmə inananların bəziləri pislərin əlindən təngə gəlmiş insanlar olur. Bu günahsız insanlar istəyirlər ki, pislər əməllərinə görə cavab versinlər.

Əhməd: Ay sağ ol! Mən də istəyirəm ki, bacımın qanına bais olan qatil ailəmizin axıtdığı göz yaşlarına görə öz cəzasını alsın.

Murad: Sizin keçirdiyiniz hisslər tamamilə normaldır. Müqəddəs Kitabda deyilir ki, günahsız insanlar pislərin əlindən əziyyət çəkəndə Allahın qəzəbi tutur və O, onları cəzalandıracağına söz verir. Görün Yeşaya 3:11 ayəsində nə yazılıb: «Pis adamların vay halına! Çünki onlara pislik olunacaq, elədikləri əməlləri qarşılarına çıxacaq». Buna görə də biz əmin ola bilərik ki, Allah onları cəzasız qoymayacaq.

Əhməd: Bəs əgər sizin dediyinizə görə cəhənnəm yoxdursa, bu, necə ola bilər?

Murad: Yaxşı sualdır. Qısaca desək, Allah pisləri əbədi məhvlə cəzalandıracaq. Görün Müqəddəs Kitabın 2 Salonikililərə 1:9 ayəsində nə yazılıb. Bu ayəni oxuya bilərsiniz?

Əhməd: Olar. «Onlar Ağanın önündən rədd edilərək əbədi məhv cəzası çəkəcəklər».

Murad: Gördünüz, Əhməd qardaş, pislər üçün ümid yeri yoxdur, çünki Allah onları əbədi ölümlə cəzalandırır. Allahın vəd etdiyi yerüzü Cənnətdə onların payı olmayacaq.

Əhməd: Ayədə yazılanları başa düşdüm, amma, məncə, bu, ədalətli deyil. Axı hamı ölür. Məgər pislər daha ağır cəzaya layiq deyillər?

Ədalət nə tələb edir?

Murad: Görürəm ki, siz ədaləti sevən insansınız.

Əhməd: Bəli, çox.

Murad: Bu tərifəlayiqdir. Allah bizi ədalət hissi ilə yaradıb. Ədalət məsələsi Onun üçün də çox önəmlidir. Din xadimləri Yaradanın insanları cəhənnəmdə cəzalandırdığını öyrətməklə Onu çox ədalətsiz Allah kimi qələmə verirlər.

Əhməd: Nə demək istəyirsiniz?

Murad: Götürək Adəmlə Həvvanı. Müqəddəs Kitabda onlar barədə yazılanları eşitmiş olarsınız.

Əhməd: Hə, eşitmişəm. Allah Adəmlə Həvvaya bir ağacın meyvəsindən yeməyi qadağan etmişdi, lakin onlar Onun buyuruğuna qarşı çıxdılar.

Murad: Düzdür. Gəlin həmin hadisəyə birlikdə nəzər salaq. Bu, Yaradılış 2:16, 17 ayələrində yazılıb. Orada deyilir: «Rəbb Allah insana əmr edib dedi: “Bağdakı bütün ağacların bəhrəsindən istəyəndə yeyə bilərsən. Ancaq xeyirlə şəri bilmə ağacının meyvəsindən yemə, çünki ondan yeyən gün hökmən öləcəksən”». Deməli, Allahın dediyinə görə, Adəm qadağan edilmiş ağacın meyvəsindən yesəydi, nə baş verəcəkdi?

Əhməd: Öləcəkdi.

Murad: Düzdür. Bir anlıq düşünün: Adəmin bu günahı ucbatından bütün insanlar günahlı doğulurlara. Hətta belə bir vəziyyətdə Allah ona cəhənnəm hökmü barədə nə isə demişdi?

Əhməd: Yox.

Murad: Əgər Adəmlə Həvvanı əbədi işgəncə gözləyirdisə, məgər Allah onları qabaqcadan xəbərdar etməzdi? Bu, ədalətin və məhəbbətin təzahürü olmazdı?

Əhməd: Hər halda.

Murad: İndi isə görək Adəmlə Həvva günah işlədəndən sonra Allah onlara nə dedi. Yaradılış 3:19 ayəsini oxuya bilərsiniz?

Əhməd: «Alın tərinlə çörək yeyəcəksən. Axırda torpağa qayıdacaqsan, çünki oradan götürülmüsən, ona görə ki yerin torpağısan, torpağa da qayıdacaqsan».

Murad: Sağ olun. Allahın sözlərinə əsasən, Adəm öləndən sonra hara getməli idi?

Əhməd: Allah demişdi ki, Adəm torpağa qayıdacaq.

