BOHA DO CARANA ASA DANG MARSOGO NI ROHA BE TU NA ASING?

1 | Unang Ma Tabeda-bedahon Halak

Na Didok Bibel:

“Na so marimbar jolma di jolo ni Debata. Lomo do roha ni Debata mangida ganup halak na makkabiari Ibana jala na mangulahon na sittong, dang soal sian bangso na dia pe nasida.”—ULAON NI APOSTEL 10:34, 35.

Lapatanna:

Rohatta do na diida Debata Jahowa,a dang margatta, sukutta, warna kulitta, manang bangsotta. Bibel mandok, “Rupa do na niida ni jolma, alai anggo Jahowa roha do na niidana.”—1 Samuel 16:7.

Na Boi Diulahon Hamu:

Nang pe dang boi taida na di bagasan roha ni halak, alai boi do hita maniru Debata na so mambeda-bedahon jolma. Alani i, berusaha ma hita mangida akka na denggan sian ganup halak. Molo negatif do pandanganmuna saleleng on tu suku na asing manang bangso na asing, martangiang ma tu Debata asa diurupi hamu mambolokkon pandangan sisongon i. (Psalmen 139:23, 24) Molo sian ias ni roha do hamu manangiakkon i tu Jahowa, pasti ditangihon Ibana do tangiangmuna jala diurupi do hamu.—1 Petrus 3:12.

a Goar ni Debata do Jahowa.—Psalmen 83:18.

“Saleleng on dang hea dope au rap hundul dohot halak na berkulit putih . . . Saonari nungnga godang be dongan sahaporseakku na sian marragam bangso.”—SI TITUS

Kisah Nyata—SI TITUS

Mambolokkon Sogo ni Roha

Sahalak anggota geng na garang do si Titus, na berusaha mangalo peraturan ni pamaretta na mambedahon halak na berkulit hitam dohot na berkulit putih. Didok ibana, “Lao do hami tu akka tempat na so manjalo halak na berkulit hitam, songon tu hotel dohot tu bar holan naeng mambahen gaor.” Diakkui si Titus do, diulahon ibana pe i ala sogo do rohana tu halak na berkulit putih. Didok ibana ma muse, “Molo marbada au tu sasahalak, tu bawa manang tu borua pittor au do na parjolo mamukkul.”

Alai dung marsiajar Bibel si Titus dohot Saksi Jahowa, mulai ma ibana muba. Godang do pengaruhna dung dijaha ibana ayat ni Bibel. Tarlumobi lomo do rohana manjaha janji ni Debata na mandok, “Dang adong be hamatean nang arsak ni roha, nang angguk-angguk, nang na haccit, dang disi be.”—Pangungkapon 21:3, 4.

Mulana maol do si Titus mambolokkon sogo ni rohana. Didok ibana, “Maol hian do huhilala paubahon cara marpikkirhu dohot pangalahokku.” Alai gabe sadar do ibana dung manjaha Ulaon ni Apostel 10:34, 35 na mandok dang dibeda-bedahon Debata jolma.

Aha ma hasilna? Didok si Titus, “Dung huida na marsihaholongan Saksi Jahowa dang soal aha sukuna manang warna kulitna, gabe pos ma rohakku Saksi Jahowa do agama na sittong. Contohna sebelum tardidi au, adong ma Saksi Jahowa na berkulit putih mangundang au mangan tu jabuna. Hira na marnipi do huhilala. Saleleng on dang hea dope au rap hundul dohot halak na berkulit putih, apalagi ma rap mangan di jabuna. Saonari nungnga godang be dongan sahaporseakku na sian marragam bangso.”