BOHA DO CARANA ASA DANG MARSOGO NI ROHA BE TU NA ASING?

2 | Unang Ma Balas Dendam

Na Didok Bibel:

“Tikki dibahen sasahalak na jahat tu hamu, unang ma balosson na jahat tu ibana. . . . Molo boi dope, bahen hamu ma sian nasa tolapmuna lao mardame tu sude halak. . . . Ai tarsurat do ‘Au do na marhak mambalos. Balosokku do hajahaton ni nasida,’ ninna Jahowa.”—ROM 12:17-19.

Lapatanna:

Memang pasti muruk do hita molo adong na mambahen na jahat tu hita. Alai dang lomo roha ni Debata molo gabe balas dendam hita. Jala dijujui Ibana do hita asa sabar paimahon Ibana na bertindak.—Psalmen 37:7, 10.

Na Boi Diulahon Hamu:

Molo balas dendam hamu, boi do gabe menular sogo ni rohamuna i tu na asing. Alani i molo adong halak mambahen haccit rohamuna manang mambahen na jahat tu hamu, unang ma balas dendam. Berusaha ma hamu asa tetap tenang jala marroha na dame. Sipata, tumagon do pittor dimaafhon hamu kesalahanna. (Poda 19:11) Alai molo serius do masalahna, boi do i dilaporhon hamu tu kalangan berwenang. Misalna molo adong kasus kekerasan manang kejahatan, boi do hamu melaporhon i tu polisi manang tu kalangan berwenang na asing.

Hita do na susa molo balas dendam

Boha molo dang marnasae masalahmuna nang pe nga dibahen hamu cara na denggan lao pasaehon i? Unang ma balas dendam. Alana, gabe lam parah do situasina molo balas dendam hamu. Jadi bolokkon ma sogo ni rohamuna, asa dang marsambung-sambung i tu na asing. Pos ma rohamuna, cara ni Jahowa do na terbaik lao pasaehon masalah i. Alani i ma didok Bibel, “Ibana ma pangasahon, urupanna do ho.”—Psalmen 37:3-5.

Kisah Nyata—SI ADRIÁN

Mambolokkon Perasaan Naeng Balas Dendam

Tikki remaja, nungnga gabe pareman si Adrián. Sering do ibana marbadai lao balas dendam. Didok ibana, “Sering do hami marsitembakan tikki marbada. Piga-piga hali sappe marmudari do dagingku jala naeng mate do au di dalan.”

Tikki marumur 16 taon si Adrián, mulai ma ibana marsiajar Bibel. Didok ibana, “Dung marsiajar Bibel au huboto ma, ikkon hupauba do pangalahokku saleleng on.” Ikkon dibolokkon ibana do sogo ni rohana jala unang be mangulahon kekerasan. Tarlumobi hona do tu rohana ayat di Rom 12:17-19 na mandok dang boi balas dendam. Didok ibana, “Pos do rohakku na lao dipamate Jahowa do sude parjahat di tikkina. Alani i, dang olo be au mangulahon na jahat.”

Di sada tikki, ro ma akka alona najolo naeng mamukkuli ibana. Dipukkul bos ni pareman i ma ibana sian pudi jala didok, “Alo ma au!” Didok si Adrián, “Sasittongna naeng hualo do nasida.” Alai martangiang ma ibana tu Jahowa asa boi mangorom dirina. Dung i lao ma ibana sian i.

Didok si Adrián muse, “Marsogotna i, hujuppangi ma bos ni pareman i. Muruk hian do rohakku nian. Alai martangiang ma au tu Jahowa asa dang muruk. Songgot do rohakku tikki didok bos ni pareman i, ‘Minta maaf ma au da. Sasittongna naeng do rohakku mangihutton ho. Lomo do rohakku naeng marsiajar Bibel.’ Uttung ma dang jadi au muruk. Mandok mauliate do au tu Jahowa jala huurupi ma bos ni pareman i marsiajar Bibel.”