Murad: Tamamilə düzdür. Yəqin, razılaşarsınız ki, harasa qayıtmaq deyəndə bu, onu göstərir ki, insan nə vaxtsa orada olub.

Əhməd: Söz yox.

Murad: Allah Adəmi yaratmazdan əvvəl o, haradasa olub?

Əhməd: Yox, o heç yox idi.

Murad: Düzdür. Fikir verdinizsə, Allahın çıxartdığı hökmdə cəhənnəmin adı belə hallanmır. Əgər Adəm cəhənnəmə gedəcəkdisə, Allahın ona götürüldüyü torpağa qayıdacağını deməsi dürüst olardımı?

Əhməd: Təbii ki, yox.

Məgər Şeytan Allahın dediyini edir?

Murad: Gəlin cəhənnəm təlimi ilə bağlı başqa bir məqama da nəzər yetirək. Bir çox insanların fikrincə, cəhənnəmdə işgəncə edən və cəza verən kimdir?

Əhməd: Şeytan.

Murad: Ancaq Şeytan Allahın ən qatı düşmənidir. Əgər Allah Şeytanın insanlara işgəncə verməsi üçün onları odlu cəhənnəmə göndərirsə, bu, Allahın İblislə əlbir olduğunu göstərmir?

Əhməd: Hmm. Heç bu fikir ağlıma gəlməmişdi.

Murad: Bir nümunə çəkmək istəyərdim. Yəqin, sizin övladınız var.

Əhməd: Hə, bir oğlum var. Bu yaxınlarda 15 yaşı tamam oldu.

Murad: Tutaq ki, o dikbaşlıq etməyə başlayır. Onun etdiyi hərəkətlər ürəyinizi yaralayır. Belə vəziyyətdə nə edərdiniz?

Əhməd: Çalışardım ki, ona düzəliş verim.

Murad: Əminəm ki, düz yola qayıtması üçün dəfələrlə ona kömək edərdiniz.

Əhməd: Əlbəttə!

Murad: Tutalım, bütün cəhdlərinizə baxmayaraq, o, sizin nəsihətlərinizi qulaqardına vurur. Və nəticədə, onu cəzalandırmaqdan başqa əlacınız qalmır.

Əhməd: Hə.

Murad: Amma xəbər tutsanız ki, uşağınıza bu şeyləri öyrədən nanəcib bir insan var, onda necə?

Əhməd: Ona çox qəzəblənərdim.

Murad: Uşağınızı sizə qarşı qaldıran pis, əxlaqsız insanın olduğunu biləndən sonra övladınızı cəzalandırmaq üçün ondan kömək istəyərdinizmi?

Əhməd: Əlbəttə ki, yox. Bu, məntiqsiz olardı.

Murad: Bəs onda Allahın pis insanlara təsir göstərən Şeytan İblisdən elə həmin insanları cəzalandırmağı xahiş etməsi nə dərəcədə ağlabatandır?

Əhməd: Məncə də.

Murad: Bundan əlavə, əgər pislərin cəhənnəmdə işgəncə çəkməsi Allahın iradəsidirsə, məgər Allahın ən qatı düşməni İblis Onun istəyini yerinə yetirər?

Əhməd: Bu haqda heç fikirləşməmişdim.

Yehova bütün pisliklərə son qoyacaq

Murad: Əmin olun ki, Allah islaholunmaz pis insanlara qarşı ölçü götürəcək. Sonda sizə bu fikri təsdiqləyən bir ayə göstərmək istəyərdim. Zəhmət olmasa, Məzmur 37:9 ayəsini oxuyun.

Əhməd: Burada deyilir: «Şər adamlar kəsilib atılacaq, Rəbbə ümid bağlayanlar ölkəni mülk olaraq alacaq».

Murad: Sağ olun. Fikir verdiniz, Allah pislərin başına nə gətirəcək?

Əhməd: Hə, ayədə deyilir ki, Allah onları kəsib atacaq.

Murad: Düzdür. Başqa sözlə, Allah onları həmişəlik məhv edəcək. Rəbbə ümid bağlayan yaxşı insanlar isə yer üzündə əbədi yaşayacaqlar. Amma, yəqin ki, sizin ağlınızda bununla bağlı başqa suallar da yaranır. Məsələn, nəyə görə Allah lap başlanğıcdan insanları pis işlər görməkdən çəkindirmir? Və əgər O, həqiqətən də, pis insanları məhv etmək niyyətindədirsə, nəyə görə indiyədək bunu etməyib?

Əhməd: Maraqlı suallardır.

Murad: Gələn dəfə görüşüb onların cavabını Müqəddəs Kitab əsasında müzakirə edərikb.

Əhməd: Məmnuniyyətlə.

[Haşiyələr]