BOHA DO CARANA ASA DANG MARSOGO NI ROHA BE TU NA ASING?

3 | Bolokkon Ma Sogo Ni Roha Sian Pikkiranmuna

Na Didok Bibel:

“Muba ma hamu marhite paubahon pikkiranmuna, asa takkas diboto hamu lomo ni roha ni Debata na denggan, na sittong, jala na palasson rohana.”—ROM 12:2.

Lapatanna:

Manang aha pe na tapikkirhon, boi do mambahen las roha ni Debata manang mambahen Ibana kecewa. (Jeremia 17:10) Memang ikkon tapadao do diritta sian akka hata manang pambahenan na boi mambahen haccit roha ni halak. Alai dang sae holan i. Alana, sian roha dohot pikkiran do dimulai sogo ni roha i. Jadi, molo nga mulai adong sogo ni roha di bagasan pikkiranta, pittor tabolokkon ma i. Molo taulahon i, boi ma hita “paubahon” pikkiranta jala dang menular be sogo ni rohatta i tu halak na asing.

Na Boi Diulahon Hamu:

Pareso hamu ma songon dia perasaan dohot pandanganmuna tu halak na asing, tarlumobi tu halak na sian suku manang bangso na asing. Sukkun ma tu dirimuna: ‘Boha do penilaianku tu nasida? Memang takkas do hutanda nasida? Manang, na berprasangka do au tu nasida?’ Asing ni i, unang ma tajaha manang tatonton film, sosial media, manang hiburan na patuduhon sogo ni roha dohot kekerasan.

Boi do Hata ni Debata mangurupi hita mambolokkon sogo ni roha sian pikkiran dohot rohatta

Memang sipata maol do lao mamareso diritta. Alai boi do Hata ni Debata “patuduhon na adong di roha dohot na adong di pikkiranta”. (Heber 4:12) Jadi taparsiajari ma isi ni Bibel. Bandingkon ma na taparsiajari tu cara marpikkirta saleleng on. Jala berusaha ma hamu asa boi sadalan cara marpikkirmuna tu Hata ni Debata. Boi do Hata ni Debata mangurupi hita mambolokkon sogo ni roha, nang pe ‘naung togu i’ marurat di roha dohot di pikkiranta.—2 Korint 10:4, 5.

Kisah Nyata—SI STEPHEN

Berhasil do Ibana Paubahon Cara Marpikkirna

Hea do si Stephen dohot keluargana gabe korban ketidakadilan sian halak na berkulit putih. Alani i, gabe bergabung ma ibana tu sada kelompok politik na jotjot marbadai lao mambela hak rakyat. Di sada tikki dohot ma ibana mangulahon kekerasan. Didok ibana, “Lao ma au dohot akka donganku tu bioskop. Ditonton hami ma film taringot halak Afrika na gabe hatoban di Amerika Serikat. Gabe emosi ma hami alani film i. Hubalbali hami ma sada doli-doli berkulit putih di bioskop i. Dung i lao ma hami tu huta ni halak na berkulit putih lao mangalului halak na boi dibalbali.”

Alai muba ma cara marpikkir ni si Stephen dung marsiajar Bibel ibana dohot Saksi Jahowa. Didok ibana, “Nga sering huida dibahen na so adil tu halak na berkulit hitam. Alai las do rohakku mangida pambahenan ni Saksi Jahowa tu donganna. Contohna, adong sahalak Saksi na berkulit putih naeng lao tu luar negeri. Dititippon ibana do akka gellengna tu sada keluarga Saksi na berkulit hitam. Adong muse sada keluarga Saksi na berkulit putih na olo manjalo sada dakdanak na berkulit hitam asa tinggal di jabuna.” Gabe pos ma roha ni si Stephen, Saksi Jahowa do na mangulahon hata ni Jesus na mandok ikkon marsihaholongan do halak Kristen.—Johannes 13:35.

Aha do na mambahen si Stephen boi mambolokkon sogo ni rohana? Godang do pengaruhna tu ibana dung dirimangi ibana ayat di Rom 12:2. Didok ibana, “Dung marsiajar Bibel au gabe sadar ma au, porlu do hape hupauba pikkiranku. Jala pos do rohakku, on ma na dumenggan na boi huulahon saleleng ni ngolukku.” Nungnga lobi sian 40 taon si Stephen mambolokkon sogo ni rohana i. Jala marlas ni roha do ibana saonari.